နတ္ထိ - "တဝချိုက်တေ"

"တဝချိုက်တေ"

နတ္ထိ ကလိသည်

(မိုးမခ) ဖေဖော်ဝါရီ ၂၆၊ ၂၀၂၄

"ဟမ်မလေး... ပင်ပန်းလိုက်တဲ့ ဖြစ်ခြင်း"

လူမျိုး ၁၃၅ ပါးကို အစိုးရသည့် အဟံ အကျွနု်ပ် ကြပ်ပြေးပြည့်ရှင်မင်းကြီးသည် အဂ္ဂမဟေသီကြီးနှင့်အတူ သမ္မတအဆောင်အယောင်ဖြစ်သည့် လီမိုဆင်း ကျည်ကာ ကားနက်ကြီးပေါ်မှ ဆင်းသက်ခဲ့ပြီးသည်နှင့် တပြိုင်နက် အထက်ပါအတိုင်း ညည်းညူမိလိုက်ခြင်းဖြစ်သည်။

 

တရားဝင်သမ္မတ မဟုတ်သည့် အကျွနု်ပ်သည် သမ္မတဖြစ်ချင်ဇောဖြင့် သမ္မတအိမ်တော်ကို သိမ်းပိုက်တော်မူခဲ့ခြင်းသည်လည်းကောင်း၊ ယခုစီးလာသည့် မော်တော်ယာဉ်၊ ရွှေစလွယ်တော် စသည်တို့ကို သုံးစွဲခြင်းသည်လည်းကောင်း အမှန်စင်စစ် တရားမဝင်ပါ။ ထို့ပြင်တ၀ ဒုသမ္မတမြင့်ဆွေအား ယာယီသမ္မတအသွင်ယူစေရန် အကျွနု်ပ်ကိုယ်တော်တိုင်က ခိုင်းစေထားသည်ဖြစ်၍၊ နိုင်ငံတော်အခမ်းအနားများတွင် တရားဝင် နိုင်ငံ့အကြီး အကဲအဖြစ် သူ့ကိုသာ တက်ရောက်စေရမည် ဖြစ်သည်။ သို့သော် "ဘာမဆို လုပ်ရဲသည်" ဟု ကမ္ဘာသိ ကြေ ညာထားသည့် ဤဖေကိုယ် တဘဝရှင်မင်းတြားကြီးသည် ပြီးခဲ့သည့် စိန်ရတုလွတ်လပ်ရေးနေ့တွင် သမ္မတ၏ မော်တော်ယာဉ်ကို စီးနင်းပြီး၊ သူ၏ ရွှေစလွယ်ကို သိုင်းကာ ပီဘိသမ္မတ တဦးသဖွယ် ဂုဏ်ထူးဆောင်ဘွဲ့များကို အပ်နှင်းပြလိုက်ရာ ယာယီသမ္မတဆိုသူ မြင့်ဆွေပင်လျှင် ငုတ်တုတ်မေ့ခဲ့ရသည် မဟုတ်တုံလော။ အခြားသူကို မဆိုထားဘိ၊ ဘရွှေကြီးကိုယ်တိုင် မလုပ်ရဲခဲ့သည့် အလုပ်ကို အကျွနု်ပ်လုပ်ပြလိုက်ခြင်းကြောင့် သူပင်လျှင် စာဖတ်နေရင်း ကြက်သေ-သေသွားခဲ့ရသည် မဟုတ်ပါလော။

အကျွနု်ပ်ဆိုသည့် ချုပ် J ချုပ် ပါဝင်ပါသည်။ သို့သော် ဝေါဟာရတ္ထဒီပနီကျမ်း၏ အလိုအရ "ချုပ်" ဟူသော ဝေါဟာရသည် အနက်အမျိုးမျိုးရသည်ဟု ဆိုထားရာ၊ ယင်းတို့အနက် လေချုပ်၊ ဆီးချုပ်၊ ဝမ်းချုပ် အစရှိသည့် မသတီစရာအနက်အဓိပ္ပာယ်များလည်း ပါဝင်နေပေသည်။ သို့ဖြစ်ရကား ပုထုဇဉ်တို့၏သဘာဝအတိုင်း အနက် အဓိပ္ပာယ် မထွေပြားမူဘဲ အထွဋ်အထိပ်တွင် တပါးတည်း သီးခြားတည်နေသည့် သမ္မတတည်းဟူ သော ရာထူးဌာနန္တတရအား အကျွန်ုပ် မက်မောသည်ကို အဘယ်သကောင့်သား သကောင့်သမီးများက ပြစ်တင်ရှုံ့ချဝံ့ပါမည်နည်း။ 

အကယ်၍ အနှီပုဂ္ဂိုလ်မျိုး ရှိခဲ့သည်ဆိုငြားအံ့ ~ ထိုသူတို့အား မေတ္တာထားသောအားဖြင့် အကျွနု်ပ်ကိုယ်တော်တိုင် စမုံတုံးပစ်မည်မှာ "မြေကြီးလက်ခတ်" မလွဲပါတည်း။

အရပ်တော် ပုသလောက် ဒေါသတော် ကြီးတတ်သည့် အကျွနု်ပ်က "မြေ ကြီးကို လက်ဖြင့်ခတ်လိုက်မည်" ဟု ဆိုလိုက်ခြင်းကြောင့် ပြည်သူအများ သောကမပွားစေလိုပါ။ အမှန်စင်စစ် အကျွနု်ပ်ကိုယ်တိုင်လည်း မြေ ကြီးကို လက်ဖြင့် မခတ်ဝံ့ပါ။ ထိုသို့ ခတ်လိုက်သဖြင့် ဝသုန်မြေကြီး တုန်တုန်ဟီးကာ ထိုအတုန်လှိုင်းကြီးက နိုင်ငံတော်၏ မြောက်ဖက်ရှိ စိန့်တိုင်းတော်ကြီးအထိ ရောက်ရှိသွားမည်ကို အကျွနု်ပ်မလိုလားပါ။ မဖြစ်စေဝံ့ပါ။ အထူးသဖြင့် စိန့်တိုင်းကြီးမှ ဧရာမ တရုတ်နဂါးကြီးအား အိပ်ရာမှ လှုပ်နှိုးလိုက်သကဲ့သို့ ဖြစ်သွားကာ ၎င်း၏ ဒေါသခိုး ဒေါသငွေ့တို့ သင့်မည်ကို အကျွနု်ပ် အလွန်မတန် စိုးထိတ်မိပါသည်။ နဂိုကတည်းက ပြည်သူတို့ ချီးမြှင့်သည့် မြောက်ရှုံးဘွဲ့အား ထိုက်ထိုက်တန်တန် ရရှိထားသော အကျွန်ုပ်သည် "ဒုတိယ-တရုတ်ပြေးမင်း" ဘွဲ့ကိုဖြင့် လားလားမှ မခံယူလိုပါ။ "ပထမ-တရုတ်ကျမင်း" အဖြစ်ကိုလည်း မတောင့်တပါ။ 

အကျွနု်ပ်၏ မျက်စေ့သာ စွေစောင်းလျှင် ရှိရမည်၊ တရုတ်နဂါးကြီး၏ အကြောင်းသုံးပါးမရွေးသည့် မျက်စောင်းကိုမူကား အကျွန်ုပ် အလွန်ခြောက်ခြားပါသည်။ ထိုအကြောင်းကြောင့်ပင် ပြည်ကြီးမှ တရုတ်ဧကရာဇ်ကြီးအား ဖားယားတော်မူသည့်အနေဖြင့် ပြည်တွင်းမှ တရုတ်အမျိုးသားများ၏ တရုတ်နှစ်သစ်ကူးအခမ်း အနားကို နိုင်ငံတော်အကြီးအကဲအဖြစ် ထိတ်လန့်စွာ တက်ရောက်ချီးမြှင့်ခဲ့ရခြင်း ဖြစ်ပေသည်။ အကျွနု်ပ်ကသာ သမ္မတဂိုက်ဖမ်း၍ သဏ္ဍာန်လုပ် သရုပ်ဆောင်နေရသော်လည်း အဂ္ဂမဟေသီကြီးကမူ သူ၏ ပင်ကိုယ်စရိုက်အတိုင်း ပေးတာယူကျွေးတာစားရင်း "နိဟောင်မား၊ အိယောင်ဝါး၊ နင့်ပေါင်ကား" အစရှိသည့် ပဋိ သန္ဓာရစကားများဖြင့် ပွဲလာတက်သည့် တရုတ်ဧည့်သည်များအား ဖော်လံဖားနေခဲ့ပါသည်။ မဟေသီကြီးသည် သူကသာ အီကြာကွေး နှစ်ချောင်းပူးကြီးကို အာခေါင်လွန်၍ လျှာခင်ရောက်သည်အထိ ထိုးသွင်း ဝါးမျိုသည် ရှိရမည်၊ အကျွန်ုပ်ကိုကား တရုတ်အမျိုးသမီးလုံးကြီးပေါက်လှလေးများက တည်ခင်းဧည့်ခံသည့် မည်သည့်ပေါက်စီကိုမှအထိမခံအကြည့်မခံပါ။ ဤမျှလောက် သဝန်တိုသည့် မဟေသီကြီးပါတကား။ ဤမျှလောက် အချစ်ကြီးသော မဟေသီကြီးပါတကား။ အကျွန်ုပ် ကံကောင်းလှပါဘိတကား။

အစားကျူးသော မဟေသီကြီးသည် ရွှေပွဲလာတရုတ်သံအမတ်ကြီးက လက်ဆောင်ပေးသည့် ရှောက်ခေါသီး၊ သခေါမသီး (သခမသီး) အစရှိသည့် ပြည်ကြီးထွက် တရုတ်သီးနှံများကိုလည်း အိမ်တော်အထိပါအောင် ယူခဲ့ပါသေးသည်။ ထို့ပြင်တဝ ကားပေါ်မှအဆင်းတွင်လည်း ထိုအရာတို့ကို အကျွန်ုပ်အား ထမ်းပိုးစေခဲ့ပါသည်။ အိမ်း... အကျွန်ုပ်သည် အများအမြင်တွင်သာ မအလ-ဘွဲ့ခံ ဧကရာဇ်မင်းတရားကြီး ဖြစ်ချင်ဖြစ်လိမ့်မည်၊ မယားရှေ့တွင်ကား အင်မတန်အပိုးကျိုးသည့် မယကကြီးသာ ဖြစ်ချေတော့သည်တကား။

~~~~~~~~~~~~~~~

အကျွနု်ပ်တို့မောင်နှံနှစ်ပါး အိပ်ခန်းတော်တွင်းသို့ရောက်သည်နှင့်အကျွနု်ပ် သည်ပင် ခေါင်းပေါင်း မချွတ်ရသေး၊ မဟေသီကြီးက တရုတ်ဧကရာဇ်ကြီး ပေးသနားတော်မူခဲ့သည့် နီစွေးစွေး ဆပ်စပင်ဒါနှင့် ပန်းနုရောင် ပိုးထည် ညဝတ်အင်္ကျီကို ဝတ်ဆင်ပြီး မွေ့ရာပေါ် လှဲလျောင်းကာ ဖုန်းတလုံးဖြင့် အလုပ်ရှုပ်နေချေပြီ။ အကျွန်ုပ်တို့သည် ဟန်ကိုယ့်ဖို့ဆိုသည့်သဘောဖြင့် ပျော်ပွဲရွှင်ပွဲမှန်သမျှကို မလွတ်တမ်းတက်ရောက်နေကြသော်လည်း အန္တရာယ်သည် လက်တကမ်းအလိုသို့ရောက်နေပြီဖြစ်ကြောင်းကို လုံးဝဥဿုံသဘောပေါက်တော်မူကြပါ သည်။

ကချင်၊ ကယား၊ ကရင်၊ ချင်း၊ ရခိုင်၊ မွန်၊ ဗမာ၊ ရှမ်း ~ ရှိရှိသမျှ တိုင်းရင်း သားအပေါင်းတို့က အကျွနု်ပ်အား ပလ္လင်ပေါ်မှကန်ချရန် ညီညာဖျဖျ ကြိုး ပမ်းနေကြသော ဤအခါသမယတွင် အကျွန်ုပ်၏ အဂ္ဂမဟေသီ ကြင်ယာတော်ကြီးမှတပါး အခြား မည်သူတဦးတယောက်ကိုမျှ အကျွန်ုပ် အားမကိုးဝံ့၊ မယုံကြည်ဝံ့တော့ပါ။ အခြားသူများကို မဆိုထားဘိ ~ အကျွနု်ပ်ဘုန်းမီးနေလ တောက်ပခဲ့စဉ်က သေဆိုသေ၊ ရှင်ဆိုရှင်၊ တခွန်းတပါဒမှ ခွန်းတုံ့မပြန်ဝံ့ခဲ့ကြသည့် သပ္ပူရိသ ဘောမအပေါင်းတို့ပင်လျှင် အကျွနု်ပ်၏ ဘုန်းတေဇာ ညှိုးနွမ်းလာသည့် ယခုလို အခါသမယတွင် အကျွနု်ပ်အပေါ် ဖေတော့မောင်တော့ ပြောဆိုကာ သိက္ခာချနေကြပြီ မဟုတ်ပါလော။ ဥဒါဟရုဏ် ပြဆိုရလျှင် ~ ဘောမပြောင်ကြီးသည် အကျွန်ုပ်ကိုသာမက အကျွနု်ပ်၏ ရွိုင်ရယ်-ဖယ်မလီကြီးကိုပင် ငယ်ပါနှင့် ကိုင်တုတ်နေပြီဖြစ်သကဲ့သို့၊ ဘောမထူးချွန်ဆုရ ပုတုမကလည်း အကျွန်ုပ်အား "ရခိုင်မလင်၊ သောင်းလှိုင်သား" ဟု ဆိုကာ ပေါင်ကြားကို တဘုတ်ဘုတ်ပုတ်၍ မှိုချိုးမျှစ်ချိုး ဖဲ့နေချေပြီ မဟုတ်ပါတကား။

~~~~~~~~~~~~~~~

အိပ်ရာဝင်တော့မည်ဖြစ်၍ ပွဲတက်ဝတ်လဲတော်ကို ချွတ်ပြီးသကာလ အာ ကာထွန်းဘောင်းဘီကို ဝတ်ဆင်တော်မူကာ အထက်ပိုင်း ကိုယ်ဗလာဖြင့် သွားတိုက်တော်မူနေသည့် အကျွန်ုပ်သည် အိပ်ခန်းတော်တွင်းမှ အသံအချို့ကြောင့် သွားတိုက်ရပ်ကာ ရွှေနားတော်စွင့်မိသည်။

"ဟယ်... အားရလိုက်တာ။ ချသာချ။ ကိုယ်နိုင်ဖို့ပဲ လိုတယ်"

ဖုန်းကိုကြည့်ရင်း လက်သီးလက်မောင်းတန်းကာ အားပေးနေမည်ဖြစ်သည့် မဟေသီကြီး၏ ရုပ်သွင်ကို ခန့်မှန်းကာ အကျွန်ုပ် ပြုံးမိသည်။ တိုင်းရေးပြည်ရေး စိတ်မအေးရသဖြင့် ယနေ့ည အာဆင်နယ်နှင့် မန်ယူပွဲ ရှိနေသည်ကိုပင် အကျွန်ုပ် မေ့နေခဲ့ချေသည်ကော။ ယခုလည်း အာဆင်နယ်-ဖန်ဖြစ်သည့် မဟေသီကြီးက သူ့အသင်းကို အားပေးနေခြင်းသာ ဖြစ်လိမ့်မည်။ သို့သော်... ခဏအကြာတွင် မဟေသီကြီး၏ အသံတော် ရုတ် တရက် တိမ်သွားသည်ကို အကျွန်ုပ် သတိထားလိုက်မိသည်။ 

"ဓညဝတီ ရေတပ်စခန်းကို မတိုက်သေးဘူးလား"

"စစ်တွေကို မြန်မြန်သိမ်းတော့လေ မောင်လေး"

တိုးညှင်းသော်လည်း သည်းသည်းကွဲကွဲကြားလိုက်ရသော မဟေသီကြီး၏ စကားသံတို့သည် စကားတလုံး မျှားတစင်းနှုန်းဖြင့် အကျွနု်ပ်၏နှလုံးသည်းပွတ်ကို ဖောက်ထွင်းဝင်ရောက်သွားချေပြီ။

"အလို... အရခိုင်ဖို့ ငါအပိုင်ယူလိုက်တဲ့ ငါ့မဟေသီကြီးက လက်စသတ်တော့... ရန်သူ့လူ ဖြစ်နေပါရောလား"

တဒိတ်ဒိတ်ခုန်နေသည့် နှလုံးက တစိမ့်စိမ့် နာလာပြီး၊ ဥက္ခောင်းတော်ကလည်း တရိပ်ရိပ် မူးလာသည်မို့ ရင်ဘတ်တော်ကို လက်ဖြင့် ဖိတော်မူရင်း ခွေကျလာသည့် အကျွန်ုပ်၏ ရွှေနားတော်တွင် နောက်ဆုံး ကြားလိုက်ရသည်မှာကား ~

"အကျွန်ရို့ အရက္ခပြည်ကြီး လွတ်မြောက်ရေးအတွက် တိုက်ပွဲတီ ဆင်နွှဲလို့နီ အကိုချေရို့ကို တဝချိုက်တေ" ဟူသတည်း။

* တဝချိုက်တေ = အရမ်းချစ်တယ် 

-

Join Us @ MoeMaKa Telegram
t.me@moemaka
#MoeMaKaMedia
#WhatsHappeningInMyanmar