နေချိုသွေး - ပြည်သူ့နှလုံး မသိမ်းကျုံးသော် ပြည်သူ့ခွန်အား မကိုးစားသော်
ပြည်သူ့နှလုံး မသိမ်းကျုံးသော် ပြည်သူ့ခွန်အား မကိုးစားသော်
နေချိုသွေး
(မိုးမခ) မေ ၁၁၊ ၂၀၂၃
လူညီတော့ ‘ဤ’ ကို ‘ကျွဲ’ ဆိုပြီး ဖတ်မှတ်နေတဲ့ အဖြစ်။ အမှားများတော့ အမှန်ထင်ကုန်ကြပြီ။ ကိစ္စတော်တော်များများမှာ သူများပါးစပ်နဲ့ လမ်းမဆုံးစေချင်ပါ။ မသေချာ မရေရာတဲ့ကိစ္စဆိုရင် ကိုယ်တိုင် ကိုယ်ကျ ခိုင်လုံတဲ့အထောက်အထားကို ရှာဖွေပြီး အမှန်ကိုတာ အတည်ပြုချက်ယူဖို့ လိုအပ်ပါတယ်။
အခုတလော နိုင်ငံရေး အရွေး စစ်ရေးအခြေအနေတွေနဲ့ ပတ်သက်ပြီး တော်လှန်ရေးမှာ စိတ်အားတက်စေဖို့ ဆိုလိုရင်းကို ထင်သာမြင်သာရှိစေတဲ့ ကဗျာပိုဒ်ကို ယူပြီး ရေးသူအမည်တပ်လို့ လူမှုကွန်ရက် facebook အပါအဝင် အင်တာနက်စာမျက်နှာတွေမှာ ရေးသားလာသာကို အတွေ့ရများလာပါတယ်။
တော်လှန်ရေး နယ်ပယ်က လူသိများတဲ့ နာမည်ကြီး လူပုဂ္ဂိုလ်တွေအပါ အဝင် စာပေနယ်က လူတွေပါ ရေးတင်လာတာတွေ့ရတယ်။ တော်လှန်ရေးမှာ အားဖြစ်စေဖို့ ရေးတင်လာတာ ကောင်းတဲ့ လုပ်ရပ်၊ မကောင်းတာက အဲဒီကဗျာကို ရေးသူနေရာမှာ “လက်ဝဲသုန္ဒရ” ဆိုပြီး မှားရေးထားတာ။
မူရင်းရေးသူ အမည်လွဲပြီး ရေးသားဖော်ပြနေတဲ့ ကဗျာစာသားတွေကို
ဖတ်ရှုခံစားကြည့်ရအောင် ...။
“ လှံကိုသို့ထား ဓားကိုသို့ငင်
သို့ဝင် သို့ထွက် သို့တက် သို့ခွာ
စစ်ပညာကို ကြေစွာတတ်မြောက်ကျွမ်းကျင်လည်း
ပြည်သူ့နှလုံး မသိမ်းကျုံးသော်
ပြည်သူ့ခွန်အား မကိုးစားသော်
ဓားသွားကျိုးကြွေ လှံသွားခွေအံ့” တဲ့..။
အထက်ပါ ကဗျာလေးကို ရေးဖွဲ့သူမှာ စာရေးဆရာကြီး(ဦး)အောင်သင်း ဖြစ်ပါတယ်။ စစ်တက္ကသိုလ်မှာ မြန်မာစာဆရာအဖြစ် အမှုထမ်းစဉ်က
ရေးဖြစ်ခဲ့တဲ့ ကဗျာလို့ သိရတယ်။
လွတ်လပ်ရေးနေ့အတွက် စစ်တက္ကသိုလ် သဝဏ်လွှာထဲမှာ ထည့်ရေးတာမို့ ရေးဖွဲ့သူအမည်ပါမသွားတဲ့အကြောင်း နောက် အချိန်ကြာလာတဲ့အခါ အဲဒီကဗျာကို လက်ဝဲသုန္ဒရကပဲ ရေးသလိုလို သတင်းစာထဲမှာ ဆောင်းပါးရေးလာကြောင်း ဆရာကြီး(ဦး) အောင်သင်းကိုယ်တိုင် ပြန်ရေးထားတာကို "အရွယ်" စာအုပ်မှာ ဖတ်ကြည့်နိုင်ပါတယ်။ ကုန်းဘောင်ခေတ်က လက်ဝဲသုန္ဒရ ဘွဲ့ခံ အမတ်ကြီး ဦးမြတ်စံ ရေးသားခဲ့တဲ့ နန္ဒီသေနပျို့ကို ရှာဖတ်ကြည့်ပါ။အထက်က ကဗျာအရေးသားမျိုး သံတူကြောင်းကွဲ့စကားလုံးအရေးသားမျိုး ရေးသားထားခဲ့တာ မတွေ့ရှိစေရပါဘူး။ ရှေးစာဆို လက်ဝဲသုန္ဒရ ရေးသားထားခဲ့တဲ့ နန္ဒီသေနပျို့ မူရင်းကို ရှာဖွေစုဆောင်းတည်းဖြတ်ပြီး မောင်သုတ ဆိုသူက စာအုပ်အဖြစ်နဲ့ ပြန် လည်ထုတ်ဝေခဲ့ပါတယ်။ စာဖတ်သူတွေအနေနဲ့ ပိုပြီး သေချာသိလိုရင် အဲဒီစာအုပ်ကို ရှာဖတ်ကြည့်စေချင်တယ်။
လက်ဝဲသုန္ဒရ ရေးသားထားတာ မဟုတ်တဲ့အကြောင်း အဲ့ဒီအရေးအသား မပါရှိတဲ့အကြောင်း ရှင်းရှင်းလင်း လင်း သိရပါလိမ့်မယ်။
"ပြည်သူ" ဆိုတဲ့ကဗျာပါဝေါဟာရ အသုံးဟာ ကုန်းဘောင်ခေတ်ရဲ့ သက်ဦး ဆံပိုင် ပဒေသရာဇ်စနစ်နဲ့ ဖြစ်နိုင် မဖြစ်နိုင် စာဖတ်သူတို့ စဉ်းစားတွေး ခေါ်ကြည့်ပေါ့ဗျာ။
ဆရာကြီးဦးအောင်သင်းက “အရွယ်” ဆိုတဲ့စာအုပ်မှာ ဒီကဗျာနဲ့ပတ်သက်ပြီးရေးသားထားပါတယ်။ ဆရာကြီးအောင်သင်း ရေးထားတဲ့ အရွယ်ဆိုတဲ့စာအုပ်ကို ဇွန်ပွင့်စာအုပ်တိုက်က ထုတ်ထားပါတယ်။ သေခြာသိချင် ရှာဖတ်ကြည့်ဖို့ ပြောလိုက်ပရစေ။
ဆရာကြီးက အဲ့ဒီကဗျာစာသားကို ကျွန်တော်က ကဗျာကို ရှေးခေတ် 'အိုင်ချင်း' ဟန်ကလေးနှင့် ရေးထာတာပါလို့လည်း အဲ့ဒီစာအုပ်ထဲမှာ ဝန်ခံ ပြောထားပါတယ်။
ဆရာကြီးအောင်သင်းက “အရွယ်”ဆိုတဲ့ စာအုပ်ထဲမှာ “လွတ်လပ်ရေးနေ့သဝဏ်လွှာအတွက် ကဗျာတစ်ပုဒ်ရေးပါဆိုသောကြောင့် ရေးပေးလိုက်ရသေးသည်။ ကဗျာလေးကိုလည်း ကြွားလိုက်ပါရစေ၊ ကဗျာ ခေါင်းစဉ်ကိုတော့ဖြင့် . မေ့နေပြီ။
လှံကိုသို့ထား ဓားကိုသို့ငင်
သို့ဝင် သို့ထွက် သို့တက် သို့ခွာ
စစ်ပညာကို ကြေစွာတတ်မြောက်ကျွမ်းကျင်လည်း
ပြည်သူ့နှလုံး မသိမ်းကျုံးသော်
ပြည်သူ့ခွန်အား မကိုးစားသော်
ဓားသွားကျိုးကြွေ လှံသွားခွေအံ့။
စစ်တက္ကသိုလ်၏ လွတ်လပ်ရေးနေ့ သဝဏ်လွှာဆိုတော့ ရေးသူရဲ့ အမည်တော့ မပါပေဘူးပေါ့။ လွန်ခဲ့သော ဆယ်စုနှစ်ကျော်ကျော်လောက်က သတင်းစာဆောင်းပါး တချို့တွင် ထိုကဗျာကို ဖော်ပြပြီး ဗျူဟာစက္ကိပျို့မှာပဲပါသလိုလို၊ နန္ဒီသေနပျို့နဲ့ သေနင်္ဂဗျူဟာမှာပဲ လက်ဝဲသုန္ဒရက ရေးခဲ့သလိုလို ဟိုလိုလို ဒီလိုလိုနဲ့ညွှန်းထားတော့ ကျွန်တော့်မှာ တစ်ယောက်ထဲ ရယ်မိသေးသည်။” လို့ ဆရာကြီးက သူ့ကဗျာအရေးအသားဖြစ်ကြောင်း ဝန်ခံရေးသားထားပါတယ်။
ဒါကြောင့် အပြောများပြီး ရေသူနာမည်မှားနေတဲ့ လက်ဝဲသုန္ဒရ ရဲ့ နန္ဒီသေန ပျို့မူရင်းမှာ ဒီကဗျာစာသားတကယ်ပါ မပါ နန္ဒီသေနပျို့မူရင်းစာအုပ်ကိုလည်း ရှာဖတ်ကြည့်ပါ။ မောင်သုတ တည်းဖြတ်ထားတဲ့ လက်ဝဲသုန္ဒရအမတ်ကြီးရဲ့ နန္ဒီသေနပျို့ မူရင်းစာအုပ် ရှိပါတယ်။ ဖတ်မှတ်လေ့ လာကြည့်ပါ။
ကဗျာတစ်အုပ်လုံးသာ ကုန်သွားမယ် အထက်ပါကဗျာစာသား တလုံးတပါဒမျှ ရေးသားထားတာ မရှိဘူးဆိုတာ ပြောလိုက်ပရစေ။
ဒါကြောင့် ...
“ စစ်ပညာကို ကြေစွာတတ်မြောက်ကျွမ်းကျင်လည်း
ပြည်သူ့နှလုံး မသိမ်းကျုံးသော်
ပြည်သူ့ခွန်အား မကိုးစားသော်
ဓားသွားကျိုးကြွေ လှံသွားခွေအံ့” ဆိုတာ ဆရာကြီး ဦးအောင်သင်း
ရေးကြောင်း သေသေချာချာ ပြောလိုက်ပရစေ။
နောက်များမှာ အဲ့ဒီကဗျာကို ယူသုံးကြမယ်ဆိုလည်း ရေးသူကလောင်အမည် *အောင်သင်း*ကိုတော့ မှန်အောင်ရေးကြ တပ်ကြဖို့ တိုက်တွန်း ပြောကြားပရစေ။
နေချိုသွေး
-
Join Us @ MoeMaKa Telegramt.me@moemaka
#MoeMaKaMedia
#WhatsHappeningInMyanmar
Posts
