ဆောင်းယွန်းလ - နေ့အသစ်တစ်နေ့ ဖွားမြင်မှု
အတိတ်ကို
ခေတ်တခေတ်လုံးရင်းပြီး ဆုံးရှုံးခဲ့ရဖူးပါပြီ
မြစ်တမြစ်မှာ
ရေနှစ်ခါချိုးလို့မရနိုင်ခဲ့ပေမယ့်
ချောင်းတစ်ချောင်းထဲမှာ
စစ်ပွဲတွေ အခါခါဖြစ်ခဲ့ရတယ်
သေသူရဲ့အလောင်းကိုထမ်းခဲ့ရသလိုမျိုး
ရှင်သူအတွက် အခေါင်းတွေကိုလည်း ထမ်းခဲ့ရလေတယ်
ကျည်ကွယ်မျက်ကွယ်ရာရောက်မှ
သေမင်းဆီမှာ ကျောက်ချရမှာလား
နောက်မကျသေးဘူးဆိုတဲ့အတွေးကပဲ
အရာရာကို ရှေ့တိုးစေခဲ့တာပါ
ဒူးထောက်ခြင်းဟာ
ပစ်မှတ်ကို ချိန်ရွယ်တာဖြစ်သလို
လက်မြှောက်ခြင်းဟာလည်း
အားမာန်ယူပြီး အသံကုန်ဟစ်ကြွေးဖို့ပဲဖြစ်တယ်
ခေတ်ကပေးသလောက်ရေးခဲ့ရတဲ့ ကဗျာတွေမှာ
အသားမာတွေတောင်တက်နေခဲ့ပါပြီ
သွေးထွက်သံယိုမှုမြင်ကွင်းတွေရဲ့နောက်မှာ
အနာဂတ်ဆိုတာ
အပြာလွင်ဆုံးကောင်းကင်အောက်က
စိမ်းလန်းတဲ့လွင်ပြင်ကျယ်တခုပါပဲ
တိုက်ပွဲကို လိုက်ပွဲမှာစားသလိုမျိုး
မိုးတဆုံးမြေတဆုံး ရုန်းထွက်လိုက်ကြရုံနဲ့တင်
အရာရာဟာ ရှင်သန်ခြင်းရဲ့ နေ့သစ်ပဲဖြစ်မယ်။
-
t.me@moemaka
#MoeMaKaMedia
#WhatsHappeningInMyanmar