ဆယ်ပေါင်တူ - ထပ်တူကာကျနိုင်လှပါတဲ့ ဆယ်ပေါင်တူတို့ ရပ်ရွာ

(မိုးမခ) ဖေဖော်ဝါရီ ၁၁ ၊ ၂၀၂၃

အပိုဒ် ( ၁ )

ဆယ်ပေါင်တူတို့၏ မြို့လေးအကြောင်းဖြင့်သာ စရပါလိမ့်မည်။ မြို့ဟု ခေါ်ဝေါ်ကြသော်လည်း ဘေးပတ်ဝန်းကျင် မြို့ကြီးများလို မြို့ပြအင်္ဂါရပ် အစုံအလင်မရှိ။ တကယ်က မြို့မကျတောမကျ ရွာကြီးသာသာဟုသာ ဆိုရပါမည်။ ဟိုတယ်၊ ကလပ်၊ ဘား ဆိုတာများ မရှိ၊ ညနေညခင်း သွားရောက်နားနေ စားသောက်လိုပါက ခေါက်ဆွဲကြော် တဆိုင်သာရှိသော အရပ်ဒေသတခု ဖြစ်သည်။

အခုတော့ အခြားခေါက်ဆွဲကြော် ဆိုင်သစ်တဆိုင် ထပ်ပေါ်လာသော်လည်း သွားစားမည့်သူက မရှိသလောက်။ ဆယ်ပေါင်တူတို့ ရပ်ရွာတခုလုံး အားပေးကြသည့် ခေါက်ဆွဲကြော်ဆိုင်နှင့် ပတ်သက်သည့် နောက်ခံဇာတ်ကြောင်းများကို အရင်ပြောပြထားမှသာ ပို၍ရှင်းလိမ့်မည် ထင်သည်။

ထိုဆိုင်တွင် ခေါက်ဆွဲကြော်ဆိုင်များ၏ ထုံးစံအတိုင်း အခြားအကြော်အလှော်များပါ ရောင်းချပြီး ဒေသခံများအတွက် အဆင်ပြေမည့် ဈေးနှုန်းများနှင့် ရောင်းချပေးသလို အရသာလည်း ကောင်းမွန်သည်ဟု ပြောနိုင်သည်။ ရွာသူရွာသားများ၏ အသည်းစွဲ ဆိုင်ကလေးဖြစ်လာရသည့် အဓိကအကြောင်းကတော့ မြို့မှာဆိုလျှင် စားဖိုမှူးဟု ခေါ်ကြမည့် အကြော်ဆရာကြောင့်ဟု ဆိုရပေမည်။ တကယ်ကတော့ အကြော်ဆရာဟု ခေါ်ရမှာလည်း အတော်လေး ခွကျပါသည်၊ အကြောင်းမှာ ကြော်လှော်သည့်သူက အဒေါ်ကြီးတယောက် ဖြစ်၍ပင်။

မှန်တာပြောရလျှင် ဆယ်ပေါင်တူတို့ ရပ်သူရပ်သားများ ကျေနပ်နှစ်ခြိုက်စွာ အားပေးနေမိသည်က အဒေါ် ကြီး၏ လက်ရာသက်သက်ကြောင့်တော့ မဟုတ်၊ လက်ရာကောင်းသလို လာရောက်စားသောက်ကြသူများ အားလုံးအပေါ် ကျောသားရင်သား မခွဲခြားပဲ မေတ္တာစေတနာ အပြည့်ဖြင့် မိသားစုသဖွယ် ဆက်ဆံတတ်သောကြောင့်ပင် ဖြစ်သည်။ တဦးမေတ္တာ တဦးမှာ ဆိုသလို တရွာလုံးကလည်း ‘အမေ’ ‘အမေ’ဟုသာ လေးစားချစ်ခင်စွာဖြင့် ခေါ် ဝေါ်ကြပြီး အဒေါ်ကြီး၏ နာမည်ရင်းကိုတောင် ခေါ်ဝေါ်အသုံးပြုဖို့ မေ့တေ့တေ့ ဖြစ်လာကြသည်အထိ တရွာလုံးနှင့် မေတ္တာရောင်ပြန်ဟပ်ခဲ့ကြသည်။

အခုတော့ ဒီဆိုင်လေးမှာ ‘အမေ’ မရှိတော့။ ဖြစ်ပုံမှာ ဆိုင်တွင် တောက်တိုမည်ရ ဆိုင်စောင့် အလုပ်ပေးထားသူက အကြော်ဆရာ ဖြစ်ချင်သည်ဆိုကာ ပြဿနာရှာ ခြိမ်းခြောက်ရာကစပြီး ခိုးဆိုးလုနှိုက် ဗီဇရှိသူပီပီ ဖျက်ဆီးသောင်းကျန်းကာ ‘အမေ’မရှိတော့အောင် ဉာဏ်နီဉာဏ်နက် ဆင်ခဲ့ခြင်းကြောင့်ပင်။ တရွာလုံးက မေတ္တာပျက်ကြလေသောကြောင့် သူ အသစ်ဖွင့်သောဆိုင်ကိုလည်း မည်သူကမျှ သွားရောက်၍ မစားသောက်ကြ။

မိတ်ဆွေအပေါင်းအသင်းများနှင့် ဆုံတွေ့ရန်ရှိသောကြောင့် ခေါက်ဆွဲကြော်ဆိုင်လေးသို့ ဆယ်ပေါင်တူ ‌ရောက်လာခဲ့သည်။ ဆိုင်လေးက အရင်လိုမဟုတ်သော်လည်း လုံးဝတော့ပျက်စီးမသွား၊ အမေ မရှိတော့သည့်နောက် အကြော်ဆရာ မဟုတ်ပေသည့် အမေနှင့် ယခင်က ဆိုင်ကလေးတွင် အတူလုပ်ကိုင်ခဲ့ကြသူများက ပြန်လည်ဦးစီး၍ ဖွင့်လှစ်ထားကြသည်။ လူဟောင်းများ တွေ့ရသလို မျက်နှာသစ်များလည်း ပါသည်မို့ ဆယ်ပေါင်တူ သူငယ်ချင်းများကို စပ်စုရင်း ထိုင်ခုံမှာ ဝင်ထိုင်လိုက်သည်။

‘အခု အကြော်ဆရာလက်ရာက ဘယ်လိုနေလဲ’

‘မှန်တာပြောရရင် အမေ့လက်ရာလောက်တော့ သိပ်သဘောမကျကြဘူးပေါ့ကွာ၊ ဒါပေမဲ့ အတတ်နိုင်ဆုံး အကောင်းဆုံးဖြစ်အောင် စေတနာထား ကြိုးစားကြော်လှော်ပေးတော့ ရပ်ရွာက အားပေးကြပါတယ်၊ လက်ရာကလည်း တနေ့ထက်တနေ့ ပိုတက်လာတယ်ကွ’

နောက်သူငယ်ချင်း တယောက်က ဝင်ပြောသည်။

‘ဘယ်နေရာမှာမဆို လူသစ် ဆိုင်သစ်တွေက အနည်းနဲ့အများ အရစ်ခံကြရတာပဲ မဟုတ်လား ‘ဦးဂျီ’လည်း ဘယ် လွတ်လေပါ့မလဲ’

‘အကြော်ဆရာနာမည်က ထူးဆန်းပါလား ‘ဦးဂျီ’ဆိုတော့’

‘မင်းသိတဲ့အတိုင်း တို့အရပ်မှာက အသက်ကြီးတဲ့ အမျိုးသားတွေဆိုရင် ‘ဦးကြီး’၊အသံထွက်တော့ ‘ဦးဂျီး’ဆိုပြီး ခေါ် ကြတာပေါ့ကွာ၊ အဲဒီတော့ ဆိုင်ထဲမှာက ‘ဦးဂျီး’လို့ လှမ်းခေါ်လိုက်ရင် ရှိနေတဲ့ ဦးကြီးအရွယ်တွေက သူ့ ခေါ်သလို ငါ့ ခေါ်သလို ဖြစ်ကုန်ကြလို့ အကြော်ဆရာဦးကြီးကို ‘ဦးဂျီ’လို့ ကွဲသွားအောင် စနောက် ပြောင်းခေါ်ကြရင်းနဲ့ ဒီနာမည်တွင်သွားတာ’

သူငယ်ချင်းက ရှင်းပြရင်းနဲ့ ‘စောင့်ကြည့်နေ ‘ဦးဂျီ အရစ်ခံရတော့မယ်’ ဟု ခပ်လှမ်းလှမ်းက ဝိုင်းကို မေးငေါ့ပြရင်း အရိပ်အမြွက် ပြောလာသည်။ သိပ်မကြာလိုက်။

‘ခေါက်ဆွဲကြော်က တခြားအဆာပလာတွေ နည်းနေပြီး မုန်လာဥနီပေါပေါများများပဲ ထည့်သုံးထားတယ်’

ညကြီးကြောင်တောင် မျက်မှန်မည်းကြီးတပ်ထားသည့် မျက်စိနာနေဟန်ရှိသူတဦးက ထရစ်လိုက်သည်။ ဒါနှင့်တင် ရပ်မသွား။ သူကဆက်ပြီး

‘ဆိုင်မှာ စားပွဲတွေ စီစဉ်ထားပုံကလည်း အထာမကျဘူး၊ ရွာလယ်ကလူတွေအတွက် သတ်သတ်မှတ်မှတ် စားပွဲ ပါတဲ့ ဆိုင်ရဲ့စားပွဲနေရာ ကားချပ်ပုံ အမြန်ရေးဆွဲပေးရမယ်၊ ဆိုင်နံရံကို နီပိန်းနေအောင် ဆေးသုတ်ထားတာကိုလည်း အရောင်ပြောင်းသုတ်ပေးပါ၊ အဲဒီအရောင်ကို ကျနော် အလားဂျစ် ဖြစ်လို့ပါ’

နိုင်ငံရေးသမားလား၊ စစ်ရေးကျွမ်းကျင်သူလား၊ ဘာသာရေးသမားလား၊ အဲန်ဂျီအိုသမားလား၊ စီးပွားရေးသမားလား လူအများက အလွယ်တကူ မခွဲခြားနိုင်ဘဲ မျက်စိလည်သွားရလေအောင် တမင်တကာ ပိပိရိရိ ကျွမ်းကျင်စွာ သရုပ်ဆောင်ထားပုံရသည့်သူက ဆိုင်အတွင်းရှိလူများကို မျက်မှန်မည်းထဲက အသာအကဲခတ်ကြည့်ရင်း

‘ကျနော်တို့ ပရက်ရှာပေးကြရမယ်၊ ဝိုင်းတွန်းကြရအောင်’ ဟုထပ်ပြောလိုက်သည်။

ဆိုင်ထဲကလူတွေကတော့ နေရာသစ်မှာပဲ ထိုင်ထိုင် နေရာဟောင်းမှာပဲ နေရနေရ မည်သို့မျှ ပြဿနာရှိလေဟန်မတူ အရသာရှိရှိ မြန်မြန်ဆန်ဆန် စားသောက်ပြီး အိမ်ပြန်ကြရဖို့ပဲ စိတ်ကူးရှိကြသည့်ပုံ။

သို့သော် အနှီပုဂ္ဂိုလ်နှင့် တဝိုင်းတည်း ထိုင်နေကြသူများကတော့ အရေးတယူပြုကြသည်။ အမှန်က လိုအပ်တာ ထက်ပင် အရေးတယူပြုကြသည်ဟုပင် ပြောနိုင်သည်။ အကြောင်းမှာ ထိုသူ ပြောဆိုသမျှကို တလုံးမကျန် လွတ်မသွားအောင် နားစိုက်ထောင်နေကြရင်း ‘ဝိုင်းတွန်းကြရအောင်’ဟု ဆိုလိုက်သည်နှင့် ယောင်ယမ်းပြီး သူတို့ ထိုင်နေသည့်စားပွဲကို ပြိုင်တူတွန်းလိုက်မိကြသည့်အတွက် စားပွဲပေါ်တွင် တင်ထားသည့် ရေနွေးအိုး၊ ပဲငံပြာရည်၊ ရှာလကာရည်၊ ငရုတ်သီးဆော့စ်ခွက်များ အကုန်မှောက်ကြကာ ကိုမျက်မှန်၏ အဝတ်အစားများကို ပေကျံကုန် ပါလေ တော့သည်။

အနံ့အသက်ပြင်းသည်များ ဖြစ်သော်လည်း သူက ကျန်အရာများကို ပြဿနာမရှာ၊ ငရုပ်သီးဆော့စ်ကိုတော့ ခွင့်လွှတ်နိုင်ပုံမရ၊ ’ဦးဂျီ’ကို လက်ညှိုးငေါက်ငေါက်ထိုးပြီး ‘ဆိုင်မှာ ဘာ့ကြောင့် ဒီလောက် ရဲရဲတောက်နီသည့် ငရုတ်သီးဆော့စ်တွေကို အသုံးပြုရတာလဲ’ ဟု ဒေါနှင့်မောနှင့် ပြောသည်။ ဒီအထိတော့ ဆယ်ပေါင်တူ အပြစ်လို့ မမြင်၊ သူ့ခမျာ အဝတ်အစားတွေ စွန်းထင်းသွားသည့်အတွက် ပြောခြင်းဖြစ်သည်ဟု နားလည်ပေးလို့ရသည်။

သို့သော် ‘ဒါ ဗမာလူမျိုးကြီးဝါဒကို ကျင့်သုံးတာပဲ’ဟု စိတ်ဆိုးမာန်ဆိုး ဆက်ပြောလိုက်သည်ကိုတော့ ဆယ်ပေါင်တူ လုံးဝ နားမလည်၊ မေးမြန်းကြည့်ရအောင်ကလည်း ကိုယ်ထူတာ တုံးတာ ပေါ်သွားမည်စိုး၍ စားပွဲပေါ်လာချသည့် ခေါက်ဆွဲကြော်ကိုပဲ အသာဆွဲယူစားကာ ပိုက်ဆံရှင်းပြီး အိမ်သို့ ပြန်လာခဲ့လိုက်သည်။

အပိုဒ် ( ၂ )

ထုံးစံအတိုင်း ဧည့်သည်စောင်သည် ရောက်လာသည့်အခါ တခြားခေါ်သွားစရာ မရှိလေတော့ ဤခေါက်ဆွဲဆိုင်သို့ ဒီနေ့လည်း ထပ်ရောက်ခဲ့သည်။ ဆယ်ပေါင်တူ၏ဧည့်သည်က တခြားသူတော့မဟုတ်၊ ဆယ်ပေါင်တူနှင့် ရေးဖော်ရေးဖက်တဦး ဖြစ်သလို နွေဦးတော်လှန်ရေးကြီးတွင်လည်း ထဲထဲဝင်ဝင် တက်တက်ကြွကြွ ပါဝင်လှုပ်ရှားနေသူ တဦး ဖြစ်သည်။

သိကြသည့်အတိုင်း စာ ကဗျာ ရေးသားသူတို့သည် စိတ်ခံစားမှု ထိလွယ်ရှလွယ် ပိုဖြစ်တတ်ကြသည်။ အချိန် အတိုင်းအတာတခု ကြာလာတော့ စိတ်ပင်ပန်းမှု စိတ်ဖိစီးမှုတွေ များပြားလာသည့်အတွက် ထိုအရာများမှ ကင်းဝေးပြီး ခေတ္တခဏ အေးအေးလူလူ စိတ်အနားယူလို့ ရစေရန် ပတ်ဝန်းကျင်သစ်တခုဟု ဆိုနိုင်သည့် ဆယ်ပေါင် တူတို့ မြို့ရွာလေးသို့ အလည်ရောက်လာခြင်းဖြစ်သည်။

ဆိုင်ထဲဝင်ထိုင်ကြပြီးသည့်နောက် အရင် အကြော်ဆရာ ‘အမေ’က စလို့ လက်ရှိ’ ဦးဂျီ’ အထိ ဤဆိုင်လေး၏ ဖြစ်ကြောင်းကုန်စင်ကို သူ့အားပြောပြလိုက်သည့်အခါ ‘တူလိုက်တာကွာ’ဟု လေသံတိုးတိုးဖြင့် ပြန်တုံ့ပြန်သည်။ ဘာကိုဆိုလိုမှန်း ကောင်းစွာမသိသော်လည်း နားနားနေနေ နေလိုသူတယောက်ကို မေးခွန်းများ သိပ်မထုတ်ချင်၍ အသာငြိမ်နေလိုက်သည်။

အခြား သွားစရာမရှိသောကြောင့်သာ လာခဲ့ရသည်၊ တကယ်တော့ နားအေးပါးအေး ရှိသောနေရာမဟုတ်။ တခြား စားပွဲဝိုင်းများက အော်ဟစ်ပြောကြားနေသည်များ၊ ဖုန်းလိုင်းမကောင်း၍ မိုဘိုင်းဖုန်းကို ခေါ်လိုက် အော်လိုက် လုပ်နေကြသည်ကလည်း အတိုင်းသား ကြားနေရသည်။

ဤညမှာလည်း ထုံးစံအတိုင်း မျက်မှန်ကိုယ်တော်က ‘ဦးဂျီ’ကို ရစ်နေတာ တွေ့ရသည်။ အရင်ညကနှင့် မတူသည် ကတော့ ‘ဝိုင်းပြီးဖိအားပေးရအောင်’ ပြောအပြီးမှာ စားပွဲကို လက်နှစ်ဖက်ဖြင့် ထိန်းလိုက်ပြီးမှ ‘ကျနော်တို့ ဝိုင်းတွန်းကြရအောင်’ဟု ဆက်ပြောသည်။ မနေ့က အတွေ့အကြုံကို ယူလိုက်ဟန်ရှိပြီး သူ့လူများကလည်း သဘောပေါက်သွားသည့်အတွက် ငရုတ်သီးဆော့စ် ထပ်မစွန်းတော့။ သို့သော်လည်း ထပ်ခါတလဲလဲ ပြောတတ်သည်က သူ့အကျင့်ပေပဲလား မသိ၊ ခေါက်ဆွဲကြော်ထဲမှာ မုန်လာဥနီ ပေါကြောင်း၊ ဤဆိုင်က ငရုတ်သီးဆောစ့်သည် ရဲရဲ တောက် နီလွန်းကြောင်း တို့ကို ယခင်ညတွေကဲ့သို့ ဆက်ပြောပြန်သည်။

ဒီညမှာ သူ အသစ်ထပ်ဖြည့်ပြောသည်က ရွာလယ်ကလူတွေအတွက် ‘ဦးဂျီ’က နေရာ သတ်သတ်မှတ်မှတ် မလုပ်ပေးနိုင်ခြင်းမှာ ‘ဆီဆန်ပီနန်အိတ်’ကို မကျော်လွန်နိုင်သောကြောင့်ဟု ဆိုခြင်းပင်၊ အကြားမှားသွားခြင်း ပေလားတော့မသိ။ ဆယ်ပေါင်တူ၏အမြင်မှာ ဘာ’ဆီဆန်ပီနန်အိတ်’မှ ဆိုင်ထဲမှာ ကျော်ခွသွားလာ နေရလောက် အောင် စုပုံထားသည် မရှိ။

ညစဉ်ညတိုင်း ဤသို့ အပြစ်မြင်လိုက်၊ ရစ်ချင်လိုက် လုပ်တတ်ပေသည့် ခိုးဆိုးလုနှိုက် လူရမ်းကား အရင်ဆိုင်စောင့်ဟောင်း ဖွင့်ထားသည့် ဆိုင်သစ်ကို မသွားဘဲ ’ဦးဂျီ’ဆိုင်မှာ လာထိုင်သည်ကိုပဲ ဆယ်ပေါင်တူ၏ အပေါင်းအဖော်တချို့က ကြံဖန်ချီးကျူးကြသည်။ စင်တင်ဟာသလူရွှင်တော် ဆိုသည့် ဓလေ့မထွန်းကားသော ဒေသဆိုတော့လည်း အပျင်းပြေစရာတခုဟု မြင်ကြသည်။ ကြားရသမျှကိုတော့ ပေါ့ပေါ့ပါးပါး ပြီးပြီးပျောက်ပျောက်။

ဤဖြစ်ပျက်နေသည်တို့ကို မြင်ရ ကြားရသောအခါတွင်မူ ဆယ်ပေါင်တူ၏ ဧည့်သည်မှာ ပါးစပ်အဟောင်းသား နှင့် ’တူကို တူနေပြန်ပါပြီ’ဟုဆိုကာ မူးမှ အေးတော့မည်ဟု စိတ်ကူးမိသည်လားမသိ တခွက်ပြီးတခွက် သောက်ပါလေတော့သည်။

ဟောင်ဖွာ ဟောင်ဖွာလေသံဖြင့် နောက်တစခန်းထ သူကလည်း ရှိသေးသည်။ ခေါက်ဆွဲကြော်ဆိုင်ဟု ခေါ်၍မရကြောင်း၊ ခေါက်ဆွဲကြော်သည့် အဖွဲ့အစည်းဟုသာ သတ်မှတ်ရမည် ဖြစ်ကြောင်း၊ ဘယ်သူတွေ စားကောင်းကောင်း သူကတော့ စားမကောင်းဟုသာ ထင်၍ တတိယခေါက်ဆွဲကြော်ဆိုင် ထူထောင်သင့်ကြောင်း ပြောသောသူ ဖြစ်သည်။ ‘ဦးဂျီ’အကြောင်း အတင်းတုပ်ထားသည် မှန်သမျှကို တကူးတက ရှာဖွေစုဆောင်းပေးပြီး တထိုင်တည်း နားဆင်နိုင်အောင် အားထုတ်ပြောကြားပေးတတ်သူလည်း ဖြစ်သည်။ ပြောစရာအတင်းများ ကုန်သွားလျင် ‘ဦးဂျီ’ကို သပိတ်မှောက်ကြမယ်၊ လိုက်ခဲ့ကြ’ဟု စည်းရုံးတတ်ပြီး သူ့နောက်က မည်သူမှ ထမလိုက်သောကြောင့် သူ တယောက်တည်း ကုပ်ချောင်းကုပ်ချောင်းနှင့် ပြန်ထွက်သွားရလေ့ရှိသောသူ ဖြစ်သည်။

ဆိုင်တွင်း မျက်စိအောက် ဖြစ်ပျက်နေသည်များကို ကြည့်ရင်း ဆယ်ပေါင်တူ၏ ဧည့်သည်ဆီမှလည်း ‘အော်….တူလိုက်တာ၊ တကယ်ပဲ တူကိုတူနေတော့တာ’ဆိုသည့် ရေရွတ်သံများ ထပ်ခါတလဲ ကြားရပြီး တခွက်ပြီး တခွက် အ မူး ငှဲ့သောက်နေတာကို မြင်ရသည်။

‘ဦးဂျီ’တို့ဆိုင်က အတော်လေးတော့ ရောင်းရသည်။ ယခုဆိုလျှင် ဆိုင်ပိုင် စက်ဘီးအတော်များများဝယ်ပြီး ဒလီဗရီတောင် လိုက်ပို့ပေးသည်ဟု သိရသည်။ ထိုနေရာတွင်လည်း ပြဿနာကင်းလှသည်တော့ မဟုတ်၊ ရွာအထက်ပိုင်းက ဒလီဗရီအဖွဲ့က ‘ဦးဂျီ’ဆီက စက်ဘီးတွေ ရထားသော်လည်း ‘ဦးဂျီ’တို့ မှာကြားသလို အတိအကျ လိုက်လုပ်၊ မလုပ် ဆိုသည့် အငြင်းပွားစရာ ကိစ္စများရှိနေသည်ဟု ဆိုသည်။ ထိုအဖွဲ့ဆီက ‘ခင်ဗျားတို့ကျတော့ ခေါက်ဆွဲကြော်ဖိုးတွေ တနင့်တပိုးရတယ်’ ဆိုသည့် ရိသဲ့သဲ့ စကားမျိုးပင် ထွက်လာသည်ဟုလည်း ပြန်ကြားရသည်။

ဤကာလမှာကလည်း ဘယ်လိုက ဘယ်ပုံ ရိသဲ့သဲ့ အထေ့အငေါ့သမားတွေ ရုတ်ခြည်းပေါများလာကြသည် မသိ။ ထိုသို့ဖြစ်လာခြင်းက ဆယ်ပေါင်တူတို့လို အထေ့အငေါ့ အရိအသဲ့ သရော်စာရေးနေသူများကို အကျပ်ရိုက်စေသည်။ ရေးသားစရာ ကုန်ကြမ်းတွေတောင် ပါးရှားလာပြီဟုပင် ခံစားမိသည်။

‘ဦးဂျီ’ဆိုင်တွင်းက ဒလီဗရီ အဖွဲ့တွေကတော့ ‘ဦးဂျီ’၏စကားကို အမိန့်သဖွယ် တသဝေမသိမ်း နားထောင်ကြသည် ဖြစ်၍ အဆင်ချောသည်ဟု ရွာခံမိတ်ဆွေက ဆက်ပြီးဖောက်သည်ချသည်။ ဤသည်များကို ကြားရပြန်လေတော့ ဆယ်ပေါင်တူ၏ ဧည့်သည်ခမျာ ‘တကယ့်ကို တူကိုတူနိုင်လွန်းလှပါတယ်ကွာ တူနိုင်လွန်းလှပါတယ်’ ဟု အကြိမ်ကြိမ်ဆိုကာ တခွက်တဖလား မော့ချလိုက်ပြန်သည်။

‘အဲသလို အဖုအထစ်လေးတွေ အကြောင်းကြားတော့ ‘ရှားလော့ဘုန်း’က သူ အသေအချာထပ်စုံစမ်းပြီး ရှင်းလင်းပွဲလုပ်ပေးမယ် ဆိုလို့ မနည်းတားထားရတယ်’ဟု မိတ်ဆွေက ဆိုသည်။

‘ရှားလော့ဘုန်း ဆိုတာက ဘယ်သူတုန်း၊ ဘာ့ကြောင့်တားရတာလဲ’

‘ရွာဦးကျောင်းက ကိုယ်တော်ကိုပြောတာ သူကအဲဒီလိုဟာမျိုးတွေမှာ စုံထောက်ဝင်လုပ်ပြီး သိပ်ပါချင်တာ၊ တားရတာကတော့ သူ ပါရင် ပြဿနာကမရှင်းဘဲ ပိုရှုပ်သွားတတ်လို့’

ဤအဖြေကို ကြားရသည့်အခါမှာလည်း ဆယ်ပေါင်တူ၏ ဧည့်သည်က စားပွဲကို သူ့လက်သီးနှင့် အခါခါထုပြီး၊ ရင်ခေါင်းသံကြီးဖြင့် ‘အောင်မလေးဗျာ တူကိုတူနေတာပါဗျ၊ တကယ့်ကို တူနေပြန်ပြီ၊တူကိုတူနေပြန်ပါပြီ’ ဆိုပြီး မချင့်မရဲ အော်ဟစ်ရေရွတ်လိုက်၊ ခွက်ကိုမော့လိုက် ပြန်ဖြည့်လိုက် လုပ်နေပါတော့သည်။

ဤသို့ ’ဦးဂျီ’တို့ ကြုံတွေ့နေရသည့် အခက်အခဲ ပြဿနာများကို တဆင့်စကားဖြင့် စားပွဲတခုမှတခုသို့ ပြန့်သွား လေရာ မျက်မှန်မည်းတို့စားပွဲနှင့် ကပ်ရက်ဝိုင်းကလူက သူ့အတွက် အကွက်ပေါ်ချေပြီဟု ယူဆလိုက်ပုံရသည်။ စားပွဲချင်း မတူသော်လည်း ဆယ်ပေါင်တူ ထိုင်နေရာက လှမ်းကြည့်လျင်တော့ ကိုမျက်မှန်တို့ဝိုင်းနဲ့ တဆက်တည်းလိုလို တဝိုင်းတည်း တဖွဲ့တည်းလိုလို ထင်ရလေသည်။

ထိုဝိုင်းမှပုဂ္ဂိုလ်က လည်ချောင်းတချက်ဟန့်လိုက်ပြီး ကက်ဆက်တိတ်ခွေဇာတ်လမ်းခေတ်က အသံသရုပ်ဆောင် များကို တုပထားသော လေသံမျိုးဖြင့် ‘ဦးဂျီ’တို့ အခုလိုပြဿနာတွေ ဖြစ်ရတာဟာ ခေါင်းဆောင်မှုနှင့် ဆိုင်ကြောင်း၊ စီမံခန့်ခွဲမှုနှင့်လည်း ပတ်သက်ကြောင်း၊ ’ဇလန်းစကီး’ဆိုရင်.....ဟု အစချီရုံ ရှိသေးသည် ဆယ်ပေါင်တူ၏ ဧည့်သည်က သူ့ခေါင်းကိုယ် သူထုပြီး ‘ဒါတွေနဲ့ ဝေးရမလားလို့ မင်းတို့ဆီ လာမိပါတယ်။ အခုတော့ တူတာကိုက တကယ့်ကို ကွက်တိ၊ တူကိုတူနိုင်လွန်းလှပါသဗျ’ဟု ငိုသံပါကြီးနဲ့ ပြောကာ ပုလင်းထဲက လက်ကျန်များကို တရစပ် ပုလင်းလိုက် မော့သောက်ပါလေတော့သည်။

ဆယ်ပေါင်တူ အရိပ်အခြည် ကြည့်ရတာက ဒီလူတော့ တော်တော်များနေပြီ။ အိမ်ပြန်ဖို့သင့်ပြီဟု စဉ်းစားမိလိုက် သည်။ တဆက်တည်းမှာပင် ဘာတွေက ဘာကို ဒီလောက်တောင် တူနေကြောင်းကိုတော့ အလွန်အမင်း သိချင် လာမိသည်။ မေးမြန်းကြည့်ရန် စိတ်ကူးနေစဉ်မှာပဲ ‘ဦးဂျီ’ကို ရစ်နေကျ ဝိုင်းများဆီမှ ဖုန်းလိုင်းမကောင်းလို့ အော်ဟစ်ပြောဆိုနေသံများက ကျယ်လောင်စွာ ပျံ့လွင့်လာသည့်အတွက် ဆယ်ပေါင်တူ အတွေးပြတ်သွားသည်။

ဟဲလို!

ရှင်းတယ်နော်.

ရှင်းပြီလား.

အမျိုးစုံ ကြိုးခုန်.

ဆရာမ နိုလင်းဟေဇာ.

စသဖြင့် လေထဲလွင့်လာသော အမျိုးသမီးတယောက်၏ အသံကို ကြားလိုက်ရသည့်နောက်မှာတော့ ဆယ်ပေါင်တူ၏ ဧည့်သည်မှာ ‘ဆယ်ပေါင်တူရေ အဲဒီထက်တူတာတောင် အဲသလောက် မတူနိုင်တော့ပါဘူး။ တူတယ် ဆိုတာထက်တောင် ပိုတူနိုင်လွန်းသကွ၊ အေးအေးလူလူ နေလို့ကောင်းတဲ့ ရပ်ရွာလေးပါဆို၊ မင်းတို့ဆီ လာမိတာကိုက ငါ့အပြစ်ပါကွာ၊ ငါ့ရဲ့အမှား ငါ့ရဲ့ မဟာ့မဟာအမှား’ဟု ငိုကြီးချက်မဖြင့် အော်ဟစ်ပြီး သူ့ခေါင်းကို အလူမီနီ ယမ်စားပွဲနှင့် မူးမေ့ကျသွားသည်အထိ အကြိမ်ကြိမ် ဆောင့်ချပါလေတော့သည်။

သောက်ထားသည့် အရှိန်ကြောင့်လား၊ ခေါင်းဆောင့်မိသည့် ဒဏ်ရာကြောင့်လား၊ ခွဲခြားမရသော်လည်း ဆယ်ပေါင်တူ၏ ဧည့်သည်မှာ လှုပ်နှိုး၍ပင် မရလောက်အောင် ဖလက်ပြသွားသည့်အတွက် ဆိုင်မှထမ်းထုတ်ကာ အိမ်သို့ ပြန်ခဲ့ကြပါတော့သည်။

အပိုဒ် ( ၃ )

ဆယ်ပေါင်တူ မနက်အိပ်ရာထသောအခါ ဧည့်သည်မရှိတော့။ အစောဆုံး ရရာကားဖြင့် ပြန်သွားလေပြီဟု သိရသည်။ ပတ်ဝန်းကျင်သစ်မှာ စိတ်အေးလက်အေး ရက်အနည်းငယ် အနားယူမည် ဆိုသည့် မှန်းချက်နှင့် နှမ်းထွက်လည်း ကိုက်သွားပုံမရ။

ဆယ်ပေါင်တူ သိလိုလွန်းလှသော အဘယ်အရာများက ထိုရွေ့ထိုမျှ တူနေကြပါသနည်း ဆိုသည်ကိုလည်း မေးခွင့်မရခဲ့လိုက်။ တကယ်တော့ ဆယ်ပေါင်တူသည် ဟန်ကိုယ့်ဖို့လုပ်ကာ အယ်ဒီတာမင်းများ အထင်မစမော ရလေအောင်နှင့် လူရှိန်ရင်လည်းမနည်းဆိုသော အတွေးများဖြင့် မိုးမခတွင် ဒုတိယစာဖတ်အား အကောင်းဆုံးဟု ခပ်တည်တည် ဆိုနေသူသာ ဖြစ်သည်။

ထို့အတွက် ယခုလည်း မိမိဘာသာ ဘယ်လိုမှ ဆက်စပ်စဉ်းစားနိုင်မည် မဟုတ်မှာ သေချာသည့်အတွက် စာဖတ်သူများအနေဖြင့် တူချင်းမက တူနိုင်လှသည့် အဖြေကိုသိရှိခဲ့ပါလျှင် ကွန်းမန့်ဘောက်တွင် ဝင်မန့်ခြင်းဖြင့် ကူညီပေးစေလိုပါသည်။

Join Us @ MoeMaKa Telegram
t.me@moemaka
#MoeMaKaMedia
#WhatsHappeningInMyanmar