မိုးမခ- မိုးမင်းသိမ်းဘာသာပြန်- ယစုနရိ ကာဝဘတရဲ့ လက်တစ်ဝါးစာ ဝတ္ထုတိုများ (၅)

ယစုနရိ ကာဝဘတရဲ့ လက်တစ်ဝါးစာ ဝတ္ထုတိုများ (၅)

နှံကောင်နှင့် ပုရစ် 

မိုးမင်းသိမ်းဘာသာပြန်ဆိုသည်

မိုးမခ ၂၂၊ ဩဂုတ် ၂၀၂၁

တက္ကသိုလ်ရဲ့အုတ်ကြွပ်မိုးတံတိုင်းတစ်လျှောက်ကနေလျှောက်လာရင်း တဖက်ခြမ်းကိုဦးလှည့်ပြီး ကုန်းမြင့်ပိုင်းကျတဲ့ကျောင်းဘက်ကိုလာခဲ့တယ်။ ကျောင်းကစားကွင်းရဲ့သစ်သားပျဉ်ချပ်ဖြူဖြူဝင်းထရံနောက်၊ တောချယ်ရီရိုင်းပင်တွေအောက်မှာ မှောင်ပိန်းနေတဲ့ချုံတအုပ်ဆီကနေ အင်းဆက်ပိုးကောင်လေးတကောင်ရဲ့အသံကိုကြားရတယ်။ ပိုပြီးဖြည်းဖြည်းဆေးဆေးလျှောက်လာရင်း အသံကိုနား‌ထောင်နေမိတယ်။ ဒီအသံနဲ့ခွဲခွာထွက်သွားဖို့ တွန့်ဆုတ်နေမိတာကိုလည်း ခံစားနေမိတယ်။ လက်ယာဘက်ကိုချိုးကွေ့လိုက်တယ်။ ဒါကြောင့်မို့ ကစားကွင်းနောက်ဘက်ကနေထွက်သွားစရာမလိုတော့ဘူး။ ဘယ်ဘက်ကို ချိုးကွေ့လိုက်တာနဲ့လိမ္မော်သီးပင်တွေစိုက်ပျိုးပြီး တမံဖို့ထားတဲ့စည်းရိုးတခုကို မသိမသာလှစ်ခနဲတွေ့လိုက်ရတယ်။ လမ်းကွေ့နေရာရောက်တော့ အံ့ဩတကြီး ဟစ်အော်လိုက်မိတယ်။ ပြိုးပြိုးပြက်ပြက်လင်းလက်နေတဲ့အင်းဆက်ပိုးကောင်လေးတွေကို ကျွန်တော့်မျက်စိရှေ့မှာ တွေ့လိုက်ရလို့ပဲ။ ကျွန်တော်လည်း ခြေလှမ်းစိပ်စိပ်လှမ်းပြီး ရှေ့ကိုသုတ်ခြေတင်မိတယ်။

တမံဖို့ထားတဲ့အောက်ခြေမှာ အစုလိုက်အပြုံလိုက်တွဲလောင်းကျနေတဲ့ လှတပတရောင်စုံမီးပုံးလေးတွေရှိနေကြတယ်။ ဝေးလံခေါင်ဖျားတောဘက်ရွာလေးတရွာက ပွဲတော်မှာတွေ့ရလေ့ရှိတဲ့ မီးပုံးလေးတွေလိုမျိုးပဲ။ ခပ်ဝေးဝေးတောင် မလျှောက်ရသေးဘူး၊ တမံဖို့ထားတဲ့ ချုံပုတ်တွေကြားထဲမှာ အင်းဆက်ပိုးကောင်လေးတကောင်ကို ကလေးတအုပ်ကလိုက်ဖမ်းနေကြမှန်း ကျွန်တော်သိလိုက်ရတယ်။ မီးပုံးအလုံးနှစ်ဆယ်လောက်ရှိမယ်။ကြက်သွေးရောင်တင်မက ပန်းရောင်၊ မဲနယ်ရောင်၊ အစိမ်းရောင်၊ ခရမ်းရောင်နဲ့အဝါရောင် မီးပုံးလေးတွေ။ ဒါပေတဲ့ မီးပုံးတစ်လုံးကျတော့ ချက်ချင်းအရောင်ငါးမျိုးပြောင်းပြီး တောက်ပလင်းလက်နေတယ်။ စတိုးဆိုင်ကနေဝယ်ထားကြတဲ့ မီးပုံးနီနီသေးသေးလေးတချို့လည်းပါတယ်။ ဒါပေတဲ့ မီးပုံးအများစုက လှလှပပ လေး ထောင့်မီးပုံးတွေ။ ကလေးတွေက နှစ်သက်လိုလားစိတ်နဲ့သူတို့ဘာသာသူတို့ဖန်တီးထားကြတဲ့ မီးပုံးလေးတွေပဲ။ ဟောဒီ လူသူအရောက်အပေါက်နည်းတဲ့ ကုန်းစောင်းတခုပေါ်မှာ ကလေးတွေအတူတကွ ရောက်လာကြတာဟာဖြင့် နတ်သမီးပုံပြင်ထဲက ဇာတ်ဝင်ခန်းတခုကို တကယ်ကြီးတွေ့နေရတာမဟုတ်လား။

တညသား အနီးအနားကလေးတွေထဲကတယောက်ဟာ ဟောဒီကုန်းစောင်းပေါ်မှာ အင်းဆက်ပိုးကောင်လေးတစ်ကောင် အော်နေသံကြားခဲ့ရတယ်။ မီးပုံးနီနီလေးတလုံးဝယ်ပြီး အင်းဆက်ပိုးကောင်လေးကိုရှာဖို့အတွက် နောက်ညကျတော့ ပြန်လာခဲ့တယ်။ အဲဒီညကျတော့ နောက်ထပ်ကလေးတစ်ယောက်လည်း ရှိနေတယ်။ အဲဒီကလေးကျတော့ မီးပုံးလေးတလုံးတောင်မဝယ်နိုင်ရှာဘူး။ ကတ်ထူပုံးသေးသေးလေးရဲ့နောက်ကျောနဲ့ အရှေ့ကို ဖြတ်တောက်ပစ်ပြီး စက္ကူကပ်ထားတယ်။ အောက်ခြေမှာ ဖယောင်းတိုင်လေးတစ်တိုင်ထည့်ပြီး ထိပ်မှာကြိုးလေးတစ်ချောင်းတည်းထားတယ်။ အတူကြီးပြင်းလာကြတဲ့ ကလေးငါးယောက်ရှိတယ်။ နောက်တော့ ခုနစ်ယောက်ဖြစ်သွားတယ်။ စက္ကူ ဘယ်လိုဆေးခြယ်မလဲဆိုတာကို တတ်မြောက်လာကြတယ်။ ဖြတ်တောက်ထားတဲ့ကတ်ထူပုံးတွေရဲ့အပေါက်တွေပေါ်မှာဆွဲဖြန့်ကြတယ်။ အဲဒီပေါ်မှာ ရုပ်ပုံလေးတွေရေးဆွဲကြတယ်။ အဲဒီနောက်လိမ္မာပါးနပ်တဲ့ကလေးအနုပညာရှင်လေးတွေက ကတ်ထူပုံးတွေကိုအဝိုင်းဖြစ်အောင်ဖြတ်တောက်ကြတယ်၊ သုံးထောင့်ချိုးကြတယ်၊ မှန်ကူကွက်သစ်ရွက်ပုံလေးတွေဖြစ်အောင်လုပ်ကြတယ်။ အပေါက်သေးသေးလေးတွေဖောက်ပြီး အရောင်ကွဲလေးတွေဆေးခြယ်ကြတယ်။ အဝိုင်းလေးတွေ၊ စိန်ပွင့်ပုံလေးတွေအပေါက်ဖောက်ပြီး အနီရောင်လေးတွေ အစိမ်းရောင်လေးတွေ ဆေးခြယ်ကြတယ်။ တစ်မူထူးတဲ့ အဆင်အကွက်တစ်ခုခု၊ မတူကွဲပြားတဲ့ မီးပုံးတစ်လုံးဖြစ်အောင် ဖန်တီးကြတယ်။ မီးပုံးနီနီနဲ့ကလေးဟာ စတိုးဆိုင်ကနေဝယ်လို့ရနိုင်ပေတဲ့ စိတ်ဝင်စားဖို့မကောင်းလှတဲ့ မီးပုံးမျိုးကိုလွှင့်ပစ်ထားလိုက်တယ်။ သူ့မီးပုံးသူဖန်တီးတတ်တဲ့ကလေးကလည်း မီးပုံးပုံစံသိပ်ရိုးစင်းလွန်းနေတာကြောင့် လွှင့်ပစ်လိုက်တာပဲ။ နံနက်မိုးသောက် အလင်းမရောက်ခင် မကျေမနပ်ဖြစ်နေစေဦးတော့ ညမှာတော့ဖြင့် ကိုယ့်မီးပုံးကိုယ်မီးထွန်းပြီး လက်ထဲကိုင်ထားကြတယ်။ ကလေးငယ်တွေဟာ စက္ကူကတ်ထူပြား၊ စက္ကူ၊ စုတ်တံ၊ ကတ်ကြေး၊ မောင်းချဓားငယ်၊ ကော် တွေနဲ့ မီးပုံးအသစ်‌လေးတွေကို နေ့စဉ်နေ့တိုင်း စိတ်ပါလက်ပါ ဖန်တီးကြတယ်။ ငါ့မီးပုံးကို ကြည့်ကြပါဦးဟေ့၊ တစ်မူထူး ခြား အလှဆုံးပဲ မဟုတ်လားဟေ့လို့ ညစဉ်ညတိုင်းအော်ဟစ်ပြောဆိုကြပြီး အင်းဆက်ပိုးကောင်အဖမ်းထွက်တတ်ကြတယ်။ ကျွန်တော့်ရှေ့မှာမြင်နေရတာကတော့ ကလေးအယောက်နှစ်ဆယ်နဲ့ သူတို့တစ်တွေရဲ့ မီးပုံးလှလှလေးတွေပဲ။

သူတို့နားမှာ မျက်စိအပြူးသားနဲ့ ယောင်ပေပေလုပ်နေမိတယ်။ လေးထောင့်မီးပုံးလေးတွေတင်မက ရှေးပုံစံမီးပုံးလေးတွေကော၊ ပန်းပွင့်ပုံမီးပုံးလေးတွေကောပါတယ်။ ဒါပေတဲ့ ကလေးတွေဟာ သူတို့ရဲ့နာမည်တွေကိုလည်း လေးထောင့်အက္ခရာစာလုံးတွေနဲ့ ပုံဖော်ဖန်တီးထားကြသေးတယ်။ ဆေးခြယ်ထားတဲ့မီးပုံးနီနီလေးတွေနဲ့အသွင်ကွဲတဲ့ မီးပုံးလေးတွေလည်း ရှိတယ်။ (ကတ်ထူပြားထူထူကို ဖြတ်တောက်ပြုလုပ်ထားကြတဲ့) မီးပုံးလေးတွေကျတော့ စက္ကူအကြည်ကွက်တွေပေါ်မှာ စိတ်ကူးတည့်ရာ အဆင်အကွက်တွေရေးခြစ်ထားကြသေးတယ်။ ဒါကလည်း ဖယောင်းတိုင်အလင်းရောင်မှာ အဆင်အကွက်ရဲ့ ပုံသဏ္ဌာန်နဲ့အရောင်အသွေးတွေပေါ်ထွက်လာအောင်ဖန်တီးကြတာလို့ယူဆမိတယ်။ ချုံပုတ်တွေရဲ့မည်းမည်းမှောင်မှောင်အရိပ်တွေကို မီးပုံးလေးတွေက သဲ သဲကွဲကွဲမြင်ရအောင် ဖော်ထုတ်ပေးနေကြတယ်။ ကုန်းစောင်းပေါ်က အင်းဆက်ပိုးကောင်လေးရဲ့အသံကြားရတဲ့နေရာကိုရောက်အောင် ကလေးတွေဟာ စိတ်အားထက်သန်စွာနဲ့ဝပ်တွားတက်သွားကြတယ်။

" နှံကောင်ကို ဘယ်သူရချင်သလဲဟေ့ " ။ တခြားကလေးတွေနဲ့ ပေသုံးဆယ်လောက်ဝေးတဲ့နေရာက ချုံပုတ်ကိုသေသေချာချာအနီးကပ်ကြည့်နေတဲ့ ကောင်လေးတယောက်က ရုတ်တရက် ကိုယ်ကိုမတ်ပြီး ဟစ်အော်လိုက်တယ်။

" ယူမယ်ဟေ့။ ငါ့ကိုပေး " ကလေးခြောက်ယောက် ခုနစ်ယောက်လောက် ပြေးတက်သွားကြတယ်။ နှံကောင်ကိုတွေ့တဲ့ကောင်လေးရဲ့နောက်ကနေ တိုး ဝှေ့ရင်း ချုံပုတ်ထဲကို သေသေချာချာကြည့်နေကြတယ်။ နှံကောင်ကိုတွေ့လိုက်တဲ့ကောင်လေးဟာ တခြားကလေးတွေရဲ့ ဆန့်တန်းထားကြတဲ့လက်တွေကို ပုတ်ထုတ်ရင်း သူ့လက်တွေကို ကားထားလိုက်တယ်။ အင်းဆက်ပိုးကောင်လေးရှိနေတဲ့ ချုံပုတ်ကို ာင့်ကြပ်နေတဲ့အနေအထားမျိုးနဲ့ ရပ်နေတယ်။ သူ့ယာဘက်လက်ထဲက မီးပုံးလေးကို ဝှေ့ယမ်းကာ တခြားကလေးတွေကို အော်ခေါ်နေပြန်တယ်။

" ဘယ်သူများ နှံကောင်လိုချင်ကြသတုံး။ နှံကောင်လေ "

" ငါ ယူမယ်၊ ငါ ယူမယ် " ကလေး လေးငါးယောက်လောက် ပြေးတက်လာကြတယ်။ နှံကောင်ထက်ပိုပြီး အဖိုးထိုက်တန်တဲ့ အင်းဆက်ပိုးကောင်မျိုး ဖမ်းလို့မရနိုင်တဲ့သဘောမျိုးလို့ ယူဆရတယ်။ ကောင်လေးက တတိယအကြိမ် ဟစ်အော်နေပြန်တယ်။

" နှံကောင်တစ်ကောင် လိုချင်ကြသလား ဟေ့ "

ကလေး နှစ်ယောက်၊ သုံးယောက် ထပ်ရောက်လာကြတယ်။

" လိုချင်တယ်။ ငါ လိုချင်တာပေါ့ "

အင်းဆက်ပိုးကောင်ရှာတွေ့တဲ့ကောင်လေးရဲ့နောက်ကနေ အခုပေါ်လာပြန်တာက ကောင်မလေးတစ်ယောက်ပဲ။ ကောင်လေးက သူ့ခန္ဓာကိုယ်ကို သွက် သွက်ကြီးလှည့်လိုက်ပြီး ရှေ့ကို ကြော့ကြော့မော့မော့ ငုံ့ကိုင်းလိုက်တယ်။ မီးပုံးကို သူ့ဘယ်ဘက်လက်နဲ့ ပြောင်းကိုင်လိုက်ရင်း ယာဘက်လက်ကို ချုံ ပုတ်ထဲထည့်လိုက်တယ်။

" ဟောဒီမှာ နှံကောင် "

" ဟုတ်ပါပြီဟယ်။ ငါက နှံကောင် လိုချင်တာ "

ကောင်လေးက သုတ်ခနဲ မတ်တတ်ရပ်လိုက်တယ်။ " ဟောဒီမှာ " လို့ပြောလိုက်ရင်း အင်းဆက်ပိုးကောင်လေးထည့်ဆုပ်ထားတဲ့ လက်သီးဆုပ်ကို ကောင်မလေးရှေ့ ထိုးပေးလိုက်တယ်။ ကောင်မလေးကလည်း မီးပုံးကြိုးအောက်က ဘယ်ဘက် လက်ကောက်ဝတ်ကို အသာလျှိုထုတ်ပြီး ကောင်လေးရဲ့ လက်သီးဆုပ်ကို လက်နှစ်ဖက်နဲ့အုပ်ကိုင်ထားလိုက်တယ်။ ကောင်လေးက သူ့လက်သီးဆုပ်ကို အေးအေးဆေးဆေး ဖြည်လိုက်တယ်။ အင်းဆက်ပိုးကောင်လေးလည်း ကောင်မလေးရဲ့လက်မနဲ့ လက်ညှိုးကြားကို ရောက်သွားတော့တယ်။ 

" အိုး၊ နှံကောင်လည်း မဟုတ်ဘဲနဲ့။ ပုရစ်ပါဟယ် " အင်းဆက်ပိုးကောင် ညိုညိုသေးသေးလေးကို ကြည့်ရင်း ကောင်မလေးရဲ့မျက်လုံးတွေဟာ ဝင်းလက်တောက်ပနေတယ်။

" ပုရစ်တဲ့ဟေ့၊ ပုရစ်တဲ့ဟ " ကလေးတွေရဲ့ သံပြိုင်ဟစ်အော်လိုက်ကြတဲ့အသံဟာ ပဲ့တင်ထပ်နေတော့တယ်။

" ပုရစ်တဲ့ဟေ့၊ ပုရစ်တဲ့ဟ " 

ကောင်မလေးဟာ အကင်းပါးတဲ့ တောက်တောက်ပပမျက်လုံးအစုံနဲ့ ပုရစ်လေးပေးလိုက်တဲ့ ကောင်လေးကို ဖျတ်ခနဲကြည့်လိုက်ရင်း ဘေးမှာလွယ်ထားတဲ့ အင်းဆက်ပိုးကောင်လှောင်အိမ်လေးကို ဖွင့်ကာ ပုရစ်လေးကို ထည့်လိုက်တယ်။

" ဒါ ပုရစ်ပါဟာ "

" အိုး၊ ဒါ ပုရစ်ပဲနော် " ပုရစ်ဖမ်းမိတဲ့ကောင်လေးကလည်း မပီမသတိုးတိုးလေးပြောလိုက်တယ်။ အင်းဆက်ပိုးကောင်လှောင်အိမ်လေးကို သူ့မျက်လုံးနားရောက်အောင် မြှောက်ကိုင်ရင်း လှောင်အိမ်ထဲကို ကြည့်လိုက်တယ်။ မျက်စိနဲ့တစ်တန်းတည်းကျအောင်မြှောက်ကိုင်ထားရင်း သူ့ရဲ့ ရောင်စုံမီးပုံးလှလှအလင်းရောင်နဲ့ ကောက်မလေးရဲ့မျက်နှာကို ဖျတ်ခနဲလှမ်းကြည့်လိုက်တယ်။

အိုး ကျွန်တော်တွေးမိနေပါကလား။ ကောင်လေးကို မဆိုစလောက်မနာလိုဝန်တိုစိတ်ဖြစ်မိတယ်လို့‌ယူဆမိပြီး မလုံမလဲဖြစ်မိတယ်။ ကောင်လေးရဲ့ အပြု အမူတွေကို ခုချိန်ထိနားမလည်နိုင်လောက်အောင် ကျွန်တော်ဟာ ထူပိန်းလှပါကလား။ အဲဒီနောက် အသက်ရှူမှားလောက်အောင် အံ့အားသင့်မိတယ်။ ကြည့်စမ်းပါဦးဗျာ။ ကောင်မလေးရဲ့အင်္ကျီရင်ပိုင်းပေါ်မှာ တစ်ခုခုပေါ်နေပါလား။

‌ပုရစ်လေးပေးလိုက်တဲ့ကောင်လေးလည်း မဟုတ်၊ ပုရစ်လေးကိုလက်ခံလိုက်တဲ့ကောင်မလေးလည်း မဟုတ်၊ သူတို့ကိုကြည့်နေကြတဲ့ ကလေးတွေလည်း မဟုတ်မှန်း သတိပြုမိတယ်။

ကောင်မလေးရဲ့ အင်္ကျီရင်ပိုင်းပေါ် ကျနေတဲ့ မှိန်ဖျော့ဖျော့ အစိမ်းရောင်အလင်းကွက်လေးဟာ " ဖူဂျီအို " ဆိုတဲ့နာမည်လားဆိုတာလည်း ရှင်းရှင်း လင်းလင်းမမြင်ရဘူးမဟုတ်လား။ ကောင်မလေးရဲ့ အင်းဆက်ပိုးကောင်လှောင်အိမ်လေးနဲ့ ဘေးချင်းယှဉ်လျက်ကိုင်မြှောက်ထားတဲ့ကောင်လေးရဲ့ မီးပုံးပေါ်မှာ သူ့နာမည်ကိုရေးထိုးထားတယ်။ အဲဒီနာမည်လေးဟာ အစိမ်းရောင်စက္ကူကပ်ထားတဲ့အပေါက်ကနေ ဖြတ်ဖောက်ထွက်ကာ ကောင်မလေးရဲ့ ချည်သားကီမိုနိုဖြူဖြူပေါ် ကျနေတာကလား။ ကောင်မလေးရဲ့ မီးပုံးဟာ ခါးမှာ လျော့တိလျော့ရဲ တွဲလောင်းကျလို့နေတယ်။ မီးပုံးလေးရဲ့ အဆင်အကွက်တွေကိုတော့ ရှင်းရှင်းကြီးမတွေ့ရဘူး။ ဒါပေတဲ့ တခုခုရေးထားမှန်းတော့ သိနိုင်တယ်။ ကောင်လေးရဲ့ခါးပေါ်ကတုန်ယင်လှုပ်ခါနေတဲ့အနီရောင်အကွက်လေးထဲမှာ " ကိယိုကို " ဆိုတဲ့နာမည်လေးပေါ်နေတယ်။ အနီနဲ့အစိမ်းတို့အပြန်အလှန်ပေါ်နေတာဟာ တိုက်ဆိုင်မှုပဲ။ တိုက်ဆိုင်မှု ဒါမှမဟုတ် အလှည့်အပြောင်းဆိုခဲ့ရင်တောင် ဖူဂျီအိုကော၊ ကိယိုကိုကော ဒီအကြောင်းကိုမသိကြဘူး။

ဖူဂျီအိုက ပုရစ်လေးပေးပြီး ကိယိုကိုက လက်ခံလိုက်တဲ့အကြောင်းကို သူတို့တစ်သက်လုံး သတိရကောင်း ရနေကြလိမ့်မယ်။ ကိယိုကိုရဲ့ အင်္ကျီရင်ပိုင်းပေါ်မှာ အစိမ်းရောင်နဲ့ရေးထားတဲ့သူ့နာမည်လေးပေါ်နေတာကို ဖူဂျီအိုက အိပ်မက်ထဲတောင် ထည့်မက်မိမှာမဟုတ်ဘူး။ သူ့ခါးထက်မှာ ကိယိုကိုရဲ့နာမည်လေး အနီရောင်နဲ့ရေးထိုးခဲ့ဖူးတယ်ဆိုတာလည်း အိပ်မက်ထဲ‌တောင်ထည့်မက်မိမှာမဟုတ်ဘူး။ သူ့အင်္ကျီရင်ဘတ်မှာ ဖူဂျီအိုရဲ့နာမည်အစိမ်းရောင်လေးပေါ်ခဲ့ဖူးတာကို ကိယိုကိုအနေနဲ့လုံးဝသိမှာမဟုတ်သလို ဖူဂျီအိုရဲ့ခါးမှာ သူ့နာမည်လေးကို အနီရောင်နဲ့ရေးထွင်းဖူးတယ်ဆိုတာကိုလည်း လုံးဝမသိရှာဘူး။

ဖူဂျီအိုရေ၊ မင်းအရွယ်ရောက်လာတဲ့အချိန်ကျရင် ပြောတော့နှံကောင်၊ ပေးလိုက်တော့ ပုရစ်ဆိုရင်ကောင် မလေးရဲ့ပီတိကို ကျေနပ်ပြီး ရယ်မောနိုင်ပါ‌စေ။ ပြောတော့ ပုရစ်၊ပေးလိုက်တော့ နှံကောင်ဆိုရင် ကောင်မလေးရဲ့စိတ်ကသိကအောက်ဖြစ်မှုကို စိတ်လှုပ်ရှားပြီး ရယ်မောနိုင်ပါစေ။

တခြားကလေးတွေနဲ့ဝေးရာ ချုံပုတ်တခုထဲမှာ ဆင်ခြင်တုံတရားနဲ့ ကိုယ့်ဘာသာကိုယ် ရှာကြည့်စေချင်တယ်။ လောကကြီးမှာ ပုရစ်ဆိုတာမျိုးကလည်း များများစားစားမှမရှိတာကိုး။ မင်းက ပုရစ်လို့ထင်ထားတဲ့နှံကောင်လိုကောင်မလေးကိုတွေ့တာလည်း ဖြစ်နိုင်တာပဲ။

အပြီးသတ်ကျရင် မင်းရဲ့ ပူဆွေးသောကရောက်ပြီး ဒဏ်ရာအနာတရဖြစ်နေတဲ့ နှလုံးသားက ပုရစ်စစ်စစ်ကြီးတစ်ကောင်ကို နှံကောင်ရယ်လို့ ထင်ကောင်းထင်နေလိမ့်မယ်။ အဲဒီနေ့မျိုးရောက်လာရင်တော့ လောကကြီးတစ်ခုလုံး နှံကောင်တွေချည်းရှိတယ်လို့ ယူဆတော့မှာပဲ။ ကနေ့ည မီးပုံးလေးတွေနဲ့ကစားခဲ့တာကို သတိမရတော့သလို ကောင်မလေးတစ်ယောက်ရဲ့အင်္ကျီရင်ဘတ်ပေါ်မှာ လှပတဲ့မီးပုံးလေးက အစိမ်းရောင်နဲ့ မင်းရဲ့နာမည်‌ ရေးထွင်းပေးဖူးတာကို သတိမရတော့ဘူးဆိုရင် ဝမ်းနည်း‌ကြေကွဲစရာပဲလို့ ယူဆရတော့မှာပဲ။

( ၁၉၂၄ )

- 

ဂျပန်ဘာသာက‌နေ လိန်းဒန်းလော့ပ်နဲ့ ဂျေမာတင်ဟိုးလ်မန်းတို့ဘာသာပြန်ဆိုပြီး North Point Press ကနေ ၁၉၉၇ ခုနှစ်က တတိယအကြိမ်ထုတ်ဝေထားတဲ့ "Palm-of-the-Hand Stories by Yasunari Kawabata " ထဲက " The Grasshopper and the Bell Cricket " ကို ဘာသာပြန်ပါတယ်။

မိုးမင်းသိမ်း

 ၁၆ ဩဂုတ် ၂၀၂၁

-

Join Us @ MoeMaKa Telegram
t.me@moemaka
#MoeMaKaMedia
#WhatsHappeningInMyanmar