ခိုင်မျိုး - ရွာထဲမှာ

Art - Than Htay Maung

ရွာထဲမှာ

ခိုင်မျိုး

(မိုးမခ) မေ ၅၊ ၂၀၂၆

လောက်တဖွားဖွားကျနေတဲ့

အနာကြီးတလုံးပေါ်

ကျွန်တော်ရောက်တုန်းကပေါ့

ဒါဘယ်လိုကမ္ဘာပါလိမ့်

လှသောပန်းတွေဟာပွင့်လို့ ....

မြစ်ရေတသွင်သွင်စီးမှုထဲ

လှေကလေးတစင်းဟာ

လှော်ခတ်လို့......

ကျွန်တော်မသိသောအဆင်တန်ဆာများနဲ့

ကျွန်တော်နားမလည်သောဘာသာစကားများ

ရွေ့လျားလို့.....

ရေတံခွန်ကတဝေါဝေါကျနေတဲ့

သူ့ရေဝတ်စုံကိုဝတ်လို့.....

ကျောက်တုံးတွေနဲ့မီးကိုခတ်နေသူတွေထဲမှာ

ကျွန်တော်အဘိုးနံအဘွားများပါလေမလား....

မိုးစက်ဝတ်မှုန်အကနဲ့လေဟာ

အနောက်တောင်အရပ်ကလာနေလေရဲ့

ရောင်စုံလိပ်ပြာအုပ်ကြီးတအုပ်က

မိန်းမပျိုလေးတယောက်ရဲ့ဖွံထွားတဲ့ရင်သားတွေပေါ်နားနေပုံဟာလှရဲ့

ညင်သာသောအသက်ရှုသံကအစ

သူမဆီကအော်ငြီးသံအဆုံးကျွန်တော်ကြားရရဲ့

ကျွန်တော်ဟာဘာလဲ

လောက်တကောင်လား

သုညတွေထဲကသုညတလုံးလား

ယာဉ်တစင်းဟာကောင်းကင်ပေါ်ကဖြတ်ပျံသန်းသွားပေါ့

အဝေးကမီးတောက်မီးလျံတွေကို

လှမ်းမြင်ရတယ်

ရှို့မီးလား

သဘာဝအလျောက်လောင်တဲ့မီးလား

မပြောနိူင်ပါဘူး

သည်ဘက်မှာလူဟာကျောက်လက်နက်တခုနဲ့

သားကောင်တကောင်ကိုပစ်ခတ်လိုက်တယ်

ဝမ်းစာအတွက်

တိုက်ပွဲကတော့စပြီ

ဂူတခုထဲမှာလူလို့ထင်ရတဲ့သတ္တဝါတွေ

ရွာထဲမှာ....

-

Join Us @ MoeMaKa Telegram
t.me@moemaka
Please show your support, donate with Zelle
Zelle to moemaka.org@gmail.com "MoeMaKa Multimedia"
Like and Subscribe MoeMaKa YouTube Channel
youtube.com/@moemaka
Like us on MoemaKa Facebook
Follow us on X
X.com/MoeMaKa
#MoeMaKaMedia
#WhatsHappeningInMyanmar