မိုးမခ - မတ် ၂၁ ကမ္ဘာကဗျာနေ့မြန်မာကဗျာများ (နေစိမ့်၊ ရင်နီ)
(မိုးမခ) မတ် ၂၃၊ ၂၀၂၁
....
ဘယ်လိုကဗျာ ရေးရမလဲ
နေစိမ့်
စကားလုံးတွေ ရှာမရတော့ဘူး
ဘယ်လိုကဗျာ ရေးရမလဲ
စကားလုံးတွေ ကြွေးကြော်သံထဲ ပြေးလွှား
စကားလုံးတွေ အခိုးအငွေ့ထဲ အသက်ရှူကြပ်
စကားလုံးတွေ သွေးစက်ထဲ စေးကပ်
စကားလုံးတွေ လမ်းမပေါ် ကစင့်ကလျား
စကားလုံးတွေ ကျည်ဆန်ထဲ ရှောင်တိမ်း
စကားလုံးတွေ ဗုံးခိုကျင်းထဲ မဆန့်မပြဲ
အရေးတော်ပုံရဲ့ ဆီဦးထောပတ်ထဲ
စကားလုံးတွေ
သတ်ပုံမှန်အောင် ပျော်ဝင်နေရ ...။ ။
...
ခွင့်တူညီမျှ
ရင်နီ
တရားမျှတမှုဆိုတာ
အမှောင်မှာ ရှာမရတဲ့အရာ
ဘာသာတရားအသစ်မဟုတ်
အကြောက်တရားအောက်မှာ ပုံးခို
ခေါင်းငုံ့နေလိုသူတွေ
မမြည်းစမ်းဖူးတဲ့ အရသာ။
လွတ်လပ်ခြင်းဆိုတာ
ကလေးငယ်တို့အတွက်
ကမ်းဆက်ရမယ့်လက်ဆောင်
ထူထောင်ရမယ့် တရား။
ဉာဏ်အား လက်ရုံးအား ပေါင်းစည်းအားနဲ့
တော်လှန်ရယူရမယ့် ဥစ္စာ။
များလူခပ်သိမ်း ငြိမ်းအေးစေဖို့
ရှေ့မှာရောင်နီ ရောက်အောင်ချီ
တိုက်ကြမှ ဖြစ်မည်
တိုက်ပွဲရှိလျှင် အောင်ပွဲ ရှိသည်
ရဲရဲယုံကြည်။ ။
ရင်နီ
၂၁၊ ၃၊ ၂၀၂၁
ကမ္ဘာကဗျာနေ့