ကိုလူမိုဃ်း - ​ရေ​လောင်းခံရခြင်း (၂)

ကိုလူမိုဃ်း - ​ရေ​လောင်းခံရခြင်း (၂)

(မိုးမခ) ဧပြီ ၁၃၊ ၂၀၂၂

(၁)

သင်္ကြန်ပြီးလို့ မြန်မာနှစ်ဆန်းတစ်ရက်​နေ့အ​ရောက်မှာ ​အကျဥ်းကျ ၈၀၀ ဝန်းကျင်ကို ပြစ်ဒဏ်​လျှော့​ပေါ့ပြီး လွတ်ငြိမ်းခွင့်​ပေးတယ်။ ​ထောင်တွင်းတရားရုံးမှာ ဟန်​ဆောင်ပန်​ဆောင် အမှုရင်ဆိုင်ဆဲ အချုပ်သားဖြစ်​နေတဲ့ ၅၀၅-က​တွေထဲက တစ်​ယောက်မှမပါပါဘူး။ သင်္ကြန်တွင်းတုန်းက အခြားပုဒ်မ မပါတဲ့ ၅၀၅-က သက်သက်စာရင်း​တွေ လာ​ကောက်ပြလိုက်၊ အဖမ်းခံရတဲ့ထဲမှာပါတဲ့ ဝန်ထမ်း စီဒီအမ်စာရင်း လာ​ကောက်ပြလိုက်နဲ့ ​ယောက်ယက်ခတ်​လောက်​အောင် ကျ​နော်တို့​တွေ ​ရေ​လောင်းခံရပါတယ်။ မအလ အာဆီယံအစည်းအ​ဝေးမှာ ကတိကဝတ်ခံလာတယ်လို့ သတင်း​တွေမှာ ​တွေ့​တော့လည်း ​​မျှော်လင့်စိတ်​တွေနဲ့ ​​ရေ​လောင်းခံလိုက်ရတာပဲ။ နား​တွေ​တောင် အ​တော်အူသွားတယ်လို့ ​ပြောရမှာပါ။ ​​ထောင်ထဲ​ရောက်တာ လနဲ့ချီရှိသွားတဲ့အခါမှာ အ​တော်​လေးအ​ရေထူလာပါပြီ။ ​တော်ရုံတန်ရုံ ​ရေ​လောင်းတာ​လောက်ကို မတုန်လှုပ်​ချင်တော့ပါဘူး။ 

တစ်ရက်​သော ​မေလဆန်းမှာ​တော့ ကျ​နော်တို့အခန်းကို ရှာ​ဖွေ​ရေးလုပ်ပါတယ်။ ပြဿနာအဖုအထစ် အနည်းငယ်လည်း ဖြစ်ခဲ့ပါတယ်။ ရှာ​ဖွေ​ရေးလုပ်တဲ့အခါမှာ ဝါဒါ​တွေရဲ့ ရှာ​ဖွေစစ်​ဆေးမှုကို သက်​သေခံအ​နေနဲ့ ကြည့်ဖို့ နှစ်​ယောက်သုံး​ယောက်မျှပဲ အခန်းတွင်း ချန်​နေရပြီး ကျန်သူ​တွေအားလုံး အခန်းပြင်ဘက် ​ကော်ရစ်ဒါမှာ ပုံစံထိုင်​နေကြရပါတယ်။ ဝါဒါ​တွေကလည်း ​စောင့်ကြပ်ကြည့်ရှု​နေကြပါတယ်။ ထိုအထဲက ဝါဒါတစ်​ယောက်ဟာ ​ကော်ရစ်ဒါက​နေ ​အောက်ကို ပက်ခနဲ ကွမ်းတံ​တွေး​ထွေးချလိုက်ပါတယ်။ အဲသမှာ ကျ​​နော်တို့ထဲက တစ်​ယောက်က ဒီလို စည်းကမ်းမဲ့မ​ထွေးသင့်​ကြောင်း၊ နံရံ​တွေမှာ ကြမ်းခင်း​တွေမှာ ကွမ်းတံ​တွေး ​ပေကျံ​နေရင် ကျ​နော်တို့​တွေကိုပဲ ​ဆေး​ကြောသုတ်သင်ခိုင်း​ကြောင်း စသဖြင့် ​ပြောလိုက်ပါတယ်။ ထိုဝါဒါဟာ သူ့လုပ်ရပ်သူ ရှက်ရ​ကောင်းမှန်းမသိဘဲ မ​ချေမငံ ပြန်ဆက်ဆံပါတယ်။ အခြားဝါဒါတစ်​ယောက်က ဝင်ထိန်း​လိုက်မှ အကျယ်အကျယ် ပြဿနာ မဖြစ်​လိုက်ရတော့ပါ။ 

ည​နေအိပ်​ဆောင်ပိတ်ချိန် ပုံစံထိုင်လူစစ်ပြီးတဲ့အခါ အ​ဆောင်မှူးက သူ့ထုံးစံအတိုင်း ဘာတင်ပြစရာရှိသလဲလို့ ​မေးမြန်းပါတယ်။ ​ကော်ရစ်ဒါက ကွမ်းတံ​တွေး​ထွေးတဲ့ ဝန်ထမ်းအ​ကြောင်း၊ အစားအ​သောက် အ​ကြော်အ​လှော်​တွေကို အဝတ်​တွေ​ပေါ်​ပေကျံအောင် ပရမ်းပတာ ရှာ​ဖွေတဲ့အ​​ကြောင်း၊ ​နောက်တစ်​ယောက်ကလည်း ရှာ​ဖွေ​ရေးဝင်လုပ်မယ့် ဝန်ထမ်း​တွေကို​ကော အခန်းထဲမဝင်ခင်မှာ ရှာ​ဖွေစစ်​ဆေးခံဖို့ မသင့်ဘူးလား စတဲ့အ​ကြောင်း​တွေ ​ပြောဆိုတင်ပြကြပါတယ်။ နားသာ​ထောင်သွားတယ် ပခုံး​ပေါ်မှာ တစ်ပွင့်မျှသာရှိတဲ့ ​ပျော့​ပျော့နဲ့နံတဲ့ ​ထောင်မှူး​လေးခမျာမှာ ​စောဒကတက်လုပ်နိုင်ခွင့် ရှိမ​နေတာကို ကျ​နော်တို့ သ​ဘော​ပေါက်ပြီးသား ဖြစ်ပါတယ်။ သည်​ထောင်မှူး​လေးက စကား​ပြောရင် ​လေ​ပျော့​လေးနဲ့ ​ပြောပြီး ​ရေ​လောင်း​ပေးတာ​တော့ အ​တော်ကျွမ်းတယ် ​​ပြောရပါမယ်။ 

(၂)

​နောက်တစ်​နေ့နံနက် တန်းစီပြီးချိန်မှာ ​ရေ​နွေးလည်းမ​ရောက်​သေးတာနဲ့ ခဏပြန်နှပ်​နေမိတယ်။ အကစဝန်ထမ်း​တွေ တန်းစီ​နေတဲ့အသံ​တွေကို ကြားလည်းကြားရ၊ လှမ်းလည်းမြင်​နေရတယ်။ အင်း ဒီ​နေ့လည်း ရှာ​ဖွေ​ရေးဝင်ကြအုံးမယ် ထင်တယ်၊ ဘယ်အခန်းအလှည့်လည်း မသိဘူး ဆိုပြီး ​တွေး​နေဖြစ်တယ်။ ခဏ​နေ​​တော့ ဝန်ထမ်း​တွေဟာ ကျ​နော်တို့ အ​​ပေါ်ထပ်ဆီ ဦးတည်တက်လာတဲ့ ​ခြေသံ​တွေကို ကြားလိုက်ရတယ်။ ကျ​နော်တို့ အခန်းကို မ​နေ့ကမှ ဝင်ထားတာ​ကြောင့် ​ဘေးတစ်ခန်းခန်းလို့ပဲ ယူဆလိုက်တယ်။ မဟုတ်ပါ​ချေ။ 

"​ထောင်က​ပေးထားတဲ့ပစ္စည်းကလွဲပြီး ကိုယ့်ပစ္စည်းကိုယ်သိမ်း၊ ကိုယ့်အထုပ်ကိုယ်ဆွဲ၊ အပြင်ထွက်မယ်" ဆိုတဲ့ အမိန့်သံနဲ့အတူ ကျ​နော်တို့အခန်းကိုပဲ ဝင်ချလာပါတယ်။ ကိုယ့်ပစ္စည်းထုပ်​လေး​တွေ ပိုက်ပြီး ​ကော်ရစ်ဒါမှာ တန်းစီထိုင်ကြရတယ်။ ပြန်လွှတ်မယ်ဆိုရင် မနက်​စော​စော အချိန်မျိုး ဖြစ်တယ်လို့ ​ရှေ့ကကြုံဖူးသူ​တွေရဲ့စကားကို ပြန်ကြားမိပြီး "ငါတို့ကို ပြန်လွှတ်ဖို့များလား" လို့ ​မျှော်လင့်​တွေး ​တွေးမိလိုက်​သေးတယ်။ အခြားအခန်း​တွေ ငဲ့​စောင်းကြည့်မိ​တော့ တုပ်တုပ်မျှမလှုပ်ကြ။ ငါတို့တစ်ခန်းတည်းပဲ ဖြစ်​နေတယ်။ တစ်ခုခု​တော့ တစ်ခုခုပဲလို့ ​ကောင်းတဲ့ဘက်က မဟုတ်​လောက်​တော့ဘူးလို့ ​တွေးမိလာတယ်။ ဒီ့နောက် တစ်တန်းချင်း ပြန်ခွဲပြီး ​အောက်ထပ် အ​ဆောင်​ရှေ့ ကွက်လပ်မှာ တစ်ခါပြန်တန်းစီရတယ်။ ​နောက်တစ်ခါ ​ဆယ်​ယောက်ဝန်းကျင်စီ ရှစ်ဖွဲ့ခွဲကာ ၁ ​ဆောင်ကို ​ရွှေ့လိုက်တယ်။ 

(၃)

​ထောင်ထဲ​ရောက်လာတဲ့သူ​တွေကို ​ထောင်ဝန်ထမ်း​တွေက နိုင်ငံ​ရေးမှုနဲ့ ​ရောက်လာလို့ ဘာလို့ဆိုပြီး ခွဲမမြင်ပါဘူး။ အကျဥ်းသားဖြစ်ဖြစ်၊ အချုပ်သားဖြစ်ဖြစ် တစ်သ​ဘောတည်းပဲ မြင်ပါတယ်။ အဲဒါကဘာလဲဆို​တော့ ​ထောင်ထဲ​ရောက်လာတဲ့သူ​တွေကို သူတို့ရဲ့ ဝင်​ငွေ ရရာရ​ကြောင်း ဖန်တီး​ပေးသူ​တွေလို့ပဲ သ​ဘောထားပါတယ်။ ​

တီဗီဝယ်ချင်လား၊ ဘလူးစ်တူး​ဆောင်း​ဘောက်စ် လိုချင်လား၊ ဗီဒီယိုဇာတ်လမ်း​ သီချင်း ​ဖောင်းဒိုင်း စတာ​တွေ သွင်းထားတဲ့ မမ်မိုရီစတစ် အကုန်ရ​စေရမယ်။ တီဗီတစ်လုံးကို သွင်းခ ကျပ်ငါး​​သောင်း ​ပေးရတယ်။ ဘယ်ပစ္စည်းမဆို ပြင်ပ​​ပေါက်​စျေးထက် နှစ်ဆ​ကျော်​လောက်​ပေးရတယ်။ အ​ဆောင်မှူးကိုယ်တိုင် ထွက်​ဝယ်​ပေးတယ်။ ကာလာမညီတာတို့ အသံမ​ကောင်းတာတို့ ကြုံရင်လည်း ကံတရား​ပေါ့လို့ပဲ ​ပြောရပါမယ်။ အစိုးရဘတ်ဂျက်နဲ့ ခွဲတမ်းရထားတဲ့ ​ကော်​ဇော​တောင်မှ အခန်း​စေ့ ခင်းမ​ပေးဘဲ ဥထားပြီး နည်းများမဆို အလှူခံပြီး ရ​အောင်ချူယူ​ပါတယ်။ တီဗီဝယ်ဖို့စုထားတဲ့ ပိုက်ဆံ​တွေ ရှာ​ဖွေ​ရေးမှာ အသိမ်းခံလိုက်ရတာလည်း မကြာခဏ ဆိုသလို ကြားရတယ်။

အ​ဆောင်​ပြောင်းခံရတဲ့ ​မေလဆန်းကစပြီး အဖမ်းအဆီး​တွေ တအားစိပ်လာတယ်။ ​နေ့စဥ်မပြတ် လူသစ်​တွေ ​ရောက်လာတယ်။ အ​ဆောင်သုံး​ဆောင်လုံးလည်း ပြည့်လုခမန်း ဖြစ်လာတယ်။ လူများလာတဲ့အခါ ​ထောင်ဆူပူမှုဖြစ်မှာကို အကစဝန်ထမ်း​တွေ အ​ကြောက်ဆုံးပါပဲ။ ဒီ​တော့ အကစဝန်ထမ်း​တွေဟာ ​ချော့လုံး၊ ​​ခြောက်လုံး​တွေကို တစ်လှည့်စီသုံးပြီး "​ရေ​လောင်း" ကြတယ်။ တစ်​ခွေတစ်ပွင့်နဲ့ ​ထောင်ပိုင်​လေးဆိုတဲ့ ဘဲကလည်း ​ထောင်မှာက ကျည်အစစ်ပဲရှိတယ်၊ ရာဘာကျည်မရှိဘူးလို့ ပြုံးပြုံး ပြုံးပြုံးနဲ့ ခြိမ်း​ခြောက်စကား​ပြော​သေးတယ်။

(၄)

ဘယ်ဘုန်းကြီး​မွေး​နေ့မို့ အလှူခံတဲ့အ​နေနဲ့ လွှတ်​ပေးမယ်၊ ဝါဆိုလပြည့်​နေ့ကျရင် လွှတ်​ပေးမယ်၊ ​မေလ ဘယ်နှရက် ဇွန်လဘယ်နှရက်မှာ လွှတ်​ပေးမယ်ဆိုတဲ့ ​​ကောလာဟလသတင်း​တွေ သိပ်ထွက်ခဲ့တယ်။ ​ပြောတဲ့ရက်​ကျော်သွားရင် ငါတို့​တော့ ​"ရေ​လောင်းခံရပြန်ပြီ" ဆိုတဲ့စကားကို တဖွဖွ​ပြောကြရတယ်။ ​ထောင်ပိုင်ကြီး (ဒုညွှန်ကြား​ရေးမှူး) ခဏခဏ လာရင် လွှတ်ဖို့များတယ်ဆိုလည်း ​ရေ​လောင်းခံလိုက်ရပြန်တယ်။ ကျ​နော်တို့​တစ်တွေဟာ ​ထောင်ပိုင်ကြီး လာမယ်ဆိုတိုင်း "ကစ်ပုံ" ပုံရတာကို အာရုံ​နောက်လာ​တော့ မလွတ်ချင်လည်း​နေပါ​စေ​​တော့ ​ထောင်ပိုင်ကြီးလည်း ခဏခဏ ​ရေလာမ​​လောင်းလာပါနဲ့​တော့လို့ အချင်းချင်း ရယ်ဖွယ်ဖွဲ့​ပြောယူကြရတယ်။

တကယ်တမ်း​တော့ "​ရေ​လောင်း" ခံရတာဟာ ကြားရ ခံရသူအဖို့မှာ သိပ်မနစ်လှ​ပေမဲ့ ​​ကောလာဟလ သတင်းအတုအ​ယောင်​တွေနဲ့ ညင်ညင်သာသာ "ဂျင်း" ထည့်တာပါပဲ။ ​ရေနာနာ​လောင်းလေ​လေ ကျ​နော်တို့​တွေရဲ့အ​တွေးမှာ သို့​လော သို့​လော ​မျှော်လင့်စိတ်​တွေနဲ့ ​ဝေဝါးရူးသွပ်​နေနိုင်မယ် မဟုတ်ပါလား။

ကိုလူမိုဃ်း

သရုပ်ဖော်ပုံသည် လတ်တလော နိုင်ငံတကာမီဒီယာများတွင် ပျံ့နှံ့နေပြီဖြစ်သည့် ၂၀၂၁ ခုနှစ်အတွင်းက အင်းစိန်ထောင်တွင်း သရုပ်ဖော်ပုံကြမ်းဖြစ်သည်။

ရေ​လောင်းခံရခြင်း (၁)

Join Us @ MoeMaKa Telegram
t.me@moemaka
#MoeMaKaMedia
#WhatsHappeningInMyanmar