Breaking News

မန်းဖိုးအေး (ဝါးခယ်မ) ● ရွှေတြိဂံ မူးယစ်ဝင်္ကာဘာ (ဘာသာပြန်)

မန်းဖိုးအေး (ဝါးခယ်မ) ●  ရွှေတြိဂံ မူးယစ်ဝင်္ကာဘာ (ဘာသာပြန်)
(မိုးမခစာအုပ်စင်ကောက်နုတ်ချက်)

(မိုးမခ) ဧပြီ ၃၀၊ ၂၀၁၉

● မိတ်ဆက်စကားချီး

"ရွှေတြိဂံ" တဲ့၊ မြန်မာ - ထိုင်း - လော သုံးနိုင်ငံဆက်နေတဲ့မြေ။ ပေါ်ပီပင်တွေစိုက်ကြ။ ဘိန်း - ဟီးရိုးအင်း အမြောက်အများ ထွက်တဲ့ရေမြေ။ မူးယစ်ဆေးဝါး ဘုရင့်နိုင်ငံတော်ရယ်လို့ ကမ္ဘာမှာ ထင်ပေါ်ကျော်ကြားလှပါတယ်။ ခန့်မှန်းချက်အရ အနီး ကပ်ဆုံးနှစ်ကာလပိုင်းအတွင်း ဘိန်းတန်ချိန်ပေါင်း (၂၅၀ဝ) ကနေ (၃ဝဝဝ) အထိထွက်ရှိတာက ရွှေတြိဂံ ရေမြေတော တောင်တွေမှာပါဆိုပြီး ပြောဆိုကြပါတယ်။ ဒီကိန်းဂဏန်းဟာဖြင့် ကမ္ဘာ့ဘိန်းထွက်ရှိမှု စုစုပေါင်းရဲ့ (၇၀) ရာခိုင်နှုန်း ရှိပါ တယ်။ ဒီလို ဘိန်းတန်ချိန်ပေါင်း မြောက်များစွာထွက်ရှိတဲ့ ရွှေတြိဂံမှာ လက်နက်ကိုင်အင်အားစုတွေ ပေါင်းစုံအောင် အခြေချ လှုပ်ရှားကြပါတယ်။ ဘိန်းဘုရင်၊ ဘိန်းရာဇာတွေ အရွှယ်အစားကြီးမားတာရော သေးသေးမွှားမွှားတွေပါ ဒီတောတောင် ရေမြေမှာ အလျှိုလျှိုပေါ်ထွန်းလာကြပါတယ်။ သူတို့ရဲ့ပိုင်နက်နယ်မြေမှာ ခိုင်ခိုင်ခန့်ခန့် စိုးမိုးချုပ်ချယ် လုပ်ကိုင်ရေးအတွက် ရော၊ တိုးချဲ့ရေးအတွက်ပါ ရည်ရွယ်ပြီး၊ တဦးနဲ့ တဦး၊ တဖွဲ့နဲ့ တဖွဲ့ မကြာခဏ ရင်ဆိုင်တိုက်ခိုက် လုယက်ကြပါတယ်။ ကိုယ့်ရဲ့ တပ်အင်အားတောင့်တင်းရေးကို တိုးချဲ့မွေးမြူကြတယ်။ ဘိန်းစိုက်ပျိုးရေးတွေ၊ ထုတ်လုပ်ရေးတွေ၊ သယ်ယူပို့ ဆောင်ရေးတွေ၊ ပြုပြင်မွမ်းမံဖြန့်ဖြူး ရောင်းချရေးတွေကို အပိုင်လက်ဝါးကြီး အုပ်ထားကြပြီး ကမ္ဘာတဝှန်းလုံး ဖြန့်ချိနိုင်ရေး ကို သူ့ထက်ငါ ဦးအောင် အားထုတ်ကြိုးပမ်းကြပါတယ်။ ဒီတော့လည်း မတရားမှုတွေ၊ လိမ်လည်ကောက်ကျစ်မှု အထွေထွေ အပြားပြားအသုံးချပြီး တစ်ကမ္ဘာလုံးကို ဆိုးကျိုးတွေပေးကြလေတယ်။

ရွှေတြိဂံတောတောင်ရေမြေတွေဆီ ပြင်ပလူသားတွေ ဝင်ရောက်ဖို့ရန် အင်မတန်ခက်ခဲလှပါတယ်။ မူးယစ်ဆေးဝါးထုပ်လုပ်မှု၊ ဖြန့်ဖြူးရောင်းချမှုလုပ်ငန်းစဉ်ကို သိနားလည်ဖို့ရန် လွန်စွာမှ ခက်ခဲပင်ပန်းလှပါတယ်။ သူတို့ရဲ့ ဖွဲ့စည်းမှုတွေ၊ လူ့ဘောင် လောက အဝန်းအဝိုင်းကို ကိုင်တွယ်ထိန်းချုပ်ထားတာတွေ၊ တရားဥပဒေစည်းမျဉ်းစည်းကမ်း၊ ပဋိညာဉ်ဆိုတာတွေ၊ ဝိ သေသ ထူးခြားတဲ့ စားဝတ်နေရေးတွေ၊ ဒါ့အပြင် ထိုဒေသတွင်းမှာ မှီတင်းနေထိုင်ကြတဲ့သူတွေရဲ့ အတွေးအမြင်၊ အယူအဆ တွေကို သိနားလည်ဖို့ရန် အင်မတန်မှ ခက်ခဲလှပါတယ်။ ဒီရလဒ်ကဖြင့် ပြင်ပကမ္ဘာနဲ့ ပြတ်တောက်လေတဲ့ တမူထူး ခြားတဲ့ ဝိသေသထူးလူမှုလောကတခုပါပဲ။ ဘာနဲ့အလားတူသလဲဆိုရင်ဖြင့် ဇာပုဝါဖုံးကာထားတဲ့ ကဝေမရဲ့မျက်နှာပါတကား။  မြင် ရသူအတွက် လျှို့ဝှက်နေတယ်။ ထူးထွေဆန်းပြားနေတယ်၊ စိုးထိတ်ဗျာပါဒ အထိတ်တလန့် ကြောက်ရွံ့နေကြတယ်။ အကြောင်းကြောင်းတွေ ဘယ်သို့ဘယ်နဲ့ကြောင့်ပဲ ဖြစ်နေပါစေ၊ ကဝေမရဲ့ပင်ကိုယ်ရုပ်သွင် မျက်နှာပြင်ကိုဖြင့် ဘယ်လိုနည်း နဲ့မှ တွေ့နိုင်၊ မြင်နိုင်မှာမဟုတ်ချေပါလေ။

ဟွမ်တို့မီ - အမျိုးသမီး စာရေးဆရာမပါ။ မူလခရီးစဉ်မှာ ရည်ရွယ်ထားမှုမရှိဘဲ ထင်မှတ်မထားတဲ့ ဘဝရေစက်ကြောင့်လို့ ဆိုရတော့မလား မသိရပါ။ ကြုံကြိုက်တုန်း ရွှေတြိဂံဆီ ထိုးဖောက်ဝင်ရောက်ခဲ့ပါတယ်။ ထိုးဖောက်မှုက တကြိမ်တခါတည်း မဟုတ်ပါချေ။ အကြိမ်ကြိမ်ပါပဲ။ သုံးနှစ်တာ အချိန်ကာလအတွင်းမှာ အကြိမ်ပေါင်း ငါးကြိမ်ရှိပါတယ်။ သူ့ရဲ့စွန်းစားမှုခရီးကို ကြားရသူအဖို့ အံ့သြတုန်လှုပ်သွားကြတယ်။ ရာဇဝတ်မှုတွေ ထူပြောလှတဲ့ကမ္ဘာဖြစ်တာကြောင့် သူ့အစား ကျောချမ်းကြပါ တယ်။ ရင်ဖိုကြတယ်။ သူ့ကိုစိုးရိမ်ပူပန်မိတယ်။

ရွှေတြိဂံဆီ ထိုးဖောက်ဝင်ရောက်ပြီး စူးစမ်းဖော်ထုတ်တဲ့ ပထမဆုံးအမျိုးသမီး စာရေးဆရာမဖြစ်တယ်။ သူတွေ့မြင်ခဲ့ရသမျှ တွေ၊ ကြားသိသမျှ တွေကို မှတ်တမ်းတင်ထားပါတယ်။ သူနဲ့အတူတွဲပြီး သူ့ရဲ့ခင်ပွန်းသည် မစ္စတာ ဟိုကျင်းဝူလည်းပဲ ရွှေတြိဂံထဲ ထိုးဖောက်ဝင်ရောက်ခဲ့ပါတယ်။ တိတ်တဆိတ် ကလေးခိုးရိုက်ခဲ့တဲ့ ဖလင်လိပ်ပေါင်း ငါးဆယ်ရှိနေပြန်ပါသေးတယ်။

သူဟာ ရွှေတြိဂံရဲ့ လူ့ဘောင်လောက လျှို့ဝှက်ချက်တွေကို ရေးသားဖွင့်ချလိုက်ပါတယ်။ အင်မတန်လျှို့ဝှက်နက်ရှိုင်းတဲ့ ရွှေတြိဂံနယ်မြေတခွင်လုံးရဲ့ လူသူအဖွဲ့အစည်းတွေ၊ ဒါ့အပြင်အရောင်အသွေးစုံလင်လှတဲ့ လူတန်းစားတွေရဲ့ နေ့စဉ်နေထိုင် တဲ့ဘဝတွေမှာ သူတို့ရဲ့ ပျော်ကြရွှင်ကြ၊ နှစ်ထောင်အားရ ဟားတိုက်ရယ်မောကြတာတွေ။ စိတ်မာန်ထကြွ ဒေါသပုန်ထ ပေါက်ကွဲကြတာတွေ။ ပူဆွေးဝမ်းနည်းရှိုက်ကြီးတငင် ငိုကြွေးကြတွေကို ကမ္ဘာသူ ကမ္ဘာသားတွေသိရှိရလေအောင် ခရေစေ့ တွင်းကျ လှစ်ဟဖွင့်ချလိုက်ပါတယ်။
ဆရာမ ဟွမ်တို့မီရဲ့ စူးစမ်းလေ့လာမှုက စေ့စပ်သေချာတယ်။ ကလောင်သွားက ထက်လှတယ်။ သရုပ်သကန် ပေါ်လွင် အောင် စီကုံးဖွဲ့ထားနိုင်ပါတယ်။ သူကိုယ်တိုင်ကိုယ်ကျ ဖြတ်သန်းခဲ့တဲ့ ထူးထွေဆန်းပြားပြီး ဘေး အန္တရာယ်တွေများပြားလှတဲ့ မြင်ကွင်းတွေကို ရေးသားနိုင်ခဲ့ပါတယ်။ အလွန် တရာမှ အချိတ်အဆက် ထိမိအားကောင်းလှတဲ့ ဖတ်ချင့်စဖွယ် အံ့ဖွယ်ပုံဝတ္ထု အဖြစ် ဖြစ်ပေါ်လာလေတယ်။

ဘိန်းစိုက်တောင်သူမိသားစုဆီ သူသွားရောက်ခဲ့တယ်။ သူတို့ရဲ့စိုက်ပျိုးဆောင်ရွက်ချက်တွေနဲ့ ဆင်းရဲဒုက္ခတွေကို သူမှတ် သားခဲ့တယ်။ ပတ်သက်စပ်ယှက်မှုတွေကိုအားထားပြီး ဘိန်းဘုရင်တွေ၊ ဘိန်းရာဇာတွေရဲ့ ကြီးကျယ်ခမ်းနားတဲ့ အိမ်ဂေဟာ တွေဆီကို သူ ခမ်းနားထည်ဝါဝင့်ကြွားစွာနဲ့ ဝင်ထွက်ခဲ့တယ်။ (ဖုန်ကျားရှင်)၊ ယဲန်လွန်း၊ ပေါင့်ယုချန် "ကျော်ကြားသူ" တွေနဲ့ တွေ့ဆုံခဲ့ စကားစမြည်တွေ ပြောခဲ့ပါတယ်။ သူတို့တတွေ အရက်သောက်တာ၊ လောင်းကစားကြတာတွေကို တွေ့မြင်ခဲ့ တယ်။ သူတို့ရဲ့ မိသားစုအိမ်ထောင်ရေးဘဝတွေ၊ သူတို့ရဲ့ စိတ်နေစိတ်ထားတွေကို နားလည်ခဲ့တယ်။ ဒါတွေဟာ ဘာနဲ့ အလား တူသလဲဆိုရင်ဖြင့် ရုပ်ရှင်ဗီဒီယိုတွေထဲမှာ ကျားရဲတွင်းထဲ တကိုယ်တော် စွန့်စွန့်စားစား ဆင်းသက်သွားတဲ့ အခန်းကို ရောက်ရှိသွားတဲ့အလားပါပဲ။ စိတ်လှုပ်ရှားဖွယ် အပိုင်းရောက်လေတာနဲ့ အသက်ရှူရမှာတောင် သတိမရတော့ဘဲ တုဏှိ ဘာဝေဖြစ်သွားရပါတယ်။ စာရေးသူ ဟွမ်တို့မီအတွက် ရင်တထိတ်ထိတ် စိုးရိမ်မိတယ်။ ရက်ပတ်ဈေးနေ့ဈေးတွေမှာ ပြောင်ကျကျဘိန်းချရောင်းတာကို သူ မျက်ဝါးထင်ထင် တွေ့မြင်ခဲ့ရပါတယ်။ တကျပ်သား နှစ်ကျပ်သားကနေ ပိဿာ ချိန်အတိုင်းအတာအထိ ဈေးခေါ်ဈေးဆစ် ရောင်းဝယ်ကြပါတယ်။ လူ မဆန်လှတဲ့ မြေတိုက်လှောင်တိုက်ထဲက သေလုနီးပါး နှိပ်စက်ညှဉ်းပန်းခံရတဲ့ အကျဉ်းသားဆိုတာကိုလည်း သူတွေ့ခဲ့မြင်ခဲ့တယ်။

မူးဆစ်ဆေးဝါးစိုက်ပျိုးထုတ်လုပ်ခြင်းဖြင့် ရွှေတြိဂံက သတင်းပျံ့နှံ ကျော်ကြားခဲ့တယ်။ ဒါပေမဲ့ ဒီတောဒီတောင် ဒီရေမြေဟာ တကယ်တော့ အင်မတန်မှ သာယာလှပတဲ့နယ်မြေတစ်ခုဖြစ်တယ်။ ပြတ်တောက်သွားမှုမရှိဘဲ ရှည်လျားဆက်စပ်သွယ်တန်း ထားတဲ့ တောင်သွယ်တောင်တန်းတို့က နိမ့်ချည် တခါ၊ မြင့်ချည်တလှည့်၊ ပြန့်ပြီးနေတယ်။ ကျယ်ပြောလှတဲ့မြစ်ပြင်ကလည်း ငြိမ့်ငြိမ့်ညောင်းညောင်း စီးဆင်းနေလျက်။ နေခြည်ပြောက်မဖောက်ထွင်းနိုင်တဲ့ တောကြီးဂနိုင်ကပါ ဝသုန်မြေပြင်ကို လွှမ်းမိုးဖုံးအုပ်ထားပါတယ်။ သစ်ပင်တွေ၊ မြက်ချုံနွယ်တွေ၊ မာလာပန်းတို့ကလည်း သူ့ထက်ငါလုယက် ပေါက်ရောက် နေကြ ပါတယ်။ ထိုထိုသော သစ်ပင်ပန်းချုံနွယ်ပင်တွေထဲမှာ ရှားပါးပြီး တန်ဖိုး မဖြတ်နိုင်တဲ့ အပင်တွေကလည်း အလျှိုအလျှို ကြားဝင်ညှပ်နေပြန်ပါသေးတယ်။ ဒါတွေဟာ ရုက္ခဗေဒပညာရှင်များနှင့် ခရီးလှည့်လည်သွားကြသူတွေရဲ့ ဥယျာဉ်ခြံကြီး သဖွယ် စောင့်ဆိုင်းလို့နေပါတယ်။ သုတေသန ပြုစူးစမ်းလေ့လာစရာ တစိမ့်စိမ့်ကြည့်ပြီး အရသာခံစည်းစိမ်ယူစရာလှည့်လည် သွားရာ အပန်းဖြေစရာ အဖိုးမဖြတ်နိုင်တဲ့တန်ဖိုးကဖြင့် ကမ္ဘာမြေပြင်ရဲ့ အခြားအခြားသောနေရာတွေနှင့် ရင်ဘောင် တန်းကာ ယှဉ်ပြနိုင်တဲ့တောတောင်ရေမြေလူသူတွေ ဖြစ်ပါတယ်။ ဒါတွေကို ဆရာမ ဟွမ်တို့မီက သူ့ရဲ့ထက်မြက်တဲ့ စုတ် ချက်ကလောင်သွားနဲ့ ရေးသားဖော်ပြထားပါတယ်။

ရွှေတြိဂံဟာ တိုင်းရင်းသားပေါင်းစုံအခြေချနေထိုင်တဲ့ နယ်မြေဖြစ်တယ်။ ရှမ်း၊ ဝ (ခဝ)၊ မျောင်၊ ဟန့် (ဟန်တရုတ်) တွေ နေထိုင်ကြတယ်။ အားလုံးဟာ ကြင်နာသနားစိတ်ထားမွန်မြတ်တဲ့ ထေရဝါဒဗုဒ္ဓဘာသာကို သက်ဝင်ယုံကြည်ကြသူတွေချည်းဖြစ်ကြပါတယ်။ ဒါပေမဲ့ အကြင်နာမဲ့ ရက်ရက်စက်စက လူ့အသက်ကိုသတ်ဖြတ်ရက်တဲ့ မူးယစ်ဆေးဝါး ရောင်းဝယ်ဖောက် ကားမှု တွေနှင့် ပေါင်းကူးချိတ်ဆက်လို့ဖြင့်နေကြပါတယ်။ ရွှေတြိဂံဟာ မြေဆီမြေနှစ် ပေါကြွယ်ဝတဲ့ မြေအမျိုးအစားပါ။ နေ ရောင်ခြည်တန်း အပြည့်အဝဖြာကျလျက် ရှိတဲ့ဒီမြေပါ။ မိုးရေကလည်း လိုအပ်သလောက်ကို သွန်းဖြိုးလို့ပေးပါတယ်။ ပင်ကိုယ်သဘာဝက စပါးဆန်ရေ၊ ကောက်ပဲသီးနှံတွေ၊ သစ်သီးဝလံတွေပေါကြွယ် ဖောသီတဲ့ တောတောင်ရေမြေဖြစ်ပါ လျက်နဲ့ ယခုတော့ဖြင့် တတောတတောင်လုံးမှာ ပေါ်မီပန်းပင်တွေက ရွှေတြိဂံရဲ့ မြေကဗ္ဗလာမှာ ငွါးငွါးစွင့်စွင့်ကြီးစိုးကာ ပွင့် လို့နေချေတယ်။

စာရေးဆရာမဟွမ်တို့မီဟာ အမှောင်ထုနှင့်ပြစ်မှုတွေကို ရှုမြင်နေရုံမျှ သာမဟုတ်သေးပါ။ မှောင်မိုက်မှု၊ ပြစ်မှုပေါ်ပေါက်လာမှု အရင်းအမြစ်ကနေဖြစ်ပေါ်လာတဲ့ ဆင်းရဲမွဲတေမှုတွေကိုပါ တလက်စတည်း စူးစမ်းရှာဖွေပါတယ်။ စီးပွားရေးအောက်တန်းနောက်တန်းကျမှုကနေ ရာဇဝတ်ပြစ်မှုတွေ ကျူးလွန်စေတဲ့အစပြုရာ ပျိုးခင်းဖြစ်တယ်။ ရွှေတြိဂံကတောသူ့တောင်သားတွေ မှာ မှီခိုအားထားစရာ ဘာကမှမရှိရှာ။ ပေါ်ပီပင်စိုက်ပျိုးခြင်းကသာ သူတို့အတွက် ရှင်သန်ရပ်တည်နိုင်ကြရမှာပါ။

ဒါကြောင့်လည်း နှစ်ကာလရှည်ကြာစွာ ဒီမူးယစ်ဆေးဝါးကိုပဲစိုက်ပျိုး ထုတ်လုပ်ပြီး အသက်ရှင်သန်ကြရပါတယ်။ ဒီရေမြေ ဒေသရဲ့ စီးပွားရေးလုပ်ငန်းက ဧကစာရီသီးနှံတစ်ခုတည်းကိုသာ အလီလီစိုက်ပျိုးတတ်ကြပါတယ်။ တခြား ရွေးချယ်စရာတွေ အရှင်းမရှိချေ။

"ပေါ်ပီကိုမစိုက်လို့မရဘူးလား" အဲသလိုမေးတဲ့သူက ဘိန်းစိုက်တောင်သူကို မေးခွန်းထုတ်မေးခဲ့ဖူးတယ်။ ဘိန်းစိုက်တောင် သူက တုန့်ဆိုင်းမနေဘဲ ပြန်ဖြေလိုက်တယ်။

"မစိုက်လို့ဖြစ်ကို မဖြစ်ဘူး။ ဝမ်းဝဖို့ ဖြည့်ရမယ်လေဗျာ။ ဘေးဘိုးစဉ် ဆက်ကတည်းက ဘိန်းကိုပဲ စိုက်တတ်တယ်ဗျ။"

သမိုင်းကချန်ရစ်ခဲ့တဲ့ လေးလံတဲ့ဝန်ထုပ်ဝန်ပိုးကြီးက ဒီနယ်မြေဒေသကလူတွေကို နက်ရှိုင်းတဲ့နွံကို နစ်စေခဲ့တယ်။ ကိုယ့် ဖာသာဆွဲနှုတ်လို့ မရရှာ။ ဒါ့အပြင်ဒီနယ်မြေက ခံယူချက်ချင်းမတူကြတဲ့ အမျိုးသားလွတ်မြောက်ရေးလက်နက်ကိုင် အဖွဲ့အစည်းဆယ်ဖွဲ့ကျော်ကျော်တို့က မူးယစ်ဆေးပစ္စည်းကနေ တိုးချဲ့လိုက်တဲ့ အင်အားကိုမှီခိုအားထားကြပြီး လက်နက်ဝယ်ယူပြီး မတော် မတရားမှုတွေကိုသာ လုပ်ဆောင်ကြအမြတ်ထုတ်နေကြတယ်။ ဟောဒီနယ်မြေဒေသမှာ စီးပွားရေးအသွင်သဏ္ဍာန် ဖွဲ့စည်းမှုကိုဘယ်အဖွဲ့ကမှ နှစ်သက်လိုလားမှု မရှိကြပါ။ စီးပွားရေးအဆောက်အအုံ အမျိုးအစားထဲကသာ ပိုမိုရေးပန်းစား စေပါတယ်။

မကြာခင်က သတင်းတရပ် ပျံ့လွှင့်လာပါတယ်။ ရွှေတြိဂံ မြန်မာပိုင်နက်က မိုင်းလားအထူးဒေသ (၄) မှာ မူးယစ်ဆေးဝါး လက်နက်ကိုင် အဖွဲ့အစည်းကို ရှင်းလင်းပစ်ခဲ့ပြီးတဲ့နောက် မူးယစ်ဆေးဝါး တိုက်နှိမ်နင်းရေးကို အရှိန် အဟုန်ပြင်းပြင်းဖြင့် အလျင်အမြန်ဆောင်ရွက်ကြပါတယ်။ ဒါဟာ တရုတ်ပြည်ယူ နမ်ပြည်နယ်ရဲ့ မန်ဟိုင်းခရိုင်နှင့် ထိကပ်နေပါတယ်။ မန်ဟိုင်းရှိတရုတ်ပြည် ကလူတွေ နယ်မြေဖြတ်ကျော်ပြီး အထူးဒေသက မြန်မာတွေ အစိမ်းရောင် လုပ်ငန်းတွေကို လုပ်ဆောင်ကြပြီး မူးယစ်ဆေးဝါး တိုက်ဖျက်နှိမ်နင်းရေးလုပ်ငန်း စဉ်ကို အကူအညီပေးကြတဲ့ လုပ်ငန်းဖြစ်တယ်။ အတိတ်ကာလ ပေါ်ပီ စိုက်ဧက မို့ ငါးသောင်း လယ်ယာမြေပေါ်မှာ စပါး၊ လက်ဖက်၊ ကြံသီးနှံတွေကို အစား ထိုးစိုက်ပျိုးလိုက်ကြပါတယ်။

(မှတ်ချက်- တရုတ် (၁)= မြန်မာ ၁/၃ ဧက၊ မြန်မာပြန်ဆိုသူ )

ဤစာအုပ်ကိုရေးသားပြုစုတဲ့ စာရေးဆရာမဟာ ပီတိလျှမ်းတဲ့ စိတ် နှလုံးကို ရင်ဝယ်ပိုက်ပြီး ရှမ်းတိုင်းရင်းသားတို့ရဲ့ တောင်စဉ်တောင်တန်းတွေ က ကျေးရွာတွေကို လှည့်လည်ဖြတ်သန်းခဲ့ပါတယ်။ လူဦးရေ ခြောက်ရာခန့်နေ ထိုင်တဲ့ ဒီတောင်ပေါ်ရွာမှာ ရှေးအစဉ်အဆက်ကတည်းက ပေါ်ပီစိုက်ပျိုးခဲ့ ကြတယ်။ ဘိန်းစိမ်းတွေကို အသုံးပြုပြီးစားနပ်ရိက္ခာတွေနဲ့ ဆားပွင့်တွေကို ဖလှယ်မှုပြုကြပါတယ်။ ယခုအဲဒီရွာဟာ ကောက်နှံစပါးကို ပြောင်းလဲ အစားထိုး စိုက်ပျိုးချေပြီး။ ခုတလောနှစ်ကာလတွေမှာ တလှိုင်လှိုင် ရိတ်သိမ်းနိုင်ခဲ့ပါ တယ်။ ကိုယ့်စိုက်ပျိုးမှုက ကိုယ့်ဝမ်းကိုပြည့်ပြည့်ဝ၀ ဖြည့်တင်းနိုင်ရုံ တင်မကသေး ပါ။ အနည်းအကျဉ်းကိုတောင် ပြင်ပဆီ ဖြန့်ဝေရောင်းချနိုင်ပါသေးတယ်။ ၎င်းတို့ရဲ့သက်မွေးဝမ်း ကျောင်းမှုဟာ မူးယစ်ဆေးဝါးကုန်ပစ္စည်းမျိုးနဲ့ လုံးဝကို ကင်းကင်းပြတ်ပြတ် ဖြစ်သွားပါပြီ။

ရွှေတြိဂံရဲ့ ရှေ့အနာဂတ်ကား မျှော်လင့်ချက် ရောင်ခြည်တန်းတွေ ထွန်းလင်းတောက်ပလို့နေချေပြီ။ ကမ္ဘာ့နိုင်ငံအသီးသီးက လက်ချင်း ပူးပေါင်း ချိတ်တွဲပြီး ဘိန်းရာဇာတွေကို အပြင်းအထန်ထိုးနှက်နေတဲ့ ဒီလှိုင်းအောက်မှာ ဘိန်းဘုရင်နိုင်ငံတော်ကြီးဟာ လုံးဝကို ကွယ်ပျောက်သွားပါတော့မယ်။ တစ်ချိန် တုန်းက မာန်စွယ်တငေါငေါဖြင့် မာန်မာနတွေတောင်လွှားလှတဲ့ ဘိန်းဘုရင်တွေ၊ ဘိန်းရာဇာတွေ မကြာဝေးတော့တဲ့ကာလမှာ အရေးယူအပြစ်ပေးခံရမှာ ဧကန် မုချမလွဲပါ။ ရွှေတြိဂံက အခြေချနေထိုင်ကြသူတွေ ဒုက္ခဆင်းရဲခြင်း ဘေးအတွင်းမှ လုံးဝရုန်းထွက်နိုင်ကြပါတော့မယ်။ သူတို့ရဲ့ဘဝသစ်ဟာ စတင်နေချေပြီတကား။