ဇမ်သစ်အောင် - မိုးရွာပြီးစ ဇာတ်လမ်း

မိုးရွာပြီးစ ဇာတ်လမ်း

ဇမ်သစ်အောင်

(မိုးမခ) စက်တင်ဘာ ၂၆၊ ၂၀၂၃

မြေကြီးလို နူးအိပြခဲ့တယ်

ပျော့ညံ့ခဲ့ခြင်း မဟုတ်

ဘာသာမဲ့တိမ်နဲ့ညားမှ

ခမ်းနားမယ် ထင်ခဲ့သူ ကောင်းကင်

မြင်မြင်သမျှ စွတ်စိုရပါလို၏

အအေးမိသစ်ရွက်ပျိုက အစ

လဲကျနေသူလေအိုညင်းလေး အဆုံး

အလွမ်းက အုံ့ရုံပဲရှိသေး

အဆွေးက ပိုးစိုးပက်စက် ရွာပြီးပြီ

ဒီညနေကို

ဒီမျက်ရည်နဲ့ပဲ ဇာတ်သိမ်းခဲ့ပါရဲ့

ကိုယ်ရဲ့ 

ကြည်ပြာရောင် ကောင်းကင်မလေးရေ

နွေသစ်ဦးမှာ 

ပိတောက်ဖူးတွေနဲ့

မြူးကြွကခုန်နိုင်စေသား။             ။ 

8:32 PM

Tue,Sep 19,2023

-

Join Us @ MoeMaKa Telegram

t.me@moemaka

#MoeMaKaMedia

#WhatsHappeningInMyanmar