ကမ္ဘာတိုင်ဆုံး မောင်စစ်မုန်း - ခေတ်သစ်အသုံးလုံးသင်တန်း

(မိုးမခ) ဇန်နဝါရီ ၆ ၊ ၂၀၂၄

ဒီခေတ်မှာ စကားကို ရှည်ရှည်ဝေးဝေး မပြောကြတော့ဘူး။ စာရေးရင် ပိုဆိုး၊ အတိုကောက်ချည်း။ အက္ခရာသက်သက်တွေက များတယ်။ တခါတလေများ အသုံးလုံးသင်တန်းရောက်နေသလားမှတ်တယ်။ လူတွေက မအလရဲ့ အသုံးလုံးသင်ခေတ်ကို ကြိုမြင်ပုံဘဲ။

ဟောကြည့် ပြောရင်းဆိုရင်း မအလ လို့ပြောမိပြီ။ အဲဒါကို အရှည်ရေးစရာ မလိုဘူး။ သွားရေးရင် နာပြီ။ ဒါဟာ ဘောမမှုအပြင် အက္ခရာတလုံး အသုံးအနန္တကိုပါ မထီမဲ့မြင်ပြုရာကျတယ်။ နာမ်တလုံးရဲ့ ဖော်စွမ်းနိုင်တဲ့ အဓိပ္ပာယ်တွေကိုလည်း ဖိနှိပ်ရာကျတယ်။ ဆိုပါစို့၊ မအလ ကို မင်းအောင်လှိုင်လို့ ဖော်ရေးလိုက်ရင် ဘာဖြစ်သွားပြီလဲ၊ သူ့ရဲ့ ဖြန့်ထွက်အနက်၊ နံ့သက်အနက်၊ ကန့်ကွက်အနက်တွေကို ချိုးဖျက်လိုက်သလို ဖြစ်သွားပြီလေ။ အာ့ကြောင့် မအလဟာ မအလပဲ ဖြစ်ရမယ်။ မဟုတ်ရင် အဆင်မပြေဘူး။ ခေတ်နဲ့လည်း မဝင်ဘူး။ စနစ်နဲ့လည်း မဆင်ဘူး။ အဲ... မအလ လုပ်လို့ ဘေဖိုးက မိုးထိသွားပြီလေ။ ငွေကသာ မြေကြီးထဲက နှိုက်မရတာ။ ဒါထဲက ဝိုင်းဝိုင်းလည်ပါတယ်ဆို ဒုံးပျံတို့ ဘာတို့ကလဲ ခံရသေး။ အာ့ကြောင့်ပြောတာ မအလဟာ မအလပဲလို့။

ကလ စို့အောက်၊ လက စို့အောက်။ အာ့ကျ ကျလောက်ဆို ရပြီ။ ဒါ မအလက ကောလင်းနဲ့ လောက်ကိုင်ကို ဝေသန္တရာမှုပြုလိုက်ပြီဆိုတာ သိပြီ။ နောက်ပိုင်း သူ့နံတူဖြစ်တဲ့ ကလေးနဲ့ လွိုင်ကော် လာတော့မယ်လေ။ လောက်ကိုင်နဲ့ ဒကစချင်း ကက်ကင်းကလဲ မိသေးမဟုတ်လား။ လစီရီးအနေနဲ့ပြောရရင်တော့ လားရှိုးပေါ့။ ခုဟာက ခလရလောက်က Like မရတော့။ ခုတောင် ဒကစမို့ စောက်ဖက်လုပ်ပြောနေဖြစ်တာ။ တကယ်က စစ်တိုင်းဌာနချုပ်လောက်မှ အမြောက်နဲ့မဖွတ်ရင် မပွတ်ချင်ကြတော့ဘူးရယ်။ လားရှိုး ကျမစိုးလို့ လေရှီးကို ထိုးအပ် ယတြာချေမယ်လည်း ကြားတယ်။ အဲဒီဘက်က တပ်မိသားစုတွေ စောစောပြုံးရတာပေါ့လေ။

ကကလ ကိုတွေ့ရင်တော့ ကကလှမ်းလို့ ထင်မနေနဲ့အုံး။ စူထောလေး ကြူခေါကို ပျော့ထာရယ်။ ဒါပေမယ့် သူ့မျက်လုံးမျက်ဆံ ပြူးပျံပျံမှာ နှုတ်ခမ်း ဘီလူး တလံလေး ထွက်နေပုံနဲ့တူတဲ့ ဘိုစာအသုံးလုံး QQလှ နဲ့ပဲ ရေးထုံးဖြစ်ကြတယ်။ ခေတ်သစ် အ သုံးလုံးက ဗမာသက်သက် မရဘူးလေ။ abc လေးနဲ့မှ။ သနက ၁၂၆ ဆိုရင် သေနတ်ကိုင်တပ်ရင်း ၁၂၆ ထင်မနေနဲ့အုံး။ သေနာကောင် ၁၂၆ လို့ပြောတာ။ အသုံးလုံး ဖတ်သက်တော့ နဲနဲလိုတာပေါ့။ စခ ရခ ပခဆိုတာတွေကတော့ ထွေပြားစရာမရှိဘူးပေါ့။ မဘသတို့ ဘာတို့လဲ အာ့လိုဘဲ။ ဒါပေမဲ့ သူ့ကွယ်ဝှက်အနက်တော့ သိပ်သတိမထားမိကြဘူး။ တကယ်က အမျိုး ဘာသာ သာသနာ မဟုတ်ဘူး။ အမျိုး ဘာသာ သေနာ။ သေနာဆိုတာ ပါဠိစကား၊ စစ်တပ်လို့ ခေါ်တာ။ ခုတော့ မြန်မာစကားရဲ့ အဓိပ္ပာယ်နဲ့ပဲ စစ်တပ်ကို သေနာလို့ သတ်မှတ်လိုက်ကြပြီ။

Join Us @ MoeMaKa Telegram
t.me@moemaka
#MoeMaKaMedia
#WhatsHappeningInMyanmar