ကိုသန်းလွင် - ဂန္ဒီကြီးအပေါ် အိန္ဒိယ၏ အမြင်
ကိုသန်းလွင် - ဂန္ဒီကြီးအပေါ် အိန္ဒိယ၏ အမြင်
(မိုးမခ) ဖေဖော်ဝါရီ ၁၉ ၊ ၂၀၂၄
( ၁ )
၂၀၂၃ ခု အောက်တိုဘာ ၂ ရက်နေ့သည် ဂန္ဒီကြီး၏ ၁၅၄ ကြိမ်မြောက် မွေးနေ့ ဖြစ်ပါသည်။ တွစ်တာ (သို့) X တွင် ကမ္ဘာတွင် အကျော်ကြားဆုံးလူ ၁၀ ဦး၏အမည်တွင် သူ့ကို လုပ်ကြံသူ နာသူရမ် ဂို့(စ) (Nathuram Godse) ပါဝင်ခဲ့ပြီး ဂန္ဒီ၏မွေးရပ်မြေဟု ဂူဂျာရပ်တွင် ဟိန္ဒူတို့၏ နှစ်ပတ်လည်ပွဲ၌ ဂို့(စ) ၏ ဓာတ်ပုံပိုစတာမှာ ဟိန္ဒူ ဘုရားများနှင့်ယှဉ်၍ထောင်ခဲ့ကြသည်။ ဤသည်မှာ လုပ်ကြံသူ ဘု(သ) (Wilker Booth) ကို သမ္မတလင်ကွန်း ၏ ဓာတ်ပုံနှင့် ယှဉ်တွဲပြသခဲ့ခြင်းနှင့်ဆင်ဆင်တူပါသည်။
( ၂ )
သူ၏လုပ်ကြံမှုကြီး ၇၅ နှစ်မြောက် နှစ်ပတ်လည်နေ့တွင် ဗြိတိသျှကိုလိုနီတို့လက်အောက်မှ လွတ်မြောက်အောင် တိုက်ပွဲဝင်ပေးခဲ့သူ ဂန္ဒီကြီးမှာ အနောက်နိုင်ငံများတွင် ငြိမ်းချမ်းစွာ တိုက်ပွဲဝင်သူတို့အတွက် ငြိမ်းချမ်းရေး၏ပြယုဂ် ဖြစ်ပါသည်။ ဟိန္ဒူအမျိုးသားရေးဝါဒ ပြင်းပြသော အိန္ဒိယတွင်မှု သူ့ပုံရိပ်မှာ မထင်မရှား ဖြစ်လာခဲ့သည်။ မဟတ္တမမှာ သူ အခွင့်အရေးရှိခဲ့စဉ်က အိန္ဒိယတွင် ဟိန္ဒူအစိုးရဖြစ်အောင် မလုပ်ခဲ့ခြင်းအတွက် ရှုတ်ချခံနေရသည်။ အကယ်စင်စစ်တွင်မှု ဂန္ဒီကြီးသည် ဟိန္ဒူ နှင့် မွတ်စလင်များ ကြီးစိုးရာ နိုင်ငံတွင် လူအားလုံး ညီညွတ်ချစ်ခင်ရေးကို ဆောင်ရွက်ခဲ့သူတစ်ဦး ဖြစ်ပါသည်။
ထိုအချိန်တွင် ဂို့(စ)မှာ ဖေ့စ်ဘွတ်၊ Instangram နှင့် ယူကျု့တို့တွင် ယခုမှ အသစ်တွေ့ရသော မိတ်ဆွေများဖြင့် ပျော်မွေ့လျက်ရှိနေပါသည်။ သူ့ကို ယခုမှသိရသူတွေက ဟီးရိုးဟု မြင်ကြသည်။ ၁၉၄၉ ခုနှစ်က ကြိုးပေးခဲ့သော ဂို့(ခ)သည် ဂန္ဒီကြီးကို လုပ်ကြံရန် ယခင်က နှစ်ကြိမ် ကြိုးစားခဲ့သည်။ ပထမအကြိမ်မှာ ဓားနှင့် ဒုတိယအကြိမ်မှာ ဓားကောက်နှင့် ဖြစ်ပါသည်။ နှစ်ကြိမ်လုံးတွင် သူ့ကို အရေးယူအပြစ်ပေးခြင်းကို ဂန္ဒီကြီးက ကန့်ကွက်ခဲ့သည်။ ထို့ကြောင့် ထိုလူငယ်မှာ ဂန္ဒီကြီး၏ အသက်ကို လုပ်ကြံနိုင်သည့် အခွင့်အရေးရသည့်တိုင် လွတ်မြောက်နေခဲ့ပါသည်။
တတိယအကြိမ် သေနတ်ဖြင့် လုပ်ကြံရန် ကြိုးစားခဲ့ရာ အောင်မြင်သွားခဲ့သည်။ သူက ပါကစ္စတန်နိုင်ငံကို အိန္ဒိယပြည်မှ ခွဲထွက်ခွင့်ပေးခြင်းကို မကျေနပ်ခဲ့ခြင်း ဖြစ်ပါသည်။ ဂန္ဒီကို မွတ်စလင် လိုလားသူအဖြစ် မြင်ခဲ့ပြီးသူ ရှိနေပါက အိန္ဒိယအစိုးရအပေါ် သူ၏ သြဇာသက်ရောက်မှုကို မနှစ်သက်ခဲ့ပါ။
ဂို့(စ) သည် ဟိန္ဒူအမျိုးသားရေးဝါဒ စစ်သွေးကြွအုပ်စုအသင်းကြီး RSS Rashtriya Swayamsevak Sangh ၏ အသင်းဝင်တယောက် ဖြစ်ပါသည်။ ဤအသင်းသည် နီရန်ဒါ မိုဒီ (Narenda Modi) ၏ BJP- Bharatiya Janata Party ကို ထူထောင်ခဲ့ပြီး မိုဒီသည် ဂန္ဒီ၏ အယူအဆကို ဆန့်ကျင်ခဲ့သူ ဖြစ်ပါသည်။ ၂၀၁၄ ခုနှစ်က မိုဒီအရွေးခံရပြီး အာဏာရယူချိန်ကစ၍ ဤအယူအဆ အမြစ်တွယ်လာသည်။ မွန်ဘိုင်းမြို့ ကိုလာဘာလမ်း (Colaba) ပေါ်တွင် အမှတ်တရ ပစ္စည်းရောင်းသူတစ်ဦးရှိရာ ၎င်းက တပ်ချ်မဟာကဲ့သို့သော အခြား ပစ္စည်းများကို ဂန္ဒီကြီး၏ ရုပ်တုပုံထက် ပို၍ တန်ဖိုးထားသည်။ ဂန္ဒီ၏ ရုပ်တုပုံမှာ မျက်နှာဖြူများ နိုင်ငံခြားသားများကသာ ဝယ်ကြသည်ဟု ပြောသည်။
ဂူဂျာရပ်ပြည်နယ်မှ ကုန်သည်တစ်ဦးကမှု “နိုင်ငံ၏ဖခင် ” ဟု တင်စားခေါ်ဝေါ်ခြင်းခံနေရသူ ဂန္ဒီကြီးကို နောက်ပိုင်းလူငယ်များက တမျိုး မြင်နေကြသည်ဟု ပြောသည်။ ဂန္ဒီသည် မွတ်စလင်များ ကျေနပ်စေရန် နိုင်ငံကို နှစ်ပိုင်းကွဲစေပြီး သူ့ကိုယ်သူ လူသားဆန်သည်ဟု မှတ်ယူခဲ့သည်။ ထိုအကြောင်းကို ခေတ်လူငယ်များက ခွင့်မလွှတ်နိုင်လောက်အောင် နာကြည်းကြသည်ဟု ဆိုသည်။ ထိုအတွေးအခေါ်များမှာ မှေးမှေးမှိန်မှိန်ဖြစ်ပြီး ပျောက်ကွယ်မသွားခဲ့ပါ။ မိုဒီက RSS ကိုတည်ထောင်သူ ဂိုးဝေါ့ကာ (Gold Walker) ကို ဂန္ဒီ လုပ်ကြံမှုဖြစ်စဉ်က ခေါင်းဆောင်ဖြစ်ခဲ့သူမှာ သူတို့အသင်းအတွက် အဓိကကျသော တွေးခေါ်ပညာရှင်အဖြစ် မှတ်ယူခဲ့ပါသည်။ ၁၉၄၇ ခုနှစ် ဒီဇင်ဘာလ ၇ ရက်နေ့က “ဂန္ဒီက မွတ်စလင်များကို သူ့ကို ထောက်ခံမည့်စကားကို ပြောစေချင်ခဲ့တာ။ ကျွန်တော်တို့မှာ ဒီလိုလူတွေကို ငြိမ်သက်သွားအောင် လုပ်နိုင်တဲ့နည်းလမ်းတွေ ရှိပါတယ်” ဟု ပြောခဲ့သည်။ နောင်တစ်လအကြာတွင် ဂန္ဒီကို လုပ်ကြံခဲ့ခြင်း ဖြစ်ပါသည်။
ဂူဂျာရပ်ရှိ ဂန္ဒီ၏အိမ် Sabarmati Ashram တွင်လည်း လူငယ်များက ဂန္ဒီကို မသိကြ၊ စိတ်မဝင်စားကြပါ။ ကောလိပ်ကျောင်းသားတစ်ယောက်ကမူ အိန္ဒိယအတိုက်အခံ ကွန်ဂရက်ပါတီမှ ခေါင်းဆောင် ရာဟူး ဂန္ဒီ (Rahul Gandhi) (ဂန္ဒီကြီးနှင့် ဆွေမျိုးမတော်စပ်ပါ) ကို အဖေကြီး (Pappu) ဟု ခေါ်ခဲ့ရာ ဂန္ဒီကို ခေါ်သည့် အသုံးအနှုန်းမျိုး ဖြစ်သည်။ ဂန္ဒီကို အဆင့်အတန်း နိမ့်ကျစေသည့်သဘော ဖြစ်ပါသည်။ နောက်ကျောင်းသားတစ်ယောက်ကမူ “သူ့မျက်နှာဟာ အိန္ဒိယ ရူပီးပေါ်မှာပဲ ရှိတယ်” ဟု ပြောသည်။
ဂန္ဒီကြီးမှာ ဤမျှ မကျော်ကြား၊ ပေါ်ပြူလာမဖြစ်ခဲ့ပါ။ ၁၉၈၂ ခုနှစ်က အန်တင်ဘောရိုး (Richard Atten- borongh) ၏ ဂန္ဒီရုပ်ရှင်ကားမှာ အကယ်ဒမီ ၈ ဆုရရှိခဲ့သည်။ ထိုရုပ်ရှင်က အိန္ဒိယသမိုင်းမှ လွတ်လပ်ရေး တိုက်ပွဲ၏ သူရဲကောင်းအများအပြားကို မွေးဖွားပေးခဲ့သည်။ ၂၀၀၆ ခုနှစ်တွင်မှု ဘောလီဝုဒ်မှ ကျော်ကြားသော ရုပ်ရှင်အဖြစ် Carry On Munna Bhai ဇာတ်ကား ပေါ်လာသောအခါ ဂန္ဒီ၏ နာမည်သည် အိန္ဒိယတွင် ပြန်လည် ခေတ်စားလာပြန်ပါသည်။ ဤကားတွင် လိမ်လည်လှည့်ဖြားသူတစ်ဦးက သူ့ချစ်သူ၏ အချစ်ကို ပြန်လည်ရယူဖို့ ဂန္ဒီ၏ အကြမ်းမဖက်ရေး၊ လူမှုရေး အမွန်စကားများဖြင့် ဆွဲဆောင်ခဲ့ရာမှ ဂန္ဒီဝါဒကို လူအများ သတိရခဲ့ကြသည်။
ထို့နောက် အိန္ဒိယမှ အစွန်းရောက်ဝါဒီများက နိုင်ငံရေးအာဏာရယူပြီးနောက်တွင် ဂန္ဒီ၏ ပုံရိပ်သည် မှေးမှိန်လာခဲ့ပြန်သည်။ ၂၀၁၉ ခုနှစ်တွင် မိုဒီ၏ ပါတီမှ သာကာ (Pragya Singh Thakur) က ဂို့(စ) ကို မျိုးချစ်တစ်ယောက်အဖြစ် ပါလီမန်တွင် ခေါ်ဝေါ်သုံးစွဲခဲ့သည်။ တတိုင်းပြည်လုံး ဆူညံသွားမှ မိုဒီက သူ၏စကားများကို ရှုတ်ချခဲ့သည်။ အလွန်ဆိုးဝါးပြီး လူနေမှုအဖွဲ့အစည်းတွင် အလွန်ရုပ်ဆိုးသည်ဟု ပြောခဲ့သည်။
RSS ၏အခြားတိုးချဲ့ပါတီဖြစ်သော Hindu Mahasabha ပါတီက ဂန္ဒီ လုပ်ကြံမှုဖြစ်သောနေ့ကို ရဲရင့်သောနေ့ (Shaurya Divas) အဖြစ် ဂန္ဒီလုပ်ကြံမှု၏ ၇၁ နှစ်မြောက်နေ့တွင် ရုပ်ရှင်အဖြစ် ပြန်လည်ရိုက်ပြခဲ့သည်။ ပရိသတ်က အကြီးအကျယ် သြဘာပေးခဲ့ကြသည်။ ၂၀၂၃ ဇွန်လတွင် မိုဒီ၏ ပါတီမှ ပြည်ထောင်စုဝန်ကြီး ဆင်း (Giriraj Singh) က ဂန္ဒီ လုပ်ကြံသူကို အိန္ဒိယ၏အမျိုးကောင်းသားအဖြစ် သတင်းထောက်များကို ပြောကြားခဲ့သည်။ ကွန်ဂရက်ပါတီ အတွင်းရေးမှူး ဗီနူးဂိုပယ် (K.C. Venugopal) ကမူ ဝန်ကြီးချုပ်က ငြိမ်သက်နေခြင်းသည် သူက ထိုစကားများကို ထောက်ခံသည့်သဘော သက်ရောက်နေသည်ဟု ဆိုခဲ့သည်။
အိန္ဒိယ ကျောင်းသုံးစာအုပ်များကို ပြင်ဆင်ရေးသားခဲ့ပုံကို Out Look မဂ္ဂဇင်းက ရေးသားခဲ့ပြန်ပါသည်။ ဂန္ဒီ လုပ်ကြံသူ ဂို့(စ) ၏ နောက်ခံဘဝအရေးအခင်းနှင့် ဂန္ဒီ၏လွတ်လပ်ရေး ရခါစက ဟိန္ဒူ မွတ်စလင် ညီညွတ်ရေးအတွက် လုပ်ဆောင်ချက်များကိုဖယ်ရှားပစ်ခဲ့ပါသည်။
ဒိုဒီယား (Atul Dodiya) သည် သူ၏ ပန်ချီကားများမှတဆင့် ဂန္ဒီဝါဒကို အသက်သွင်းရန် ကြိုးပမ်းခဲ့သည်။ ၁၉၉၇ ခုနှစ်တွင် ဂန္ဒီ၏ လမ်းစဉ်ဝါဒအဖြစ် Lamentation ပန်ချီကားမှာ လောကတွင် အဆိုးဆုံး လူအုပ်စု သူပုန်ထမှု (Communal Riot) အဖြစ် ရေးဆွဲခဲ့ပါသည်။ မွန်ဘိုင်း ပုန်ကန်မှုသည် ၁၉၉၁ ခုနှစ်တွင် ဖြစ်ပွားပြန်ရာ Babri Masjid အဆောက်အဦကို ဘီဂျေပီနှင့် RSS အဖွဲ့သားများက ဖျက်ဆီးခဲ့ကြသည်။ ၎င်းသည် ဂန္ဒီကြီး၏ ဝါဒကို အကြီးအကျယ် ဖျက်ဆီးရာရောက်သည်ဟု ပြောခဲ့ပါသည်။ သူသည် အနှစ် ၂၀ ကျော် ဂန္ဒီဝါဒအတိုင်း နေလာခဲ့ပြီး ပန်ချီကားပေါင်း ၂၀၀ ကျော်ဆွဲခဲ့ရာ ဤအဖြစ်အပျက်များကြောင့် စိတ်မချမ်းမသာ ဖြစ်ရသည်ဟု ဆိုသည်။
ယနေ့ ဝန်ကြီးချုပ်ဖြစ်သူ မိုဒီကလည်း ဂန္ဒီနာမည်ကို သူ့အတွက် အသုံးကျမှသာ အသုံးပြုလေ့ရှိသည်။
( ၃ )
ဇွန်လက ကုလသမဂ္ဂဌာနချုပ်တွင် ဂန္ဒီ၏ ရုပ်တုရှေ့၌ မိုဒီက ပန်းခွေများဖြင့် ဦးညွှတ်၍ အရိုအသေပြုခဲ့ပါသည်။ စက်တင်ဘာလက Group 20 အတွက် စက်မှုထွန်းကားသော နိုင်ငံများခေါင်းဆောင် ၂၀ ကျော်တို့ အိန္ဒိယပြည်သို့ လာရောက်ခဲ့ကြသည်။ မိုဒီ က ခေါင်းဆောင်များနှင့်အတူ ဂန္ဒီ၏ အရိုးပြာများ မြှုပ်နှံထားရာ Raj Ghat တွင် ဂန္ဒီကြီး အားပေးခဲ့သော အိမ်တွင်းဖြစ် လက်ယက်ပဝါများကို ခေါင်းဆောင်များ၏ လည်ပင်းတွင် လွှမ်းခြုံပေးခဲ့ပါသည်။ နံရံတွင်မှု My Life is My Message “ကျွန်တော်ဘဝသည် ကျွန်တော်ပေးချင်သော သတင်းစကားပင် ဖြစ်သည်” ဟု ဂန္ဒီကြီး၏ စာတန်းရေးထိုးတားပါသည်။
ဂန္ဒီအကြောင်းကို ပြောကြားရာ၌မှု မိုဒီ၏ စကားများ၌ အဆိုးနှင့် အကောင်း ယှဉ်တွဲ၍ ရောယှက်နေပါသည်။
ကိုသန်းလွင်
Ref: In Modi’s India has become Irrelevant By Rana Ayyub , Wasington post 2 Jamuary 2023
t.me@moemaka
#MoeMaKaMedia
#WhatsHappeningInMyanmar