မြန်မာနွေဦး လမ်းခုလတ်မှာ အမေရိကန်ဒီမိုကရေစီ နေဝင်ပြီလား

မြန်မာနွေဦးခရိုနီကယ် - ဇန်နဝါရီ ၇ မြင်ကွင်း

မိုးမခ ၊ ဇန်နဝါရီ ၈၊ ၂၀၂၆

မြန်မာနွေဦး လမ်းခုလတ်မှာ အမေရိကန်ဒီမိုကရေစီ နေဝင်ပြီလား

သည်နေ့ ဘာရေးမလဲ။ အယ်ဒီတာ ၂ ဦးက တဦးကို တဦး လှမ်းမေးကြတယ်။ ပဲခူးတိုင်း အနောက်ခြမ်းက လုံခြုံရေးစခန်းတွေကို တိုက်တဲ့အကြာင်းရေးမလား။ မင်းလှ စစ်ကွင်းဘက်က ပြည်ကားလမ်းပေါ်မှာ ဖြစ်နေတာ။ သည်လိုမျိုး မေးခွန်းနဲ့ စ ကြတယ်။ ဟုတ်တယ်။ စစ်တပ်၏ ရွေးကောက်ပွဲ အပိုင်း ၁ အပြီးမှာ စစ်ရေး ပိုပြင်းထန်လာတယ်။ နေရာအနှံံ့မှာ ပြင်းထန်လာတယ်။ မြန်မာစစ်တပ်က လေကြောင်း ဗုံးကြဲမှုတွေ ပြင်းထန်လာတယ်။ အရပ်သားနေရာတွေကို ပိုမို ပစ်မှတ်ထားလာတယ်။ ချင်းပြည်ဖက်မှာ မြန်မာစစ်တပ်က စစ်ကြောင်းတွေကို ချင်းတော်လှန်ရေးအဖွဲ့တွေက ခုခံချေမှုန်းမှုတွေ ပြင်းထန်လာတဲ့အကြောင်း အဲသည်အရပ်က ကျောင်းဆရာလေးက ပြောလာတယ်။ အကျအဆုံးကလည်း များတယ်၊ ဗုံးကြဲတာလည်း များတယ်။ သို့သော် မြန်မာစစ်တပ်ဘက်က အဆုံးအရှုံးက အရမ်းများတာက မြန်မာပြည်အနှံ့အပြားမှာလို့ ပြောကြတယ်။ NUG နဲ့ ERO မဟာမိတ်တွေဘက်ကလည်း မြန်မာစစ်တပ်ကို စစ်ရေးအရ တိုက်ပွဲဝင်နေတာက ရွေးကောက်ပွဲ ဒုတိယပိုင်းမတိုင်ခင် ပိုတိုးလာတယ်လို့ ဆိုရပါမယ်။ 

ဒါနဲ့ စကားမစပ်၊ မြန်မာစစ်တပ်က အခု ပတ်စ်ပို့တွေ လျင်လျင်မြန်မြန် ထုတ်ပေးမယ်လို့ သူတို့ဝက်ဆိုက်တွေ ဖေ့စ်ဘုတ်တွေမှာ ထုတ်ပြန်ထားတယ်လို့ m.CDM က တဦးက လှမ်းပြောပြန်တယ်။ လူငယ်တွေကို အဓမ္မစစ်မှုထမ်းဖို့ အတင်းအကြပ် ဖမ်းပြီး သွတ်သွင်းနေချိန်မှာ နိုင်ငံကူးလက်မှတ်တွေ အလျင်အမြန်ဝန်ဆောင်မှုပေးနေတယ်ဆိုတော့ စစ်အုပ်စုလက်အောက်မှာ လူတန်းစားတရပ် လူအုပ်စုတစုက ပြည်ပကို ထွက်နေကြတဲ့ အခြေအနေ အင်အားတွေ ရှိနေတဲ့သဘောလို့ ဆိုရမလား။ အာရှနိုင်ငံတွေမှာ အလုပ်သမားလိုအပ်ချက်တွေကို မြန်မာပြည်က ဖြည့်စွမ်းနိုင်သေးတဲ့သဘောလား။ ဒါကို ပြည်တွင်းက သတင်းထောက်တွေက မြေပြင်မှာ တိုက်ရိုက်စုံစမ်းပြီး ရေးရမယ့်သဘောဆိုတော့ ကိုယ်တွေက ရေးလို့ မရသေးဘူး။

၂၀၂၆ အဝင်မှာ လေးနဲ့ မြားကို ချန်မထားရစ်တော့တဲ့ ကမ္ဘာကြီးအကြောင်း ရေးရမလား။ အမေရိကန်က ဇန်နဝါရီ ၃ ရက်မှာ ဗန်နီဇွဲလားကို အင်အားသုံး လျပ်တပြက်ဝင်တိုက်ပြီး အာဏာရှင်သမ္မတ မာဒူရိုကို ဖမ်းဆီး ပြန်ပေးဆွဲသွားတယ်။ သတင်းစာအချို့နဲ့ နိုင်ငံရေးသမားတချို့ကတော့ နိုင်ငံတခု၏ အစိုးရခေါင်းဆောင် ပြန်ပေးဆွဲခံရတယ်လို့ သုံးကြပါတယ်။ ဆိုလိုချင်တာက အမေရိကန်အစိုးရ၏ မတရားတဲ့ စစ်အင်အား နိုင်ငံရေးအင်အား အလွဲသုံးစားလုပ်မှုပေ့ါ။ အမေရိကန်လွှတ်တော်က စစ်ရေး နိုင်ငံတကာဆက်ဆံရေးနဲ့ ပတ်သက်တဲ့ အထူးကော်မီတီတွေကို ကြိုတင်အသိမပေးတဲ့အတွက် လုပ်ထုံးလုပ်နည်းနဲ့ မညီဘူး၊ အခြေခံဥပဒေကို ချိုးဖောက်တယ်လို့ ဝေဖန်ပြစ်တင်ခြင်း ခံရပါတယ်။ အင်အားကြီးသူ လက်ဦးမှုယူပြီး အနိုင်ကျင့်တဲ့ နိုင်ငံရေးဆိုတာက အမှန်တရား ဖြစ်လာပြီလားလို့ မေးခွန်းထုတ်ခံရပြီ ဖြစ်ပါတယ်။

သည်လို အမေရိကန်အစိုးရက အင်အားကြီးသူ လုပ်ချင်တိုင်းလုပ်တာ တင့်တယ်တဲ့ ခေတ်ရောက်ပြီလား။ အမေရိကန်သမ္မတ ထရန့်က ဗန်နီဇွဲလားပြည်သူတွေအေးချမ်းဖို့ အခုလို အင်အားသုံးပြီး သူတို့သမ္မတကို ပြန်ပေးဆွဲသွားရတာလို့ ပြောပါတယ်။ သို့သော် နောက်တရက်မှာ ထရန့်က လွှတ်တော်အမတ်တွေကို တခါးပိတ်ဆွေးနွေးတင်ပြတဲ့ဆီမှာ ဗန်နီဇွဲလားတိုင်းပြည်က ရေနဲံဈေးကွက်ကို လိုချင်တာလို့ ဝန်ခံပါတယ်။ လွှတ်တော်နဲ့သာမတိုင်ပင်တာ အမေရိကန်က ရေနံကုမ္မဏီကြီးတွေနဲ့ အရင်ဆုံးတိုင်ပင်ပြီး သူများတိုင်းပြည်ကို ဝင်သိမ်းတာလို့ ပြောလိုက်ပါသတဲ့။ သူများတိုင်းပြည်ခေါင်းဆောင်ကို ပြန်ပေးဆွဲပြီး သူများတိုင်းပြည်က ရေနံတွေကို အမေရိကန်အတွက်ဆက်ကြေးအနေနဲ့ တောင်းဆိုထားပါပြီ။ အဲသည်ရေနံတွေကို ပေါက်ဈေးနဲ့ရောင်းပြီး ထရန့်က စီမံခန့်ခွဲပေးမယ်လို့ ပြောပါသတဲ့။ 

အမေရိကန်က အာဏာရှင်ကို စိတ်တိုင်းကျ လုပ်ခွင့်ရှိနေချိန်မှာ သူက တခုတော့ ဝန်ခံပါတယ်။ သူ့လွှတ်တော်က ရုပ်သေးရုပ်အမတ်တွေကို တခုတော့ သတိပေးပါတယ်။ ၂၀၂၆ ကြားကာလရွေးကောက်ပွဲမှာ ရီပတ်ဘလစ်ကန်တွေ နိင်အောင်လုပ်ကြပါတဲ့။ မင်းတို့ရှုံးပြီး ဒီမိုကရက်တွေနိုင်ရင် ငါ့ကို သူတို့ဒီမိုကရက်တွေက စွပ်စွဲပြစ်တင်ပြီး ဖြုတ်ချ (Impeachj) လုပ်ကြလိမ့်မယ်လို့ ဝန်ခံသွားပါတယ်။ ဆိုတော့ ထရန့်ကိုယ်တိုင်က သူလုပ်တဲ့ အမှုတွေက အပြစ်ကြီးတယ်ဆိုတာ သူသိထားပြီးသားလို့ ဆိုတဲ့သဘောပေါ့။

ဗန်နီဇွဲလားသမ္မတ မာဒူရိုက ရွေးကောက်ပွဲ့ရှုံးတာ အာဏာမစွန့်ဘူးဆိုပြီး ထရန့်က စွပ်စွဲပါတယ်။ ပြစ်တင်ပါတယ်။ သူကိုယ်တိုင်က ၂၀၂၀ နိူဝင်ဘာ သမတရွေးကောက်ပွဲရှုံးတာကို လက်မခံဘဲ သူ့ကို ထောက်ခံတဲ့လူအုပ်ကြီးကို လွှတ်တော်ကို အကြမ်းဖက် ဝင်စီးနင်းခိုင်းခဲ့ပါတယ်။ အဲသည် ပုန်ကန်တဲ့ ရာဇဝတ်သား လူပေါင်း ၁၅၀၀ လောက်ကို အမေရိကန်တရားရေးစနစ်က ထောင်ချအရေးယူခဲ့တာကို သူ သမ္မတပြန်ဖြစ်တဲ့ ၂၀၂၅ မှာ အကုန်လုံး လွတ်ငြိမ်းချမ်းသာ ပေးတဲ့ သမ္မတမျိုး ဖြစ်ပါတယ်။ အခု ၂၀၂၆ ဇန်နဝါရီ ၆ ငါးနှစ်ပြည့်အထိမ်းအမှတ်မှာ ဇန်၆ အကြမ်းဖက်မှုကို သမိုင်းပြောင်းပြန် ပြန်ရေးခိုင်းပါတယ်။ ဒီမိုကရက်တွေ လုပ်ကြံဖန်တီးပြီး လွှတ်တော်ရဲတွေက ပြည်သူတွေကို ရန်စ အကြမ်းဖက်တဲ့ အကျည်းတန်ဖြစ်ရပ်ကြီးလို့ သူက ထုတ်ပြန်ခိုင်းပါသတဲ့။

ဆိုတော့ အမေရိကန်ဒီမိုကရေစီ နေဝင်ချိန်ရောက်ပြီလားလို့ မေးကြရတဲ့ အချိန်ဟာ ၂၀၂၆ နှစ်ဆန်းဖြစ်ပါတယ်။ အမေရိကန်ဒီမိုကရေစီ နေဝင်ချိန်ဆိုတော့ တိုင်းပြည်တခုလုံး တကမ္ဘာလုံး အမှောင်ကျသွားပြီလား၊ လူတွေအားလုံး သွေးပျက်ခြောက်ခြားပြီး ပြေးလွှား ပုန်းရှောင် ကမ္ဘာပျက်သလို ဖြစ်ကုန်ပြီလားလို့ မေးလာရင်တော့ အဲသည်လိုလည်း မဟုတ်သေးပြန်ဘူးလို့ ဖြေရမှာပါ။ အမေရိကန်နဲ့ ကမ္ဘာ့ စတော့ဈေးကွက်က ဘာမှ ဟန်ချက်ပျက်ခြင်း မရှိပါဘူး။ ရေနံဈေးတွေလည်း ကမောက်ကမ ဖြစ်သွားတာမျိုးလည်း မဖြစ်ပါဘူး။ ဈေးကွက်အညွန်းကိန်းတွေက တည်တည်ငြိမ်ငြိမ်နဲ့ တုန့်ပြန်ကြတယ်လို့ ဆိုပါတယ်။ အကဲခတ်တွေက ယေဘူယျပြောဆိုတာကတော့ အမေရိကန်၏ ဒီမိုကရေစီတန်ဖိုးနဲ့ စည်းကမ်းကို အမေရိကန်ကိုယ်တိုင်က စောင့်ရှောက်ပေးနိုင်ခြင်း မရှိတော့တာကို ကမ္ဘာခေါင်းဆောင်တွေ တက်ကြွလှုပ်ရှားသူတွေ ပညာရှင်တွေက သိရှိသွားပြီး ဖြစ်တာမို့ ကမ္ဘာကြီး၏ ယဉ်ကျေးတဲ့ အစိတ်အပိုင်းက သူ၏ ဟန်ချက်အသစ်ကို ပြန်လည် ထိန်းညှိဖို့ ပြင်ဆင်နေကြချိန်လို့ ဆိုကြပါတယ်။ အမေရိကန်မဲဆန္ဒရှင်တွေ၏ အသည်းကြားက မဲတပြားဟာ တန်ဖိုးရှိသေးသလားဆိုတာကို ၂၀၂၆ ကြားကာလရွေးကောက်ပွဲမှာ ပြန်လည် ချိန်ထိုးကြည့်ကြရမှာ ဖြစ်ပါတယ်။ အမေရိကန်နဲ့ နိုင်ငံတကာပြည်သူတွေအားလုံး မီးစင်ကြည့်ကရတဲ့ အချိန်ကာလကို ရောက်လာတယ်လို့ ဆိုကြပါတယ်။

အမေရိကန်ပြည်သူတွေကိုယ်တိုင်ကော ရွှေ့ပြောင်းအခြေချနေထိုင်သူတွေကိုယ်တိုင်ပါ ထရန့်အစိုးရ၏ လက်နက်ကိုင် စစ်တပ်၊ ရဲ၊ လုံခြုံရေးတပ်ဖွဲ့တွေ၏ ခြိမ်းခြောက် တိုက်ခိုက်မှုတွေ ခံစားနေကြရပါတယ်။ ကျန်းမာရေး လူမှုရေး ပညာရေး အလုပ်အကိုင် ကဏ္ဍမျိုးစုံမှာ အာဏာအလွဲသုံးစားလုပ်ပြီး ဥပဒေမဲ့ အနိုင်ကျင့် ဖိနှိပ်ခြင်း မျိုးစုံကို ခံနေရပါတယ်။ သူတို့အခွင့် အရေးတွေ ရပိုင်ခွင့်တွေ ကန့်သတ်ခြင်း ခံနေရပါတယ်။ သတင်းမှားတွေ လုပ်ကြံသတင်းတွေနဲ့ ပြည်သူတွေဟာ သွေးခွဲခြင်း ခံထားရပါတယ်။ မနေ့ကပဲ အစိုးရအဆင့်ပြည်သူပြန်ကြားရေးဌာနကို ဘတ်ဂျက်မရှိတော့လို့ ကိုယ့်ဖာသာကိုယ် ဖျက်သိမ်းခြင်း ခံလိုက်ရပါတယ်။ USAID လို နိုင်ငံတကာထောက်ပံ့ရေးဌာနတွေ မရှိတော့။ VOA RFA လို သတင်းဌာနတွေ မရှိတော့။ ပညာရေးနဲ့ သိပ္ပံသုတေသန ထောက်ပံ့မှုတွေ မရှိတော့။ လူမှုဖူလုံရေးတွေ ပညာရေးထောက်ကူတွေ အမျိုးသမီး၊ မိခင်နဲ့ ကလေးစောင့်ရှောက်မှု ဘတ်ဂျက်တွေ ဖြတ်ချ၊ ကျန်းမာရေးစာရိတ်ထောက်ကူမှုတွေ မရှိတော့တဲ့ အမေရိကန်ပြည်သူတွေရဲ့ဘ၀ဆိုတော့ သူတို့အမေရိကန်တွေ၏ ဒီမိုကရေစီတန်ဖိုးတွေ အရောင်မှိန်တဲ့ ကာလလို ဆိုရမှာ ဖြစ်ပါတယ်။

မြန်မာပြည်က မြန်မာပြည်သူလူထုအနေနဲ့ကတော့ အမေရိကန်ပြည်သူတွေကို ကိုယ်ချင်းစာပြီး စာနာကြောင်း ဂရုဏာစကားလေးတော့ ပါးနိုင်ပါတယ်။ မြန်မာပြည်က အာဏာရှင်တွေအောက်က ပြည်သူတွေဘ၀မှာ ဒီမိုကရေစီနဲ့ ဖယ်ဒရယ်စနစ်ကို မရရအောင် ပြန်လည် ရယူဖို့ ထူထောင်ဖို့ ကြိုးပမ်းဆောင်ရွက် တိုက်ပွဲဝင်နေကြချိန် ဖြစ်ပါတယ်။ အမေရိကန်ပြည်ထောင်စုကတော့ ဒီမိုကရေစီနဲ့ ဖယ်ဒရယ်ပြည်ထောင်စုအလွန် တဘူတာမှာ သူတို့ဒီမိုကရေစီ ကျပျောက်တော့မလားလို့ ရင် မ နေရတဲ့ လမ်းခုလတ် ဖြစ်ပါတယ်။

Join Us @ MoeMaKa Telegram
t.me@moemaka
Please show your support, donate with Zelle
Like and Subscribe MoeMaKa YouTube Channel
#MoeMaKaMedia
#WhatsHappeningInMyanmar