ကိုလှိုင်းသစ် - နေရီရီရဲ့ ရသစုံလက်ဖက်ပွဲများ

နေရီရီရဲ့ ရသစုံလက်ဖက်ပွဲများ

ကိုလှိုင်းသစ်

(မိုးမခ) ဧပြီ ၁၁၊ ၂၀၂၄

အိမ်ကစာအုပ်စင်ရှင်းရင်းနဲ့ နေရီရီစာအုပ်တိုက်ကထုတ်ဝေခဲ့တဲ့ စာရေးသူစိတ်ကြိုက် ဆောင်းပါးစုစာအုပ်လေးတွေတွေ့လို့ ပြန်ကြည့်မိတယ်။ နေရီရီစာအုပ်တိုက်ဟာတစ်ခေတ်တစ်ချိန်ကစာရေး ဆရာကြီးတွေရဲ့ စာပေ၊ နိုင်ငံရေး၊ သမိုင်းဆိုင်ရာဆောင်းပါးများ၊ ဒီဘက်ခေတ်စာရေးဆရာတွေရဲ့ စာပေရေးရာဆောင်းပါးတွေကို ကောင်းနိုးနိုးရာရာရွေးထုတ်ပြီး .... နှင့် စာရေးသူ စိတ်ကြိုက်ဆိုပြီးလက်ရွေးစဉ်ဆောင်းပါးများ ပုံစံမျိုးထုတ်ဝေခဲ့တာ တွေ့ရတယ်။ စာပေရေးရာ၊ နိုင်ငံ ရေး၊ စီးပွား ရေး၊ သမိုင်းအစရှိသဖြင့် အကုန်ပါတယ်။ အမှာစာမှာအရသာပြည့်စုံတဲ့ လက်ထက်ပွဲတွေတစ်ပွဲပြီးတစ်ပွဲ တင်ဆက်ပေးနိုင်ဖို့ ကြိုးစားနေပါတယ်ဆိုတဲ့အတိုင်း စာရေးဆရာတွေရဲ့ လက်ရာစုံဆောင်းပါးများစွာကို တွေ့ရတယ်။ စာပေ၊ သမိုင်းနဲ့ပတ်သက်လို့ ကျွန်တော်တို့ မသိသေးတာတွေအများကြီးသိရတယ်။

မှတ်မှတ်ရရပထမဆုံးဖတ်ဖူးခဲ့တာကနံရံကပ်မဏ္ဍိုင်နှင့် စာရေးသူစိတ် ကြိုက်ဆိုတဲ့ စာအုပ်လေး၊ အဖေဝယ်လာတာတွေ့လို့ ကြည့်လိုက်တယ်။ ဒဂုန်တာရာ၊ ဦးလှ၊ မြသန်းတင့်၊ ကျော်အောင်၊ မင်းကျော်၊ မောင်နေဝင်း၊ ရာဇာနေဝင်းတို့ရဲ့ ဆောင်းပါးတွေကိုတွေ့လိုက်ရတယ်။ စာအုပ်လေးကပါးပါးလေးပါ။ စိတ်ဝင်စားပြီဖတ်ကြည့်မိလိုက်တယ်။ ကြိုက်သွားတယ်။ အဲဒီထဲကအကြိုက်ဆုံးဆောင်းပါးဆိုရင် ကိုရာဇာကြီး(ရာဇာနေဝင်း)ရဲ့ ဆောင်းပါးပါပဲ။ သူနဲ့ ဆရာကြီးဒဂုန်တာရာတို့ရဲ့အလွဲလေးတွေအကြောင်း၊ သံအမတ်ကြီးဦးအုန်း၊ ဆရာဗန်းမော်တင်အောင်တို့အကြောင်း၊ ဆရာ ကြီးဒဂုန်တာရာလိုစနစ်ကြီးတဲ့ပုဂ္ဂိုလ်ကြီးနဲ့ ကိုရာဇာကြီးရဲ့အလွဲတွေအကြောင်းဟာစိတ်ဝင်စားစရာကောင်းလှပါတယ်။ ကိုရာဇာကြီးရေးမှ ကျွန်တော်တို့ သိလိုက်ရတာက သူ့အဖေမင်းသားကြီးကောလိပ်ဂျင်နေဝင်းဆီကို ကောင်မလေးတွေဖုန်းဆက်ရင် ဆရာကြီးကပဲ ဒိုင်ခံပြောပေးတာဆိုပဲ။ ဆရာကြီးဒဂုန်တာရာကောင်မလေးတွေနဲ့ ဘယ်လိုများပြောမလဲ စိတ်ဝင်စားမိပါတယ်။ တခြားဆောင်းပါးကောင်းတွေလည်း အများကြီးပါပဲ။

အဲဒီစာအုပ်လေးကိုဖတ်မိရာကနေသဘောကျပြီးနေရီရီစာအုပ်တိုက်ထုတ် .....နှင့် စာရေးသူစိတ် ကြိုက်စာအုပ်တွေကိုရသလောက် ဝယ်ဖတ်ဖြစ်ခဲ့တယ်။ ပထမဆုံးစထုတ်ဖြစ်ခဲ့တာကစာရေးသူစိတ်ကြိုက်နှင့် မုဟုတ်ဆိုတဲ့ဆောင်းပါးစုံစာအုပ်လေးကိုဒေဝီသန့်စင် (တော်ဘုရားလေးအောင်ဇေရဲ့ သမီး) နဲ့ ကွယ်လွန်သူစာရေးဆရာမောင်နေဝင်းရဲ့ ဇနီးနီနီနိုင် (နေရီရီ-ဆရာမမေနီ) တို့စီစဉ်ပြီး ၂၀၀၂ ခုနှစ်၊ ဇူလိုင်လမှာနေရီရီစာအုပ်တိုက်ကစတင်ထုတ်ဝေခဲ့တယ်။ စာအုပ်အပါးလေးပါပဲ။ စာရေးဆရာအစုံရဲ့ ကောင်းနိုးရာရာဆောင်းပါးတွေပါတယ်။ အဲဒီအထဲကဆောင်းပါးတစ်ပုဒ်ကိုဖတ်ပြီးတော့မှ ဆရာနတ်နွယ်ရဲ့ မိုးဇော်ဟိန်း၊ ကောလိယအပြင် အခြားကလောင်ခွဲတွေဖြစ်တဲ့ ရွှေစင်၊ အဲမောင်း၊ ဘွဲ့ဖြူ၊ ပျံလွှားအစရှိတဲ့ကလောင်နာမည်တွေကိုသိခဲ့ရတယ်။

အဲဒီစာအုပ်ပြီးတော့မှ ကိုရီးယားဂျင်စင်နှင့် စာရေးသူစိတ်ကြိုက်စာအုပ်ကိုဆက်ထုတ်ခဲ့တယ်။ ကိုရီးယားဂျင်စင်နှင့် စာရေးသူစိတ်ကြိုက်စာအုပ်မှာဆရာထက်မြက်ရဲ့ ဘာသာပြန်ဆရာဆောင်းပါးမိုက်သလို The Song of Ouyang Hai (အိုယန်ဟိုင်းတေးသံ)  စာအုပ်ကိုဆရာထက်မြက် တစ်ဦးတည်းဘာသာပြန်ခဲ့ပြီးပြီးမှ နှစ်ယောက်ဘာသာပြန်တဲ့ပုံစံမျိုးလိုချင်လို့ ဆရာနိုင်ဝင်းဆွေနာမည်ထည့်ခဲ့တယ် လို့ သိရတယ်။ အဲဒီနောက်တော့ ဆက်တိုက်ဆိုသလိုနေရီရီစာအုပ်တိုက်ကနေခေါင်းစဉ်အမျိုးမျိုးနဲ့ စာရေးသူစိတ်ကြိုက် ဆောင်းပါးစာအုပ်တွေ ဆက်ထွက်လာခဲ့တယ်။ တချို့ဆောင်းပါးတွေက တစ်ချိန်တုန်းကဂျာနယ်မဂ္ဂဇင်းတွေမှာဖော်ပြခဲ့တဲ့ ဆောင်းပါးတွေဖြစ်ပြီး တချို့ကတော့ စာရေးသူစိတ်ကြိုက် အစီအစဉ်အတွက် စာရေးဆရာတွေကရေးပေးတဲ့ဆောင်းပါးတွေပါ။ စာအုပ်အပါးလေးတွေဖြစ်ပြီးအနည်းဆုံး ၁၅ အုပ်လောက်ထုတ်ဝေခဲ့ပါတယ်။ ကျွန်တော့်မှာတော့ ၁၂ အုပ်လောက်ပဲရှိပါတယ်။ အထက်မှာရေးခဲ့သလိုပဲ စာရေးဆရာမျိုးစုံရဲ့ စာပေနဲ့ပတ်သက်တဲ့၊ သမိုင်းနဲ့ပတ်သက်တဲ့၊ နိုင်ငံရေးနဲ့ပတ်သက်တဲ့ ဆောင်းပါးအစုံဟာ စိတ်ဝင်စားစရာကောင်းလှပါတယ်။ ကျွန်တော်တို့ မသိသေးတာတွေအများကြီးပါပဲ။

ဂဏန်းသင်္ချာခွန်းထောက်ကဗျာနှင့် စာရေးသူစိတ်ကြိုက်စာအုပ်မှာ ဆရာမြရဲ့ ' နံနက်ခင်း၌ရန်ကုန်မြို့တွင်းစျေးများကို လျှောက်ကြည့်ခြင်း' ဆောင်းပါးလေးလည်းကောင်းသလို ခင်မောင်အုန်းရဲ့ မိုးတိမ်လှေပေါ်က မြသန်းတင့် ဆောင်းပါးမှာ ဆရာမြကို ပခုက္ကူသားသူ့မိတ်ဆွေတွေက မိန်းမပိုးသွားတိုင်း ဟိုဖက်ကမိန်းကလေးပြောသမျှနားထောင်ပြီး ချစ်ကြောင်းကြိုက်ကြောင်း ဘာမှမပြောဘဲ ပြန်ပြန်လာလို့ ကျားပြန်ကြီးလို့ ခေါ်ကြတာလေး ဖတ်မိတယ်။ လွတ်လပ်ရေးကြိုကဗျာများနှင့် စာရေးသူစိတ် ကြိုက်မှာ မောင်ညိုမင်း (ရန်ကုန်တက္ကသိုလ်) ရဲ့ မထင်မှတ်ဘဲကြည့်ခဲ့ရသောပန်းချီကားများဆောင်းပါးက တော်တော်စိတ်ဝင်စားစရာ ကောင်းပါတယ်။ ပညာတော်သင်နဲ့ ဩစတေးလျ၊ ဆစ်ဒနီရောက်နေတုန်း ဆစ်ဒနီအမျိုးသားပြတိုက်မှာလုပ်တဲ့ပန်းချီပြပွဲကိုဝင်ကြည့်ခွင့်ရခဲ့တာ၊ ပြင်သစ်ပန်းချီဆရာဆူရတ်ရဲ့ ပန်းချီကားတွေ၊ မိုးနေး၊ ဂေါ်ဂင်၊ ဗင်ဂိုး၊ စေဇန်း၊ ပီကာဆိုတို့ရဲ့ပန်းချီကားမူရင်းတွေကို ကြည့်လိုက်ရတဲ့အရသာကို ရေးထားတာ တော်တော်စိတ်ဝင်စားစရာကောင်းပါတယ်။ 

အတ္ထုပတ္တိနှင့် စာရေးသူစိတ်ကြိုက်မှာ ဗိုလ်မှူးဘသောင်း (မောင်သုတ) အကြောင်းနဲ့ စာဆိုတော် များအတ္ထုပတ္တိပထမအကြိမ်ရိုက်နှိပ်မူက အမှားလေးတစ်ခုအကြောင်းကို ပညာ(အမရပူရ)ရဲ့ ဆောင်းပါး၊ ၁၉၄၈ လွတ် လပ်ရေးနေ့အခမ်းအနားသတင်း မှတ်တမ်းရုပ်ရှင် ရိုက်ကူးခဲ့တဲ့ ဆရာဓူဝံရဲ့ ဘုရင်ခံမျက်ရည် ကျသည့်နေ့ဆောင်းပါး၊ ကျော်အောင်ရဲ့ ဂျပန်ခေတ်ဆေးရုံကြီးဆောင်းပါးမှာ ဗိုလ်ချုပ်နဲ့ ဒေါ်ခင်ကြည်တို့ စတွေ့ပုံတွေ၊ ဒေါ်ခင်ကြည်ဆီသွားလည်ပုံတွေ၊ မိန်းမတောင်းပုံတွေ စိတ်ဝင်စားစရာကောင်းလှပါတယ်။ ဆရာဓူဝံဟာ ပြန်ကြားရေးဝန်ကြီးဌာနမှာ ဒုတိယညွှန်ကြားရေးဝန်အဖြစ်နဲ့ တာဝန်ထမ်းဆောင်နေချိန်မှာ လွတ်လပ်ရေးနေ့အခမ်းအနားပြင်ဆင်တာ၊ အခမ်း အနားကျင်းပတာတွေကို ရုပ်ရှင်မှတ်တမ်းတင်ခွင့် ရခဲ့တာပါ။ ဒိထက်ပိုပြီးဆောင်းပါးကို ပြည့်ပြည့် စုံစုံရေးနိုင်ရင် ပိုပြီးသမိုင်းမှတ်တမ်းအနေနဲ့ တန်ဘိုးရှိမှာပါ။

သတင်းလောကသံသရာနှင့် စာရေးသူစိတ်ကြိုက်ထဲက မောင်ညိုမင်းရဲ့ ဆရာနန်းဝေ (သို့) ကံ့ ကော်တန်းရဲ့ လွမ်းချင်းရှည်ဆောင်းပါးဖတ်မိတော့မှ ဆရာကြီးဒေါက်တာသန်းထွန်းက ပန်းချီဆွဲမှန်းသိခဲ့ရတယ်။ အဖိုးတန်ကလောင်တစ်ချောင်းနှင့် စာရေးသူစိတ်ကြိုက်မှာ စာရေးဆရာကြီးမောရစ်ကောလစ်ရဲ့ အတ္ထုပတ္တိအကျဉ်းချုပ်နဲ့ မြန်မာပြည်အကြောင်းရေးခဲ့တဲ့ စာအုပ်စာရင်းကို အဖိုး တန်ကလောင်တစ်ချောင်းမှာ ဖတ်နိုင်တယ်။ မောင်နေဝင်းရဲ့ ဆရာဇဝန၏ အမှတ်တရမွေးနေ့ ဆောင်းပါးမှာရှားလော့ဒ်ဟုမ်းဟာ အပြင်မှာတကယ်ရှိခဲ့တဲ့ ပုဂ္ဂိုလ်တစ်ယောက်ဖြစ်ပြီး သူ့ရဲ့အတ္ထုပတ္တိစာအုပ်ရှိတယ်ဆိုတာ သိရတယ်။ကျွန်တော်တို့သိခဲ့တာက ရှားလော့ဒ်ဟုမ်းဟာ ဖန်တီးမှုဇာတ်ကောင်တစ်ခုလို့ပဲ သိထားတာ။ မောင်နေဝင်းက ဆရာဇဝနကို ဘာသာပြန်ဖို့ တိုက်တွန်းခဲ့တယ်။ မောရစ်ကောလစ် ကွယ်လွန်တော့ မြန်မာစာရေးဆရာတွေစုပြီး ဝမ်းနည်းကြောင်းသဝဏ် လွှာပေးပို့ကြတဲ့အကြောင်းကို နှစ်သစ်မင်္ဂလာမုခ်ဦးနှင့် စာရေးသူစိတ်ကြိုက်မှာ ဆရာမောင်ဝံသရေးသားခဲ့တယ်။ 

စာအုပ်ရောဂါနှင့် စာရေးသူစိတ်ကြိုက်မှာ ဆရာဇေယျရေးတဲ့ ကိုယ်တွေ့ဟံသာဝတီဆောင်းပါးက တော်တော်လေး စိတ်ဝင်စားဖို့ ကောင်းပါတယ်။ ပုဂံတိုက်လိုပဲ တစ်ချိန်ကနာမည်ကြီးခဲ့တဲ့ ဟံသာဝတီတိုက်ရဲ့သမိုင်းကျောင်းလေးပါ။ မစ္စတာရစ်ပလီကနေ မြန်မာအဆွေသူဌေးဦးညွန့်ယူလိုက်တဲ့အထိရေးထားတာ စိတ်ဝင်စားစရာကောင်းပါတယ်။ မစ္စတာရစ်ပလီက မန္တလေးနန်းတွင်းမှာကြီး ပြင်းခဲ့ရပြီးမှ ရန်ကုန်ကိုရောက်လာ၊ သီပေါမင်းပါတော်မူပြီးနောက်ပိုင်းမှ ကင်းဝန်မင်းကြီးကိုမန္တလေးမှာသွားတွေ့ခဲ့တယ်။ ကင်းဝန်မင်းကြီးက မစ္စတာရစ်ပလီကိုပေးစရာတော့ ဒါပဲရှိတော့တယ်ဆိုပြီး ခရီးသွားမှတ်တမ်းပေစာနှစ်ခု ပေးခဲ့တယ်။ အဲဒါက ပြင်သစ်နိုင်ငံသွားနေ့စဉ်မှတ်တမ်းနဲ့ လန်ဒန်မြို့သွားနေ့စဉ်မှတ်တမ်းနှစ်ခုပါပဲ။ အဲဒါကို မစ္စတာရစ်ပလီက ဟံသာ၀တီတိုက်ကနေ ပြန်ထုတ်ခဲ့ပါတယ်။

မင်္ဂလာနှစ်ပတ်လည်နှင့် စာရေးသူစိတ်ကြိုက်ထဲက ဆရာမင်းသုဝဏ်ရဲ့ ကျွန်တော်သိသောဆရာမှတ်ကျောင်းမှာ ဆရာမင်းသုဝဏ်က စိန်ဂျွန်းကျောင်းထွက်ဆိုတာ သိလိုက်ရတယ်။ ဆရာမှတ်ကြီး (Dr. John E Marks) အကြောင်းက စိတ်ဝင်စားဖို့ကောင်းပါတယ်။ အလုံမြို့နယ်ထဲကလမ်းတစ်လမ်းက အဲဒီဆရာမှတ်ကြီးကိုရည်ရွယ်ပြီး ဆရာမှတ်ကြီးလမ်းလို့ခေါ်ခဲ့တာပါ။ အနုပညာအရသာမှာ မောင်လွန်းကြင်ရဲ့ ဒဂုန်တာရာနှင့်တွေ့ဆုံခြင်းက တော်တော်လေးကောင်းတယ်။ 

ဒါတွေက ကျွန်တော်ဖတ်မိသလောက်ထဲက စိတ်ဝင်စားစရာကောင်းတာ၊ မသိသေးတာတွေကို ဖတ်မိသလောက် ရေးလိုက်တာပါ။ နေရီရီစာအုပ် တိုက်က အနည်းဆုံး ၁၅ အုပ်လောက်ထုတ်ခဲ့ပါတယ်။ စာအုပ်ဆိုင်တွေမှာတချို့တလေ ရနိုင်ပါသေးတယ်။ စာဖတ်ဝါသနာပါသူတွေ၊ စာပေအသိုင်း အဝိုင်းနဲ့ စာပေလောကအကြောင်းစိတ်ဝင်စားသူတွေ ဖတ်ကြည့်စေချင်ပါတယ်။ ကြုံရင်ဝယ်ဖတ်ကြည့်ကြပါ။

ကိုလှိုင်းသစ်

9-4-2024- 11;30 PM

-

Join Us @ MoeMaKa Telegram
t.me@moemaka
#MoeMaKaMedia
#WhatsHappeningInMyanmar