မောင်သော်တာ - နွေကို ငါတို့ဦးထားပြီ

ART - Than Htay Maung

နွေကို ငါတို့ဦးထားပြီ

မောင်သော်တာ

(မိုးမခ) ဧပြီ ၁၅၊ ၂၀၂၁

၁

လူစင်စစ်ဖြစ်ခွင့် မရချင်ဘူးလား

လူယုတ်မာတွေရဲ့လက်ကိုင်တုတ် မဖြစ်စေနဲ့

ကျွန်ရာဝင်ပြီး

ဘေးကင်းလုံခြုံနေတဲ့ဘဝဟာ လူဖြစ်ရှုံးပါတယ်

၂

အကြောက်တရားကိုမြင်အောင်ကြည့်

ပိတ်ဆို့ထားတဲ့အတားအဆီးတွေကလမ်းတွေပေါ်မှာ

သဲအိတ်တွေ၊ ပရိဘောဂအပျက်တွေ၊ စစ်ဖိနပ်အစုတ်တွေနဲ့သွေးစွန်းကွက်တွေကြားမှာ

ရဲအချုပ်ကားနဲ့စစ်ထရပ်ကားတွေရဲ့ကားတာယာအောက်မှာ

ကျည်ဆန်ခွံတွေ၊ ရေသန့်ဗူးခွံတွေ၊ကြွေးကြော်သံဆိုင်းဘုတ်တွေရဲ့နံဘေးမှာ

ည ၈ နာရီ သံပုံးတီးသံထဲမှာ

ဖယောင်းရည်တွေစီးကျနေတဲ့လက် ၃ ချောင်းနဲ့အတူ 

အမှောင်ကိုတွန်းဖယ်နေကြတဲ့နွေဦးညတွေထဲမှာ

အကြောက်တရားကိုမီးခိုးဗုံးတွေလိုတစ်လုံးပြီးတစ်လုံးပစ်ချလိုက်တိုင်း

စစ်မြေပြင်မဟုတ်ဘဲချေမှုန်းရေးလက်နက်တွေနဲ့တရစပ်ပစ်ချလိုက်တိုင်း

ဖျော်ဖြေရေးတီဗီဖန်သားပြင်ပေါ်အဆိပ်လူးထားတဲ့သတင်းတွေသွန်ချလိုက်တိုင်း

အကြောက်တရားဟာဝတ်လစ်စလစ်ဖြစ်သွားတဲ့စစ်သားတစ်ယောက်လို

လမ်းပေါ်ရပ်ပြနေတာမြင်ရ

မိုးပေါ်ထောင်မဖောက်ဘူးဆိုတဲ့သေနတ်ဟာ

ငရဲတံခါးကိုဖွင့်တဲ့သော့တစ်ချောင်းပဲဖြစ်လိမ့်မယ်

အမှောင်ထုကြီးစိုးနေတဲ့ကြားမှာ

အကြောက်တရားကိုမြင်အောင်ကြည့်တတ်ရင်

နွေဦးဟာကဗျာတစ်ပုဒ်ဖြစ်လာမယ်

အရင်းအနှီးလည်းများတယ်

တန်ဖိုးလည်းကြီးတယ်

အသက်သွေးချွေးတွေနဲ့နိုင်ငံသစ်တစ်ခုကိုလဲယူနေကြတယ်

၃

နေ့ရက်တိုင်းဟာစစ်တလင်းပြင်ထဲရောက်နေတယ်

ဒီမြေကိုထွန်ယက်လိုက်တိုင်း

အလောင်းနဲ့သွေးစသားစတွေဖွာထွက်လာတော့မယ်

ခေါင်းပေါ်ရွာချလာမယ့်မိုးရေစက်တွေထဲမှာအက်ဆစ်ရည်တွေလား

ကမ္ဘအပျက်အစီးတွေအပိုင်းအစတွေသွေးလိုက်ပါတော့

ငါတို့ရဲ့သွေးသားတွေငွေ့ရည်စုပြီးပို့ချင်တယ်

ကမ္ဘာအသစ်မှာစစ်မရှိတဲ့မြေဖြစ်ပါစေ

၄

အပျက်အစီးတွေအပိုင်းအစတွေသွေးစက်တွေအော်သံတွေ

ငိုကြွေးသံတွေအသိုးအပုပ်တွေ

သခင်ကတည်းကအပုပ်နံ့ထွက်နေတဲ့ကောင်တွေ

တပြုံတမ

မွကြဲနေသလို

မသေခင်ကတည်းကအပုပ်နံ့ထွက်နေတဲ့ကောင်တွေ

လမ်းသလားနေကြ

အုတ်အရောရောကျောက်အရောရောဆိုတာတွေထဲကပဲ

ပွင့်တဲ့ဘုရားက ပွင့်တယ်

မြေမြိုခံရမယ့်မြေမြိုခံရမယ့်ဒေဝဒတ်ကိုမြေမြိုတယ်

၅

ငါတို့ရဲ့အာခံမှုကိုလိုက်ရှာချင်ရင် လူမဲ့လမ်းတွေပေါ်ကသဲအိတ်တွေကိုရှာပါ

ကတ္တရာလမ်းပေါ်ရေးထားတဲ့ဆန့်ကျင်ရေးစာလုံးအဖြူတွေကိုဖတ်ကြည့်ပါ

ကျည်ထိလဲကျခဲ့တဲ့သွေးစွန်းကွက်တွေနေရာမှာရှာပါ

အသံမဲ့ရင်မဲ့နေလိမ့်မယ်

အရှုံးမပေး အခဲမကျေတဲ့ဝိညာဉ်တွေက

ကမ္ဘာမကြေဘူး'သီချင်းသံကြားရင် ပူးဝင်ရုန်းထနေကြမယ်

အသေခံတိုက်နေတဲ့သူရဲကောင်းတွေရှိတဲ့အကြောင်း

ကမ္ဘာကြီးရဲ့သမိုင်းအသစ်ပဲ