မိုးမခရုပ်ရှင်ခံစားမှုဆောင်းပါး - ကျော်မင်း​မောင် " စန္ဒရားတီးသူနဲ့ လုလင်ငယ်​သွေး "

မိုးမခ

စက်တင်ဘာ ၂၀၊ ၂၀၂၁

" စန္ဒရားတီးသူနဲ့ လုလင်ငယ်​သွေး "

ကျော်မင်း​မောင်

ဒီ​နေ့ရက်တွေထဲမှာ စိတ်နှလုံးမသာလွန်းသမို့ ရုပ်ရှင်​လည်း မကြည့်ဖြစ်၊ သီချင်း​လည်း နားမ​ထောင်ဖြစ်၊ စာ​တောင်​ကောင်း​ကောင်း မဖတ်ဖြစ်ခဲ့တာ နှစ်ဝက်​ကျော်လာခဲ့ပြီ။ တကယ်​တော့ မကြည့်ဖြစ်၊ မ​ထောင်ဖြစ်ဆိုတာထက် မကြည့်ရက်၊ မ​ထောင်ရက်လို့ဆို ပိုမှန်ပါလိမ့်မယ်။

    ဒါ​ပေမယ့် တ​လောက​တော့ ချဉ်ခြင်းတပ်လွန်း ယဉ်းထလွန်းတာနဲ့ ရုပ်ရှင်တစ်ကား ထကြည့်ဖြစ်ခဲ့ပါရဲ့။ ဒီနှစ် ​အော်စကာအကယ်ဒမီ (နိုင်ငံခြားကား)ဆု ဇကာတင် အ​ရွေးခံခဲ့ရတဲ့ကား၊ kickass မှာ​တွေ့လို့ down ထားပြီးသား​ပေမယ့်၊ ဇာတ်ကျောရိုး wiki မှာ ဖတ်ပြီးကတည်းက ကြည့်ချင်​နေ​ခဲ့ပေမယ့် မကြည့်ဖြစ်ရ​သေးတဲ့ကား။

    Quo Vadis, Aida? တဲ့။

    ဗမာလိုဆို "မင်းဘယ်သွားမလဲ အိုက်ဒါ ?" တဲ့။

   မြန်မာရုပ်ရှင်ကြည့် ပရိတ်သတ်နဲ့ နည်းနည်းစိမ်းမယ့် "​ဘော့စနီးယားနဲ့ ဟာဇီဂိုဗီးနား" နိုင်ငံက ထွက်လာတဲ့ကား။ (နိုင်ငံသာလူသိနည်း​မယ်၊ ရုပ်ရှင်အနုပညာကျ ကမ္ဘာသိ​အောင် အား​ကောင်း​လေ​တော့ No Man's Land ဆိုတဲ့ကားနဲ့ ၂၀၀၂ ခုနှစ်တုန်း ​အော်စကာအကယ်ဒမီ (နိုင်ငံခြားကား) ဆုကို သိမ်းသွားဖူးခဲ့တဲ့နိုင်ငံ၊ စစ်ပွဲ​တွေ၊ လူမျိုးတုန်းလူသတ်ပွဲကြီး​တွေ​ကြောင့် ကမ္ဘာကျော်ထားတဲ့ နိုင်ငံ) 

    စစ်​အေးတိုက်ပွဲကြီးအဆုံး ဆိုဗီယက်အင်ပါယာကြီး ပြိုလဲသွားလိုက်ပုံများ ​ပြောပါတယ်၊ ​ကျောက်​ဆောင်နဲ့ ကိုင်​ပေါက်ခံလိုက်ရတဲ့ ဖရဲသီးတစ်လုံးလိုကို အစိတ်စိတ်အမွှာမွှာ ကွဲ​ကျေသွားလိုက်ရရှာတာ။ အင်ပါယာအလယ်ချက်မ ဆိုဗီယက်ရုရှားကြီး ပြိုကွဲသွားရရုံမက၊ သူ့အရံကြယ် အ​ရှေ့ဥ​ရောပနိုင်ငံကြီး-ငယ်​တွေပါ အားကျမခံ ထပ်စိတ် ထပ်ပိုင်းလိုက်ပုံများ မွစာကို ထိုးကုန်ပါ​လေ​ရောလား။ ဒီမှာ စ​တော့တာပါပဲ၊ စစ်ပွဲ​တွေ..စစ်ပွဲ​တွေ..

    လူမျိုး​ရေး၊ ဘာသာ​ရေးစစ်ပွဲ​တွေ။ သူ့နယ် ငါ့နယ် နယ်​​မြေလုစစ်ပွဲ​တွေ။ ခဝါချ မရနိုင်​သေးတဲ့ ဝါဒ​စွဲ စစ်ပွဲ​တွေ..

    တစ်ချိန်က မိတ်​ဆွေ၊ ​ကျောင်း​နေဖက်သူငယ်ချင်း၊ ရဲ​ဘော်ချင်းချင်း၊ တစ်ချိန်က အိမ်နီးနားချင်းချင်း၊ တစ်ချိန်က ချစ်သူ​တွေအချင်းချင်း သတ်တဲ့.. သတ်လိုက်ကြတဲ့ စစ်ပွဲ​တွေ..စစ်ပွဲ​တွေ..။ 

    အခု ကျွန်​တော်ကြည့်ခဲ့ရတဲ့ ဒီကားဟာ ဒီကာလကို ဖွဲ့ဆိုပါတယ်။ ဗမာလို "​ငွေ​တောင်မြို့"​ခေါ်ရင်ရမယ့် Srebrenicaမြို့​လေးမှာ တကယ်ကြီးကို ဖြစ်ခဲ့တဲ့ "လူမျိုးတုန်းသတ်ဖြတ်ပွဲကြီး" ကို ဖွဲ့ဆိုပါတယ်။

      ဒီဖြစ်ရပ်မှန်ကြီးကို အတိုင်ချည်ထားလို့ စိတ်ကူးဇာတ်​ကောင် အိုက်ဒါနဲ့ အ​ဖောက်ချည်လုပ် ရက်ယှယ်လိုက်တဲ့အခါ (​​နောက်တစ်ကြိမ် ထပ်ကြည့်ရက်စရာ မရှိတဲ့) နာကျင်ဆို့နင့်ဖွယ် အနုပညာလက်ရာတစ်ခုကို ကျွန်​တော်တို့ ခံစားခွင့် ရခဲ့ပါ​တော့တယ်။

    ကုလသမဂ္ဂ ငြိမ်းချမ်း​ရေးတပ်အတွက် အင်္ဂလိပ်စကားပြန်လုပ်​ပေး​နေတဲ့ ​ကျောင်းဆရာမ​ဟောင်း အိုက်ဒါ၊ သူရဲ့ သားလူပျိုနှစ်​ယောက်နဲ့ ကျောင်းဆရာ​ဟောင်းခင်ပွန်းသည်။ ဒီမိသားစုဝင်​တွေကို ကာကွယ်​ပေးလို​ဇောနဲ့.. မိခင်​မေတ္တာ​တွေအပြည့်နဲ့ ​သွေးရူး​သွေးတန်း ရုန်းကန်ကြိုးစားနေရတဲ့ အိုက်ဒါ။ 

    (မြန်မာနိုင်ငံရဲ့​မြေအကျယ် တစ်​ဝက်​လောက်​တောင် မရှိတဲ့) တချိန်က ယူဂိုဆလားဗီးယားဆိုတဲ့ နိုင်ငံငယ်တခုဟာ ဆာ့ဗ်၊ ဘော့စနီးယား၊ ကရိုအက်၊ ဆလိုဗက်စသဖြင့် လူမျိုး​ရေး​ပေါ်အ​ခြေခံလို့ ​​​ခြောက်စိတ်စိတ်ကာ ခြောက် နိုင်ငံ​တောင် ကွဲထွက်သွားပါတယ်။ Orthodox ​ရှေးရိုးခရစ်ယာန်နဲ့ အလယ်လတ် မွတ်ဆလင်​တွေ တစ်​လျှောက်လုံး အတူယှဉ်တွဲ​နေလာရာက ထသတ်ကုန်ကြပါတယ်။ လူမျိုး​တန်းတူအခွင့်အ​ရေးက​နေ လူမျိုး​ရေးအစွန်း​ရောက်ဆီ၊ ဘာသာ​ရေးအစွန်း​ရောက်​တွေဆီကို ကူး​ပြောင်းအစွယ်​ပေါက်ကုန်ကြပါ​တော့တယ်။

     ​ဘော့စနီးယားနိုင်ငံအ​ရှေ့ဖျားက Srebrenica မြို့လေးဟာ တဖက်ခွဲထွက်​ဖော်နိုင်ငံ ဆားဗီးယားနယ်စပ်နားမှာ။ ​​တော​တောင်လျှို​မြောင်တွေကြား ငွေသတ္တု တွင်း​တွေ၊ ကမ္ဘာ​ကျော်ပို့ကုန် သဘာဝစိမ့်စမ်း​သောက်​ရေ​တွင်းတွေ ရှိရာမြို့ငယ်​လေး။ လူဦး​ရေ နည်းနည်းနဲ့ မြို့​လေး။ လူနည်းစု မွတ်ဆလင်​တွေနဲ့ လူများစု ခရစ်ယာန်တို့ ​ဒွေး​ရောယှက်တင်​နေလာခဲ့တဲ့ မြို့​လေး။

    ၁၉၉၅ ခုနှစ်၊ ဇူလိုင်လ၊ ၁၁ ရက်

    ဆာ့ဘ်စစ်ဗိုလ်ချုပ် Ratko Mladic ရဲ့ ကျူး​ကျော်တိုက်ခိုက်​ရေးတပ်တွေဟာ ​ဒီငွေ​တောင်မြို့​လေးဆီ လက် နက်ကြီး​တွေဆက်တိုက်ပစ်ရင်း တင့်ကား​တွေနဲ့ တရကြမ်း ဝင်လာကြပါပြီ။ မြို့သူမြို့သား​တွေရဲ့ တန်ပြန် ခုခံတိုက်ခိုက်မှုဆိုတာ ​နေ့ခင်း​ကြောင်​တောင် မီးခွက်ထွန်းရှာရမတတ် ရှားသမို့ နာရီပိုင်းအတွင်းမှာပဲ သာသာယာယာသိမ်းလိုက်နိုင်ပါပြီ။

    မြို့သူမြို့သား​တွေဟာ အ​လောင်း​ကောင်ကို ငုတ်တုပ်​ထောင်ထားသလို မျက်နှာ​တွေနဲ့ ဒီဖြစ်ရပ်ကို ​တော်​တော်နဲ့လက်မခံ မယုံကြည်နိုင်ပဲ မင်သက်မိ​​နေကြ။ အနားကအ​ဆောက်အဦ​တွေကို အ​မြောက်ဆံကျ ​ပေါက်ဟယ်ကွဲဟယ်ဖြစ်​တော့မှပဲ တကယ်ကြီးဟဆို ထ​ပြေးဖို့ သတိဝင်လာကြပါတယ်။ ​ဒီလိုပြေး​ဟေ့ဆိုမှပဲ အဝတ်အိတ်​တွေထဲ အဝတ်အစားကြုံသလို ဆွဲထည့်ရ။ တွက်ချက်ပြင်ဆင်ထားမှု ဘာဆိုဘာမျှ မရှိပုံများ ​ပြောပါတယ်။ စစ်​ရှောင်အ​ရေး​ပေါ်အိတ်ဆို ​ဝေး​ရော..

    ကဲ ဘယ်​ပြေးကြမလဲ..ဒါ​တော့ ရှိတာ​ပေါ့။ ယုံကြည်စရာ၊ အားကိုးစရာ၊ ​ဘေးအ​ပေါင်း ရန်အ​ပေါင်းကင်းရာ၊ နဘယံ ​ဘေးမရှိရာဆီ..။ 

     တကယ်​တော့ ဒီမြို့သူမြို့သား​တွေရဲ့ အသင့်မဖြစ်မှုကို အပြစ်တင်လို့လည်း မရ။ ​၁၉၉၂ ခုနှစ်လောက်ကတည်းက ဒီနယ်​မြေလု ဆာ့ဘ်​တွေက ​ဘော်စနီးယား​တွေအ​ပေါ်​ (အထူးသဖြင့် မွတ်ဆလင်​တွေအ​ပေါ်) ခြေမှုန်းတိုက်ခိုက်နေမှုဟာ ဖွဲမီးလို တ​ငွေ့​ငွေ့​လောင်​နေခဲ့တာ ကြာကြာ​လှပေါ့။ သေရတဲ့လူ​တွေလည်း များများလှ​ပေါ့။

    ဒီမှာတင် ကယ်တင်ရှင်ကြီး​ပေါ်လာ။ ကမ္ဘာဦးလူတို့​နေလကို ​မျှော်တရသလိုတ​နေရတဲ့ ကယ်တင်ရှင်။ ခင်ဗျားတို့ ကျွန်​တော်တို့ရဲ့​ဖောက်သည်ကြီး​လေ၊ UN ပါတဲ့။ "ကမ္ဘာ့ကုလသမဂ္ဂကြီး" ပါတဲ့။ လက်နက်တို့ဘုန်း မိုးသို့ချုန်းတော်မူပါတဲ့ အနောက်စစ်အုပ်စု ​NATO ပါတဲ့။

    

သူတို့ ​ရောက်လာ၊ နင်တန် နင်တန် ပန်းကန်ကွဲ။ စစ်မဲ့ဇုန် ​ကြေငြာ၊ အပစ်အခတ်မဲ့ဇုန် ​ကြေငြာ။ ​ငွေ​တောင်နယ်တစ်ခို ကျည်ဆိုမ​ပေါက်ရ ဘာညာ ဘာညာ။ ဆယ်​ရေးတစ်​ရေး ကိုး​ရေးတစ်ရာ၊ ​ငွေ​တောင်နဲ့ မလှမ်းမကမ်းမှာ "ဒုက္ခသည်ခိုလှုံ​ရေးစခန်းကြီး" ဆောက်​ပေးထားလိုက်၊ ​NATOအဖွဲ့ဝင် ဒတ်ချ်စစ်တပ်ဖွဲ့တဖွဲ့ကို ကုလငြိမ်းချမ်း​ရေးထိန်းသိမ်း​ရေးတပ် စစ်ခ​မောက်အဖြူ​လေး​တွေ ​ဆောင်းခိုင်းပြီး တပ်စွဲခိုင်းထားလိုက်။ ဘာလို​သေးလဲပေါ့​နော။

     ဒီ​တော့ ​ငွေ​တောင်သူ ​ငွေ​တောင်သား​တွေ ​အေး​ဆေး​ပေါ့။

​ပြေး​ဟေ့ဆို ဒီ ကယ်တင်ခြင်း​​မြေ၊ ​ဘေးကင်းရာ​မြေဆီမှတပါး အခြား မရှိပေါ့။ ကျန်တဲ့ဖြစ်လာသမျှအ​ကြောင်း ကုလ​ခေါင်း၊ အရာရာ ကုလက တိုက်​ပေး၊ ရှင်း​ပေး.. NATO ရဲ့ တိုက်​လေယဉ်​တွေက လာလိမ့်မ​ပေါ့။ 

လက်​တွေ့ဘဝ​တွေဟာ ခါးလွန်းတတ်ပါတယ်။

    မြို့တွင်းကို ရန်သူ​တွေ ဝင်လာ​နေချိန် ကုလဒုက္ခသည်စခန်း ရုံးခန်းထဲမှာ စခန်းတာဝန်ခံ ဒတ်ချ်ဗိုလ်မှူး Thom Karremans နဲ့ ​ငွေ​တောင်မြို့​တော်ဝန်တို့ဟာ စကားပြန် အိုက်ဒါကတဆင့် ​အ​ရေး​ပေါ်ဆွေး​နွေးလို့ ​ကောင်းတုန်းပါ။ ခင်ဗျားတို့​ပြောတုန်းက ဒီလို ဖြစ်မလာပါဘူးဆို။ အားကိုးတကြီး ​တောင်းဆိုပါတယ်၊ ကာကွယ်​ပေးပါ၊ ရပ်တန့်​ပေးပါ၊ တိုက်​ပေးပါ။ သူ့မှာ တိုက်မိန့် ပစ်မိန့် မရှိ၊ အစီရင်ခံ တင်ပြ​ပေးပါ့မယ်။ ​​လေ​ကြောင်းက​နေ တိုက်ခိုက်မှု လုပ်​ပေးပါ။ လာမှာပါ.. ​လာမှာပါ။ ချက်ချင်းလာခိုင်းပါ။ NATO ကို အဲဒီလို အမိန့်​ပေးခွင့် မရှိ၊ ​အဲဒီလို တောင်းဆိုပိုင်ခွင့်မရှိ။ အစီရင်ခံ တင်ပြ​ပေးပါ့မယ်။ ​​ဆွေး​နွေးပွဲအဆုံး မြို့​တော်ဝန်ဟာ တပ်တာဝန်ခံ ဗိုလ်မှူးကို လက်ဆွဲနှုတ်မဆက်ချင်​လောက်​တဲ့ထိအောင်ကို ​ဆွေး​နွေးပွဲကြီးက ​အောင်မြင်သွားခဲ့ပါတယ်။ ကုလရာဇသံ ဖီဆန်သူ၊ သ​​ဘောတူညီချက် ချိုး​ဖောက်သူ၊ ဥပ​ဒေကို မလိုက်နာသူ အ​ရေးယူ​ပေးပါ။ ကုလရဲ့ဗြူရိုက​ရေစီယန္တယား​အောက်မှာ လက်​တွေ့ဘဝ​တွေ၊ လက်ရှိအ​ခြေအ​နေ​တွေအတွက် အ​ရေး​ပေါ်ဆုံးဖြတ်ချက်ဆိုတာမရှိ။ လုပ်ထုံးလုပ်နည်းအတိုင်းသာ အစီရင်ခံ တင်ပြ​ပါ။ 

     "ကတိ" ဆိုတာ "​လေ"..."စာချုပ်" ဆိုတာ "စက္ကူ"...

      ပကတိ အ​ခြေအ​နေမှာ ​ငွေ​တောင်က ကုလတပ်မှာ အစီရင်ခံ တင်ပြ​ရုံမှတပါး ဆုံးဖြတ်ပိုင်ခွင့်၊ ​တောင်းဆိုပိုင်ခွင့် မရှိ။ ယုတ်စွအဆုံး အပန်း​ဖြေခရီးထွက် ချိန်မို့ အထက်လူကြီး​တွေဆီ ဖုန်းဆက်တင်ပြခွင့်ပင် မရှိ။ မရှိ ၊ မရှိ။ ဒုက္ခသည်စခန်းဆီ အားကိုးတကြီး ​ပြေးလာတဲ့ ​ထောင်နဲ့ချီတဲ့ လူအုပ်ကြီးအတွက် ဒီမှာ ​နေရာထိုင်ခင်း အလုံအ​လောက် မရှိ၊ ​မရှိ။ နေရာမ​လောက်​တော့ရင် ဝင်းတံခါးကို ပိတ်လိုက်​တော့။ ဝင်းတံခါးအပြင်က ဝင်ခွင့်မရတဲ့လူ​တွေအတွက် ဘာမျှ တာဝန် မရှိ။ အထဲ ဇွတ်ဝင်ခွင့် မရှိ။ ဝရုန်းသုန်းကား လုပ်ခွင့် မရှိ။ အထဲက လူ​တွေအတွက်​တောင် ​နေရာထိုင်ခင်း အလုံအ​လောက် မရှိ၊ ​ရေအလုံအ​လောက် မရှိ၊ အိမ်သာအလုံအ​လောက် မရှိ။ ရိက္ခာအလုံအ​လောက် မရှိ။ တပ်မှာပင် ​လောင်စာဆီ အလုံအ​လောက် မရှိ။

    ကျူး​ကျော်သူ ဆာ့ဘ်​တွေ လက်နက်တကားကားနဲ့ တအုပ်တမကြီး​ စခန်းထိ​အောင်ကိုရောက်လာတာ တားခွင့်မရှိ။ ဒင်းတို့က ဗြူးဗြဲဟိန်း​ဟောက်ပြီး စခန်းထဲအတင်းဝင် 'သူတို့ကို ခုခံခဲ့တဲ့​ကောင်​တွေ ရှာမယ် ဖမ်းမယ်' ဆိုတာလည်း တားမြစ်ပိုင်ခွင့်မရှိ။ ကုလတပ်မှာ လက်နက်ကြီးလက်နက်​ကောင်းဆိုတာ မရှိ။ စစ်သည်အင်အား အလုံအ​လောက် မရှိ။

     စခန်းတွင်း/ပြင်က ဒုက္ခသည်​တွေကို ဘေးကင်းလုံခြုံရာမြို့​တွေဆီ ​ပြောင်း​ရွှေ့​ပေးမယ်ဆို​တော့လည်း ကုလတပ်အစား သူတို့တပ်ကပဲ လုပ်မယ်၊ ယုံကြည်စိတ်ချပါဆိုတာလည်း ငြင်းခွင့် မရှိ။ ​ပြောင်း​ရွှေ့​ရေးဘတ်စ်ကား​တွေ​ပေါ် မိသားစုအတူတူ မတက်ရ၊ ​ယောက်ျားသတ်သတ် မိန်းမသတ်သတ်၊ မ​အေသတ်သတ် သမီးသတ် သတ်၊ တက်​စေဆိုတာကိုလည်း သံသယ ဖြစ်ခွင့်မရှိ။ ငြင်းဆန်ခွင့် မရှိ။

    ကုလသမဂ္ဂဆိုတာကြီးမှာ အထက်က ကြိုးနီဆုံးဖြတ်ချက်အတိုင်း မဟုတ်ရင် ဘာမျှဆုံးဖြတ်ခွင့် မရှိ၊ ​ကုလတပ်ဆိုတာ ဘော်ဒါ​ဘော်ကျွတ်စိတ် လုပ်​ဖော်ကိုင်ဖက်စိတ်မရှိ၊ လူသားချင်းစာနာကူညီခွင့်မရှိ။ တရားဝင်အမိန့်မရှိရင် ဘာလုပ်ပိုင်ခွင့်မျှ မရှိ။ 

    ဒီလိုနဲ့ဘတ်စ်ကားကြီး​တွေ​ပေါ် ကုလတပ်က ငါ့လက်ကလွတ် ဗလွတ်ဆို ထည့်အလွှတ်ခံလိုက်ရတဲ့ ဒုက္ခ သည်​တွေ။ ကုလရဲ့ အစီအမံ​တွေအ​ပေါ် ယုံကြည်စိတ်ချစွာ လိုက်ပါလာသူ​တွေ​ရော၊ သံသယနဲ့ ဇွတ်လိုက်လာရသူ​တွေ​ရော...သင် သူတို့သွားလိုရာ သွားကြ​ပေ​ရော့..

    သတ္တုစက်ရုံခန်းမတခုထဲကို ​ဇက်ပိုး​ပေါ် လက်ယှက်တင်ရက်သား ​မောင်းထည့်ခံလိုက်ရတဲ့ ​ယောက်ျားသား​တွေ၊ လူကြီး​တွေ​ရော၊ ခုခံ​တော်လှန်စစ်မှာဆို တိုက်​ကောင်းခိုက်​ကောင်းမဲ့အရွယ် လူပျိုလူရွယ်​လေး​တွေ၊ ခု​တော့ ငြိမ်ခံ​ပေးလက်စနဲ့ ဆက်ငြိမ်ခံ​ပေး​နေလိုက်ကြရ​အောင်။ ​​တရစပ်​ပေါ်ထွက်လာမယ့် စက်​သေနတ်သံ​တွေ၊ အပြစ်သား မင်းတို့ဆီကို ပျံလာမယ့် ကျည်ဆံ​တွေ။ မင်းတို့ဟာ ​သေဒဏ်ထိုက်ခဲ့ပြီ။ ဘော်စနီးယန်းမို့လို့၊ မွတ်ဆလင်မို့လို့...သိုး​လေး​တွေမို့..အထူးသဖြင့် ကုလတပ်အားကိုး ပုဆိန်ရိုးမို့လို့..

       အတိုချုံး​ပြောရရင် ဘတ်စ်ကားကြီး​တွေနဲ့ ပါသွားရရှာသူ ​​ဘော့စနီးယားမွတ်ဆလင် ယောက်ျားကြီးငယ် ​ထောင်ချီပစ်သတ်ခံရပါတယ်၊ က​လေးငယ်တချို့ လည်လှီးသတ်ခံရပါတယ်။ မိန်းမကြီး/ငယ်များစွာက​တော့ (ထုံးစံမပျက်) ဆာ့ဘ်စစ်သား​တွေရဲ့ မုဒိမ်းကျင့်တာ ခံရပါတယ်၊ အသတ်လည်း ခံရပါတယ်။ (​နောက်​နောင် အ​လောင်း​တွေ အစုလိုက်အပြုံလိုက် မြှုတ်ထားတဲ့ ​​မြေကျင်းကြီး​တွေကို ပြန်တူး​ကြည့်ကြ​တော့ စုစု​ပေါင်း ရှစ်​ထော​င်တောင် ​ကျော်ပါသတဲ့)

    

"ကျုပ်က စန္ဒရားတီးသူ သက်သက်ပါ"

    "အိုက်ဒါ..ဗိုလ်မှူး ဘာကို ဆိုလိုတာလဲ"

    "မြို့​တော်ဝန်မင်းရှင့်..သူဟာ သတင်း​လက်ဆင့်ကမ်းပေးရသူ သက်သက်ပါ-တဲ့" 

    ဒီက ကုလတပ်တာဝန်ခံဗိုလ်မှူးဆိုတာ ခလုပ်နှိပ်သူသက်သက်။ စန္ဒရားတီးသလို တယ်လီဖုန်းခလုပ်​လေး​တွေ လျှောက်နှိပ်လို့ အထက်အဆင့်ဆင့်ကို တင်ပြ​နေရသူအဆင့်ထက် မပို။ 

    ခု​နောက်ပိုင်းမှာ ဒီအဖြစ်ဆိုးကြီးရဲ့ အဓိကတရားခံ ဆာ့ဘ်ဗိုလ်ချုပ်ကြီးကို ICJ​ တွေ ဘာ​တွေ ပို့၊ ရုံး​​​တွေဘာ​တွေ တင်၊ ​ထောင်တွေ ဘာ​တွေ ချလို့ သိရ​ပေမယ့် ကျွန်​တော်က​တော့ စိတ်မဝင်စား​တော့ဘူး။ သိလည်း မသိ​တော့ဘူး။ 

   ကျွန်​တော်သိတာ ​(သေချာတာက​တော့) အဲဒီ လူသတ်ပွဲကြီးတုန်းက ​ခံမတိုက်ရဲခဲ့တဲ့ ဘော့စနီးယားတွေ၊ UN​ တွေ၊ NATO ဆိုတာ​တွေက မ​သေ​အောင် တားမ​ပေးခဲ့နိုင်လို့ ​သေသွားရရှာတဲ့ အပြစ်မဲ့ပြည်သူ​တွေဟာ "တစ်​ယောက်မျှ ပြန်ရှင်မလာကြ​တော့ဘူး"  ဆိုတာပါပဲ။ ဒီ​တော့.. 

     NUGနဲ့ ကျွန်​တော်တို့ ပြည်သူ​တွေ ဒီ​နေ့​ရွေးချယ် ​လျှောက်ခဲ့တဲ့ ​ဟောဒီလမ်းဟာ အမှန်ကန်ဆုံး၊ အသင့်မြတ်ဆုံးလမ်းပါ။ လုပ်သင့်တာ၊ လုပ်ရမှာအားလုံး ကျွန်​တော်တို့ လုပ်ခဲ့ပြီးကြပြီ။ တစ်ရက်မပျက် ဆက်လုပ်​နေကြတုန်း။

     " UN ကြီး​ရေ လာပါ​တော့ ပြည်သူတ​မော့​မော့" တို့၊ " R2P​ ရေ လာပါ​တော့ ပြည်သူတ​မော့​မော့"တို့ ဆိုတာ ​ခေတ်​ဟောင်း​တေး ဖြစ်သွားတာ ကြာ ကြာလှ​ပေါ့။ ဦးUN ကြီးကို ရပ်မိရပ်ဖ အရာထားမှဆိုလည်း ထား​ကြတာပေါ့၊ သံဃာစင်​ပေါ်တင် ထိုင်ခိုင်းထား​ကြတာပေါ့။ တိုင်စရာ​ တောစရာရှိလည်း တိုင်​ပေါ့တော​ပေါ့။ ကိုယ်လည်း စင်​အောက်မှာ လုပ်စရာရှိတာ​တွေ သိမ်းကြုံးလုပ်​ပေါ့။ သူဖာသူ လူကြီးတန်မဲ့ သံဃာစင်​ပေါ်မှာ တံခါးဖွင့်တမ်း ပိတ်တမ်း ကစား​နေချိန်၊ ကိုယ်လည်း ​ထောင်းစရာယမ်း ဆက်​ထောင်း၊ စပ်စရာယမ်း ဆက်စပ်​နေကြရုံ​ပေါ့။

     ကျွန်​တော်တို့ "ဟန်သစ်"မဂ္ဂဇင်း ပထမအုပ်စကိုင်​တော့ မဂ္ဂဇင်းအတွက် ​​ကြော်ငြာ​တောင်း​ကြော်ငြာ​လေးတစ်ခု ထည့်ရတယ်။ ​ကြော်ငြာ​တောင်း စာသား​လေးကို "သင့်လုပ်ငန်း ​ပိုအောင်မြင်လိုလျှင် ဟန်သစ်တွင်​ကြော်ငြာပါ" ဆို ခပ်​ကျော​ကျော​လေး ​ရေးလိုက်မိတယ်။ ဆြာပီ (​အော်ပီကျယ်) ကြီးက "​ကြော်ငြာများများလိုချင်ရင် သင့်မဂ္ဂဇင်းကို ​ပိုအောင်မြင်​အောင် ကြိုးစားပါ" ဆို ​နောက်လအတွက် ကာတွန်းတစ်ကွက်လာပို့ပြီး ခွပ်ပါ​တော့တယ်။ သူ​ပြောတာလည်း အမှန်ပဲမို့ ရှက်ရှက်နဲ့ ရယ်​ရင်း ​ခေါင်းထိုးခံ​ပေးခဲ့ရဖူးတယ်။

 ကုလတပ်မှူး ဗိုလ်မှူးဟာ စစ်​ရှောင်ဒုက္ခသည်​တွေကို ​ဘေးလွတ်ရာ ​ရွှေ့ဖို့ စီစဉ်ရတဲ့အခါ "ကျူး​ကျော်ပါတယ်၊ ဥပ​ဒေချိုး​ဖောက်ပါတယ်" ဆိုတဲ့ လူသတ်​ကောင်၊ မုဒိမ်း​ကောင် ဆာ့ဘ် ဗိုလ်ချုပ်ကြီးဆီပဲ အ​ပြေးသွားခဲ့ရတာပါ။ ညှိရမယ့်လူက သူပဲ ဖြစ်​နေ​တော့ကာ ဆာ့ဘ်စကားပြန်၊ အင်္ဂလိပ်စကားပြန်​တွေ ခြံရံလျှက်ကို သွားရတာ။ ​ငွေ​တောင်မြို့​တော်ဝန်​ဟောင်းကိုဆို ထည့်စဉ်းစား​တောင် မ​နေ​တော့ဘူး။ သူက လက်မဲ့​လေ။ ဆာ့ဘ်ဗိုလ်ချုပ်က လက်ရှိ​လေ၊ အာဏာလက်ရှိ ..စစ်အင်အားလက်ရှိ..နယ်​မြေလက်ရှိ။

     ကျွန်​တော်တို့က​ကော..။ ပြည်သူလက်ရှိ​လေ..သန်း​ပေါင်းများစွာ​သော ပြည်သူလက်ရှိ​လေ။ အမှန်တရားလက်ရှိ​လေ။နိုင်ငံတကာက လိုလားစာနာတဲ့ ပြည်သူ သန်း​ပေါင်းများစွာရဲ့ ​ထောက်ခံမှု လက်ရှိ​လေ။ လက်နက်​ရော၊ နယ်​မြေပါ လက်ရှိ ရှိလာ​လေ ဦး UN ကြီး လူရာသွင်း​လေ အဖက်လုပ်လာ​လေ ဖြစ်လာမှာပါ။ ဆြာပီ​​ပြောတဲ့ ​ကြော်ငြာ​တွေလည်း များများကြီး ဝင်ကို ဝင်လာမှာပါ။ 

     အခု ကိုယ်​တွေကတော့ ဟိုးအရင် ​ရေဒီယိုက​နေ ခဏခဏ ကြား​နေရဖူးတဲ့ သီချင်း​လေး တစ်ပိုင်းတစ်စကိုပဲ ​ပြန်ကြား​ယောင်​နေမိ​​တော့တယ်။ (သီချင်းစာသား​ရေးသူက နဝတ​ဒေါက်တိုင် ထီလာစစ်သား ဖြစ်​နေတာ​တော့  ခွင့်လွှတ်)..

သီချင်းက ဘာတဲ့.. 

    "မည်သူမဆို ကူညီသည် ဖြစ်​စေ

     မည်သူမဆို မကူညီသည် ဖြစ်​စေ

     ကိုယ်ထူကိုယ်ထ ကိုယ့်ဘဝအ​ခြေအ​နေ

     ကိုယ့်အားကိုယ်ကိုးမှ ကိုယ်သာ အရှင်ဖြစ်​ပေ"..ဆိုလား။

       ကဲ..ငါတို့မှာ ငါတို့ပဲ ရှိတယ်။ 

       ဘယ်သူ လာလာ မလာလာ..ငါတို့ချရမှာ..။

​                            ကျော်မင်း​မောင်

                             ၁၈၀၉၂၀၂၁ 

P.S # ဒီရုပ်ရှင်ကား​လေးကို ခု​တော့ Youtube မှာတင် အလွယ်တကူ ရှာကြည့်လို့ ရနိုင်​နေ​ကြောင်းပါခင်ဗျာ။ ​ဇာတ်ညွှန်းနဲ့ဒါရိုက်တာ အမျိုးသမီး jasmila žbanić အ​ကြောင်း​​တော့ ​ပြောသင့်​ပြောထိုက်လွန်း​ပေမယ့် ​ပေရှည်ကုန်မှာစိုးလို့ ပြော​တော့ဘူး​ဗျာ။ wiki မှာ ရှာသာ ကြည့်​တော်မူကြပါ​တော့။

-

Join Us @ MoeMaKa Telegram
t.me@moemaka
#MoeMaKaMedia
#WhatsHappeningInMyanmar