သီအိုဇော် - လွမ်းမပြေတဲ့ပန်းခွေ

(မိုးမခ) ဇူလိုင် ၁၉ ၊ ၂၀၂၄

‘လွမ်းမပြေတဲ့ ပန်းခွေ’ဆိုတဲ့ သီချင်းက အာဇာနည်ခေါင်းဆောင်ကြီးများ ကျဆုံးသွားချိန်မှာ အဆိုတော် (ဒေါ်)စိန်ပါ တီ သီဆိုခဲ့တဲ့ သမိုင်းမှတ်တမ်းဝင် တေးသီချင်းတပုဒ် ဖြစ်ပါတယ်။တေးသံရှင်ကိုယ်တိုင် ယူကျုံးမရဖြစ်အောင် ခံစားထားပြီး ကရုဏာသံ ဆွဲငင်မှုအပြည့်နဲ့ သီဆိုထားတဲ့ သီချင်းက စိတ်ထိခိုက်ကြေကွဲဝမ်းနည်းနေတဲ့ ပြည်သူများရဲ့ စိတ်နှလုံးကို အင်မတန်မှ ဝမ်းနည်းဆို့နင့်စေခဲ့တဲ့ သီချင်းတပုဒ်ပါ။

သီချင်းလို့သာ ဆိုလိုက်ရပေမယ့် ကျဆုံးအာဇာနည်ကြီးများကို အထူးဂုဏ် ပြုစပ်ဆိုထားတာ ဖြစ်တဲ့အတွက် ဆောင်းပါးတပုဒ်နဲ့တောင် အလားတူနေပါတယ်။ အပိုဒ်လေးပိုဒ် ပါတဲ့ ဒီသီချင်းရဲ့နောက်ဆုံးအပိုဒ်မှာ ဆိုရင် ဗိုလ်ချုပ်အောင်ဆန်းက စလို့ ရဲဘော်ကိုထွေး အထိ တဦးချင်းစီရဲ့ အမည်များကို ရေးသားထည့်ဆိုထားတာပါ။ စုစုပေါင်း ဆယ်မိနစ်ကျော်ကြာတဲ့ သီချင်းဖြစ်လို့ ခံစား ရေးသားသူ၊ ခံစားသီဆိုသူတို့ရဲ့ ကြိုးစားအားထုတ်ထားမှုကို တွေ့မြင်နိုင်ပါတယ်။

အဓိက ရေးသားချင်တဲ့ အပိုင်းရောက်ပါပြီ၊ အခုရေးဖြစ်ရတဲ့ အကြောင်းက ‘နှစ်၃၀ မြန်မာ့အသံ’ဆိုတဲ့ (၁၉၇၉ခုနှစ် -ပထမအကြိမ်ထုတ်) စာအုပ်ကို ဖတ်မိရာက စပါတယ်။ စာရေးဆရာကတော့ အင်္ဂလိပ်အစိုးရ အသံလွှင့်ဌာန၊ ဂျပန်ခေတ်အစိုးရ အသံလွှင့်ဌာနတို့ကစပြီး ဗမာ့အသံခေတ်၊ အဲဒီနောက် မြန်မာ့အသံခေတ်တွေမှာပါ တလျှောက်လုံး ကျင်လည်ဖြတ်သန်းခဲ့သူ ဦးကျော်ညိန်း (မာတလိ) ဖြစ်ပါတယ်။

နေ့စဉ်မှတ်တမ်း ရေးသားလေ့ရှိသူပီပီ ကိုယ်ပိုင်ဒိုင်ယာရီစာအုပ် ၃၆ အုပ်ကို ကိုးကားပြီး နေ့စွဲရက်စွဲ အတိအကျ ဖော်ပြထားတဲ့စာအုပ်လို့ ဖော်ပြထားပါတယ်။ စာပေဗိမာန်ထုတ် ပြည်သူ့ လက်စွဲစာစဉ်အနေနဲ့ ထုတ်ဝေတာ ဖြစ်တဲ့အတွက် စာပေဗိမာန် စာတည်းအဖွဲ့ရဲ့ တည်းဖြတ်ပြုစု ကူညီမှုကိုလည်း ရရှိခဲ့တယ်လို့ နားလည်ရပါတယ်။

ဒီအတွက် စာအုပ်အချက်အလက် တိကျမှန်ကန်မှုအပေါ် ယုံကြည်စိတ်ချရနိုင်တယ်လို့ ယူဆရပါလိမ့်မယ်။ အခု ပြောပြချင်တဲ့ အပိုင်းက စာမျက်နှာ (၄၀) မှာ ‘လွမ်းမပြေတဲ့ပန်းခွေ’ဆိုတဲ့ သမိုင်းဝင် တေးသီချင်းကို ဆရာရန်နိုင်စိန်က ရေးစပ်ခဲ့တယ်လို့ ဖော်ပြထားတာနဲ့ ပတ်သက်ပါတယ်။

ဘာကြောင့်လဲဆိုတော့ ဒီသီချင်းကို နားထောင်ချင်လို့ ရှာဖွေကြည့်တဲ့အခါ ‘ယူကျူ့ဘ်’အပါအဝင် တချို့တင်ထားတဲ့ နေရာတွေမှာ တေးရေးသူနေရာမှာ သဟာယဆရာတင် ဆိုပြီး တွေ့လိုက်ရလို့ပါ။

သဟာယဆရာတင် ဟာ လွတ်လပ်ရေးရပြီးခါစမှာပဲ အသက်ငယ်ငယ်ရွယ်ရွယ်နဲ့ ကွယ်လွန်ခဲ့သူ ဂီတပါရမီရှင် တယောက်ပါ၊ သူ ကွယ်လွန်သွားတဲ့အချိန်မှာ အသက် (၃၈) နှစ်ပဲ ရှိပါသေးတယ်။

(ဒေါ်)မေရှင်၊ (ဒေါ်)မာမာအေး၊ (ဒေါ်)တင်တင်မြ တို့ သီဆိုခဲ့တဲ့ ‘အောင်ခြင်းရှစ်ပါး’သီချင်းကို သဟာယဆရာတင် ရေးသားခဲ့တာပါ။ စိုးစန္ဒာထွန်းတို့လို အခုနောက်ပိုင်း အဆိုတော်တွေလည်း ဆက်လက်သီဆိုကြတဲ့အထိ ခေတ်အဆက်ဆက် အောင်မြင်ခဲ့တဲ့ ဗုဒ္ဓဘာသာဝင်တိုင်း မသိသူမရှိလို့တောင် ဆိုနိုင်တဲ့ ဓမ္မသီချင်းတပုဒ် ဖြစ်ပါတယ်။

ဆရာဝဏ္ဏကျော်ထင် ရန်နိုင်စိန် ဆိုရင်လည်း စိန်ပါတီ၊ ဥဩဘသောင်၊ ပြည်လှဖေ၊ မေရှင်၊ ဘိလပ်ပြန်သန်း တို့အတွက် သီချင်းရေးသားပေးခဲ့တဲ့ နာမည်ကျော် ဂီတစာဆိုတဦး ဖြစ်ပါတယ်။ သီချင်းရေးသားတာနဲ့ပတ်သက်ပြီး ဆရာရွှေတိုင်ညွန့် ဆီမှာ ဆည်းပူးခဲ့သူလည်း ဖြစ်ပါတယ်။

အခုခေတ် လူငယ်များအတွက်တော့ အသက် (၃၆) နှစ်အရွယ်မှာပဲ ကွယ်လွန်ခဲ့တဲ့ ဂီတစာဆို ရွှေတိုင်ညွန့်ကို အဆိုတော် ဇော်ဝင်းထွဋ်ရဲ့ အဘိုးဆိုရင် ပိုသိသွားလိမ့်မယ် ထင်ပါတယ်။ ဗိုလ်အောင်ဒင် ဇာတ်ကားနဲ့ တွဲဖက်ပြီး မှတ်မိကြတဲ့ မင်းသားခင်မောင်ရင် သီဆိုခဲ့တဲ့ ဒီကနေ့အထိ နာမည်ကြီးတဲ့ နဂါးနီ သီချင်းဟာ ဆရာ ရွှေတိုင်ညွန့်ရဲ့ လက်ရာပါပဲ။

ဖော်ပြခဲ့တဲ့ အနုပညာရှင်နှစ်ဦးလုံးက ‘လွမ်းမပြေတဲ့ပန်းခွေ’လို သမိုင်းဝင် သီချင်းမျိုး ရေးသားနိုင်စွမ်း ရှိကြမှာ သံသယ မရှိပါဘူး။ တခုတော့ ရှိပါတယ်၊ တေးရေးဆရာကတော့ ဟိုနေရာမှာတယောက်၊ ဒီနေရာမှာတယောက် ဖြစ်မနေဘဲ တယောက်တည်းသာ ဖြစ်ရပါလိမ့်မယ်။

စိတ်ထဲမှာတော့ (ဒေါ်)မာမာအေး ရှိစဉ်ကဆိုရင် ဒီအကြောင်းနဲ့ ပတ်သက်ပြီး ထင်မြင်ယူဆချက်ကို ပြောကြားပေးနိုင်ခဲ့မှာပဲလို့ ထင်မိပါတယ်။ ဒါပေမဲ့ အခုလည်း မိုးမခကို ဝိုင်းကြ ဝန်းကြတဲ့ ရုပ်ရှင် စာပေ သဘင် ဂီတ နယ်ပယ်အသီးသီးနဲ့ ကျွမ်းဝင်သူ အနုပညာရှင်ကြီးတွေ ကျန်ရှိနေပါသေးတယ်။

စာဖတ်သူတွေထဲမှာလည်း ဒီသီချင်းနဲ့ ပတ်သက်လို့ ထဲထဲဝင်ဝင် သိရှိတဲ့သူတွေလည်း ရှိနိုင်ပါတယ်။

(ဒေါ်)စိန်ပါတီက ၁၉၇၀ ပြည့်နှစ်၊ ဆရာရန်နိုင်စိန်က ၁၉၉၆ ခုနှစ်တို့မှာ အသီးသီး ကွယ်လွန်ခဲ့ကြပါတယ်။

ဒီစာအုပ်ကို ၁၉၇၉ ခုနှစ်မှာ ထုတ်ဝေတာ ဖြစ်ပေမယ့်၊ စာရေးသူ အမှာစာ ရက်စွဲက ၁၉၇၆ ခုနှစ် ဩဂုတ် ၃၀ ရက်နေ့လို့ သတိပြုမိပါတယ်။ ဒါ့ကြောင့် တကယ်လို့များ စာရေးသူ ဦးကျော်ညိန်း(မာတလိ)က ဒီသီချင်းနဲ့ပတ်သက်ပြီး ဒွိဟ ဖြစ်ခဲ့ရင်၊ အဲဒီအချိန်က ဆရာရန်နိုင်စိန် သက်ရှိထင်ရှား ရှိနေဆဲဖြစ်လို့ မေးမြန်းနိုင်ခဲ့လိမ့်မယ် ထင်ပါတယ်။

အထက်ကပြောခဲ့သလို ဒိုင်ယာရီ အမှတ်အသား ကောင်းခဲ့သူတဦး ဖြစ်တဲ့အပြင်၊ သူကိုယ်တိုင်ကလည်း ဘုရင်ခံ ဆာဟူးဘတ်ရန့်က ဗိုလ်ချုပ်တို့ လုပ်ကြံခံရတဲ့အကြောင်း အင်္ဂလိပ်ဘာသာနဲ့ ဇူလိုင်လ ၁၉ ရက်နေ့ ည ၇နာရီ ၁၅ မိနစ်မှာ အသံလွှင့်ပြောကြားခဲ့တာကို မြန်မာဘာသာပြန် စာမူနဲ့ ထပ်ဆင့်အသံလွှင့်ခဲ့တဲ့သူ ဖြစ်ပါတယ်။

ဒါ့ကြောင့် ဂျူဗလီဟောမှာ အာဇာနည်ကြီးများရဲ့ ရုပ်ကလာပ်များ ထားရှိစဉ် ကာလတလျှောက်လုံး အသံလွှင့်ရုံကနေ မပြတ်ရွေးချယ်ထုတ်လွှင့်ပေးခဲ့တဲ့ ‘လွမ်းမပြေတဲ့ပန်းခွေ’ သီချင်းရေးသားသူကို စာရေးသူ အနေနဲ့ မှတ်မှတ်သားသား ရှိခဲ့လိမ့်မယ်၊ မှန်ကန်စွာ ဖော်ပြနိုင်ခဲ့လိမ့်မယ်လို့လည်း ယူဆပါတယ်။

ဒီဆောင်းပါးနဲ့ တိုက်ရိုက်မသက်ဆိုင်ပေမယ့် အဲဒီအချိန်က ဗမာ့အသံရဲ့ အာဇာနည်နေ့နဲ့ ပတ်သက်တဲ့ အစဥ်အလာတခုကို ဖတ်ရှုရတဲ့အတွက် ထည့်ရေးလိုပါတယ်။ အဲဒါကတော့ ၁၉၄၈ ခုနှစ် ဇူလိုင်လ ၁၉ ရက်နေ့ကစလို့ ၁၉၅၀ ပြည့်နှစ် ဇူလိုင်လ (၁၉) ရက်နေ့အထိ အာဇာနည်နေ့‌ရောက်တိုင်း၊ ဗမာ့အသံက နံနက်ပိုင်းနဲ့ နေ့လယ်ပိုင်း အစီအစဥ်တွေကို လွမ်းဆွတ်တသတဲ့ အထိမ်းအမှတ်အနေနဲ့ မထုတ်လွှင့်ခဲ့ဘူး ဆိုတဲ့အကြောင်းကိုပါ။ ညပိုင်းရောက်မှသာ အသံလွှင့်အစီအစဥ်ကို ပြုလုပ်တယ်လို့ မှတ်သားရပါတယ်။

အနုပညာဖန်တီး အားထုတ်မှုများအတွက် လွဲချော်မှတ်သားမှုများ မရှိစေဖို့က အရေးကြီးပါတယ်။

ကိုယ်တိုင်လည်း သုတေသနစီမံခန့်ခွဲမှုနဲ့ ပတ်သက်ပြီး ဉာဏပစ္စည်းမူပိုင်ခွင့်အကြောင်း သင်ကြားဆည်းပူးခဲ့သူတဦး ဖြစ်တဲ့အတွက်၊ ဘယ်နယ်ပယ် ဘယ်ကဏ္ဍကပဲဖြစ်ဖြစ် တီထွင်ဖန်တီးအားထုတ်ထားမှုများကို တန်ဖိုးထားလေ့ရှိပြီး လွဲချော်မှုတွေ တွေ့မိပြန်ရင်လည်း မနေနိုင်မထိုင်နိုင် ဖြစ်တတ်ပါတယ်။

အခုကိစ္စကတော့ အဲဒီလောက်အထိ ရှုပ်ထွေးမှု မရှိနိုင်ပေမယ့် အခုလိုအာဇာနည်နေ့နဲ့ ပတ်သက်တဲ့ သမိုင်းဝင် တေးတပုဒ်ကို ရည်ညွှန်းကိုးကားကြတဲ့အခါ မှန်ကန်မှုရှိစေလိုတဲ့အတွက် ရည်ရွယ်ရေးသားရခြင်း ဖြစ်ပါတယ်။

ဖြည့်စွက်ပြောရရင် (ဒေါ်)စိန်ပါတီ သီဆိုထားတဲ့ ဒီသီချင်းကို SoundCloud မှာ (ဒေါ်)မေလှမြိုင်က သီဆိုထားတယ် ဆိုပြီးလည်း တင်ထားပြန်ပါတယ်။ စေ့ငုစွာ ကြည့်ဖို့ မေ့လျော့ခဲ့ရင် တချိန်မှာ အမှားတွေကို အမှန်လို့ ထင်သွားနိုင်ပါတယ်။

လက်လှမ်းမမီတဲ့ အချိန်ကာလနဲ့ နယ်ပယ်က ဖြစ်တဲ့အတွက် ဒီဆောင်းပါးမှာလည်း တည့်မတ်ပြင်ဆင် ပေးစရာတွေ ရှိကောင်းရှိနိုင်ပါတယ်။ အမှားတွေကနေ အမှန်ပြန်ဖြစ်ဖို့ကသာ အဓိကကျတဲ့အတွက် လစ်ဟာချက်များ တွေ့ မြင်ခဲ့လို့ ထောက်ပြပေးလိုတာမျိုး ဆိုရင်လည်း ကြိုဆိုပါတယ်။

‘ဪ ဒါလေး မှားနေတာ ဘာမှဖြစ်မသွားနိုင်ပါဘူး၊ ပြောမနေတော့ပါဘူး’ဆိုတဲ့ အလေ့အကျင့်ကို လက်ဆင့်မကမ်းခဲ့ဘဲ၊ မှားတာတွေ့ရင် အချက်အလက်မှန်နဲ့ ပြောဆို ထောက်ပြ ပြင်ဆင်ပေးတတ်တဲ့လူ့အဖွဲ့အစည်း ဖြစ်လာနိုင်စေရေးအတွက် အားလုံးဝိုင်းဝန်း ကြိုးစားပေးဖို့ လိုအပ်ပါလိမ့်မယ်။

Join Us @ MoeMaKa Telegram
t.me@moemaka
#MoeMaKaMedia
#WhatsHappeningInMyanmar