ဆာသော်ဒိုး - မ သာ ၀
မ သာ ၀
ဆာသော်ဒိုး
(မိုးမခ) သြဂုတ် ၁၊ ၂၀၂၁
တခေတ်တခါကပေါ့ဗျာ . . .
ဖရိုဖရဲကာလကြီး။ "ဗန်ဒါ" ဆိုတဲ့ရွာမှာ "သူကြီး" အသစ် တက်တယ်။ ရပ်ရွာလူထုက "ရွေး" တာမဟုတ်ဘူး။ "ဆယ်အိမ်ခေါင်း"ေ အာ့ကျောလန် ရွာ့လူမိုက်သာဝက သူ့နောက်လိုက်လူမိုက်တစ်စုနဲ့ လက်ရှိသူကြီးဦးသီလကိုဖမ်းဆီးထိပ်တုံးခတ်ပြီး သူကြီးတက်လုပ်တာ။
အကြောင်းပြချက်ကတော့ ဦးသီလဟာ လာဘ်စားတယ်၊ ပလိပ်ရောဂါဆိုးကာလကြီးမှာ စည်းကမ်းမဲ့တယ်၊ ပြီးခဲ့တဲ့ ရွာ့သူကြီးရွေးပွဲမှာ မဲမသမာမှုလုပ်တယ် . . . ဘာညာသာရကာ ပေါက်ပန်းစျေးမဟုတ်ကဟုတ်ကတွေပြောဆိုစွတ်ဆွဲပြီး မတရားချုပ်နှောင်ထားတာ။
ရွာ့လူထုကိုးဆယ်ရာခိုင်နှုန်းက သူတို့တွေဟာ ဦးသီလကိုမဲပေးခဲ့တာလို့ ပြောကြပေမယ့် သာဝကတော့ ပါးစပ်ထဲရှိရာအလေနတောတွေလျှောက်ပြောပြီး သူကိုယ်တိုင် သူကြီးထိုင်ခုံပေါ်မတရားတက်ထိုင်ပြီး သူကြီးလုပ်နေတယ်ခင်ဗျ။
ရပ်ရွာလူထုကလည်း သာဝနဲ့ သူ့နောက်လိုက်လူမိုက်တွေလက်ထဲမှာ တဆဆလုပ်နေတဲ့ ဓားတွေ တုတ်တွေ မှိန်းတွေ လှံတွေ လေးခွတွေကိုကြည့်ပြီးမလှုပ်ရဲကြဘူး။ ဒါပေမယ့် ညဘက်ညဘက်တွေမှာတော့ တောတိရစ္ဆာန်တွေကိုခြောက်လှန့်မောင်းထုတ်သလို အိမ်မှာရှိတဲ့သံပုံးတွေ အိုးတွေခွက်တွေကို သံပြိုင်ကြီးတီးကြတယ်။
အဲသည်အချိန်ဆို သာဝတပည့်တွေက ရပ်ရွာထဲလှည့်လည်ပြီး သံပုံးတီးနေတဲ့အိမ်တွေကိုအယုတ်တအနတ ဆဲနည်းပေါင်းစုံနဲ့ မိုးမွှန်အောင် ကော်ကော်ဆဲပြီး လောက်လေးခွတွေနဲ့ တလကြမ်းကိုပစ်ကြတယ်။
ရွာ့လူထု တစ်ရာမှာ ကိုးဆယ့်ငါးယောက်က သာဝကိုမကြိုက်ကြဘူး။ သာဝကို ကြိုက်တာကတော့ သူ့လက် ပါးစေ လူ့ငနွားအချို့ပဲရှိတယ်။ သူတို့ကို သာဝက အရက်ဆိုအရက် ကြက်ဆိုကြက်ပံ့ပိုးထားတော့လည်း အရိုးအရင်းလေးကိုက်နေရတဲ့ ငမိုက်သားတွေဟာရိုက်ဆိုရိုက် သတ်ဆိုသတ်ဖြတ်ဆိုဖြတ်နဲ့လက်ရဲဇက်ရဲနိုင်နေတာပေါ့ခင်ဗျာ။
"ဖွတ်မိကျောင်းဖြစ် မြစ်မချမ်းသာ"ဆိုသလိုပဲ စာမတတ်ပေမတတ်လူမိုက် "ဆယ်အိမ်ခေါင်း" ကမတန်မရာ "သူကြီး" တက်လုပ်နေတော့ ခက်ပြီပေါ့။ အဲသည်ခရိုင်မှာရှိတဲ့ ဗန်ဒါရွာရဲ့အနီးပတ်ဝန်းကျင်ရွာတွေကသူကြီးတွေကလည်း 'အလိုတူအလိုပါ' တွေလိုနှုတ်ဆိတ်နေကြတာလည်း ထူးခြားတယ်ဗျ။
သာဝစကားကို ရွာသားတွေက ဖင်ကြားတောင် မညှပ်ကြပါဘူး။ သူ့အမိန့်တွေကို မလိုက်နာကြဘူး။ ငြင်းဆန်ကြတယ်။ ဒင်းကိုဘယ်သူမှ မကြည်ညိုကြဘူး။ တတ်နိုင်တဲ့နေရာကနေ ဆန့်ကျင်ကြတယ်။
ရွာဘေးထန်းတောထဲက ထန်းပင်တွေမှာ "စကောလောက်" ရှိတဲ့စာလုံးကြီးတွေကိုမြင်ကြရတယ်။ ပထမအပင်မှာ "မ" လို့တွေ့ရပြီးဒုတိအပင်မှာ "သာ" လို့ မြင်ရကာ တတိယအပင်မှာတော့ "ဝ" လို့ ရေးထားတယ်။
ဆက်ဖတ်လိုက်တော့ " မ သာ ဝ " ပေါ့ခင်ဗျာ။ "သာဝ" ကနေ "မသာဝ"အဖြစ်အကျွေးအမွေးမပါဘဲနာမည် ပြောင်းကင်ပွန်းအတပ်ခံလိုက်ရပါသဗျ။ ငပုသာဝ ဒေါတွေပွပြီး သူ့လက်ပါးစေတွေကို ရသမျှလိုက်ဖျက်ခိုင်းလို့ ဟိုကောင်တွေ နေ့စဉ်လိုလိုဖျက်နေရတာ နားကိုမနားရပါဘူး။
အဲသည်အချိန်ကာလမှာပဲ "ပလိပ်" ရောဂါကတစ်ကျော့ပြန်ပြီး အားကောင်းလာတယ်။
အရင်သူကြီးဦးသီလ လက်ထက်မှာ နိုင်နိုင်နင်းနင်း ညီညီညွတ်ညွတ် ကိုင်တွယ်နိုင်ခဲ့လို့ လူအသေအပျောက် နည်းပါးခဲ့ပေမယ့် သာဝလက်ထက်မှာ လူတွေဟာ ဟောတစ်ယောက် ဟောတစ်ယောက်ဆိုသလိုတဖြုတ်ဖြုတ်ကြွေကုန်ကြတာကို ထိတ်လန့်ကြောက်ရွံ့ဝမ်းနည်းစရာကောင်းလွန်းအောင် ကြုံ နေကြရတယ်။
စာမတတ်ပေမတတ် အကြံတုံးဉာဏ်တုံးနလပိန်းတုံးသာဝဆိုတော့ ကိုယ့်ရွာသားတိုင်း ပလိပ်ရောဂါကာ ကွယ်ဆေးထိုးနှံရဖို့ကိုမကြိုးစားဘဲ ဘာလုပ်တယ်ထင်ပါသလဲ။
ဟုတ်ကဲ့ . . သာဝဟာ ရွာ့သင်္ချိုင်းလေးကို နေ့ချင်းညချင်းတိုးချဲ့လိုက်တာ "သင်္ချိုင်းကြီး"အဖြစ် ဟီးနေအောင် ပေါ်ထွန်းလာပါတော့တယ်ခင်ဗျ။
တိုက်ဆိုင်တာပဲလား ဘာလားတော့ မဆိုတတ်ဘူး၊ "သင်္ချိုင်းကြီး"ဖွင့်လှစ်ပြီး သာဝအိမ်တောင်ပြန်မရောက်သေးဘူး၊ သူ့လက်ပါးစေ မဲလုံးဆိုတဲ့ကောင် အူရားဖားရား အပြေးရောက်ချလာပြီး အမောတကော သတင်းပို့ပါတော့တယ်ခင်ဗျ။
" သူကြီး . . . သူကြီး . . . သူကြီး "
" ဘာဖြစ်လာတာလဲ စောက်မဲလုံးရဲ့ "
" အိမ်မှာ . . . အိမ်မှာ . . . သူကြီးကတော်ရော သူကြီးသမီးကော သူကြီးသားကော သူကြီးယောက်ဖကော သူကြီးခယ်မကော ရောဂါကူးစက်ခံရလို့ မျော . . . မျော . . . မျောနေပြီခင်ဗျ "
သာဝ ရုတ်တရက် လဲကျသွားတယ်။ ။
ဆာသော်ဒိုး
30-7-21(Fri) 2:15 Pm
-
Join Us @ MoeMaKa Telegramt.me@moemaka
#MoeMaKaMedia
#WhatsHappeningInMyanmar
Posts
