မြန်မာ့နွေဦးတော်လှန်ရေးကဗျာများ - ရင်နီ၊ ရန်လင်းအောင်
မြန်မာ့နွေဦးတော်လှန်ရေးကဗျာများ
မိုးမခ
မေ ၇၊ ၂၀၂၁
မျိုးဆက်တော်လှန်ရေး
ရင်နီ
သမီးငယ်ရဲ့ရှိုက်သံနောက်
သားကြီးရဲ့ လက်သီးက နံရံဆီလွင့်
မိဘတစ်ယောက်ရဲ့ စိတ်ခံစားမှုဟာ
တိုက်ပွဲဖြစ်သွား။
အသက်ကိုအရင်းပြုလို့
နိုင်အောင် တိုက်ရမယ့်တိုက်ပွဲ။
ပြည်သူချင်းယုံကြည်မှုနဲ့
နိုင်ကိုနိုင်ရမယ်လို့
စိတ်ကိုဖြတ်
မရပ်မနား ထိုးစစ်ဆင်ရမှာပဲ။
မေတ္တာတရားရဲ့ညွှန်ပြချက်နဲ့
ရှေ့ဆက်ရမယ့်လမ်း
အကြမ်း အရမ်း လွမ်းခန်း
သန်းချီတဲ့ တိုင်းရင်းသားပြည်သူများနဲ့ လက်တွဲ
နှောင်ကြိုးပြတ်ဖို့ တိုက်ရမယ့်ပွဲ
တိုက်ပွဲဟာ ဘဝထဲကို မီးထုပ်ကိုင်ပြီး ဝင်လာပြီ။
သိစိတ်ထဲဆုပ်ကိုင်မိတာက ဓမ္မ
နှလုံးသားမှာ လူ့ဂုဏ်သိက္ခာ
စစ်မိစ္ဆာကိုအမြစ်ဖြတ်ဖို့
သွေးသစ္စာကို ဆိုခဲ့ပြီ။
အံကြတ်ရင်းကြည့်တဲ့ အဖေ့မျက်လုံးထဲ
အမေကိုင်ထားတဲ့ ဓားမကိုမြင်တော့
သွေးကပြောတဲ့စည်းလုံးမှုနဲ့
အောင်စည်သံကို အောင်စိတ်နဲ့ကြား
သားတို့ရေ
အိမ်ရှေ့သပြေပင်က ရွက်နုသစ်လွင်
တိုက်ရင်နိုင်မယ့်အောင်ပွဲရှိတယ်။ ။
၃၊ ၃၊ ၂၀၂၁
နံနက် ၈း၄၅
...
နွေဦးကျောင်း
ရန်လင်းအောင်
နွေဦးကျောင်းကို တက်ပြီးပြီပဲ
ဘယ်ကျောင်းတက်ဖို့လိုသေးလဲ ။
ဓမ္မလှိုင်းတွေ တလုံးပြီးတလုံး
အဓမ္မအမှိုက်တွေကို ခါထုတ်နေပြီ
စစ်မိစ္ဆာတွေက ပြည်သူကိုပုန်ကန်လို့
ပြည်သူတွေက ပြည်သူ့တရားနဲ့
စီရင်ကြပြီ
ဒလန်တွေ သေပန်းပွင့်သလို
နွေဦးကြယ်တွေ ရှင်ပန်းပွင့်ပြီ
ပြည်သူ့ကောင်းကင်ပေါ်မှာ
တလက်လက်
လူဆိုးနဲ့လူကောင်း
ဓမ္မနဲ့အဓမ္မ
ရန်သူနဲ့မိတ်ဆွေ
အထူအပါး စာရင်းဇယားထုတ်
ခွဲခြားဖော်ပြ
နွေဦးပညာရေးဟာ
ကျွန်ပညာရေးကို အမြစ်ဖြုတ်ပြီ
နွေဦးကျောင်းကိုတက်ခဲ့ပြီပဲ
ဘယ်ကျောင်း တက်ဖို့လိုသေးလဲ ။
၂၆.၄.၂၁
t.me@moemaka
#MoeMaKaMedia
#WhatsHappeningInMyanmar