မနအ - ငွေ့ငွေ့လေးမျှ လွမ်း၍ မရသော
Art by KT#
ငွေ့ငွေ့လေးမျှ လွမ်း၍ မရသော
မနအ
(မိုးမခ) ဖေဖော်ဝါရီ ၂၅၊ ၂၀၂၅
ဒုတိယ လ၊ ပထမ ရက်၊ နံနက်
တယ်လီဖုန်းက ဧရိယာပြင်ပ၊ ဆက် မရ
အင်တာနက် ပြတ်တောက်
တောက်ခေါက်သံ
မင်မခြောက်သေးတဲ့ လက်သန်းကို ပြန်ကြည့်မိပါ့ ။
ပထမရက်၊ အမျက်ထ စိတ်နောက်
တောက်ခေါက်သံ
အဲဒီ နောက်
ပေါက်ပေါက်ဖောက် ဝေဖန်သံ
အဲဒီ နောက်
သူတစ်ယောက် ကိုယ်တစ်ယောက် ညာသံ
အဲဒီနောက်
သူစု ကိုယ်စု ကြွေးကြော်သံ
အဲဒီ နောက်
ညည သံပုံး ထ ထ တီးကြတဲ့ အသံ ။
နောက် တော့
အဲဒီအသံတွေကြား ပစ်ခွင်းလိုက်တဲ့
မိုက်ကန်း သံ
အဲဒီနောက်
လူသေ ဘယ်နှယောက်လိုအပ်ပါသလဲလို့
ကမ္ဘာကြီးကို တိုင်တည်သံ
အဲဒီ နောက်
မုန်း၊ ကြောက်၊ ရွံရှာဟန် နဲ့
လေပျံ မလာနဲ့၊ မလာနဲ့ ဆိုတဲ့ မောင်းထုတ်သံ
နောက်တော့
အဲဒီအသံတွေကို အဓမ္မ နင်းလိုက်တဲ့
စရိုက်ကြမ်းအသံ ။
ဒီ လို နဲ့
လက်သန်းကို ပြန်ငေးကြည့်တော့
သွေးတွေက ရဲခနဲ ။
ဘယ်မေ့မှာလဲ
ငွေ့ငွေ့လေးမျှ လွမ်း၍မရ
ပထမရက်၊ စတုတ္ထနှစ်၊ ညသန်းခေါင်
အမှောင်မပြိုလဲခဲ့တဲ့ သက္ကရာဇ်တွေ ။ ။
၂၇ ဇန်နဝါရီ ၂၀၂၄
-
t.me@moemaka
#MoeMaKaMedia
#WhatsHappeningInMyanmar
Posts
