ဆားပုလင်းသာပိန် — ရာဇဝတ်အိုးထဲမှာ ကြင်စိုးကိုထားရစ်ခဲ့ (၉)
ဆားပုလင်းသာပိန် — ရာဇဝတ်အိုးထဲမှာ ကြင်စိုးကိုထားရစ်ခဲ့ (၉)
(မိုးမခ) ဖေဖော်ဝါရီ ၁၄၊ ၂၀၂၂
ဟိုးရှေးရှေးက ‘ဖင်ပုတ် ခေါင်းပုတ်’နိုင်ငံကြီးမှာလို့ အစချီပြီး ပြောရမလောက်အောင် လူတွေက ရပ်ကွက်ထဲမှာလည်း ဖင်ပုတ် ခေါင်းပုတ်ကြ၊ ဖေစ့်ဘွတ်ပေါ်လည်း ဖင်ပုတ် ခေါင်းပုတ်ကြ၊ နေရာအနှံ့ ဖင်ပုတ် ခေါင်းပုတ်ကြပါတယ်။ တချို့တွေများဆို ခလုတ်တိုက်ရင်တောင်’အောင်မယ်လေး ဖင်ပုတ် ခေါင်းပုတ်’လို့သာ အော်ကြတော့သတဲ့။
ဒီလောက် ပေါပေါပဲပဲ ဖြစ်လာလေတော့ ဖင်ပုတ် ခေါင်းပုတ်အကြောင်ဆို မရေးလို့ ဆားပုလင်းသာပိန်
တို့အဖွဲ့က စိတ်ပိုင်းဖြတ်ထားကြပါတယ်။ ဒီရက်ပိုင်းအတွင်း ပေါက်ကြားလာတဲ့ “ကြိုးစားတဲ့ကြားက လူကယ်ပြန်ဝန်ကြီးဌာနရဲ့ စွမ်းအားမကောင်းသေးဘူးဆိုတာ ဝန်ခံပါတယ်” ဆိုတဲ့ အီစီကလီအသံရဲ့ နောက်က၊ “အဲဒီလိုဆိုရင်တော့..ဟဲ...ဟဲ...ဟဲ”လို့ အစချီပြီး ပြောလာတဲ့ ကြင်စိုးရဲ့ ပြီတီတီ အသံဖိုင်အကြောင်းကိုတောင် ဆုံးဖြတ်ချက် ထိခိုက်မှာစိုးပြီး မရေးဖို့ ချုပ်တည်းခဲ့ကြတာပါ။ စွမ်းအားမကောင်းတဲ့သူကို ကြင်စိုးတစ်ယောက် ဘာလုပ်တော့မယ် ဆိုတာ ကိုယ့်ဘာသာ ကိုယ်သာပဲ စဥ်းစားကြည့်ကြပါတော့။
ဒီတော့ ချိပ်လုံချည်တွေ၊ ဒေါက်မြင့်ပုံတော်ဖိနပ်တွေနဲ့ ဖလန်းဖလန်းထကြသူများ အကြောင်းနဲ့ပဲ စလိုက်ကြတာပေါ့။ တချို့ သတင်းလိုက်သူများက ပိုးထည်တိုက်တွေ ဘာတွေသွားပြီး ချိပ်ဘယ်နှစုံ ရောင်းရတယ် ဆိုတာ စုံစမ်းကြသတဲ့။ ဒါကလည်း လုပ်သင့်လုပ်ထိုက်တဲ့ ကိစ္စပါ။ ဒါပေမဲ့ ဆားပုလင်းသာပိန်တို့ အဖွဲ့ကတော့ သူများတကာထက် ထောက်လှမ်းရေး စွမ်းရည်ပိုမြင့်မားလေတော့၊ ပိုအတွင်းကျတဲ့သတင်းကို မရရအောင် စုံစမ်းကြပါတယ်။ အတွင်းသတင်းဆိုတဲ့အတိုင်း ဘော်လီတွေ၊ ဘရာတွေ ရောင်းတဲ့ဆိုင်တွေက အရောင်းစာရင်းနဲ့ ပြန်တိုက်စစ်ကြည့်လိုက်တော့၊ တိုက်တိုက်ဆိုင်ဆိုင် ချိပ်လုံချည်အရေအတွက်တွေနဲ့ ကွက်တိဖြစ်နေပါရော့လား၊ ကဲ ဖြည့်စွက်ပြီးသာတွေးကြည့်လိုက်ကြပါ။
ပြောလက်စနဲ့ မထူးတော့ပါဘူး။ နောက်ထပ် တိုးတိုးတိတ်တိတ် ရလိုက်တဲ့ သတင်းအရဆိုရင် ‘G for General’ ဆိုတဲ့ ဆောင်ပုဒ်ကို ကိုင်စွဲထားကြတဲ့ ဗိုလ်ချိတ်ကြီးများရဲ့ အလုအယက်အားပေးမှုနဲ့ G String (ဂျီစထရင်း) တွေပါ အတော်ရောင်းကောင်းသွားသတဲ့။ ဆန္ဒရှိရင်တော့ ပြေးကြည့်စရာမလို၊ တွေးကြည့်ရုံနဲ့ ကြင်စိုးတို့အဖွဲ့ ဝတ်စားထားတာကို ကွက်ကွက်ကွင်းကွင်း မြင်နိုင်ပေမယ့် ‘အော့အော့’လို့သာ ဆိုပြီး နှာခေါင်းရှုံ့ ၊ မျက်နှာလွှဲလို့ အတွေးထဲကတောင် အမြန်မောင်းထုတ်လိုက်ကြမယ်ဆိုတာ သံသယမရှိပါဘူး။
ဆက်ပြီး ဖောက်သည်ချမယ့် အကြောင်းကတော့ ဆားပုလင်းသာပိန်တို့အဖွဲ့ ရေသာခိုပြီး ဘာမှအားစိုက်ထုတ် စရာမလိုပဲ ရရှိလိုက်တဲ့ သတင်းအချက်အလက်တွေ ဖြစ်ပါတယ်။ဘာဖြစ်လို့လဲဆိုတော့ ‘ဂရုမစိုက်ခြင်းအနုပညာ’မှာ ပါဝင်ထားကြသူများပီပီ စုံစမ်းထောက်လှမ်းခြင်း လုံးဝမပြုလုပ်ဖို့ ဆုံးဖြတ်ထားတဲ့ ကြင်စိုးတို့ပွဲနဲ့ ပတ်သက်တာတွေ ဖြစ်လို့ပါ။
ဒါပေမယ့် အခုကာလက ဖရဲသီးလှိုင်လှိုင်ပေါ်တဲ့ရာသီဆိုတော့ သူတို့ပို့ပေးတဲ့ ညစာစားပွဲသတင်းကို ဖတ်ကောင်းအောင် နည်းနည်းပါးပါး ဖြည့်စွက်ရေးသားလိုက်ရုံပါပဲ။ ဖတ်ရှုပြီး မြင်ယောင်သာ ကြည့်လိုက်ကြပါတော့၊ ဒီလိုပါ။
ကြင်စိုးကို လူလည်လို့ခေါ်ရမလား အရူးပါးလို့ပဲပြောရမလားမသိ၊ ဒီတခါ တခြားညစာစားပွဲတွေမှာလို စားပွဲထိပ်မှာ အခန့်သား ထိုင်မနေပဲ၊ မီနူးစာရွက်လေးတကိုင်ကိုင်နဲ့ တပ်လက်ကိုင်ရှိပြီး ရှေ့တန်းကိုကွပ်ကဲ နေရတဲ့ ဗိုလ်ချိတ်ဂျန်လီများကို စကားရောဖောရော လာလုပ်ပါတယ်။ ကြင်စိုးတို့ဘက်မှာ ထက်ထက်မြက်မြက် ဂျန်ဇီတွေသာ အုံနဲ့ကျင်းနဲ့မရှိတာ၊ ထူထူထိုင်းထိုင်း ကြောက်ကြောက်လန့်လန့် ဂျန်လီတွေကတော့ ဒီမို ရပ်ကွက်ဘက်ကလိုပဲ ရှိပါတယ်။(စာမျက်နှာပေါ်မှာ အဆင်ပြေအောင်ရေးထားရတဲ့ ဂျန်လီကို ပြောနေကျအသံထွက်နဲ့ပဲ လွတ်လွတ်လပ်လပ် ထွက်နိုင်ပါတယ်)။
“တွေ့ရတာဝမ်းသာတယ်ဟေ့၊ ပဒေသာမိုင်းနဲ့ လွတ်လာကြတယ်ပေါ့” ထုံးစံအတိုင်း ဘလွတ်ရွှတ်တ၊ပေါက်ပန်းလေးဆယ် ထွက်တတ်တဲ့ ကြင်စိုးပါးစပ်က အခုလည်းပြောသင့်၏ မသင့်၏ စဥ်းစားမနေတော့ပဲ အဲဒီလို စကားစလိုက်တယ်။
တချို့ ဗိုလ်ချိတ်ငယ်လေးများက မျက်နှာမကောင်း၊ သူတို့အောက်ကတပ်တွေ တကယ်ပဲ ပဒေသာမိုင်းနဲ့ အီစလံ ဝေဖူးကြတယ်လေ။
”ကဲ ... ဒီမှာကြည့် မင်းတို့တတွေ မိုင်းကွင်းထဲမှာ ကြောက်ဒူးတုန်နေတုန်း ၊ ဘကြင်စိုးကိုယ်တိုင် အချိန်ပေးစီစဥ်ရေးဆွဲထားတဲ့ ဒီညအတွက်မီနူး၊ အဘဖတ်ပြမယ်၊ စားချင်တာရွေးကြ၊ ဘာမှ အားနာစရာ မလိုဘူး၊ ငါတို့ ကုန်တာမှ မဟုတ်တာ၊ ပြည်သူတွေရဲ့ပိုက်ဆံပဲ” လို့ စပ်ဖြီးဖြီးပြောပြီး သူ့မီနူးဇာတ်လမ်းကို စဖို့ပြင်လိုက်ပါတယ်။
“ကဲ ... ပထမဦးဆုံးက ‘မုန့်ဟင်းခါး’၊ ဘယ်သူစားမလဲ”၊
အားလုံးကငြိမ်နေကြတော့မှ
“ဟုတ်သားပဲ၊ မင်းတို့တ တွေက နေ့တိုင်းနေ့တိုင်း မုန့်ဟင်းခါးဆို မမြင်ချင်အဆုံး ဖြစ်နေကျတဲ့သူတွေဆိုတော့ ဘယ်စားချင်ပါ့မလဲ၊ ဆောရီး၊ နောက်တမျိုးရွေးကြမယ်”လို့ပြောလိုက်တယ်။
“ဒန်ပေါက်စားကြမလား၊ တိုင်းရင်းသား အစားအစာတွေပဲကျွေးချင်လို့ ဒန်ပေါက်တောင်မှ ’ကချင်ဒန်ပေါက်’ ကို ရွေးထားတာ၊ စားပြီးရင် ဆွေတွေမျိုးတွေ မေ့သွားမယ် သိတယ်မဟုတ်လား ...
♪ ကချင်မြေကိုလာပါ့ တကယ် ဆော်တယ်နော်♬
♪ကချင်မြေကိုလာပါ့ တကယ်ဆော်တယ်နော်’♬
♪ကချင်မြေကိုလာပါ့ တကယ်ဆော် တယ်နော်♬
ကြင်စိုးက သူဟိတ်ဟန်မရှိတာ ပေါ်စေချင်လို့ အပျော်အပျက် သီချင်းဆိုပြလိုက်တော့မှ ပိုဆိုးသွားပါတယ်၊ လောလောလတ်လတ် ကချင်ဘက်မှာ တပ်ရင်းလိုက်ပြုတ်ထားတဲ့ ဗိုလ်ချိတ်ငယ်လေး ခမျာ မျက်နှာဇီးရွက်လောက်သာ ကျန်ပါတော့တယ်။
“အစက ‘ကချင်စကောထမင်း’ ရွေးထားတာ၊ ‘ကိုးကန့်စကောထမင်း’ကလည်း အခုနောက်ပိုင်း နံမည်ရ လာလို့ ပြန်ပြောင်းလိုက်တာ၊မင်းတို့အတွက် အပြောင်းအလဲဖြစ်အောင်ပေါ့၊ ဘယ်ကဟာပဲဖြစ်ဖြစ်ပါ စားပိုး နင့်အောင် စားချင်စရာတွေပဲကွ” ကိုးကန့်ကလည်း လက်စလက်န မသေးဘူး၊ ဟုတ်တယ်မဟုတ်လား။"
ကြင်စိုးအတည်ပြောတာလား၊နောက်နေတာလား မသိလို့ ‘ဟုတ်’ဆိုတဲ့အသံတိုးတိုးတွေက နည်းနည်းပါးပါးပဲ ထွက် လာပါတယ်။
“ထူးထူးခြားခြား အသစ်ထည့်ထားတာလေးတွေလည်းရှိတယ်၊ အရင်တုန်းကဆို ကယားလက်ရာကို စဥ်းတောင်မစဥ်းစားမိဘူး၊ ဒီမှာတွေ့လား ‘မက်ခါသီးနိုင်းချင်းနဲ့ ကယားဝက်အူချောင်းတို့၊ ကယားအမဲလုံးကြော် တို့’ မင်းတို့ဆွေမျိုးတင်မကဘူး၊ အိမ်က မော်ဒယ်အောက်နေတဲ့ မိန်းမတွေတောင်မေ့သွားမယ် ”ပြောရင်းနဲ့ မဒမ်ကြင်စိုးများ ကြားသွားလေမလားဆိုပြီး ခိုးကြည့်လိုက်ရသေးတယ်။ ပြီးတော့လေသံတိုးတိုးနဲ့ “မဲလုံး ရှေ့တော့သွားပြီး ’အမဲလုံးကြော်’ အကြောင်းမပြောနဲ့နော်၊ သူ့ကိုစောင်းပြောတယ် ထင်နေအုံးမယ်” လို့ သတိ ပေးလိုက်တယ်။
“နောက်ဟင်းအသစ်တွေက ဘာလဲဆိုတော့ ဒီမှာတွေ့လား ‘ချင်းရိုးရာ နွားနောက်သားဟင်း’၊ရှားရှားပါးပါး ရထားတာဆိုပြီး အသားကုန်မစားလိုက်နဲ့၊ဗိုက်ပွင့်သွားမယ် ‘ချို’ပါ ထည့်ချက်ထားတာ။ ဟား..ဟား.. နောက်တာပါကွ၊ ဟင်းထဲမှာ ‘ချို’မပါ ပါဘူး။ လန့်မသွားပါနဲ့”။ မင်းတို့ကြည့်ရတာ ချင်းပြည်ဘက်မှာ ခဏခဏ ဟိုပွင့်၊ ဒီပွင့် ဖြစ်နေကျပုံစံမျိုး ပါလား။ ချင်းပြည်နယ်ဘက်ကို ကွပ်ကဲနေရသူတွေက ကြင်စိုးနဲ့အတူ ဟန်ဆောင်ပန်ဆောင်တောင် လိုက် မရယ်နိုင်ရှာပါဘူး။
“ငါတို့တိုင်းရင်းသား အစားအစာတွေက အရသာသိပ်ရှိတော့ အဲဒီဘက်တွေ ရှေ့တန်းထွက်ကြရင် တချို့ဆိုရင် ပြန်တောင် ပါမလာကြတော့ဘူးဆို၊ အစားမက်ပြီး ကျန်နေရစ်ခဲ့တာဖြစ်မှာပေါ့၊ ဒီကောင်တွေခက်ပါတယ်ကွာ အဲဒီလောက် ငတ်ကြီးကြရသလား” လို့လည်းပြောလိုက်ပါတယ်။လက်နက်ထောက်ပံ့ရေး၊ လေ့ကျင့်ရေးအလုပ်တွေ ဝင်လုပ်ပေး မိသလို ဖြစ်သွားမှာကလည်းစိုးရသေးတယ်”။ အဲဒီကျရင် ယောက်ဖကြက်ဥတိုက်တဲ့ ကြင်စိုးဆိုပြီး အခေါ် ခံ ရဦးမှာ။ငါကိုက ရှည်ကဲပြီး အာဏာသိမ်းမိလိုက်တာ၊ ကဲ စိတ်ရှုပ်စရာတွေ ထားလိုက်ပါကွာ၊မီနူးဆက်ဖတ်ကြ ရအောင်။
ဘာမှမစားမသောက်ရသေးပဲ သူ့ဒဏ်ကို ပိုခံလိုက်ရသူကတော့ သူ့နားကပ်ထိုင်မိတဲ့ ဗိုလ်ချိတ်ငယ်လေးပါ၊ ကြင်စိုးရဲ့အားရပါးရ အပြောကြောင့် သူ့ မျက်နှာကို တံတွေးတွေလာစင်နေတဲ့ အတွက်ပါ။ ပေါ်တင်ကြီးလည်းမသုတ်ရဲတော့ စကားဝိုင်းကြာလာတာနဲ့ အမျှ တံတွေးစက်တွေ ဗရပွနဲ့ဖြစ်လို့၊ ကြင်စိုးကြောင့် တံတွေးခွက်ထဲမျောရပုံ နောက်တစ်နည်းလို့လည်း ပြော နိုင်ပါတယ်။
ဒါနဲ့တင် မရပ်သေးဘူး၊ ဆက်လိုက်သေးတယ် “မူလလက်ဟောင်း ကရင်ဆော်ဒါနော် ပေါ့သေးသေး မဟုတ် ဘူး၊ လျှော့မတွက်လိုက်နဲ့၊ ‘ရန်ကုန်အစိုးရကာလ’ကို ပြန်သတိရလိုက်”တဲ့။
ဆားပုလင်းသာပိန်
t.me@moemaka
#MoeMaKaMedia
#WhatsHappeningInMyanmar
Posts
