မောင်သော်တာ - မြေကြီးရဲ့ဆွဲငင်အား

မြေကြီးရဲ့ဆွဲငင်အား

မောင်သော်တာ

(မိုးမခ) ဇူလိုင်၊ ၁၂၊ ၂၀၂၀

ပွင့်ပွင့်လင်းလင်းခေတ်ကြီးတဲ့ဗျာ

မေတ္တာပေးလို့မေတ္တာရပါစေ

မြေကြီးကိုတူးဆွပြီးသူဌေးဖြစ်ခွင့်အိပ်မက်မက်ချင်တယ်

အကင်းပါးတဲ့လူဆိုတာဖဲသမားလားဖဲဝိုင်းနားမှာဖဲမီးလှုံသူလား

ဖဲဒိုင်ခံတဲ့သူလားဖဲထုပ်ရောင်းတဲ့စတိုးဆိုင်လား

သေနေတဲ့ဖဲပစ်ချပြီးကွမ်းတစ်ယာ'ထဝါးသလိုလို

ရေထသောက်သလိုလိုနဲ့

ဖဲဝိုင်းကထွက်ပြီးစဉ်းစားခန်းဝင်ကြည့်မိတယ်

ခေါင်းခြောက်စရာဘာတွေရှိသလဲ

ကျားနဲ့သတ်ပုတ်ဆော့ကစားချင်တယ်ဆိုရင်

အရင်ဆုံးကျားလှောင်အိမ်ထဲဝင်ရင်ဝင်

ကျားလှောင်အိမ်ကိုတော့ဖွင့်ပေးသင့်တယ်မဟုတ်လား

ဖွင့်လိုက်ပါစိတ်တံခါးကိုဖွင့်လိုက်ပါ

ပိတ်လှောင်ထားတဲ့ကုန်စည်တွွေ

မြုံထားတဲ့တေးတွေ...

ကစားပွဲတစ်ခုလို

ငွေစက္ကူတွေထက်ဖဲချပ်တွေကိုသာအာရုံစိုက်ဖို့ပဲ

တချို့ဖဲချပ်တွေကမျှော်လင့်ချက်တွေကိုနိမိတ်ဖတ်ပေးတယ်

ကျွန်တော်ရေးချင်တဲ့ကဗျာထဲကပန်းသီးဟာ

အပင်အောက်ကြွေကျဖို့ထက်

လေထဲမှာပျံဝဲနိုင်ဖို့ပဲ

ကမ္ဘာမြေကြီးမှာဆွဲငင်အားရှိတာသေချာတယ်

ဆွဲငင်အားကိုမြေကြီးထဲကတူးဆွထုတ်ယူကြည့်ချင်တယ်

မြေကြီးဆန်ဆန်စဉ်းစားတွေးခေါ်ရင်အားလုံးကိုဆွဲငင်သိမ်းပိုက်နိုင်မလားပဲ

လောလောဆယ်တော့မြေကြီးလိုခေါင်းခြောက်မြန်နေတယ်

လူတွေအားလုံးသိနေတဲ့ငွေဆိုတာ

အစိုးရကအချိန်မရွေးပြန်သိမ်းခွင့်ရှိနေတဲ့စက္ကူရွက်တွေသာပါလား

ခေါင်းခဲမိပြန်တယ်

ကျွန်တော်ရေးချင်တယ်

ငါမကောင်းရင်ငါ့အကြောင်းရေး

ငါ့ကဗျာမကောင်းရင်လည်းငါ့အကြောင်းရေး

ဟောဒီကဗျာစာရွက်တွေဆိုတာ

ငွေစက္ကူတွေ ရွှေသို့မဟုတ်ငွေသတ္တုလိုကျောထောက်နောက်ခံ

အမာခံ 

အာမခံမှုမရှိပါ

အဲဒီတော့

ဘဏ်သူဌေးတွေစဉ်းစားသလို

ငွေအတွက်အလုပ်လုပ်မယ်ဆိုရင်ကဗျာမရေးဘူး

ငွေစက္ကူစက်ထောင်မှာပေါ့

တောင်ပံမပါဘဲပျံသန်းလွတ်လပ်ချင်တဲ့စိတ်ကူးတွေဆိုတာ

သိပ်လှသပေါ့

ဒါပေမယ့်

မြေကြီးရဲ့ဆွဲငင်သိမ်းပိုက်မှုကိုရက်ရက်စက်စက်ခံစားလိုက်ရမှာ

ဒီလိုနဲ့ပဲမြေစာပုံတွေအောက်မှာ

လမ်းဆုံးနေတဲ့အလောင်းတွေကိုဆွဲထုတ်လို့မဆုံးနိုင်တော့ဘူး

မောင်သော်တာ