အမ်တီကေ၊ ကျော်ဟုန်း - ၃၆ နှစ်မြောက် ၈ လေးလုံး လူထုဒီမိုကရေစီအရေးတော်ပုံအထိမ်းအမှတ်ကဗျာ
၃၆ နှစ်မြောက် ၈ လေးလုံး လူထုဒီမိုကရေစီအရေးတော်ပုံအထိမ်းအမှတ်ကဗျာ
(မိုးမခ) ဩဂုတ် ၉၊ ၂၀၂၄
ဇီဝဝိညာဉ်
အမ်တီကေ
၃၆ မိုင်ခရီးတစ်လျှောက်မှာ
မျက်ရည်တွေ ဒုက္ခတွေ သောကတွေ
တောပန်းရိုင်းလို ပွင့်ကြတယ်။
အဲဒီပန်းတွေဟာ ဝတ်မှုန်ကူးတဲ့အခါ
ဝိညာဉ်တစ္ဆေတွေ ဖြစ်သွားကြတယ်။
ပျားတွေက ဝတ်ရည်စုပ်နေ
ပြီးတော့ လိပ်ပြာတွေက ကခုန်နေရဲ ့။
ပန်းတွေရဲ ငရဲခန်းဟာ ပါရီကျဆုံးခန်းနဲ့တူနေရဲ့ ။
အဲဒီနောက်မှာ ဘာဖြစ်သွားပါလိမ့်
မြေအောက်ပေါ့ ရေသောက်မြစ်ပေါ့ ။
အခု ခင်ဗျားမြင်ရတာ ဘယ်သူပါလိမ့်
နာမည်ဝှက်နဲ့လှုပ်ရှားနေတဲ့လူတစ်ယောက်ပေါ့။
သူဟာ ပန်းတစ်ပွင့်ရဲ့ ဇီဝ ဝိညာဉ်ပေါ့။ ။
8/8/2024
-
စနစ်ဖြိုလက်များရာဇဝင်
ကျော်ဟုန်း
ငါတို့
ခံစားချက်နဲ့ စတင်ခဲ့ပါတယ်
ခံယူချက်နဲ့ ခရီးဆုံးလျှောက်လှမ်းဆဲ။
ငါတို့
မနိုင်ရင်ကန်မှန်းသိပါတယ်
နိုင်ကိုနိုင်မယ်စိတ်နဲ့လှုပ်ရှားခဲ့ပါတယ်။
ငါတို့
သာသလို မနေရက်ခဲ့ပါဘူး
သန်သလို လှုပ်ရှားနေဆဲပါ။
ကိုယ်နဲ့ မပြီးသေးဘူးဆို လက်ဆင့်ကမ်း
လက်ဆင့်လက်ကို လက်ဆက်တွဲ
လက်ဆက်တွဲတွေ လက်ချင်းချိတ်မြဲရင်
ဆုံမှတ်ဟာ မဝေး
မျှော်လင့်ချက်ဟာ မဝေး
ယုံကြည်ချက်သာ တူပလေ့စေ။
၂၄၈၈
-
t.me@moemaka
#MoeMaKaMedia
#WhatsHappeningInMyanmar
Posts
