ဆလိုင်းဇုန် - ပတ်လမ်း

Art- Aung Htet

ပတ်လမ်း
ဆလိုင်းဇုန်
(မိုးမခ) စက်တင်ဘာ ၂၂၊ ၂၀၂၆

ငါ့ရဲ့ ဒီဂရီအစွန်းနားမှာ
မင်းရဲ့ ပုံရိပ်တချို့ကို ဖမ်းမိခဲ့တယ်
တကယ်တော့ 
ငါတို့က ၄၅ ဒီဂရီ စောင်းနေတဲ့ ရပ်ဝန်းတဖက်ဆီမှာ
သိမ်းငှက်တစ်ကောင်နဲ့
ပိုဆမ်တွေလမ်းမပေါ် အများကြီးပဲ
လမ်းမက အပြစ်လား
အသက်များက ကားဘီးအောက်မှာ 
အတုံးအရုန်း … တဖြုတ်ဖြုတ် …
ဆာလောင်ခြင်းဟာ အသက်ကိုမွေးဖို့
ဖြည့်ဆည်းခြင်းက အသက်ဓာတ်များ
မဆန်းဘူးပေါ့
သူလူ ကိုယ်လူပဲ 
ဇိမ်ခံကားပြတင်းက 
ဆေးလိပ်ပြာခြွေချဖူးချင်တယ်
ဒီမှာပဲ ဆုံမှတ်ကပွတ်တိုက်မှု
တစ်ဖက်က အသက်ကိုခြိမ်းခြောက်
တစ်ဖက်မှာ အသက်ကိုပေးအပ်
ဒီမြေကမ္ဘာက အမွေတစ်ခုလို …
သေနတ်ပစ်တမ်းကစားတဲ့အရွယ်တုန်းက
သေနတ်ပစ်တဲ့ဂိမ်းတွေ မကစားခဲ့သင့်ဘူး …

ခွန်တောင်းကိုကျိုက် 
ကွင်းပတ်လည်ပြေး ဘောလုံးကန်ခဲ့သင့်တာ 
ပါဝါဟာ တဖြည်းဖြည်းတက်
မျက်လုံးပဲ မွဲလာခဲ့သလား
ကျွန်သွေးတက်နေခဲ့သလား …
စနစ်တွေကသတ်တဲ့ ဓားသွားစက်တွေ …
အဲ့ဒါကို တပျော်တပါး …
လောကကြီးက တရားပါတယ်ပေါ့
ဓားအောက်က လွတ်ထွက်ဖို့ပြင် …။     ။

19 September 2026  

 

* ပိုဆမ်-  မြေသွားတိရစ္ဆာန်ငယ်တမျိုး 

- 

Join Us @ MoeMaKa Telegram

t.me@moemaka

Please show your support, donate with Zelle

Zelle to moemaka.org@gmail.com "MoeMaKa Multimedia"

Like and Subscribe MoeMaKa YouTube Channel

youtube.com/@moemaka

Like us on MoemaKa Facebook

Follow us on X

X.com/MoeMaKa

#MoeMaKaMedia

#WhatsHappeningInMyanmar