ရတနာပုံဆရာမှတ်ကြီး - နပ်ရာစံ ပူရင်ကျူး

(မိုးမခ) ဩဂုတ် ၁၂ ၊ ၂၀၂၄

စင်အောက်မှ ရှစ်လုံးဘွဲ့ရွတ်သံများ ထွက်လာသည်။

သွေးရူးသွေးတမ်း ဗရမ်းဗတာ

ကစဉ့်ကလျား ပြေးလွှားနေတာ

စစ်ဘောမအုပ် ရုတ်ရုတ်ရှုပ်ကာ

တောင်မြောက်ပြေး သောင်ခွေးလွှတ်ပမာ။

တရုတ်ကိုဆဲ မိုင်တဲဖန်တွေ

ရှရှားကိုတမ်း မျှော်မှန်းကာနေ

ပိုက်လိုင်းဖျက်ရေး မြှောက်ပေးကာလေ

အဟုတ်ကြဲ လုပ်ရဲပါဘူးဟေ။

ထိုအခိုက် စင်ပေါ်မှာ ရင်ဘတ်ဗုံတီး ငိုကြီးချက်ထီး မီးလောင်သွပ်ပြားမျက်နှာနဲ့ ဂုစ္ဆာမထွက်လာပြီး—

"ကြူပင်ခုတ် ကြူငုတ်မကျန်ရဆိုတဲ့ စကားရှိနေတော့ ဟောဒီ ကြူကြူလှ မြေးတွေအတွက် ရတက်မအေး၊ သမက်ကလေးကလဲမရှိ၊ သမီးကလဲ အဆင်တွေနဲ့ ဒချိဖို့လောက် စိတ်ဝင်စား၊ သားကလဲ တပ်အသက်အာမခံကြေးနဲ့ မွဲမယ့်စတိုင်၊ မိုင်တဲတာဝါတိုင်တွေကလဲ ရော်ရ၊ လင်ကလဲ ဘာမှစိတ်မဝင်စား သွားလဲဆင် နားလဲဆင် ဆင်မှ ကျေနပ်သူ။

အော် အပူတွေ အပူတွေ၊ ဒီအပူ ဘယ်လူဘယ်နတ်မှကူနိုင်ဘူးဘုန်းဘုန်းဘုရားတို့။ ဘုန်းဘုန်းတို့မြှောက်ပေးတဲ့အတိုင်း တံခါးကို သွားကန်ဖွင့်မိတာ၊ ခုတော့" လို့ နတ်သံနှောပြီး အသံစူးစူး ချဉ်တူးတူးနဲ့အော်ဟစ်ကာ "အပူတောမှာလေ ကြူခေါကို ဘယ်ဘုန်းကယ်မယ်လို့ ကွယ် ပြော ပြောကြပါအုံးဘုရား၊ အပူသယ် ကြူကလယ်လေးကို ဟော ဟောကြပါအုံးတရား" ဆိုပြီး ငိုချင်းချလေတော့သည်။

"ဟေ ဘာသံတွေတုံးကွဲ့"

"ငိုချင်းချသံပါဘိုးဘိုး၊ ပူပူတွေကြွပြီး ကြူကြူလှ ငိုချင်းချတာပါ"

"ဘုန်းကြီးပျံရှိလို့လား"

"သူ့ဘုန်းဘုန်းတွေ တသတ်နဲ့ နတ်ရွာစံသွားလို့ ဧယဉ်ကျူးတာမဟုတ်ဖူးဘိုးဘိုးရဲ့ ၊ ပသတ်နဲ့ နပ်ရာစံကုန်လို့ ပူရင်ကျူးနေရှာတာ"

"အော် သလိုလား၊ ဒါလဲ နာရေးတမျိုးပေါ့"

"အပီနှိပ်တဲ့ ဝစီပိတ်ဆိုပြီး ခေတ်ပြောင်းဘို့ ခေါင်းပစ်ဆို" ခိုင်းတဲ့အတိုင်း ခေါင်းချည်းပစ်တာ ခုတော့ သူ့ခေတ်မပြောင်းဘဲ ကိုယ့်ခေတ်ပြောင်း ကိုယ့်ခေါင်းပစ်ခံနေရပါပေါ့လားဘိုးဘိုးရဲ့"

"သူ့ကြွေးရှိ ဆပ်ရမှာပေါ့မိကြူရဲ့"

"ဂူဂူဘုရားတဲ့မှလေ၊ လိုအပ်ရင် သံဃာငါးသိန်းရှိတယ်ဆိုဂူဂူဘုရားရဲ့၊ တပါးမှ လူဝတ်တော်လဲလို့ စစ်ထဲမကြွ၊ တပဲ့တော်မကို ငဲ့ဖော်မရကြတော့ပါကလားဘုရာ့း"

လို့ပြောရင်း စောင့်စောင့်ငိုလေတော့သည်။

"ကိုယ်တော်ဝီလဲ အလိုတော်မကြည် မထီတရီတွေပြော ခုတော့ မိခေါမလင်ကို ဝီအရင်လိုမဟုတ်တော့ဘူးဘိုးဘိုးရဲ့"

"အော် ခေါသနီမရယ် ဝီဝီအကြိုက် ဆယ်ခါလိုက်လဲ မလိုက်တခါ ရှိခဲ့ပါမူ ကြီးစွာရန်သူ စွဲမှတ်ယူ၏ဆိုတဲ့စကားအတိုင်းမှတ်ပေါ့လကွယ်"

"ဘုန်းဘုန်းမဘသတွေက ပြုံးပြုံးမပြကြတော့ဘူးဘိုးဘိုးရဲ့၊ တချိန်ကတော့ မအလရဲ့ မဘသတွေဆိုပြီးတော့၊ ခုများ ပြူကလေးနှစ်ပဲခြောက်ပြားနဲ့ ပေါက်ဆရာကလဲ ဟောက်တာတအား"

"ဘုန်းဘုန်းတွေဆိုတော့လဲ ခြောက်ပြားမရှိ‌ပေမယ့် ဟောက်စား မြှောက်စားမှာ ဆရာတဆူ နင်တို့တပ်နဲ့ဖအေတူကိုးဟဲ့"

"ဘုန်းဘုန်းတွေက ပြုံးမပြဆို ကတုံးဘဝက ခြေနေအကြည့်မှာ ကဝေငတိချည်းဘဲလေ၊ နင်ခြေနေမလှရင် သူ့ဆီသဝေထိုး၊ သူ ခြေနေမလှရင် နင့်ဆီသဝေထိုးအတတ်မှာ တဖက်ကမ်းခတ်လေကွယ်"

"ဟောဒီ လောကီကို‌ကွယ် ခေါသနီ သဘောမမှီပါဘု

ဟောတဝီ ပြောတဝီနဲ့ ခုတဝီ တော်ကြာတဝီမို့ တော်ပါပြီကိုယ်တော်တို့ရယ် ဒို့လင်မယားဒုက္ခမီးလောင်မှ ဖြုတ်ချရီးကောင်လို့ အော်တယ်တအား ဆော်တယ်ဘုရား တကတဲမှ လှော်တယ် မသနား"(ငိုချင်း)

"အေး ငိုငို ခေါသနီ၊ နင် မိုးလင်းဒီ့ထက်ငိုရအုံးမယ်၊ တပါးပြီးတပါး မသနားပြီး မသနား ထားပြီးထားခဲ့တော့မှာကိုး"

တနေရာက စတီရီယိုသီချင်းသံ ပျံ့လွင့်လာသည်။

"ဝီဝီ"

"ရက်စက်တယ် ဝီဝီ"

"ဟေ ဒါကရော"

"ဝီဝီမြည်တာပါဘိုးဘိုး"

"ဘာဝီဝီမြည်သံလဲဟ"

"ဒရုန်းသံပါဘိုးဘိုး"

"ကလေးတွေ စွန်လွှတ်တဲ့ဟာလား"

"ဟုတ်ပါတယ်ဘိုးဘိုး"

"ဝုန်း"

"အုံး"