မြန်မာပြည်မှာ စစ်တပ်အာဏာသိမ်းပြီး ၃လ ၂၃ ရက် မြောက်နေ့ မြင်ကွင်း

မြန်မာပြည်မှာ စစ်တပ်အာဏာသိမ်းပြီး ၃လ ၂၃ ရက် မြောက်နေ့ မြင်ကွင်း

(မိုးမခ) မေ ၂၃၊ ၂၀၂၁

ချင်းပြည်နယ် ပြီးတော့ ဒုတိယမြောက် ခုခံတိုက်ပွဲဖေါ်ဆောင်တဲ့ ကရင်နီပြည်နယ်

ပြီးခဲ့တဲ့ သီတင်းပတ်တွေမှာ နေ့စဥ် သတင်းတွေရဲ့ ထိပ်ဆုံးသတင်းအဖြစ် နေရာယူခဲ့တာက ချင်းပြည်နယ် မင်းတပ်မြို့က နေ ခုခံ တိုက်ခိုက်ကြတဲ့ တိုက်ပွဲသတင်းတွေ ဖြစ်ပါတယ်။ မင်းတပ်က တက်ကြွသူလူငယ်တွေ နဲ့ဖွဲ့ထားတဲ့ ချင်းပြည်သူကာကွယ်ရေး တပ်ဖွဲ့က ရက်အတန်ကြာ မင်းတပ်ကို ဝင်လာတဲ့ စစ်ကောင်စီ တပ်သား၊ တပ်ရင်းတွေကို ကြားဖြတ်တိုက်ခိုက်တာတွေ၊ သူတို့ စခန်းချထားတဲ့ နေရာတွေကို သွားေရာက်တိုက်ခိုက်တာတွေ လုပ်ခဲ့ပါတယ်။

နောက်ရက်အနည်းငယ် အကြာ စစ်ကောင်စီဘက်က တပ်အင်အားအကူတွေ ခုခံမှုနဲ့ မညီမျှတဲ့ လက်နက်ကြီးတွေကိုပါ သယ်ယူလာပြီး အင်အားနဲ့မင်းတပ်မြို့ကို သိမ်းခဲ့ပြီး ချင်းပြည်သူ့ကာကွယ်ရေး ပျောက်ကြားတပ်တွေ မြို့ကနေ ဆုတ်ခွဲပေးခဲ့တာဖြစ်ပါတယ်။

မင်းတပ်က ကလေးမြို့၊ ကနီ၊ မြင်းခြံ၊ တန့်ဆည်၊ ပင်လည်ဘူး စတာတွေရဲ့ အတွေ့အကြုံ၊ ရေမြေ ပထဝီအနေအထား အားသာမှုတို့ကို ယူပြီး စစ်ကောင်စီကို အတိုင်းအတာတခုထိ သင်ခန်းစာပေးခဲ့တယ်လို့ ဆိုနိုင်ပါတယ်။ တဖက်မှာလည်း အရင်းအနှီးကြီးမားပါတယ်။ လူဦးေရ သောင်းဂဏန်းရှိတဲ့ မြုိ့နေလူထု၊ အသက်ကြီးသူတွေ အမျိုးသမီးတွေ၊ ကလေးငယ်တွေ ခုဆို ထောင်နဲ့ချီတောထဲ တောင်ထဲ မိုးထဲရေထဲ မီးမရှိ အစားအသောက် မလုံမလောက်နဲ့ နေထိုင်နေကြရတဲ့ အနေအထားဖြစ်ပါတယ်။

ခု ချင်းပြည်နယ် မင်းတပ်ပြီး အဆက်ဆက် အစိုးရတွေက ကယားပြည်နယ်လို့ ခေါ်ပြီး ဒေသခံနဲ့ တိုင်းရင်းသားလက်နက်ကိုင် အဖွဲ့အစည်းတွေက ကရင်နီပြည်နယ်လို့ ခေါ်တဲ့ ပြည်နယ်မှာ ပြီးခဲ့တဲ့ ၂ ရက်ကစလို့ စစ်ကောင်စီ တပ်တွေ၊ ရဲတွေကို စိမ်ခေါ် ပြီး တိုက်ပွဲစတင်ခဲ့ပါပြီ။

မနေ့က ကေပီဒီအက်ဖ် တွေက စစ်ဆေးရေး ဂိတ်တွေကို သိမ်း မီးရှို့ဖျက်ဆီးတာတွေ လုပ်ခဲ့ပြီး စစ်တပ်ကားတွေကို ဖြတ်တိုက်တာတွေ ကနေ ဒီနေ့တော့မိုးြဗဲ ရဲစခန်းတခုကို သွားသိမ်းခဲ့ပြီး လက်နက်ချတဲ့ ရဲအချို့ကိုလည်း ဖမ်းဆီးထားပါတယ် စစ်ကောင်စီဘက်က ရဲတပ်ဖွဲ့ဝင်တွေလည်း အကျအဆုံးများခဲ့တဲ့သတင်းတွေ ဖေါ်ပြထားကြပါတယ်။

ဒီအဖြစ်အပျက်က ကရင်နီပြည်နယ် မှာ တိုက်ပွဲခေါ်သံခေါ်ရုံမျှမက စတင်ပြီး ပျောက်ကြားစစ် ဆင်နွှဲမယ့် ကရင်နီပြည်သူ့ကာကွယ်ရေး တပ်ဖွဲ့ရဲ့ ပထမဆုံး တိုက်ပွဲအတွေ့အကြုံ ဖြစ်ပါလိမ့်မယ်။ စစ်ပွဲတွေကို နုိင်ငံရေး နည်းလမ်းနဲ့ အဖြေရှာဖို့ ၂၀၁၁၊ ၁၂ က စတဲ့ ငြိမ်းချမ်းရေး လုပ်ငန်းစဥ်ကလည်း စစ်အာဏာသိမ်းလိုက်ကတည်းက ရှေ့မတိုးနိုင်တော့တာ သေချာသွားပြီး ခုဆို နောက်ပြန်လျောကျလာနေတာတွေ့ နေရပါပြီ။

စစ်ကောင်စီရဲ့ ရက်စက် ရမ်းကားတဲ့ ဖြိုခွဲမှု၊ နိုင်ငံရေးအရ ဖြေရှင်းဖို့မကြိုးစားပဲ ဆူပူ ဆန္ဒပြသူ၊ အကြမ်းဖက်ဆူပူသူလို့ ခေါ်ဆိုပြီး ရက်စက်စွာ ဖြိုခွဲခဲ့တာရဲ့ အကျိုးဆက်တုံ့ပြန်မှုက လက်နက်ကိုင် တပ်ဖွဲ့အသစ်တွေ ပေါ်လာနေပြီး ငြိမ်းချမ်းရေးစကားသံ တိတ်ဆိတ်သွားခဲ့ပြီလို့ ယူဆရမယ့်သဘောလည်း ဖြစ်ပါတယ်။

ဒီနေ့တိုက်ပွဲတွေ တိုက်ခိုက်မှုတွေ အသေအပျောက်စာရင်းတွေ တက်တဲ့ ေဒသတွေက ချင်းပြည်နယ် မင်းတပ်နဲ့ ကရင်နီပြည်နယ် ဒီမောဆိုး၊ မိုးြဗဲ၊ တို့တင်မကပါဘူး။ စစ်ကိုင်းတိုင်း အထက်ပိုင်း ကနီနယ်မှာလည်း အသေအပျောက် ဒါဇင်အနည်းငယ်အထိ ရှိခဲ့တယ်လို့ သတင်းဖေါ်ပြချက်တွေ အရ သိရပါတယ်။

မြန်မာနိုင်ငံ မြောက်ပိုင်း၊ အရှေ့အနောက် အလယ်ပိုင်း အောက်ပိုင်း စတဲ့ နေရာတွေမှာ တပြိုင်နက်ထဲ အရင်က လက်နက်မကိုင်ဖူးတဲ့ သာမန်အရပ်သားတွေက ထပြီး တော်လှန်တိုက်ခိုက်တာ တိုင်းရင်းသားလက်နက်ကိုင် အဖွဲ့တွေက တိုက်ခိုက်တာတွေနဲ့ စစ်ကောင်စီအဖို့ ဗျာများနေတာတော့ အမှန်ပဲ ဖြစ်ပါတယ်။ သို့ပေမယ့် တပ်ချုပ် ဖြစ်သူက ပြီးခဲ့တဲ့ လအနည်းငယ် အာဏာမသိမ်းမှီကတည်းက ဘာမဆိုလုပ်ရဲတယ် မလုပ်ရဲတာ မရှိဘူးဆိုတဲ့ စကားကို တိုင်းသိပြည်သိ ပြောခဲ့တာမို့ မိုက်ဇတ်ကို ဆက်ခင်း ဆက်တိုးဖို့ များပါတယ်။ နိုင်ငံရေး နည်းလမ်းနဲ့ ဖြေရှင်းဖို့ထက် စစ်အင်အားကိုသာ ထပ်သုံး၊ ရက်စက်ကြမ်းတမ်းတဲ့ နည်းလမ်းတွေ သုံးပြီး နှိမ်နှင်းတိုက်ခိုက်မယ့် အလားအလာတွေ ရှိနေပါတယ်။

စစ်အာဏာရှင်တော်လှန်တဲ့ အုပ်စုတွေ အနေနဲ့ စုစည်းမှု အချိန်ကိုက် တော်လှန်မှု၊ အချင်းချင်းအကြား ပူးေပါင်းလုပ်ဆောင်မှုတွေ ရှိဖို့ အလွန်အရေးကြီးပါတယ်။ ဒီမိုကရေစီ လုိလားသူ ဖက်ဒရယ် စနစ်ကို လိုလားသူအင်အားစုတွေ အကြား အာဏာသိမ်း စစ်ကောင်စီကို ဘုံရန်သူအဖြစ် သတ်မှတ်ထားပြီး နည်းအမျိုးမျိုးနဲ့ တွန်းလှန် တိုက်ခိုက်နိုင်ဖို့ အရေးကြီးတယ် ထင်ပါတယ်။

အာဏာသိမ်းစစ်ကောင်စီအနေနဲ့လည်း ခုချိန်မှာ ရန်ဘက်မျက်နှာစာ နည်းနိုင်သမျှနည်းအောင် လျော့ချဖို့ ကြိုးစားခဲ့ ကြိုးစားနေတုန်းလည်း ဖြစ်ပါတယ်။ အာဏာမသိမ်းမီ အေအေ ရခိုင့်တပ်တော်နဲ့ နှုတ်နဲ့ အပစ်ရပ်ဖို့ သဘောတူခဲ့ကြသလို အာဏာသိမ်းပြီးနောက်မှာ ဝ တပ်ဖွဲ့၊ အက်စ်အက်စ်ပီပီ/ အက်စ်အက်စ်အေ အဖွဲ့၊ အာရ်စီအက်စ်တို့နဲ့ တွေ့ပြီး လက်နက်ကိုင် ပဋိပက္ခတပြိုင်ထဲ မဖြစ်အောင် ပရိယာယ် အမျိုးမျိုးသုံးနေတာလည်း တွေ့ရပါလိမ့်မယ်။

ခုလို လက်နက်ကိုင် ပဋိပက္ခတွေ အရှိန်မြင့်လာချိန်မှာ မနက်ဖြန် တနင်္လာနေ့မှာေတာ့ ဖမ်းဆီးထားတာ ၃လကျော် ၄ လနီးပါးရှိပြီဖြစ်တဲ့ အန်အယ်လ်ဒီခေါင်းဆောင် ဒေါ်အောင်ဆန်းစုကြည်ကို ပထမဆုံးအကြိမ် လူကိုယ်တိုင် ရုံးထုတ်မှာ ဖြစ်ပါတယ်။ ဘာရည်ရွယ်ချက်နဲ့ လူကိုယ်တိုင် ထုတ်သလဲ ဆိုတာတော့ မမှန်းဆတတ်ပေမယ့် ဟိုးအရင် စစ်အစိုးရလက်ထက်က ဒေါ်အောင်ဆန်းစုကြည် ကိုရုံးထုတ်တာ အချုပ်ကာလ သက်တမ်းတိုးတာတွေ အပေါ် သတင်းမီဒီယာတွေ နဲ့ လူထုရဲ့ အာရုံစူးစိုက်မှုမျိုး ခုအခြေအနေမှာ မတွေ့မိပါ။ ခုအခေြအနေက လက်နက်ကိုင် တိုက်ပွဲတွေ၊ ခုခံစစ်တွေ ကို လူထုအနေနဲ့ ပိုအာရုံစိုက်နေကြတာလည်း သတိထားမိပါတယ်။

Join Us @ MoeMaKa Telegram
t.me@moemaka
#MoeMaKaMedia
#WhatsHappeningInMyanmar