မောင်ဘဦး - မလာပါနဲ့ သမီးလေး

မောင်ဘဦး - မလာပါနဲ့ သမီးလေး

မိုးမခ ၊ ဩဂုတ် ၂၃ ၊ ၂၀၂၅

(အညာ‌ရွာ၊ ဖုန်းလိုင်းမိသော နေရာမှ မိခင်နှင့်၊ သူနာပြုအကူ၊ ဆေးဝါးဗေဒ ဖမ်မကော်လော်ဂျီ ၃-လ သင်တန်းတက်ပြီး ပုဂ္ဂလိကဆေးရုံကြီးတွင် အလုပ်လုပ်နေသော သမီးတို့၏ အချီအချ စကားပြောခန်း)

(၁)

အညာက ရွာ၊ ပြန်လာချင်တယ် ...။

မလာစေလို၊ မန်းရွှေမြို့ကြီး၊

မီးမှန်ရေမှန်၊ ဝိုင်ဖိုင်မှန်ကာ၊

မှန်မှန်လခ၊ 'ရှယ်နာ့စ်' ရသေး၊

သင်တန်းကြွေးသာ၊ ကြေဖို့ရာ... ၊

ဆေးခန်းကြီးမှာ သည်းခံ နေ... ။

(၂)

ချက်မြှုပ်အညာ၊ ပြန်လာချင်တယ် ...။

အရင်ကဆို၊ ကျောင်းအိုကျောင်းကြား၊

ပြေးသွားလို့ရ၊ ခုကာလမူ၊

ပူရ လေထီး၊ ဗုံးသီး ရမ်းကြဲ၊

ဘုရားလည်း မရှောင်၊ ကျောင်း မရှောင်... ၊

လူတောင် မစုရဲအောင် လေ... ။

(၃)

မွေးရပ်အညာ၊ ပြန်လာပါမယ် ...။

မလာစေလို၊ တောလျှိုတွေထဲ၊

ယာခင်းထဲမှာ၊ တဲထိုး စစ်ရှောင်၊

ပုန်းရှောင်ကြရ၊ ဒုက္ခ မျိုးမျိုး၊

မြွေဆိုး ကင်းမှောက်၊ နယ်တလျှောက်... ၊

ရွာတောင် မရောက် ဖြစ်ကြ အေ... ။

(၄)

မွေးရပ်အညာ၊ ပြန်လာဦးမယ် ...။

စစ်ကိုင်းနှာဝ၊ တပ်မ-၃၃၊

စလုံး ခကွေး၊ ဆန် ပေးမသယ်၊

ပိတ်တယ် စားဆီ၊ စက်သုံးဆီ နှင့်၊

ဆေးမည် ဂျပ်ဖာ၊ ဒိုက်ဗာ ပါ... ၊

လစဉ်သုံးပါ မကျန်လေ ... ။

(၅)

အညာ အညာ ပြန်လာချင်တယ် ...။

လာမနေနဲ့၊ ပေါ်တာတွေဆွဲ၊

ဗုံးတွေကြဲချ၊ လမ်းမ ဝဲယာ၊

မိုင်းရှာ ဆင်းခိုင်း၊ လူသားဒိုင်း မှတ်၊

ကားတန်း ရပ်ဦး၊ ဝဲ နေတုန်း... ၊

ဒရုန်းစဲမှ သွား တဲ့အေ ... ။

(၆)

မွေးရပ်အညာ၊ လာပါဦးမယ်။

ဖြစ်ရင်မလာ၊ အဲသည်မှာ နေ၊

ရွာတွေဒုက္ခ၊ ကြုံကြရ လည်း၊

ဘုရားကျောင်းပွဲ၊ အလှူပွဲနှင့်၊

မင်္ဂလာပွဲစုံ၊ မွေးနေ့ကြုံ... ၊

ဓမ္မာရုံ ဆောက်ဖို့ အလှူခံနေ... ။

(၇)

မဟာအညာ ပြန်လာချင်တယ် ...။

မလာလေနဲ့၊ ရွာ-ပကဖ၊

ကြက်ဝိုင်းချ၍၊ ပအဖ-ဖိုးရှိ၊

ဖဲဝိုင်းမိ ကြောင့်၊ ဖမ်းသည့် ခရိုင်၊

အပိုင်ဒဏ်ချ၊ သည်တစ်လ... ၊

လ,ပတ် တိုးလို့ ကောက်တယ်လေ... ။

(၈)

မဟာအညာ လာချင်လိုက်တာ ...။

လာချင်လွန်းလို့၊ ကိုယ့်ထိုက် ကိုယ်ခံ၊

ရွာမြောက်ဌာန် အဖြစ်၊ စစ်ကြောင်းနဲ့တိုး၊

မိမိုး လင်မယား၊ နသားပါရ၊

အဓမ္မ အတင်း၊ လင်ရှေ့ခင်း.. ၊

မင်း ကျေနပ်သလား မေးသတဲ့ လေ... ။

သုခိတာ ဟောထ၊ ဒုက္ခ မုဉ္စထာ။ တလရဘက်တော်သူ/သားအားလုံး ချမ်းသာကြပါစေ၊ ဆင်းရဲအပေါင်းမှ လွတ်ကင်းကြပါစေ။

(မောင်ဘဦး၊ ၈၇၊ ခေါင်ကျော် ၅)

Join Us @ MoeMaKa Telegram
t.me@moemaka
Please show your support, donate with Zelle
#MoeMaKaMedia
#WhatsHappeningInMyanmar