နေသွင်ညိဏ်း - အိန္ဒိယနွယ်ဖွားတွေ ဘာကြောင့် ထိပ်တန်းရောက်ကြသလဲ
ဗြိတိန်ဝန်ကြီးချုပ် ရီရှီ ဆူးနက်ခ်
အိန္ဒိယနွယ်ဖွားတွေ ဘာကြောင့် ထိပ်တန်းရောက်ကြသလဲနေသွင်ညိဏ်း
(မိုးမခ)နိုဝင်ဘာ ၁၂၊ ၂၀၂၂
ဗြိတိန်မှာ ရီရှီ ဆူးနက်ခ် ဝန်ကြီးချုပ် ဖြစ်လာတာကို အိန္ဒိယ နိုင်ငံတဝှမ်းလုံးမှာ ပြည်သူတွေ အောင်ပွဲခံခဲ့ကြတယ်။ ဟိန္ဒူယဉ်ကျေးမှုကို သက်ဝင်ယုံကြည်တဲ့ အသားညိုညိုလူတယောက်က ဗြိတိန်နိုင်ငံကို ဦးဆောင်နေတာဟာ အလွန်ထူးခြားတဲ့ကိစ္စဖြစ်တယ်။ တချိန်တည်းမှာ ဒါက အနောက်ကမ္ဘာမှာ အိန္ဒိယနွယ်ဖွားတွေ နေရာရလာတဲ့ အပြောင်းအလဲဖြစ်စဉ်ကြီးကို မီးမောင်းထိုးပြနေပါတယ်။
တကယ်တော့ အပြောင်းအလဲဖြစ်စဉ်က အခုမှ စလာတာမဟုတ်ပါဘူး။ အထူးသဖြင့် ပုဂ္ဂလိက စီးပွားရေးလောကမှာ အိန္ဒိယနွယ်ဖွား စီအီးအိုတွေဟာ အမေရိကန်ပြည်ထောင်စုအခြေစိုက် ကော်ပိုရိတ်တွေရဲ့ခေါင်း ဆောင်ပိုင်းမှာ နေရာယူလာတာ ကြာနေပါပြီ။ မိုက်ခရိုဆော့ စီအီးအို ဆတ္တယာ နာဒယ်လား၊ အယ်လ်ဖာဘက် စီအီးအို ဆန်းဒါး ပီချီ၊ ပက်စီကိုစီ စီအီးအို အင်ဒရာ နိုးရီတို့ဟာ အကောင်းဆုံး နမူနာတွေပါ၊ တခြား အများကြီး ကျန်ပါသေးတယ်။ Fortune မဂ္ဂဇင်းကရွေးချယ်တဲ့ ကုမ္ပဏီ ၅၀၀ ထဲမှာ ၅၈ ခုကို အိန္ဒိယလူမျိုးစစ်စစ်တွေက ဦးဆောင်နေပါတယ်။ အရင်လက တွစ်တာ ကုမ္ပဏီကို အီလွန်မက်ခ်က ဝယ်ယူပြီးတဲ့နောက် ရာထူးကနေအဖြုတ်ခံလိုက်ရတဲ့ ပါရက် အဂ္ဂါဝဲလ်တို့လို လူမျိုးလည်း ရှိပါသေးတယ်။ ဒီလိုထိပ်တန်းရောက်နေတဲ့ အိန္ဒိယလူမျိုးတွေဟာ Adobe လို နည်းပညာကုမ္ပဏီရဲ့အကြီးအကဲ ရှန်တာနူ နာရာယန်ကနေ IBM အကြီး အကဲ အာဗန် ခရစ္စနား၊ Starbucks ကုမ္ပဏီအကြီးအကဲ လက်ခ်စမန်း နာရီဆင်းဟန်းအထိ စာရင်းရှည်ကြီး ရှိနေပါသေးတယ်။
အမေရိကန် ဒုတိယသမ္မတ ကင်မလာဟားရစ်
ဆူးနက်ခ်ရဲ့ဝန်ကြီးချုပ်ရာထူးအထိ ရောက်သွားတဲ့ ကိစ္စကတော့ နိုင်ငံရေးလောကအထိ အိန္ဒိယနွယ်ဖွားတွေ ထိုးဖောက်လာနိုင်တဲ့ နောက်သက်သေတခု ဖြစ်လာတယ်။ တကယ်တော့ အမေရိကန် ပြည်ထောင်စုမှာ ဒုတိယသမ္မတ ကင်မလာဟားရစ်ဆိုရင်လည်း အိန္ဒိယမိခင်ကနေ မွေးဖွားခဲ့သူဖြစ်ပြီး၊ ကုလသမဂ္ဂရဲ့ အမေရိကန်သံအမတ်ကြီးဟောင်းလည်း ဖြစ်၊ ၂၀၂၄ ခုနှစ်ကျရင် သမ္မတလောင်းဖြစ်ဖို့ ရေပန်းစားနေတဲ့ နစ်ကီဟာလေး ဆိုရင်လည်း အိန္ဒိယနိုင်ငံ ပန်ဂျက်ပြည်နယ်က ဆစ်ဘာသာဝင် မိဘနှစ်ပါးက မွေးဖွားလာသူ ဖြစ်ပါတယ်။ ပေါ်တူဂီနိုင်ငံမှာဆိုရင် ဝန်ကြီးချုပ် အန်တိုနီယို ကောစတာရဲ့ဖခင်ဟာ အိန္ဒိယသွေးပါသူ ဖြစ်ပါတယ်။ အိုင်ယာလန်မှာ ဝန်ကြီးချုပ်ဟောင်း လီယိုဗာရက်ကာဟာ ဒီနှစ်နှောင်းပိုင်းမှာ ဝန်ကြီးချုပ် အဖြစ် ဒုတိယအကြိမ် ရာထူးလက်ခံဖို့ ရှိပါတယ်။ Brexit အလွန် အင်္ဂလန်နဲ့ အိုင်ယာလန်တို့ကြားက ခက်ခဲတဲ့ဆွေးနွေးမှုတွေကို အိန္ဒိယ နွယ်ဖွားနှစ်ယောက်က ကမကထလုပ်ဖို့ ရှိနေပါတယ်။
ဒီဖြစ်စဉ်က ဘာကိုပြောနေသလဲ။ ပြည်ပနိုင်ငံတွေမှာ ပြောင်းရွှေ့အခြေ ချတဲ့ အိန္ဒိယနွယ်ဖွားတွေနဲ့ မျိုးဆက်သစ်တွေဟာ အနောက်နိုင်ငံသားတွေနဲ့ အနောက်တိုင်းပညာရေးစနစ်ကိုရရှိတဲ့ လူတော်တွေအတွက် ဖန် တီးထားတဲ့စနစ်ထဲမှာ ထွန်းပေါက်နေရာရလာကြတယ်ဆိုတာကို ပြောနေပါတယ်။
အင်္ဂလိပ်တွေဟာ အိန္ဒိယကို ရာစုနှစ်နှစ်ခုလောက်အုပ်ချုပ်ခဲ့တာကို အကြောင်းရင်းတခုအနေနဲ့ ယူလို့ရနိုင်ပါတယ်။ ဒါပေမယ့် ဘာသာစကား ကျွမ်းကျင်တာ တမျိုးတည်းနဲ့တော့ ဒီလိုအောင်မြင်မှုတွေကို ရဖို့ ခက်ခဲပါတယ်။ ဒါကို အဓိကအကြောင်းရင်းအနေနဲ့ ယူမယ်ဆိုရင်လည်း အင်္ဂလိပ် စကားမပြောတဲ့ ဥရောပနိုင်ငံတွေမှာ အိန္ဒိယနွယ်ဖွားတွေ ထွန်းပေါက်နေတာကို မျက်ကွယ်ပြုရာရောက်သွားပါလိမ့်မယ်။ ဥပမာ ဂျာမနီမှာဆိုရင် အိန္ဒိယနွယ်ဖွား အလုပ်သမား ၅၈ ရာခိုင်နှုန်းဟာ တက္ကသိုလ် ဘွဲ့ရ၊ ဒါမှမဟုတ် ဒီလိုအရည်အချင်းနဲ့ညီမျှတဲ့ အရည်အချင်းရှိသူတွေပဲ ရရှိတဲ့ အလုပ်အကိုင်တွေကို လုပ်ကိုင်နေကြပါတယ်။
အိန္ဒိယနွယ်ဖွားတွေဟာ ပြောင်းရွှေ့အခြေချသူတွေကြားမှာ ခေါင်းတစ်လုံးပိုမြင့်နေတာကတော့ အမှန်တရားပါပဲ။ အမေရိကန် ပြည်ထောင်စုမှာ လူ မျိုးပေါင်းစုံ ရှိနေတဲ့ကြားထဲမှာ အိန္ဒိယနွယ်ဖွားတွေဟာ ဝင်ငွေမြင့် အုပ်စုတွေအဖြစ်ရပ်တည်နိုင်နေတာ ကြာပါပြီ။
တကယ်တော့ ပြည်ပနိုင်ငံကို ပြောင်းရွှေ့အခြေချကြတဲ့ အိန္ဒိယနွယ်ဖွား ပထမမျိုးဆက်တွေဟာ သူသူငါငါရကြတဲ့ အခွင့်အရေးကြားထဲကပဲ ကိုယ်ဒူးကိုယ်ချွန်ရင်း ဒီနေ့အခြေအနေမျိုးအထိ ရောက်လာကြတာပါ။ သူတို့ ရောက်ရှိနေတဲ့နိုင်ငံတွေမှာ အစိုးရတွေရဲ့ တင်းကျပ်တဲ့စည်းမျဉ်းစည်း ကမ်းတွေကို ကျားကုတ်ကျားခဲ ကြိုးစားဖြတ်ကျော်ခဲ့ရပါတယ်။ သူတို့မှာ ခါးသီးတဲ့ အတွေ့အကြုံတွေလည်း ရှိကြပါတယ်။
တကယ်တော့ အိန္ဒိယသမိုင်းကြောင်းနဲ့ ဗဟုဝါဒနောက်ခံက အိန္ဒိယနွယ်ဖွားတွေကို ဘယ်နေရာရောက်ရောက် မတူညီတဲ့ဘာသာစကား၊ ယဉ် ကျေးမှု၊ ဘာသာရေးတို့နဲ့ သဟဇာတ ဖြစ်စေပါတယ်။ ယဉ်ကျေးမှု ပဒေ သာစုံကုမ္ပဏီတွေမှာ အံဝင်ဂွင်ကျ ဖြစ်စေပါတယ်။ ဒီမိုကရေစီ နိုင်ငံမှာ မွေးဖွားကြီးပြင်းလာတဲ့ အိန္ဒိယလူမျိုးတွေဟာ ကိုယ်ထူကိုယ်ထ ကြိုးစားလုပ်ကိုင်တတ်တဲ့အလေ့အထ၊ ထိုးဖောက်စဉ်းစားတတ်တဲ့အကျင့်၊ လွတ် လပ်စွာ ထုတ်ဖော်ပြောဆိုတတ်တာတွေနဲ့လည်း မစိမ်းကြပါဘူး။ ဒါတွေဟာ စီးပွားရေး လောကမှာ အလွန်အရေး ကြီးတဲ့အရင်းအမြစ်တွေ ဖြစ် လာပါတယ်။ တချိန်တည်းမှာ အထက်အောက် လေးစား၊ အဆင်ပြေပြေနေတတ်တဲ့အိန္ဒိယသားတွေရဲ့ ဓလေ့ကြောင့် သူတို့ရောက်နေတဲ့ ဘယ်လူ့အဖွဲ့အစည်းမှာမဆို၊ ဘယ်ကုမ္ပဏီတွေမှာမဆို အပြောင်းအလဲတွေကို ပဋိပက္ခနည်းနည်းနဲ့ ငြင်ငြင်သာသာ ဖြစ်ပေါ်စေပါတယ်။
အိန္ဒိယနိုင်ငံရဲ့ဗဟုဝါဒကို အားပေးမှု၊ ပညာရေးနဲ့ သင်ယူမှုကို အားပေးမှု၊ မိသားစုစည်းနှောင်မှု၊ အလုပ်ကျင့်ဝတ်ကောင်းမှု စတာတွေဟာ အိန္ဒိယသားတွေအတွက် အားသာချက်ဖြစ်ပါတယ်။ လူလတ်တန်းစားမိသားစုတွေမှာမွေးဖွားကြတဲ့ အိန္ဒိယအများစုဟာ မိသားစုအသိုင်းအဝိုင်းရဲ့ ချီးမြှင့်မြှောက်စားတာကို ခံရလေ့ရှိပြီး၊ သူတို့ကိုယ်တိုင်ကလည်း ဒီလို ချီးမွှမ်းခံရတဲ့ ဘဝမျိုးကိုရအောင် ကြိုးပမ်းအားထုတ်တတ်ကြပါတယ်။
ဒီလိုကောင်းမွန်တဲ့ အမူအကျင့်တွေဟာ ပထမမျိုးဆက်တွေမှာ တွေ့ရတဲ့ စရိုက်လက္ခဏာတွေ ဖြစ်သလို၊ ဆူးနက်ခ်၊ ဗာရက်ကာ၊ ဟာရစ်တို့ကို မြင်ရတာက ကောင်းမြတ်ခြင်းတွေကို နောက်မျိုးဆက်တွေအထိ အောင်အောင်မြင်မြင် လက်ဆင့်ကမ်းနိုင်ခဲ့ပြီးဆိုတဲ့ အဓိပ္ပာယ်ပါပဲ။ အထူးသဖြင့် ဆူးနက်ခ်ဟာ အိန္ဒိယလူငယ်တွေရဲ့ ရည်မှန်းချက်ကို မြင့်မားစေရုံမက၊ အိန္ဒိယနိုင်ငံသစ်အတွက် တန်ဖိုးသစ်ကို မွေးဖွားပေးသူလို့ ဆိုရပါမယ်။
*(The Indian Diaspora Has Arrived ဆောင်းပါးကို ဘာသာပြန်ပါသည်။ ဆောင်းပါးရှင် ရှာရှီ သာရို (Shashi Tharoor) သည် လက်ရှိ အိန္ဒိယအမျိုးသားလွှတ်တော်အမတ်ဖြစ်သလို၊ ကုလသမဂ္ဂ လက်ထောက်အတွင်းရေး မှူးချုပ်နှင့် အိန္ဒိယနိုင်ငံခြားရေးအဖြစ် တာဝန်ထမ်းဆောင်ခဲ့ပါသည်။)
-
t.me@moemaka
#MoeMaKaMedia
#WhatsHappeningInMyanmar
Posts
