အောင်မော်ဦး - “ ကိုယ်တို့ ချစ်ခြင်းဟာ အပြစ်ကင်းခဲ့ပါတယ် ”
“ ကိုယ်တို့ ချစ်ခြင်းဟာ အပြစ်ကင်းခဲ့ပါတယ် ”
အောင်မော်ဦး
(မိုးမခ) ဧပြီ ၁၅၊ ၂၀၂၀
စစ်ကတော့ ပူနေမှာပဲလေ
ဒါနဲ့ပဲ
ချစ်သူချင်း အတူမနေကြရတော့ဘူးလားတဲ့
ဗုံးဆံ အမြောက်ဆံတွေကြားက
သေနတ်သံမစဲတဲ့ နှစ်တွေမှာ
ခဲရာခဲဆစ် ချစ်ခဲ့ကြတယ်လို့ပဲ ဆိုကြပါစို့ရဲ့။
ဒီလိုနဲ့
ကိုယ်တို့ရဲ့ချစ်ခြင်း
၂၃ နှစ် တင်းတင်းပြည့်ခဲ့ပြီ
အချစ်ဒီဂရီက ဘယ်မျှ
အလွမ်းရာခိုင်နှုန်းက ဘယ်ရွေ့
မင်းကို မမေ့နိုင်ပါဘူးလေဆိုတဲ့
တိတ်တခိုးဖွဲ့ ကဗျာမျိုးကို
ဒီရုပ်ကြီးနဲ့ ရေးရင်
ဘဝတူရဲဘော်တွေ ကိုယ့်ကို ဝိုင်းရယ်ကြမှာပေါ့။
“လင်နဲ့မယား လျှာနဲ့သွားတဲ့“
ဒေတာတွေကို ဒီတေးတော့ မမှတ်မိတော့ဘူး
မှတ်မိသလောက် နောက်ကြောင်းပြန်ရရင်
ခွန်းကြီးခွန်းငယ်က ဘယ်နှစ်ကြိမ်
ဆွဲလားရမ်းလားက ဘယ်နှစ်လီ
ဝုန်းဒိုင်းကြဲပြီး ပေါက်ခွဲခဲ့တာက ဘယ်နှစ်ခါ
ဆိုတာက တမျိုး၊
“တော်ပြီ ...
တော်နဲ့ကျုပ် မပေါင်းနိုင်တော့ဘူး”
ဆိုတာက တဖုံ၊
“ပူညံပူညံ မလုပ်နဲ့ကွာ
နောက်တခွန်းထွက်ရင် လက်ပါမိတော့မယ်”
ဆိုတာက တသွယ်၊
အဲဒီလို
လွယ်လွယ်ကူကူ ထူထောင်ဖို့ မလွယ်ကူလှတဲ့
၂၃ နှစ်တာ အိမ်ထောင်ရေးမှာ
သူတင် ကိုယ်တင် ခနဲ့တဲ့တဲ့ရယ်နဲ့
အချေအတင် စစ်မခင်းဖြစ်ခဲ့ကြတဲ့
ကိုယ်တို့ချစ်ခြင်းဟာ အပြစ်ကင်းခဲ့ပါတယ်။
ကဗျာရေးတဲ့အခါ
ကိုယ့်ကဗျာအပေါ် ကိုယ်မညာရဘူးတဲ့
ဒီကဗျာမှာ
သေချာတာကတော့
သမီးလေးနောင်းမေဟာ တဦးတည်းသော သက်သေပါပဲ။
ဒေါ်နက်ရေ
ရဲဘော်မကြီးရေ
ချောက်ချောက်ချားချားနဲ့
ခြောက်တီးခြောက်ကပ်နေ့တွေက
အထီးကျန်ဆန်လွန်းလှပါရဲ့
တိတ်ဆိတ်ခြင်းကို ဖောက်ခွဲပစ်တဲ့အနေနဲ့
ပြေးကြည့်မှ ဒီလူ ဒီလူအပြင် အပိုမရှိနိုင်တော့တဲ့
ရပ်နီးရပ်ဝေးက ရဲဘော်ရဲဘက်တွေထံ
အသံပြုကြပါစို့လားကွယ့်
ကိုယ်တို့ရဲ့ သာကြောင်းမာကြောင်းနဲ့
သူတို့အတွက်
သာပါစေကြောင်း မာပါစေကြောင်း
ဆုမွန်ကောင်းတောင်းရင်း
နာလန်ထလာမယ့် ကမ္ဘာကြီးမှာ
ကိုယ်တို့တတွေ
အတူတကွ ထူကြထကြပါစို့လား။
အောင်မော်ဦး
ဧပြီ၊ ၁၃၊ ၂ဝ၂ဝ။
(သင်္ကြန်အကြိုနေ့မှာ မှတ်မှတ်ရရလက်ထပ်ခဲ့ကြတဲ့ အိမ်ထောင်သက် ၂၃ နှစ်ပြည့် အမှတ်တရ)
Posts
