မိုး သက် ငြိမ် ဦး - သွေးကြွေးနှင့်ဆွေးနွေးခြင်း

သွေးကြွေး နှင့် ဆွေးနွေးခြင်း

မိုး သက် ငြိမ် ဦး

(မိုးမခ) ဩဂုတ် ၁၂၊ ၂၀၂၃

လှောင်ချိုင့်ထဲကငှက်တွေကအော်ပြောလိုက်တယ်

အဲဒီတော့ ငါတို့ကလွတ်မြောက်သွားမှာလား

စစ်ကြောရေးအတွင်းစုတ်ပြတ်သွားတဲ့မျက်နှာကပြောတယ်

အဲ့ဒီတော့ ငါ့မျက်ခွက်ကပြန်ကောင်းပြီလား...

မိုင်းဒဏ်ကြောင့်ပြတ်တောက်သွားတဲ့ခြေထောက်တစုံကပြောတယ်

အဲ့ဒီတော့ငါ့ခြေထောက်တွေပြန်ပေါက်မှာလား..

မိဘမဲ့ကလေးတယောက်ကငိုရင်းပြောတယ်

အဲ့ဒီတော့ အသတ်ခံရတဲ့ သားမိဘတွေပြန်ရှင်မှာလား...

မုဆိုးမတယောက်ကအော်ပြောတယ်

အဲ့ဒီတော့ ငါ့လင်ပြန်လာမှာလား...

မုဆိုးဖိုတယောက်က ညည်းတွားတယ်

အဲ့ဒီတော့ ငါ့မိန်းမပြန်လာမှာလား...

အဘွားအိုတယောက်ကပြောတယ်

အဲ့ဒီတော့ ငါ့သားသမီးငါ့မြေးတွေပြန်လာမှာလား

အဘိုးအိုတယောက်ကပြော​တယ်

အဲ့ဒီတော့မီးအရှို့ခံလိုက်ရတဲ့ငါ့ရွာ အကောင်းအတိုင်းပြန်ရမှာလား...

 အလုပ်လက်မဲ့ဝန်ထမ်းတယောက်ကပြောတယ်

အဲ့ဒီတော့ငါ့လစာတွေပြန်ရမှာလား...

ငတ်ပြတ်နေသူတယောက်ကပြောတယ်

အဲ့ဒီတော့ ညစာကောင်းကောင်းစားရမှာလား...

အိမ်ယာမဲ့တယောက်ကပြောတယ်

အဲ့ဒီတော့ ငါ့အိမ်ငါ့ယာပြန်ပေးမှာလား...

ပြေးလွှားနေရတဲ့စစ်ဘေးရှောင်တဦးကပြောတယ်

အဲ့ဒီတော့ ငါတို့ကသေပေးရမှာလား...

သေပေးလိုက်ရတဲ့ သေဒဏ်ကျသူကပြောတယ်

 အဲဒီတော့ ငါတို့အသက်တွေပြန်သွင်းပေးမှာလား...

နင်းခြေခံလိုက်ရတဲ့ပန်းတပွင့်ကပြောတယ်

 အဲ့ဒီတော့ ပန်းပွင့်မိတာအပြစ်လား...

အတောင်အချိုးခံရတဲ့ချိုးဖြူငှက်ကပြောတယ်

အဲ့ဒီတော့ လွတ်လပ်ချင်တာအပြစ်လား...

လူ့အခွင့်အရေးကြေညာစာတမ်းကပြောတယ်

အဲ့ဒီတော့တန်းတူညီမျှချင်တာအပြစ်လား...

 အရိုးတွန်သံတွေနဲ့ကမ္ဘာတုန်ဟီးအောင်

သံပြိုင်ဟစ်သံကို ကြားကြရတယ် ။

...သွေးကြွေးမှာဆွေးနွေးစရာမရှိ...

...သွေးကြွေးမှာဆွေးနွေးစရာမရှိ... ။ ။

28.7.2023

-

Join Us @ MoeMaKa Telegram

t.me@moemaka

#MoeMaKaMedia

#WhatsHappeningInMyanmar