Breaking News

အညတရနွေဦး - အဆုံးထိ လျှောက်ခဲ့ကြသူများ


အညတရနွေဦး - အဆုံးထိ လျှောက်ခဲ့ကြသူများ

(မိုးမခ) စက်တင်ဘာ ၂၅၊ ၂၀၂၂


၂၀၂၁ ခုနှစ် စက်တင်ဘာလလယ်မှာ ကျနော်တို့လုံခြုံရေးအခြေအနေ မကောင်းတော့ဘူးဆိုတာသိရပြီ။ ဒါပေမဲ့ ချက်ချင်းနေရာရွှေ့ဖို့က ထုတ်လုပ်ရေးပစ္စည်းတွေနဲ့ရုတ်တရက် ရွှေ့လို့မဖြစ်၊ တော်လှန်ရေးအလုပ်တွေကလည်း ဆက်တိုက်လုပ်နေရ။ မြေပြင်သပိတ်ဆိုင်ရာအလုပ်တွေကလည်း ရှိနေပြန်။ 

စစ်အာဏာရှင်တွေကို နာကျည်းပြီးရင်း နာကျည်းမှုတွေထဲ မြေပြင်သပိတ်တိုက်ပွဲမှာ တွေ့ကြုံခဲ့ရတဲ့ ရက်စက်မှု တွေက ဘယ်တော့မှ မပျောက်ပျက်တော့မယ့် သေရာပါ နာကျည်းမှုတွေ ဖြစ်ခဲ့ပြီ။ ရှေ့မှာကျဆုံးသွားတဲ့ သူရဲကောင်းအာဇာနည်တွေအတွက်၊ အဲဒီ့နာကျည်းချက်တွေနဲ့ပဲ တော်လှန်ရေးတာဝန်တွေကို ကျနော်တို့ တနင့် တပိုး ယူခဲ့မိတာ ဖြစ်ပါလိ့မ်မယ်။ 

တော်လှန်ရေးတာဝန်တွေ တနင့်တပိုး ထမ်းဆောင်နေကြတဲ့ လူကြီး၊ လူငယ်မရွေး မျိုးဆက်အသီးသီးထဲမှာ ကျနော်တို့ လေးယောက်လည်း ပါခဲ့ကြတယ်။ ကျနော်…ကျော်ကြီး၊ ကျနော်…ပစ်ကြီး၊ ကျမ…ခင်ခင်ကြွယ်၊ ကျနော်…စတီဗင် ခေါ် ဇင်လင်း။ 

စမ်းချောင်း၊ မြေနီကုန်းဘက်က တိုက်ခန်းလေးတခန်းထဲမှာ စုနေကြရင်း အဲဒီနေ့က၊ အဲဒီနေ့ဆိုတာ ၂၀၂၁၊ စက်တင်ဘာ ၂၅ ရက်နေ့က ကျနော်တို့လေးယောက် ဒီလို တိုင်ပင်ဖြစ်ခဲ့ကြတယ်။ ရန်သူက ငါတို့ဆီ ရောက်လာခဲ့ရင် ဘာလုပ်ကြမလဲ။ အားလုံး တညီတညွတ်တည်း ရန်သူ့လက်တော့ အကျမခံ၊ ခုခံရင်း အဆုံးထိ လျှောက်ကြမယ်။  

ည ၁ နာရီနဲ့ မိနစ် ၂၀ အထိ ကျနော်တို့ ရဲဘော်တွေနဲ့ Telegram, Signal တွေကနေ အဆက်အသွယ်ရနေတယ်။ ရဲဘော်တွေကို ကျနော်တို့လေးယောက် ဆုံးဖြတ်ထားတာ ပြောပြလိုက်ပြီ … ဒါပေမဲ့ ဘယ်သူ့ကိုမှ နှုတ်ဆက်တယ်လို့မပြောဘူး၊ ကျနော်တို့ဟာ ရဲဘော်တွေအားလုံးနဲ့အတူ တော်လှန်ရေးအောင်ပွဲရတဲ့အထိ အဆုံးထိ ဆက်ရှိနေမယ်ဆိုတာ ယုံကြည်လို့။ 

ဟော … ရန်သူတွေလာနေပြီ၊ ဝိုင်းနေပြီ …..၊ အားလုံးအသင့်။ ငါတို့ ငုံမခံ၊ ရန်သူ့လက်ထဲ အကျမခံ၊ အမိမခံ၊ ဖောက်ထွက်ကြမယ်။ 

ရန်သူ့ကျည်တွေက စပစ်နေပြီ၊ ကျနော်တို့လည်း ပြန်ပစ်ရင်း ပစ်ရင်း ပစ်ရင်း ဖောက်ထွက်ခဲ့ကြတယ် … 

ရဲဘော်တို့ရေ … ကျနော်တို့ အဆုံးထိ လျှောက်ခဲ့ကြပါပြီ။ ။ 

(ရဲဘော်တို့ …ဒီနေ့ဟာ ရဲဘော်တို့ရဲ့ ပိုင်းဖြတ်စွန့်လွှတ် စွန့်စားခဲ့မှုဟာ ၁ နှစ်တာကာလ ပြည့်မြောက်လာခဲ့ပြီဖြစ်ပါတယ်။

ရဲဘော်တို့ရဲ့ သူရဲကောင်းပီသစွာ စွန့်လွှတ်စွန့်စားမှုကို ငါတို့ ကျန်ရစ်သူ ရဲဘော်များအားလုံး ရင်ထဲ အသည်းထဲ နှလုံးသားထဲမှ ကမ္ဗည်းထိုး ဂုဏ်ပြု မှတ်တမ်းတင်လျက်ရှိပါတယ်။

ရဲဘော်တို့ရဲ့ ပိုင်းဖြတ်မှု နဲ့ စွန့်လွှတ်စွန့်စားမှုကို စံနမူနာယူပြီး နွေဦးတော်လှန်ရေး ရည်မှန်းချက်ပန်းတိုင် ရောက်တဲ့အထိ ဆက်လက်တိုက်ပွဲ ဝင်သွားမှာဖြစ်ပါကြောင်း သစ္စာဓိဋ္ဌာန်ပြုလိုက်ပါတယ်။

ရဲဘော်တို့ မြင့်မြတ်ရာ ဘုံဌာနမှာ ငြိမ်းချမ်းကြပါစေ။

၂၀၂၁ ခုနှစ်၊ စက်တင်ဘာလ ၂၅ ရက်နေ့တွင် စစ်အာဏာရှင်တို့ကို ဒူးမထောက်၊ လက်မမြှောက်ဘဲ၊ ပြန်လည် ခုံခံရင်း သူရဲကောင်းများပီသစွာ အဆုံးထိလျှောက်ခဲ့ကြသည့် ကိုစတီဗင် ခေါ် ဒေါက်တာဇင်လင်း၊ သူနာပြုဆရာမ မခင်ခင်ကြွယ်၊ ကိုပစ်ကြီး၊ ကိုကျော်ကြီးတို့ကို ဦးညွှတ်အလေးပြုလျက် ….. )


Join Us @ MoeMaKa Telegram
t.me@moemaka
#MoeMaKaMedia
#WhatsHappeningInMyanmar