ဒေါင်းလန်း၊ ကျော်ကျော်(မြရည်စမ်း)၊ ငဇတို့၏ ကြေကွဲဖွယ်ဖားကန့်ဖြစ်ရပ်အပေါ်ခံစားမှုကဗျာများ

ဖားကန့်ကျိန်စာ ပျက်ပြယ်ပါစေ

ဒေါင်းလန်း

- သယံဇာတ ကျိန်စာ

မျက်နှာလိုက်လွန်းလှပါကလား။

- လက်လုပ်လက်စားတို့ရဲ့ အိပ်မက်

ဒင်း နင်းခြေရက်ပလေ။

- မျှော်နေကြတဲ့ မိဘများ အိမ်သူများနဲ့ သားသမီးဘုစုခရုများရဲ့

ရွှေတောင်ကြီးများ ပြားပြားဝပ်ပြိုဆင်းသွား

ကူသူမဲ့ ကယ်သူမဲ့ ဘဝများစွာ ပျက်ယွင်းခဲ့ပေါ့။

- နင်းပြား ဆင်းရဲသားအလွှာ ကျိန်စာသင့် ဘဝများရဲ့ဝေဒနာ

ကျိန်စာတိုက်ခဲ့သူများ မသိသယောင်ပြုရက်။

- လူ့ဘောင်လောက အရုပ်ဆိုးလွန်းလှ

မြေနိမ့်ရာ လှံစိုက် သူ့ထိုက်နဲ့သူ့ကံဆိုပါလား။

- သယံဇာတအနှစ် ကုန်စင်အောင်ညှစ်ထုတ်သွားသူများ

ရေမဆေးမြေစာပုံနဲ့ အန္တရာယ်တွေ ချန်ထား

ဘယ်သူသေသေ ငတေ မာရင်ပြီးစတမ်းလား။

- အနိစ္စ ဒုက္ခ အနတ္တ ဘယ်အရာမှ မမြဲဆိုသော်လည်း

အကုသိုလ်အမှုမှန်သမျှ ပြုသူထံပြန်သွားကြစမြဲ။

- သယံဇာတ မြေစာပုံအောက် ကျရောက်ပျောက်ဆုံးသူတို့ရဲ့

အိပ်မက်များ မျှော်လင့်ချက်များ ပို့သခဲ့သောမေတ္တာများ

ကောင်းရာ သုဂတိ ရောက်ပါစေ။

ဖားကန့်ကျိန်စာ ပျက်ပြယ်ပါစေ။

ဇူလိုင် ၃၊ ၂၀၂၀

...

ဖားကန့်

ကျော်ကျော်(မြရည်စမ်း)

ကျောက်စိမ်းတူးထားတဲ့

​ချိုင့်ဝှမ်းကြီးတွေ

မြေစာပုံကြီးတွေ

အကြီးကြီးပဲ။

ရောက်ခါစ ကျွန်တော်က

ဒီမှာ

စစ်ကားရိုက်ရင်

သိပ်ကောင်းမှာပဲ ပြောမိတယ်။

အကြီးအကဲက ပြောတယ်

ရင်းရင်းနှီးနှီး

ချစ်ချစ်ခင်ခင်

အပြန်အလှန်အားကိုးအားထားနဲ့

ကျည်ဆန်တစ်ခွံမှ

မကျ  ခဲ့ဖူးဘူးတဲ့။

ချိုင့်ဝှမ်းကြီးနဲ့

မြေစာပုံကြီးတွေ

ချစ်ခင်နေကြပုံ

အတူယဉ်တွဲနေထိုင်ကြပုံ

မျက်စိထဲမြင်လာတဲ့အထိ

ငြိမ်းချမ်းစွာပေါ့

ကျန်းမာချမ်းသာစွာပေါ့။

ကားဘီးကြီးတွေက

အိမ်လောက်နီးနီး

ကြီးမားကြပါပေတယ်။  ။

၄၊ ဇူလိုင်၊ ၂၀၂၀

...

ဖားကန့်

ငဇ

ဆိုင်ကယ်ကျောက်လေး မရရင်လည်း

ထမင်းစားကျောက်လေးတော့ ရမှာပါလေ

ရေမဆေးရဲ့ ရင်ထဲမှာ ...

မြေစာပုံအောက် ဆိုင်ကယ်ကျောက်

နွံလှိုင်းအောက် ထမင်းစားကျောက်

ဒီဘဝမှာ ထမင်းတွေဝေးခဲ့ပြီ အမေ

မိုးတွေ အရမ်းရွာတယ်

ဆိုင်ကယ်အသစ်လေးနဲ့ အိမ်မပြန်နိုင်တော့ဘူး။

၄၊ ၇၊ ၂၀၂၀