အမှောင်ခေတ်ထဲက လူငယ်များ၏ ကံကြမ္မာ၊ မြို့ပြစစ်ဆင်ရေးနှင့် SCEF ၏ ဦးဆောင်လမ်းညွှန်မှု

အမှောင်ခေတ်ထဲက လူငယ်များ၏ ကံကြမ္မာ၊ မြို့ပြစစ်ဆင်ရေးနှင့် SCEF ၏ ဦးဆောင်လမ်းညွှန်မှု

ဖောင့်ဖ. (မိုးမခ) စက်တင်ဘာ ၂၄၊ ၂၀၂၆

၂၀၂၄ ခုနှစ် ဖေဖော်ဝါရီလအတွင်း စစ်ကောင်စီက စစ်မှုထမ်းဥပဒေကို အသက်သွင်းလိုက်ခြင်းသည် မြန်မာ့လူ့အဖွဲ့အစည်းတစ်ခုလုံးအပေါ် ကြီးမားသည့် သက်ရောက်မှုများ ဖြစ်ပေါ်စေခဲ့သည်။

ခေတ်အဆက်ဆက် မတရားမှုကို ရဲဝံ့စွာ ရင်ဆိုင်ခဲ့ကြသည့် မျိုးဆက်သစ်လူငယ်များ၏ အနာဂတ်၊ အိပ်မက်နှင့် ဘဝများသည် ထိုဥပဒေ အသက်ဝင်လာသည့်အချိန်မှစ၍ မရေရာမှုများနှင့် ရင်ဆိုင်လာကြရသည်။

နိုင်ငံ၏ အနာဂတ်ကို တည်ဆောက်ကြရမည့် လူငယ်များသည် စစ်အာဏာတည်မြဲရေးအတွက် ဆင်နွှဲနေသည့် စစ်ပွဲများအတွင်းသို့ အဓမ္မပို့ဆောင်ခံရမည့် အန္တရာယ်နှင့် ရင်ဆိုင်နေကြရသည်။

အဓမ္မစစ်မှုထမ်းခိုင်းခြင်းနှင့် မိသားစုများအပေါ် ငွေညှစ်ခြိမ်းခြောက်မှုများ

စစ်မှုထမ်းဥပဒေကို အကြောင်းပြု၍ မြို့နယ်နှင့် ရပ်ကွက်/ကျေးရွာအုပ်ချုပ်ရေးအဖွဲ့ဝင်အချို့၊ ပျူစောထီးအဖွဲ့ဝင်များ၊ ရဲတပ်ဖွဲ့ဝင်များနှင့် စစ်တပ်နှင့် ဆက်နွှယ်သူများက ပြည်သူများအပေါ် ငွေညှစ်ခြင်းနှင့် ဖိအားပေးခြင်းများ ပြုလုပ်နေကြောင်း သတင်းများ မကြာခဏ ထွက်ပေါ်လျက်ရှိသည်။

စစ်မှုထမ်းစာရင်းမှ ပယ်ဖျက်ပေးမည် သို့မဟုတ် လူစားထိုးပေးမည်ဟုဆိုကာ တစ်အိမ်လျှင် သိန်းနှင့်ချီ၍ ငွေကြေးတောင်းခံမှုများ ရှိနေသည်။ ငွေမပေးနိုင်ပါက သားသမီးများကို ဖမ်းဆီးမည်ဟု ခြိမ်းခြောက်ခြင်း၊ မိဘများကို အာမခံသဘောဖြင့် ဖမ်းဆီးထားခြင်းတို့ဖြင့် အကြပ်ကိုင်မှုများလည်း ရှိနေကြောင်း သိရသည်။

ထို့ပြင် လမ်းသွားလမ်းလာလူငယ်များကို ညအချိန် သို့မဟုတ် လမ်းဆုံလမ်းခွများတွင် ဖမ်းဆီးခြင်း၊ ငွေကြေးတောင်းခံခြင်းနှင့် စစ်သင်တန်းကျောင်းများသို့ ပို့ဆောင်ခြင်းတို့လည်း ဖြစ်ပေါ်နေကြောင်း သတင်းများတွင် တွေ့မြင်နေရသည်။

ယင်းလုပ်ရပ်များကြောင့် စစ်မှုထမ်းစနစ်သည် လူငယ်များ၏ လုံခြုံရေးပြဿနာတစ်ခုသာမက မိသားစုများအပေါ် စီးပွားရေးနှင့် လူမှုရေးဖိအားပေးနိုင်သည့် ယန္တရားတစ်ခုအဖြစ်ပါ ပြောင်းလဲလာနေသည်။

နိုင်ငံပြင်ပသို့ ထွက်ခွာကြရသည့် လူငယ်များ

အဓမ္မစစ်မှုထမ်းရမည့် အန္တရာယ်မှ လွတ်မြောက်ရန် လူငယ်အများအပြားသည် နည်းလမ်းမျိုးစုံဖြင့် ပြည်ပသို့ ထွက်ခွာရန် ကြိုးပမ်းလာကြသည်။

ပတ်စပို့ရရှိရေး အခက်အခဲများနှင့် နယ်စပ်ဂိတ်များ၊ လေဆိပ်များတွင် ထွက်ခွာခွင့်ဆိုင်ရာ တင်းကျပ်မှုများကြောင့် တရားဝင်နည်းလမ်းဖြင့် နိုင်ငံပြင်ပသို့ ထွက်ခွာရန် ခက်ခဲလာသည့်အခါ အချို့လူငယ်များသည် တရားမဝင်လမ်းကြောင်းများကို ရွေးချယ်လာကြရသည်။

ပွဲစားများမှတစ်ဆင့် အိမ်နီးချင်းနိုင်ငံများသို့ ထွက်ခွာကြရာတွင် တောတောင်များအတွင်း ရက်ပေါင်းများစွာ လမ်းလျှောက်ရခြင်း၊ လူကုန်ကူးသူများ၏ လှည့်ဖြားမှုကို ခံရခြင်း၊ အိမ်နီးချင်းနိုင်ငံများတွင် ဖမ်းဆီးခံရခြင်းနှင့် အသက်အန္တရာယ်အထိ ကြုံတွေ့ရခြင်းများလည်း ရှိလာသည်။

အချို့မှာ အိမ်နီးချင်းနိုင်ငံများက မြန်မာနိုင်ငံသို့ ပြန်လည်ပို့ဆောင်ခြင်းခံရသဖြင့် စစ်မှုထမ်းအန္တရာယ်မှ လွတ်မြောက်ရန် ကြိုးပမ်းမှု မအောင်မြင်ဘဲ မူလအန္တရာယ်ရှိရာ ပတ်ဝန်းကျင်သို့ ပြန်လည်ရောက်ရှိသွားကြရသည်။

ရပ်ကွက်နှင့် ကျေးရွာအဆင့် ဖိအားပေးမှုများ

မြို့ပြနှင့် ကျေးရွာများတွင် လူငယ်များကို စစ်မှုထမ်းရန် စုဆောင်းရာ၌ ရပ်ကွက်နှင့် ကျေးရွာအုပ်ချုပ်ရေးအဖွဲ့ဝင်အချို့၊ ပျူစောထီးအဖွဲ့ဝင်များနှင့် စစ်တပ်နှင့် ဆက်နွှယ်သူများ ပါဝင်နေကြောင်း စွပ်စွဲမှုများ ရှိနေသည်။

ရပ်ကွက်အတွင်းရှိ လူငယ်များ၏ စာရင်းကို စစ်တပ်ထံပေးပို့ခြင်း၊ အလှည့်ကျစနစ်ဖြင့် မဲနှိုက်စေခြင်းနှင့် မဲပေါက်သူများထံမှ ငွေကြေးတောင်းခံခြင်းတို့ ဖြစ်ပေါ်နေကြောင်းလည်း သတင်းများတွင် ဖော်ပြကြသည်။

ထို့အပြင် ညအချိန် နေအိမ်များသို့ ဝင်ရောက်ရှာဖွေခြင်း၊ လမ်းသွားလမ်းလာများကို ဖမ်းဆီးခြင်းနှင့် ဒေသခံများအကြား အကြောက်တရား ဖြစ်ပေါ်စေသည့် လုပ်ရပ်များလည်း ဆက်လက်ရှိနေသည်။

မြို့ပြတော်လှန်ရေးလှုပ်ရှားမှုများနှင့် SCEF ၏ အခန်းကဏ္ဍ

စစ်ကောင်စီ၏ ဖိနှိပ်မှုများ၊ လူငယ်များကို အဓမ္မစစ်မှုထမ်းရန် စုဆောင်းမှုများနှင့် ငွေညှစ်မှုများကို တုံ့ပြန်ရန် မြို့ပြတော်လှန်ရေးအဖွဲ့များက ၎င်းတို့၏ လှုပ်ရှားမှုများကို တိုးမြှင့်လာကြသည်။

ယင်းအခြေအနေတွင် ဖက်ဒရယ်ဒီမိုကရေစီပြည်ထောင်စု ပေါ်ထွန်းရေးဦးဆောင်ကောင်စီ (SCEF) အနေဖြင့် တော်လှန်ရေးအင်အားစုများအကြား မဟာဗျူဟာပိုင်းဆိုင်ရာ ပေါင်းစပ်ညှိနှိုင်းမှု၊ အရပ်သားများ ထိခိုက်မှုမရှိစေရေးနှင့် တာဝန်ခံမှုရှိသည့် လုပ်ဆောင်ချက်များ ဖြစ်ပေါ်လာစေရေးတို့တွင် အရေးကြီးသည့် အခန်းကဏ္ဍမှ ပါဝင်ရန် လိုအပ်သည်။

တိုင်းရင်းသားလက်နက်ကိုင်အဖွဲ့အစည်းများ၊ အမျိုးသားညီညွတ်ရေးအစိုးရ (NUG) နှင့် မြို့ပြတော်လှန်ရေးအင်အားစုများအကြား ပိုမိုကောင်းမွန်သည့် ပေါင်းစပ်ညှိနှိုင်းမှု ရှိလာပါက သီးခြားစီ လှုပ်ရှားနေခြင်းထက် မဟာဗျူဟာပိုင်းဆိုင်ရာ ရည်မှန်းချက်များကို ပိုမိုရှင်းလင်းစေနိုင်မည်ဖြစ်သည်။

တစ်နေ့တစ်နေ့ ထွက်ပေါ်လာသော သတင်းများသည် မရိုးနိုင်အောင်ပင် တုန်လှုပ်ခြောက်ခြားဖွယ်ရာ ဖြစ်လာနေသည်။ မတရားမှုများ ပိုမိုမြင့်တက်လာသော်လည်း အရပ်သားအစိုးရဟု အမည်ခံထားသည့် အုပ်ချုပ်ရေးယန္တရားဘက်က ထိရောက်စွာ အရေးယူဖြေရှင်းပေးနေသည်ကို မတွေ့ရဟု ဝေဖန်မှုများလည်း ရှိနေသည်။

ထိုသို့သော အခြေအနေအောက်တွင် အစိုးရနှင့် ပြည်သူအကြား ယုံကြည်မှုကွာဟချက်သည် ပိုမိုကြီးမားလာပြီး ပြည်သူများ၏ နေ့စဉ်ဘဝလုံခြုံရေးမှာလည်း အလွန်စိုးရိမ်ဖွယ် အခြေအနေသို့ ရောက်ရှိလာသည်။

အာဏာပိုင်အဖွဲ့အစည်းများ၏ မတရားမှုများကို တုံ့ပြန်ရာတွင်လည်း အရပ်သားများ၏ အသက်နှင့် လုံခြုံရေးကို ဦးစားပေး၍ စနစ်တကျ၊ တာဝန်ခံမှုရှိစွာနှင့် ရေရှည်နိုင်ငံရေးရည်မှန်းချက်ကို မထိခိုက်စေမည့် နည်းလမ်းများကို ရွေးချယ်ရန် အရေးကြီးသည်။

မြန်မာနိုင်ငံတွင် ဖြစ်ပေါ်နေသည့် အဓမ္မစစ်မှုထမ်းခိုင်းခြင်း၊ လူငယ်များကို ဖမ်းဆီးစုဆောင်းခြင်းနှင့် ငွေညှစ်ခြင်းတို့သည် နိုင်ငံ၏ လူမှုရေး၊ စီးပွားရေးနှင့် လူငယ်မျိုးဆက်၏ အနာဂတ်အပေါ် ကြီးမားသည့် အကျိုးဆက်များ ဖြစ်ပေါ်စေလျက်ရှိသည်။

ထိုအခြေအနေများကို ရပ်တန့်နိုင်ရေးအတွက် တော်လှန်ရေးအင်အားစုများအကြား စနစ်ကျသော ပေါင်းစပ်ညှိနှိုင်းမှု၊ ပြည်သူလူထု၏ လုံခြုံရေးကို ဦးစားပေးမှုနှင့် နိုင်ငံရေးရည်မှန်းချက် ရှင်းလင်းပြတ်သားမှုတို့ လိုအပ်နေသည်။

ပြည်သူလူထု၏ ပူးပေါင်းပါဝင်မှုနှင့် တော်လှန်ရေးအင်အားစုများ၏ ဟန်ချက်ညီသော လှုပ်ရှားမှုများသည် လူငယ်များ၏ အနာဂတ်ကို ပြန်လည်ဖော်ဆောင်နိုင်ရေးအတွက် အရေးပါသကဲ့သို့ မြန်မာပြည်သူများ မျှော်လင့်တောင့်တနေသည့် ဖက်ဒရယ်ဒီမိုကရေစီပြည်ထောင်စု ပေါ်ထွန်းလာရေးအတွက်လည်း အခြေခံအင်အားတစ်ရပ် ဖြစ်လာမည်ဖြစ်သည်။

ဖောင့်ဖ
(၈-၁၁-၂၆)

Join Us @ MoeMaKa Telegram

t.me@moemaka

Please show your support, donate with Zelle

Zelle to moemaka.org@gmail.com "MoeMaKa Multimedia"

Like and Subscribe MoeMaKa YouTube Channel

youtube.com/@moemaka

Like us on MoemaKa Facebook

Follow us on X

X.com/MoeMaKa

#MoeMaKaMedia

#WhatsHappeningInMyanmar