ဇာနည် - အာဇာနည်တွေနေတဲ့တိုင်းပြည် (သို့မဟုတ်) ကြွေလွင့်ခဲ့သောနွေဦးပန်းတပွင့်

Photo- Crd

အာဇာနည်တွေနေတဲ့တိုင်းပြည်

(သို့မဟုတ်)

ကြွေလွင့်ခဲ့သောနွေဦးပန်းတပွင့်

ဇာနည်

(မိုးမခ) မတ် ၁၂၊ ၂၀၂၁

(၁၁-၃-၂၀၂၁) မနေ့ကမြောက်ဒဂုံ (၃၅) လမ်းမှာ သေနတ်ကျည်ဆံနားထင်ကိုဖောက်မှန်ပြီး ကျဆုံးသွားတဲ့ရဲဘော်လေး "ချစ်မင်းသူ" (အသက်၂၅ နှစ်) ဟာ ငါတို့အတွက် စံပြပြည်သူ့သူရဲကောင်းဖြစ်တယ်...

စစ်ဖက်ဆစ်တွေက သေနတ်နဲ့တရစပ်ပစ်နေတာကိုထွက်မပြေးဘဲ...နောက်ကသူတွေမထိအောင်ရှေ့ဆုံးကနေ ဒိုင်းတလက်နဲ့ကာကွယ်ပေးရင်း သူ့ရဲ့သံဒိုင်းကိုသေနတ်ကျည်ဆံဖောက်မှန်ပြီး ကျဆုံးခဲ့ရတာဖြစ်တယ်...

သူ့မှာ (၂) နှစ်အရွယ် သမီးလေးတယောက်နဲ့ သူ့မိန်းမမှာကိုယ်ဝန် (၂) လ ကျန်ခဲ့တယ်..

အဲ့ဒီနေ့က သူ့မိန်းမကမသွားဖို့တားခဲ့သေးတယ်...

"ငါ့မသွားလို့ ငါ့လိုလူတွေများလာရင် ဒီမိုကရေစီတိုက်ပွဲမအောင်မြင်မှာစိုးရိမ်ရတယ်.."လို့ပြောပြီး မိသားစုကိုကျောခိုင်းပြီး ဆန္ဒပြပွဲကိုထွက်လာခဲ့တယ်...

ဒီစကားကိုကြားလိုက်ရတော့..တခါက ဆရာဗန်မော်တင်အောင်ရဲ့ "မြိုင်" ဝတ္ထုထဲကဇတ်ကောင် "ကိုတင်ဦး" ပြောခဲ့တဲ့စကားလေးကို ပြန်သတိရလိုက်မိတယ်...

" မြိုင်ရယ်... ဖမ်းဆီးနှိပ်စက်ခံရလို့ပဲဖြစ်ဖြစ်၊ အသတ်ဖြတ်ခံရလို့ပဲဖြစ်ဖြစ်...အမှန်တရားဘက်ကရပ်တည်ပေးမဲ့သူတွေမရှိခဲ့ဘူးဆိုရင်..ဒီလောကကြီးဟာလဲ ဘယ်တော့မှလဲမတိုးတက်နိုင်သလို ကြီးနိုင်ငယ်ညှဉ်းတိရတ္ဆန်သာသာလောကကြီးပဲဖြစ်နေတော့မှာပေါ့..." တဲ့။

သူ့အမေဆီက ငွေ (၁၀၀၀) တောင်းသွားပြီး..သူသမီးလေးကိုနမ်းရင် း"အဖေပြန်လာခဲ့မယ်.." လို့ နှုတ်ဆက်သွားခဲ့သေးသတဲ့...။

ခုတော့...သူဟာ သူ့ချစ်ဇနီးနဲ့သူသမီးလေးဆီကိုပြန်မလာနိုင်ခဲ့တော့ပါဘူး...

လူလောကထဲကိုရောက်မလာသေးတဲ့ သူရဲ့ (၂)လအရွယ် ရင်သွေးလေးကိုလဲ မတွေ့မြင်ခဲ့ရတော့ပါဘူး...

သူ့အလောင်းကို လူတွေကပြန်ဆွဲယူပြီး သူ့အိမ်ကိုပို့ပေးခဲ့တယ်...

(စစ်ဖက်ဆစ်တွေဟာ သူ့အလောင်းကိုအတင်းအဓမ္မပြန်သိမ်းသွားကြတယ်လိုသိရတယ်...)

ဒါဟာဘာကိုပြသလဲဆိုတော့...

"ချစ်မင်းသူ" ကိုရက်ရက်စက်စက်သေနတ်နဲ့ပစ်သတ်ခဲ့တဲ့စစ်ဖက်ဆစ်တွေဟာ..

အသက်မရှိတော့တဲ့ သူရဲကောင်း "ချစ်မင်းသူ" ရဲ့အလောင်းကိုတောင် ကြောက်နေတယ်ဆိုတာပြတာပါပဲ...

ဖက်ဆစ်တွေရဲ့ရက်စက်ယုတ်မာမူ့တွေကို သူရဲကောင်း "ချစ်မင်းသူ" ရဲ့အသက်မဲ့ခန္ဓာကိုယ်ကတောင် ကမ္ဘာ တခုလုံးသိအောင်ပြသသွားနိုင်ခဲ့ပါတယ်...

နိုဗယ်ဆုရကမ္ဘာကျော် ချီလီကဗျာဆရာကြီး"နီရူဒါ" ရဲ့ ကဗျာလေးတပိုဒ်ရှိတယ်...

"You can cut all the flowers,

But you can not keep spring from coming..."