မိုးဦးဆွေညိန်း - လှိုင်းထနေသောတနင်္ဂနွေများအကြောင်း

မိုးဦးဆွေညိန်း - လှိုင်းထနေသောတနင်္ဂနွေများအကြောင်း

(မိုးမခ) ဇွန် ၂၃၊ ၂၀၂၂

၁။

ပုံမှန်အားဖြင့်ဆိုရလျှင် တနင်္ဂနွေနေ့ကို ရုံးပိတ် အလုပ်နား မိသားစုနဲ့ အတူတကွရှိကြ စသည် ပြုကြလေ့ရှိသော အားလပ်ရက်၊ သို့တည်း မဟုတ် မိသားစုနေ့ (family day) ဟု တင်စားကြသည်။ တနင်္ဂနွေကို ရက်သတ္တပတ်၏ အဦးအစနေ့အဖြစ် ဂုဏ်ပြုအပ်သော၊ ချီးမြှောက်အပ်သော နေ့ထူးတစ်ရက်ကဲ့သို့ အထွတ်အမြတ်ထားကြသည့် အယူဝါဒများလည်း ရှိကြသည်။

တစ်ပတ်မှာ ခုနစ်ရက်လုံး အားလပ်ရက်ဟူသည် သီးခြားမရှိဘဲ အဆင်ပြေသလို အနားယူကြရသူများလည်း ရှိနိုင်သည်။ ကျနော်က ကိုယ် ပိုင်လုပ်ငန်းငယ်မျှလုပ်ကိုင်သူသာဖြစ်လေတော့ ရုံးတက်ရုံးဆင်း ကုမ္ပဏီအလုပ်လုပ်ကြသူတွေလို နေ့စဉ်ရက်ဆက် အလုပ်သဘောအရ အပြင်ထွက်ရခြင်း မရှိသော်ငြားလည်း တစ်ပတ်မှာ တနင်္ဂနွေ တစ်ရက်ကို သတ်သတ်မှတ်မှတ်ထားပြီး အနားယူဖြစ်သည်။ အလုပ်ချိန်သည်သာ ကွဲလွဲပေလိမ့်မည်။ အလုပ်ဖွင့်ရက်များကတော့ ထိုနည်းအတိုင်းပင် ဖြစ်၏။

ယခု ကိုဗစ်နှင့်ညစ်နေရသည့်ကာလများကို အလိုမတူဘဲ ဖြတ်သန်းနေရချိန်မှာတော့ နေ့စဉ်သည် တနင်္ဂနွေချည့်သာ ဖြစ်နေလေသည်။

၂။

တနင်္ဂနွေနေ့ကို ဘယ်လိုသုံးစွဲကြသလဲ၊ လူတစ်ဦး တစ်ယောက်ချင်းစီ၌ ပုံသဏ္ဌာန်အမျိုးမျိုး ကွဲပြားနိုင်ကြမည်မှာ သေချာ၏။ ဤနေရာတွင် ခင်ဗျားကော ဘယ်လိုသုံးစွဲသလဲဆိုသည်ထက် ကျနော် ဘယ်လိုသုံးစွဲနေသလဲဆိုသည်ကသာ ပိုသိနိုင်ပါသည်ဟု စကားဦးသန်းထားနှင့်ချင်ပါသည်။ သိနိုင်သည်ဟုသာ ဆိုထားသောကြောင့် တိကျသည်ဟုတော့လည်း အပ်ကျမပ်ကျ မဆိုနိုင်ကြောင်း မိတ်ဆွေ သတိထားမိရန် လို အပ်ပါမည်။

တနင်္ဂနွေနေ့ ဖြစ်ပေါ်လာပုံအကြောင်းကိုတော့ ကျနော် မသိ။ ဒါက သင်္ချာဗေဒတွေ၊ နက္ခတ္တဗေဒတွေ စသည့်ပညာရပ်များနှင့်သာ ပိုမိုသက်ဆိုင်ပေလိမ့်မည်။ ထိုပညာရပ်တွေကို ကျနော်စိတ်မဝင်စားသကဲ့သို့ နားလည်ရန်လည်း မကြိုးစားခဲ့ဖူးပေ။ သို့မို့ကြောင့် ထိုပညာရပ်များအပေါ်အခြေခံသော တနင်္ဂနွေနေ့ ဖြစ်ပေါ်လာပုံအကြောင်းကို ကျနော် ဆွေးနွေးပြောဆိုနိုင်မည် မဟုတ်ပါ။ လတစ်လ၏ ပထမဦးဆုံး တနင်္ဂနွေနေ့၌ နှစ်ချင်းခရစ်ယာန်ဘာသာဝင်များ ပွဲတော်တည်ခြင်းအခမ်းအနား ကျင်းပကြသည်ကိုတော့ ဘုမသိဘမသိဖြင့် ကြုံကာ သိခဲ့ရဖူးသည်။

၃။

တချို့သောတနင်္ဂနွေရက်များသည် ပျင်းရိလေးလံစရာကောင်းလှသည်။ ဥပမာအားဖြင့်ဆိုရသော် တစ်ယောက်တည်းလည်း အထီးကျန်ဖြစ်နေ၊ မိုးကလည်း တစိမ့်စိမ့်နှင့် ပျင်းရိလေးလံမှုကို ထပ်ဆင့် ပံ့ပိုးပေးနေ ဖြစ်နေလျှင် သင် မည်သို့ပြုမည်မသိသော်လည်း ကျနော့်မှာတော့ ဆွေးမြည့်ခြင်းကသာလျှင် ပိုနေမြဲဖြစ်၏။

တစိမ့်စိမ့် တအိအိနှင့် စိမ်ပြေနပြေ ရွာသွန်းနေသည့် မိုးစက်မိုးပေါက်များသည် တံစက်မြိတ်အစွန်းကနေ နရီ စည်းချက်မှန်စွာဖြင့် ကခုန် ခုန်ဆင်းသွားကြသည်။ ထိုမြင်ကွင်းကို တမြည့်မြည့် ကြည့်နေမိရင်း မိုးစက်ကလေးများသည် ကျနော်ကိုယ်တိုင်ပင် ဖြစ်နေလေသလားဟု ထင်မှားမိသည်က အကြိမ်များစွာပင် ဖြစ်၏။ ထိုသို့ ပျင်းရိငြီးငွေ့ဖွယ်ရာ ကောင်းလွန်းသည့် အဖြစ်အပျက်ကို ဘယ်လိုအရာက ကျော်လွှားပေးနိုင်ပါမည်လဲ။ သီချင်းတစ်ပုဒ်လား၊ သို့တည်းမဟုတ် ဝီစကီတစ်ခွက်လား၊ သို့တည်းမဟုတ် ရင်ခုန်လှုပ်ရှားဖွယ်ရာ ယမင်းခင်ပျိုလား။ ဒီလိုမှ မဟုတ်လျှင်လည်း ပါရှန်ကဗျာဆရာ အိုမာခယမ်လို လောဘကြီးစွာ သုံးမျိုးလုံးဖြင့် ပြီးပြည့်စုံချင်သည်လား။

တနင်္ဂနွေမိုး
ပျင်းရိငြီးငွေ့ဖွယ်ရာ ဖြစ်အောင်
တရွေ့ရွေ့သယ်ဆောင်လာပုံက

တည့်တည့်ရှုနေရတဲ့ အဆာမပြေမှု
ဒုက္ခတရားနဲ့ ယဉ်ပါးအသားကျသူ

လူးလွန့်နေရခြင်းများရဲ့ အဓိပ္ပာယ်
မိုးရေစက်တွေ ပုံသဏ္ဌာန်အမျိုးမျိုးနဲ့
တံစက်မြိတ်အစွန်းမှာ ရှင်သန်နေရသလောက်ပါပဲ။

တစ်ခုသောတနင်္ဂနွေရဲ့ မိုးတစ်နေ့မှာ အဲသည်လို ကဗျာတစ်ပုဒ်ကို ရေးခဲ့ဖူးသည်။ တံစက်မြိတ်အစွန်းက ခုန်ဆင်းသွားသည့် မိုးရေစက်လေးများကဲ့သို့ ဘဝတွေကို ကျနော့်မှာ တွေ့မြင်ရဖန်များလွန်း၍ ထုံနေပြီ ထင်သည်။

၄။

အလိုမတူခဲ့ပါဘဲ ရလာခဲ့သည့် "ကိုဗစ်" ဟူသော ရောဂန္တရကပ်ကြောင့် ကျနော်တို့၏နေ့ရက်များစွာသည် ပြင်ပနှင့်အဆက်ဖြတ်လျက် အိမ်တွင်းအောင်းကြရကာ တနင်္ဂနွေချည့် ဖြစ်ခဲ့ရသည်။

သည်တုန်းက ကိုဗစ်ဒုတိယလှိုင်းကာလ ဖြစ်သည်။ work from home ဆိုသလို အိမ်မှာပဲ အလုပ်အကိုင်တွေ ရှာဖွေလုပ်ကိုင်တတ်လာကြသည်။ ကုမ္ပဏီဝန်ထမ်း စသည်ကလည်း အွန်လိုင်းကနေ အလုပ်လုပ်တတ်လာသည်။ ကိုယ်ပိုင်လုပ်ငန်း လုပ်သူတွေလည်း page များထောင်ကာ ဝင်ငွေရရာရကြောင်း လုပ်တတ်လာသည်။ zoom ကဲ့သို့ ဆိုရှယ်မီဒီယာ ပလက်ဖောင်းများကတစ်ဆင့် သင်ကြားရေးတွေ၊ အစည်းအဝေးတွေ လုပ်တတ်လာသည်။ ငွေပေးငွေယူကိစ္စတွေမှာလည်း mobile banking ကို ပိုမိုသုံးတတ်လာသည်။ ပြောရလျှင် မြန်မာပြည်သူတွေကို ကိုဗစ်က digital world နှင့် ဇွတ်ပေးတွေ့ကာ ရင်းနှီးစေခဲ့သည်။ အဆိုးထဲက အကောင်းရလိုက်၍ ကျနော့်မှာ ကြိတ်ဝမ်းသာမိခဲ့ရသေးသည်။ လမ်းပေါ်ထွက်အလုပ်လုပ်မှ ဖြစ်မည့်သူများ စွန့်လွှတ်စွန့်စား သွားလာရသည်ကတော့ ရှိပါသည်။

ကျန်းမာရေးစောင့်ရှောက်မှုလည်း ကောင်းမွန်မှန်ကန်စွာဖြင့် လုပ်ပေးနိုင်ခဲ့၍ ပြည်သူများလည်း ကျေနပ်မှုရှိခဲ့ကြသည်။ လူမှုရေးထောက်ပံ့ခြင်းများ ရှိခဲ့သည်။ ချုပ်ပြောရလျှင် ကိုဗစ်ဒုတိယလှိုင်းကို ကျနော်တို့တစ်တွေ ရုန်းကန်ရင်ဆိုင်နိုင်ခဲ့ကြသည်။ အဆိုးဒုက္ခတွေကို ဖြတ်သန်းပြီးလျှင် ကောင်းမွန်သောသုခတွေ ရောက်ရှိလာရမည်ဟု အားသစ်အင်သစ်မွေးကာ မျှော်လင့်စိတ်ထားနိုင်ခဲ့ကြသည်။

တနင်္ဂနွေနေ့တွေချည့် ဖြစ်ခဲ့ရသည့် ရက်သတ္တပတ်များစွာသည် တနင်္လာပြီး အင်္ဂါဆိုသလို ပုံမှန်နေ့တွေ ဖြစ်လာတော့မည်ဟု ရင်ခုန်နေခဲ့ရသည်။ သို့သော် ...

၅။

တိုင်းပြည် လွတ်လပ်ရေးရသည့်အချိန်မှစ၍ ခေတ်အဆက်ဆက် မြန်မာ့နိုင်ငံရေးမှာ အချောင်နှိုက် လူတွင်ကျယ်လုပ်လာသော ငါတကောကော စစ်တပ်သည် မဖြစ်နိုင်သည်ကို တမ်းတမိပြီး မရသည့်အဆုံး၌ အငုံ့စိတ်တွေကန်ထွက် စောက်ရူးထကာ အာဏာသိမ်းလိုက်ပြန်၏။ ရုတ်တရက် မျက်စိရှေ့၌ မိုးတိမ်ရိပ်များ အပြင်းအထန်ဆင်လာသည့် ကောင်းကင်မည်းကြီးသည် ကန့်လန့်ကာဆွဲချလိုက်သကဲ့သို့ ကျလာသည်။ အထူးသဖြင့် လူမှန်းသိတတ်သည့် အရွယ်ကတည်းက ကမ္ဘာကြီးကို တွေ့ဖူးထားသည့် ဂျန်ဇီဟု အမည်တွင်လာမည့် အသက်နှစ်ဆယ်ဝန်းကျင် လူငယ်များပါမက တို့ကလေးတွေ အနာဂတ်လှပြီထင်ခဲ့သည့် လူကြီးများပါ အကြီးအကျယ် ရှော့ခ်ရသွားသည်။

၂၀၂၀ ပြည့်နှစ် တစ်နှစ်လုံးနီးပါး ငဗစ်ဒဏ်ကြောင့် တစ်တိုင်းပြည်လုံး ဖြူခါပြာကျမျှ ဒုက္ခရောက်ကြရသည်ကို မထောက်မညှာဘဲ မအလသည် အာဏာရူးခဲ့၏။ ပြည်သူတွေခမျာ ဒုက္ခတွေ တစ်ပူပေါ် နှစ်ပူဆင့်ကာ သောကပင်လယ်ဝေကြရပြန်သည်။ လုပ်ငန်းကိုင်ငန်းတွေ ပိတ်သွားသည်၊ ဆေးရုံဆေးခန်းတွေ ပိတ်သွားသည်၊ ကျောင်းစာသင်ခန်းတွေ ပိတ်သွားသည်၊ လူတိုင်းလူတိုင်း၏အနာဂတ်တွေပါ ပိတ်သွားတော့သည်။

ကိုဗစ်က ရောဂန္တရကပ် တစ်မျိုးသာ ကြုံခဲ့ရပေမဲ့ မအလနှင့်အပေါင်းပါ ဖက်ဆစ်တပ်၏ အာဏာရူးမှုကြောင့် ဖြစ်လာရသည်ကတော့ ကပ်ကြီးသုံးပါးလုံးပင် ဖြစ်၏။ လက်နက်ဘေးဖြင့် သေကြေပျက်စီးသော ကာလ (သတ္တန္တရကပ်)၊ ရောဂါဘေးဖြင့် သေကြေပျက်စီးသော ကာလ (ရောဂန္တရကပ်)၊ ငတ်မွတ်ခြင်းဘေးဖြင့် သေကြေပျက်စီးသော ကာလ (ဒုဗ္ဘိက္ခန္တရကပ်) ဟူသော ကပ်ကြီးသုံးလုံး၏ ကိုင်ရိုက်ခြင်းကို ခံနေကြရသည်။ ငဗစ်က တစ်မျိုး၊ ငစစ်က တစ်မျိုး နှိပ်စက်ကလူပြုလိုက်သဖြင့် "လှိုင်းထနေသောတနင်္ဂနွေများအကြောင်း" သည် တစ်ဆစ်ချိုး အရောင်ပြောင်းကာ ထပ်မံရောက်ရှိလာသောကြောင့် ရင်ဆိုင်ရန် ခွန်အား မွေးရပြန်လေ၏။

မိုးဦးဆွေညိန်း

Join Us @ MoeMaKa Telegram
t.me@moemaka
#MoeMaKaMedia
#WhatsHappeningInMyanmar