လှကျော်ဇော ● ပိုးလမ်းမသစ်စီမံကိန်းကြီးကပေးတဲ့ သင်ခန်းစာများ - အပိုင်း (၈)

လှကျော်ဇော ● ပိုးလမ်းမသစ်စီမံကိန်းကြီးကပေးတဲ့ သင်ခန်းစာများ - အပိုင်း (၈) 

(မိုးမခ) ဇူလိုင် ၁၆၊ ၂၀၁၉

● ခေတ်သစ် “ရေရှည်စစ်ပွဲ”
အာဖရိက လိုင်ဘေးရီးယားနိုင်ငံ သမ္မတ ဂျွန်ဆင် တရုတ်ပြည်ကိုလာလည်စဉ် တရုတ်ဖွံ့ဖြိုးတိုးတက်ရေးပုံစံရဲ့ ပြရုဒ်ဖြစ်တဲ့ ကွမ်တုန်းပြည်နယ်က ရှင်စင့်အထူးကုန်သွယ်ရေးဇုံကိုလေ့လာအပြီး ဒီလိုပြောခဲ့ဘူးပါတယ်။

... တရုတ်ပြည်ရဲ့ဖွံ့ဖြိုးတိုးတက်မှုပုံစံကို ကျွန်မတို့ အကုန်တုပ ပြုလုပ်နိုင်ပါတယ်။ တခုပဲ။ တရုတ်လူမျိုးတွေရဲ့ဇွဲလုံ့လနဲ့ အပင် ပန်း အဆင်းရဲခံစိတ်ဓာတ်နဲ့ လုပ်ဟန်ကိုတော့ ဘယ်လိုမှမီနိုင်မှာမဟုတ်ပါဘူး ... တဲ့။

ဟုတ်ပါတယ်။ တရုတ်တွေရဲ့ ဇွဲနဲ့ အလုပ်ကြိုးစားမှုဟာ နာမည်ကျော်ပါတယ်။ ဘာကြောင့်ပါလဲ။ သမိုင်းနောက်ခံ အကြောင်း ရင်းတွေရှိပါတယ်။

၂၀၁၉ ဇွန် ၁၂ ရက်နေ့ထုတ် China Daily အင်္ဂလိပ်ဘာသာနဲ့ထုတ်ဝေတဲ့သတင်းစာက ဆောင်းပါးတစောင်မှာ အဖြေ သွားတွေ့ပါတယ်။

တရုတ်ပြည် ရှန်စီးပြည်နယ် ယင်အန်းကခေါင်းဆောင်မှုသင်တန်းတက်နေတဲ့သူတဦး (ဝမ်ဟောက်) ရေးထားတဲ့ဆောင်းပါးပါ။
(History can repeat itself in a constructive way in trade dispute .Wang Hao   China Daily 12-6-2019)

ယင်အန်းဆိုတာက ၁၉၃၆ ခုနှစ်ကစလို့ တရုတ်ကွန်မြူနစ်ပါတီရဲ့ဗဟိုရုံးစိုက်တဲ့ဒေသပါ။ အဲဒီကနေ ဥက္ကဌမော်စီတုန်းက တရုတ်တော်လှန်ရေးကို လမ်းညွှန်မှုအမျိုးမျိုးပေးခဲ့တာပါ။ နိုင်ငံရေးအရ သင်တန်းတွေလည်းပေးခဲ့ပါတယ်။ ဂျပန်ခုခံရေး တက္ကသိုလ်ကိုဖွင့်လှစ်ပြီး အနယ်နယ်အရပ်ရပ်က မြေအောက်ပါတီဝင်တွေ တိုင်းရင်းသားဒေသတွေက တိုင်းရင်းသားခေါင်း ဆောင်တွေကို သင်ကြားလေ့ကျင့်ပေးခဲ့ပါတယ်။၁၉၄၉ ခုနှစ် တရုတ်တော်လှန်ရေး အောင်ပွဲခံချိန်အထိပါပဲ။

အခုလည်း တရုတ်ကွန်မြူနစ်ပါတီက အဆင့်အသီးသီးက ခေါင်းဆောင်များကိုလေ့ကျင့်ပေးတဲ့သင်တန်းများကို ယင်အန်းက သမိုင်း ဝင်နေရာများမှာ (ဥပမာ မော်ရဲ့ကျော်ကြားလှတဲ့ မိန့်ခွန်းများ သင်တန်းပို့ချချက်စာတမ်းများရေးသားခဲ့တဲ့ ရွှံ့လိုဏ်ဂူ အိမ်အတွင်း) ပို့ချပေးတာတွေ လုပ်လေ့ရှိပါတယ်။ အဲဒီသင်တန်းတက်နေတဲ့ သင်တန်းသားတယောက်က မော်ရဲ့ ရေရှည် စစ် စာတမ်းပို့ချချက်အကြောင်းရေးထားတဲ့ ဆောင်းပါးပါ။ အခုခေတ် အခြေအနေနဲ့ ပြန်လည်သုံးသပ်ထားတဲ့ပို့ချချက်ပါ။

၁၉၃၇ - ၇ - ၇ ရက်နေ့ ပေကျင်း လူကိုးချောင်တံတားတိုက်ပွဲကစတင်ခဲ့တဲ့ ဂျပန်ရဲ့တရုတ်ပြည်ကျူးကျော်ရေးစစ်ပွဲဟာ (၁၀) လကျော်လေးအတွင်း တရုတ်ပြည် အရှေ့ပိုင်းနေရာအတော်များများကို ဂျပန်က သိမ်းပိုက်နိုင်လိုက်ပါတယ်။ ဒီတော့ ဒီလောက်အင်အားတောင့်တင်းတဲ့ ဂျပန်ကို နိုင်အောင်တိုက်နိုင်ပါ့မလား။ တရုတ်ပြည်ကြီး ကျဆုံးသွားတော့မလားဆိုတဲ့ အတွေးအခေါ်တွေ တရုတ်ပြည်သူတွေအကြား ပေါ်ပေါက်လာနေပါတယ်။

ဒီအတွေးအခေါ်အယူအဆတွေကို ရှင်းလင်းပစ်ရေးအတွက်ရည်ရွယ်ပြီး မော်က ၁၉၃၈ ခုနှစ်မှာ ရေရှည်စစ်ဆိုတဲ့ဆောင်းပါး ကိုရေးသားခဲ့တာပါ။ ဂျပန်ခုခံရေးစစ်ပွဲကို ဘယ်လိုကြည့်မြင်ရမယ်။ ဘယ်လို အတွေးအခေါ်တွေပြင်ဆင်ရမယ်။ ပြည်သူ လူထုတရပ်လုံးကို ဘယ်လိုစည်းရုံးရမယ်။  စတာစတာတွေကို အကုန်အသေးစိတ်ရှင်းပြထားပါတယ်။

မော်က ... တရုတ်ပြည်ဟာ ဂျပန်နယ်ချဲ့သမားတွေကို အနိုင်တိုက်နိုင်ရေးအတွက် အချက်အလက် ၃ ခုရှိရမယ်တဲ့။

၁။ တရုတ်ပြည်မှာ ဂျပန်ခုခံရေး ညီညွတ်ရေးတပ်ပေါင်းစုကြီးကို အကျယ်အပြန့် တည်ဆောက်ရမယ်။ ဒါဟာ အဓိက။
၂။ နိုင်ငံတကာက ဂျပန်ခုခံရေးအင်အားစုများနဲ့ တပ်ပေါင်းစုဖွဲ့ရမယ်။
၃။ ဂျပန်ပြည်သူများနဲ့ ဂျပန်ကိုလိုနီများရှိပြည်သူများကိုပါ တော်လှန်အုံကြွလာရေးအတွက် စည်းရုံးနိုင်ရမယ်တဲ့။
မော်ရဲ့ဆောင်းပါးဟာ (အဲဒီအချိန်က တရုတ်ကွန်မြူနစ်များကို ရန်သူအဖြစ်တိုက်နေတဲ့) ကူမင်တန်ပါတီနဲ့ တပ်ကလူများ အပါ တရုတ်ပြည်သူအားလုံးကို စိတ်ဓာတ်အင်အားသစ်တွေ အမြင်သစ်တွေ သွင်းပေးလိုက်နိုင်ခဲ့ပါတယ်။ ဒါကြောင့်ပဲ နောင် (၇) နှစ်အကြာ ၁၉၄၅ ခုနှစ်မှာ ဂျပန်ကို အောင်နိုင်လိုက်ပါတယ်။

ဒီနေရာမှာ မော်အမှူးပြုတဲ့ တရုတ်ကွန်မြူနစ်များဟာ မိမိထက်အဆ မတန်အင်အားကြီးတဲ့ ရန်သူနဲ့ သေရေး-ရှင်ရေး အပြတ်အသတ် တိုက်ပွဲဆင်ရာမှာ အခြေခံအကျိုးစီးပွားတူညီတဲ့ လူ့အလွှာအမျိုးမျိုး အကြား တပ်ပေါင်းစုကို ဘယ်လောက် ရင်ကျယ်ကျယ်နဲ့ ဇွဲခတ်ပြီး တည်ဆောက်နိုင်ခဲ့တယ်ဆိုတဲ့အချက်ဟာ အဓိကကျပါတယ်။

တကယ်တော့ တရုတ်တွေဟာ ဂျပန်ကိုမျိုးဆက်နဲ့ချီပြီး တိုက်ရလိမ့်မယ်လို့ထင်မြင်ပြီး အဲဒီအတွက်လည်း ဘက်စုံက ပြင် ဆင်ထားတာပါ။

ဥပမာ ချုံကင်းမြို့အနောက်ဘက်ပိုင်း တောင်တန်းဒေသတနေရာမှာ လိုဏ်ခေါင်းတူးပြီး မိဖမဲ့ ကလေးကျောင်းတကျောင်းကို ဂျပန်ခုခံရေးကာလအတွင်း ဖွင့်ထားဖူးပါတယ်။ ဂျပန်တော်လှန်ရေးအတွင်းကျဆုံးသွားကြတဲ့ စစ်သည်တော်တွေရဲ့ ကျန်ရစ် တဲ့ကလေးတွေအပြင် မြို့တွေ ရွာတွေမှာ လှည့်လည်တောင်းရမ်းစားသောက်နေရတဲ့ ကလေးတွေအကုန်စုပြီး စာတွေသင် ပေးကြပါတယ်။ သမရိုးကျ ဘာသာရပ်များအပြင် နိုင်ငံရေးအရ မျိုးချစ်စိတ်ထက်သန်ရေးအတွက်ရော ကိုယ်ခန္ဓာ ကြံ့ခိုင် ဖွံ့ဖြိုးရေးများအတွက်ပါ စနစ်တကျ အစီအစဉ်ရှိရှိ သင်ကြားပို့ချပေးနေတာပါ။

အဲဒီကာလက တရုတ်ကွန်မြူနစ်ပါတီနဲ့ ကူမင်တန် ပါတီတပ်ပေါင်းစုဖွဲ့ထားချိန်ဖြစ်လို့ ချုံကင်းမှာ တရုတ်ကွန်မြူနစ်ပါတီက ဆက်သွယ်ရေးရုံးဖွင့်ထားပြီး ချောင်အင်လေးက ရုံးအုပ်အဖြစ် တာဝန်ယူနေချိန်ပါ။ ဒါ့ကြောင့် ဒီကလေးကျောင်းကို အဓိက အားဖြင့် ကွန်မြူနစ်တွေက ဦးစီးပြီးလုပ်နေပေမယ့် ကျောင်းဥက္ကဌကို မဒမ်ချန်ကေရှိတ် (ဆွန့်မေလင်) ကို တင်ပေးထားပါ တယ်။ ဒါမှ နိုင်ငံတကာက အကူအညီရနိုင်တာပါ။

ဒါဟာ ဂျပန်ခုခံရေးစစ်ကို မျိုးဆက်ချီ လုပ်နိုင်ဖို့ပြင်ဆင်ခဲ့တာပါ။

တရုတ်တွေဟာ မိမိတိုင်းပြည်က မိမိလူမျိုးများသာမက ဂျပန်ပြည်သူတွေကိုပါ ရေရှည်အမြင်နဲ့ စနစ်တကျစည်းရုံးခဲ့တာပါ။တရုတ်ကွန်မြူနစ်တွေက အခြေခံဂျပန်ပြည်သူတွေနဲ့ ဂျပန်စစ်ဝါဒီများကိုခွဲခြားကြည့်ဖို့ တရုတ်ပြည်သူတွေကို (ဂျပန်တပ် တွေကို အပြင်းအထန်တိုက်နေရတဲ့ တရုတ်စစ်သားများအပါ) ပညာကောင်းကောင်းပေးထားနိုင်ခဲ့ပါတယ်။

တရုတ်အရှေ့မြောက်အရပ်က ဂျပန်ခုခံရေးစစ်ပွဲအတွင်း ဓာတ်ပုံဟောင်းများအကြား လူပြောများတဲ့ ထင်ရှားတဲ့ပုံတပုံရှိပါ တယ်။ တရုတ်တပ်သားတဦး ထမ်းပိုးထမ်းထားတဲ့ပုံပါ။ ထမ်းပိုးတဘက်မှာ အိုးခွက် စတဲ့ မီးဖိုချောင်သုံး ပစ္စည်းများဖြစ်ပြီး နောက်တဘက်မှာတော့ ၂ နှစ် ၃ နှစ်ရွယ် ကလေးလေးနှစ်ဦး  ဖြစ်ပါတယ်။ ဂျပန်စစ်စခန်းတခု ဝင်တိုက်အပြီး ဖမ်းဆီးမိခဲ့တဲ့ ဂျပန်ကလေးငယ် နှစ်ဦးပါ။ တရုတ်တပ်က ပြောက်ကျားတပ်ဖြစ်တာကြောင့် နေရာအတည်တကျမရှိပဲ လှည့်လယ်သွားလာ နေရတာကြောင့် အဲဒီကလေးလေးတွေကို တပ်သွားလေရာ ခေါ်သွားနေရတာ၊ နောင်စစ်ပွဲတွေပီးမှ ဂျပန်ပြန်ပို့ရပါတယ်။ ထို့ အတူ တရုတ်အရပ်သားတွေကလည်း ကျန်နေရစ်တဲ့ မိဖမဲ့ ဂျပန်ကလေးတွေကို ကောင်းကောင်းမွေးစားထားပါတယ်။

ဒီကလေးတွေအားလုံး ဂျပန်ပြည်ပြန်ရောက်ပြီး လူကြီးတွေဖြစ်လာတဲ့အခါ ဂျပန် တရုတ်ချစ်ကြည်ရေးအသင်းတွေတည် ထောင်ကြပြီး ဂျပန်ပြည်အနှံ့အပြား လှည့်လည်သွားရောက်ကြပြီး ဂျပန်စစ်တပ်က တရုတ်ပြည်သူတွေအပေါ် ဘယ်လိုရက် စက်ခဲ့တာ တရုတ်ပြည်သူတွေကတော့ သူတို့ဂျပန်ကလေးတွေအပေါ် (အငတ်ခံပြီး) ဘယ်လိုပြုစုစောင့်ရှောက်ခဲ့တာ စတာတွေဟောပြောပြီး ဂျပန်ပြည်သူနဲ့ တရုတ်ပြည်သူအကြား ချစ်ကြည်ရင်းနှီးလာအောင်ကြိုးစားလုပ်ဆောင်နေတာတွေ တွေ့နေရပါတယ်။ ဂျပန်စစ်ဝါဒကိုပါ ဆန့်ကျင်တာဖြစ်လေတော့ ဂျပန်က လက်ယာဂိုဏ်းရဲ့ရန်မူတာ အမျိုးမျိုးကို အာခံပြီးလုပ်ဆောင်ကြတာပါ။(ဒီအဖွဲ့များရဲ့ကျေးဇူးကြောင့် ဂျပန်လူမှုရေးအဖွဲ့အသီးသီးရဲ့ ကူညီမှုတွေကို တရုတ်ပြည်ကရခဲ့ပါ တယ်။)

ဒါက ဥပမာလေးတရပ်ပါ။ တခြားစိတ်ဝင်စားဖွယ် လေ့လာဖွယ်အကြောင်းအရာတွေလည်း အများကြီးရှိပါသေးတယ်။ နောင်ကြုံကြိုက်မှရေးပါဦးမယ်။

တရုတ်တွေဟာ ဒီလိုအတိတ်က ဂျပန်ခုခံရေးစစ်ပွဲ အနိုင်တိုက်နိုင်ခဲ့တဲ့သင်ခန်းစာများကို အနာဂါတ်အတွက် လမ်းညွှန်ချက် များအဖြစ် သဘောထားကြပါတယ်။ အထူးသဖြင့် ယခုအခါသမယမှာ ပေါ်ပေါက်လာတဲ့ တရုတ်-အမေရိကန်ကုန်သွယ်ရေး ပဋိပက္ခ (စစ်ဆိုတဲ့စကားတော့ မသုံးချင်ဘူးလို့ဆောင်းပါးရေးသူက ဆိုထားပါတယ်။) မှာ ဘယ်လိုဆက်လုပ်ဆောင်နိုင်မလဲ စဉ်းစားကြတဲ့အခါ သမိုင်းအရ တချို့တူညီတဲ့ နည်းလမ်းတွေတွေ့လာနေပါတယ်။

တရုတ်တွေအနေနဲ့ ၁၉၄၉ လွတ်မြောက်ရေးရအပြီး တိုင်းပြည်တည်ဆောက်ရေးလမ်းတလျှောက် ပြင်ပဖိအားအမျိုးမျိုးကို ရင်ဆိုင်ခဲ့ရရာမှာ တရုတ်ပြည်သူတွေဟာ ဘယ်ဖိအားကိုမှ အလျှော့ပေးခဲ့ခြင်းမရှိပါဘူး။ ပြင်ပစိန်ခေါ်မှုအမျိုးမျိုးကို တရုတ် ပြည်သူတွေဟာ စည်းလုံးညီညွှတ်စွာနဲ့ ကျော်လွှားနိုင်ခဲ့တာချည်းပါပဲ။ အခုအချိန်မှာလည်း တရုတ်ပြည်ရဲ့ဖွံ့ဖြိုးတိုးတက်မှုအရှိန်အဟုန်မြင့်လာလေ ပြင်ပစိန်ခေါ်မှုနဲ့ ဖိအားပိုတိုးလာလေဖြစ်လာတဲ့အခါ တရုတ်ပြည်သူတွေအနေနဲ့ သမိုင်းမှာ မကြုံ ဘူးတဲ့ စည်းလုံးညီညွတ်မှုကို ရလိုက်ပါတော့တယ်။

ဒီလို နိုင်ငံရေးအသိရေချိန်မြင့်လာမှုကို အနောက်တိုင်းသတင်းမီဒီယာများက “အမျိုးသားရေးစိတ်ဓာတ်” လို့ကင်ပွန်းတပ်ပါ တယ်။ အမေရိကန်ခေါင်းဆောင်များရဲ့ ဘဝင်မြင့်မှုနဲ့ မောက်မာမှုကို တခြားဘယ်အရာတွေကများ ခုခံဆန့်ကျင်နိုင်ပါ့မလဲ လို့ ဆောင်းပါးရေးသူက မေးထားပါတယ်။

တကယ်လည်း တရုတ်-အမေရိကန်ကုန်သွယ်ရေးဟာ နှစ်ပေါင်း (၄၀) အတွင်း အနိမ့်ဆုံးကာလကိုရောက်နေပါတယ်။

တရုတ်အနေနဲ့ ဒီလိုမျိုးအချိန်အခါ အခြေအနေအောက်မှာ မိမိရဲ့ဖွံ့ဖြိုးတိုးတကိမှုအရှိန်ကို ထိမ်းထားနိုင်ဖို့ ဂလိုဘယ်လာဇေး ရှင်းကိုရော လွတ်လပ်စွာကုန်သွယ်ခွင့်ကိုရော ကာကွယ်ဖို့လိုအပ်လာပါတယ်။ ဒါဟာ တရုတ်တနိုင်ငံတည်းက မလုပ်ဆောင် နိုင်လေတော့ မိမိတို့နဲ့အတူ ပူးတွဲလုပ်ဆောင်နိုင်မယ့် မိတ်ဆွေများကို  (အာရှ အာဖရိက ဥရောပနိုင်ငံများ) ရှာရ ပါ တော့တယ်။ ဒီနည်းနဲ့သာလျှင် တရုတ်အနေနဲ့ ကုန်သွယ်ရေးစစ်ပွဲဂယက်ကြောင့်ပေါ်ပေါက်လာတဲ့ ထိခိုက်မှုတွေကို ခံနိုင်မှာ ပါ။

အခွန်အကောက်များ၊ ကုန်သွယ်ရေးလိုငွေပြမှု၊ ဉာဏပစ္စည်းပိုင်ဆိုင်မှု၊ စတာစတာတွေဟာ အမေရိကန်အနေနဲ့ တရုတ်ရဲ့ ဖွံ့ဖြိုးတိုးတက်မှုအရှိန်မြင့်လာမှုကို ဟန့်တားဖို့သုံးတဲ့ အကြောင်းပြချက်တွေသာဖြစ်ပါတယ်။

တရုတ်တွေအနေနဲ့ကလည်း ခေတ်မီတိုးတက်တဲ့နိုင်ငံတော်ကြီး တည်ဆောက်ရေးစီမံကိန်းရဲ့ လမ်းခရီး တဝက်မှာပဲရှိပါသေး တယ်။တရုတ် ရဲ့တဦးချင်း (GDP) ဂျီ-ဒီ-ပီဟာ အမေရိကန်ရဲ့ ခြောက်ပုံ တပုံသာရှိပါတယ်။

အမေရိကန်က တရုတ်ရဲ့ မြင့်မားလာမှု (Rise) ကို အမေရိကန် ပြန်လည်ကြီးမြတ်လာရေး စီမံကိန်းရဲ့အတားအဆီးလို့ ဆက်လက်သဘောထားနေရင်တော့ ကုန်သွယ်ရေးစစ်ပွဲဟာ မြန်မြန်ပြီးသွားမှာမဟုတ်ပဲ၊ ရှည်ကြာနိုင်ပါတယ်။

ယင်အန်းဟာ တရုတ်ပြည်သစ်ရဲ့ အခြေခံအုတ် မြစ်ချခဲ့တဲ့အရပ်ပါ။ မော်စီတုန်းအတွေးအခေါ် မြစ်ဖျားခံရာ အရပ်လည်းဖြစ်ပါ တယ်။ ဒါ့အပြင် ဒီနေရာကပဲ တရုတ်တွေရဲ့ အစဉ်အလာ ဉာဏ်ပညာအမြော်အမြင်နဲ့ ဇွဲလုံ့လ ခိုင်ခိုင်မာမာနဲ့ အပင်ပန်းအ ဆင်းရဲခံကြိုးပန်းအားထုတ်မှု မျိုးရိုးဗီဇ (DNA) တွေကို တမျိုးဆက်ပြီး တမျိုးဆက် အဆင့်ဆင့်လက်ဆင့်ကမ်းပေးခဲ့ပါတယ်။ ဒီစိတ်ဓာတ်အခြေခံနဲ့ပဲ ကမ္ဘာလူဦးရေအများဆုံးနိုင်ငံကြီးကို စီးပွားရေအရ ဒုတိယအင်အားကြီးနိုင်ငံဖြစ်အောင်ပြောင်းလဲ ပစ်နိုင်ခဲ့ပါတယ်။

ဒါ့ကြောင့် ယင်အန်းကပေးတဲ့သင်ခန်းစာအရ  တရုတ်ပြည်ဟာ ကုန်သွယ်ရေးစစ်ပွဲမှာ ရှုံးမှာမဟုတ်ဘူး။ ရေရှည်စစ်ကို ဆင် နွှဲရမှာဖြစ်တယ်။ ကုန်သွယ်စစ်မှာ ဘယ်သူမှနိုင်မှာမဟုတ်တဲ့အတွက် အကျိုးကြောင်းဆီလျှော်တဲ့ တရားမျှတတဲ့ ဖြေရှင်း နည်းများပေါ်ပေါက်လာအောင် နည်းလမ်းပေါင်းစုံ နည်းဗျူဟာအမျိုးမျိုး ကျင့်သုံးရမှာပါလို့လည်း ရေးထားပါတယ်။

ဒါ့ကြောင့် တရုတ်တွေဟာ မိမိထက်လက်နက်အင်အားအဆမတန်သာတဲ့ ဂျပန်ကို တပ်ပေါင်းစုအမျိုးမျိုးဖွဲ့ပြီး အနိုင်တိုက်ခဲ့ တဲ့ အတွေ့အကြုံအရ အခု ဒီကုန်သွယ်ရေးစစ်ပွဲမှာလည်း အောင်နိုင်ရေးအတွက် ဘက်စုံကြိုးစားလုပ်ဆောင်နေရာမှာ ဒီပိုး လမ်းမသစ်စီမံကိန်းဟာလည်း နည်းနာတရပ်အဖြစ် ပါဝင်နေဟန်ရှိပါတယ်။

အခုအခါ ဒီပိုးလမ်းမသစ်စီမံကိန်းကြီးအတွင်းက စီမံကိန်းအများအပြား အောင်မြင်မှုတွေရလာနေတဲ့အတွက်  နိုင်ငံအတော် များများက ထောက်ခံလာရုံမက ဒီစီမံကိန်းကြီးကိုအထောက်အကူပြုဖို့ဖွဲ့စည်းထားတဲ့  အာရှအခြေခံအဆောက်အအုံ ရင်း နှီးမြှုပ်နှံမှုဘဏ် (AIIB) မှာလည်း ပါဝင်လာတဲ့ နိုင်ငံတွေတိုးများလာနေပါတယ်။

ဂျပန်ကိုတိုက်စဉ်က အပြတ်အသတ်အနိုင်ရရေး (Zero sum game) ကို တရုတ်ကဦးတည်ခဲ့ပေမယ့် အခု ဒီကုန်သွယ် ရေးတိုက်ပွဲအပါ ပဋိပက္ခပြသာနာအမျိုးမျိုးကိုတော့ အားလုံးမျှတ သင့်တင့်တဲ့အဖြေ (တနည်း) အနာဂါတ်တွေကို မျှဝေထား တဲ့လူ့အဖွဲ့အစည် းတည်ဆောက်ရေးဆိုတဲ့မူနဲ့ ဖြေရှင်းရေးကို တင်ပြနေပါတယ်။

မော်က ပြောခဲ့တဲ့စကားကလည်း ဒီလိုရှိပါတယ်။

တရားတဲ့စစ်ကို ကူသူများတယ်။
မတရားတဲ့စစ်ကို ကူသူရှားတယ် ....တဲ့။

လှကျော်ဇော
၁၄-၇-၂၀၁၉