ဆာသော်ဒိုး - မုန့်ဟင်းခါး
မုန့်ဟင်းခါး
ဆာသော်ဒိုး
(မိုးမခ) ) ဇွန် ၂၅၊ ၂၀၂၁
ဒီမနက် အိမ်မှာမုန့်ဟင်းခါးချက်တယ်။ မုန့်ဟင်းရည်ထဲမှာ ကြက်သွန်နီဥကြီးတွေကို ပေါပေါလောလောတွေ့ရပေမယ့် "ငှက်ပျောအူဖတ်" က ရှားရှားပါးပါး။ သိပ်မမြင်ရဘူး။
ဗမာအစားအစာတွေက သူ့ဟာနဲ့သူ ဟန်ချက်ထိန်းထားတာ။ "ငှက်ပျောအူဖတ်" ပါမှသာ မုန့်ဟင်းခါးရဲ့အင်္ဂါ ပြည့်စုံတာ။
ချစ်ဇနီးကတော့ ပြောပါတယ်၊ "ဒီနေ့မနက်စျေးထဲမှာ "ငှက်ပျောပင်" လိုက်ရှာလိုက်တာ ဒါလေးပဲရလို့ ရတာလေးပဲယူလာခဲ့ရတယ်" တဲ့။
"မုန့်ဟင်းခါး"ကိုမြင်တော့ တခါတုန်းကဂျာမနီနိုင်ငံ မြို့တော်ဘာလင် နိုင်ငံခြားရေးရာဝန်ကြီးဌာနမှာဆုံခဲ့ခင်ခဲ့တဲ့ ပန်းချီပြခန်းပိုင်ရှင် ဂျာမန်မိတ် ဆွေကြီး Reinhard ကို သွားပြီးသတိရမိတယ်။
သူတို့ဇနီးမောင်နှံက သူတို့ဆီမှာ အအေးဒီဂရီအနုတ်လက္ခဏာ(-18)လောက်ရောက်တဲ့ ဇန်နနဝါရီလလောက်မှာ မြန်မာပြည်ကိုအမြဲမပြတ်ဆောင်းလာလာခိုကြတယ်။
ရန်ကုန်မှာတစ်ရက်နှစ်ရက်နေပြီးရင် ရှမ်းပြည်နယ် အောင်ပန်း၊ ကလော၊ အင်းလေးဘက်တက်တက်သွားတယ်။ အဲသည်ဒေသက အကူအညီလိုအပ်နေတဲ့ တိုင်းရင်းသားရွာတွေကိုသွားသွားပြီး ပစ္စည်းအကူအညီ နည်းပညာအကူအညီတွေပေးကြတယ်။ ပရဟိတအလုပ်တွေပေါ့။ အခု Reinhard ကို သွားသတိရမိတယ်။
သူနဲ့ကျနော်ဘာလင်မှာဆုံတော့ သူက ပြုံးပြပြီး "ဗမာပြည်ကမဟုတ်လား" လို့ အင်္ဂလိပ်လိုမေးရင်း မိတ်ဆက်လာပါတယ်။ ကျနော်ကလည်း " ဟုတ်ပါတယ်ခင်ဗျာ၊ တွေ့ရတာဝမ်းသာပါတယ်" လို့ အင်္ဂလိပ်လိုပြန် ပြောပြီး "Guten Tag"လို့ ဂျာမန်လိုထပ်ပြောလိုက်တော့ သူ့ရဲ့နဂိုအပြုံးမျက်နှာကြီးပေါ်မှာ ထပ်ဆင့်အပြုံးကြီးတက်လာတာ မြင်ရပါသဗျ။
" ဟား ဟား ဟား ဟား ' မင်္ဂလာပါ ' "
သူကလည်း ဗမာလိုပြန်နှုတ်ဆက်တယ်ဗျ။
သူက သူတို့နေအိမ်ပြခန်းကို အားတက်သရောဖိတ်ပါတယ်။ သူနဲ့ ဘာလင်မြို့လယ်မှာရှိတဲ့ Brandenburg Gate ကြီးနားက Starbucks ကော်ဖီဆိုင်မှာထိုင်ကြရင်း ဗမာပြည်အကြောင်းတွေမေးပါတယ်။ ဆရာဝင်းဖေမြင့် ဂျာမနီကိုလာတုန်းကလည်း သူတို့အိမ်ကိုရောက်ပါကြောင်း ဗမာပန်းချီဆရာတွေရဲ့ပန်းချီကားတွေ သူတို့အိမ်မှာ အများအပြားဝယ်ယူချိတ်ဆွဲထားပါကြောင်းနဲ့နောက်တခါလာရင် တည်းလို့ခိုလို့ရပါကြောင်းလည်း ဖိတ်ပြောပြောပါတယ်။
မိတ်ဆွေဖြစ်ဖြစ်ချင်းပဲ သူ့ I Pad ကို ကျနော့်ဆီကမ်းပေးရင်း "ဒီအိုင်ပက်ထဲမှာ ကျုပ်အမျိုးသမီးရိုက်ခဲ့တဲ့ဗမာပြည်ကဓာတ်ပုံတွေ အများကြီးပဲဗျ။ ဖွင့်ကြည့်ပါလား" တဲ့။ ပြုံးပြုံးကြီးနဲ့။
ကျနော်လည်း အိုင်ပက်ကိုဖွင့်လိုက်တော့"Pass Word" တောင်းနေတာ တွေ့ရတယ်။
" ရိုင်းဟာ့ဒ်ရေ ရော့ရော့၊ "Pass Word" လေးရိုက်ပေးပါအုံး "
သူ့နဂိုအပြုံးမျက်နှာကြီးဟာ ထပ်ဆင့်ထပ်ဆင့်ပိုပြီးတော့ ပြုံးလာပြန်တယ်ခင်ဗျ။ ပြီးတော့ "ဆာသော်ဒိုးကိုယ်တိုင်ပဲ ရိုက်ထည့်လိုက်ပါ" တဲ့။
သူက "နိမိတ်ပြ" တခုတော့ ပေးတယ်။
"ဗမာပြည်မှာ လူကြိုက်အများဆုံးအစားအစာ၊ ဘယ်မြို့ဘယ်နေရာသွားသွားဆိုင်ကလေးတွေနဲ့ရောင်းတယ်ဗျာ၊ အဲသည်အစားအစာ စာလုံးပါ "
" ဟား ဟား ဟား ဟား ဟား ဟား "
ကျနော်လည်း ချက်ချင်းပဲ " Moathingar " လို့ ရဲရဲကြီးရိုက်ထည့်လိုက်တာ I Pad ပွင့်သွားတယ်။
" ဟား ဟား ဟား ဟား ဟား ဟား "
" ဟား ဟား ဟား ဟား ဟား ဟား "
ဒီနေ့သူ့ကိုသတိရမိတယ်။ သူက ဗမာအစားအစာထဲမှာ "မုန့်ဟင်းခါး"ကို သိပ်ကြိုက်လွန်းလို့ "Pass Word" ကိုလုပ်ထားတာကိုး။
ဗမာပြည်မှာ "မုန့်ဟင်းခါး"နဲ့ပတ်သက်ပြီး"ဆင့်ပွားအဓိပ္ပာယ်သတ်မှတ်ချက်တွေ "ရှိပါလေသဗျ။ "မုန့်ဟင်းခါးစားကြွပါ"တို့" မုန့်ဟင်းခါးအကြွေးခံလိုက်ရပြီ"တို့ပေါ့ဗျာ။ "အခိုင်းခံ" ရတာတို့ "အဆော်ခံရ" တာတို့မှာသုံးနေကျ။
နောက်တခုရှိတာက "နာရေး"ဖြစ်ပြီး ၇ ရက်ပြည့်လို့ "ရက်လည်" ပြီဆို"မုန့်ဟင်းခါး" ကျွေးခဲ့တာဓလေ့တခုပါ။ ဗိုက်တွေဘာတွေမနာအောင် "ငှက်ပျောအူဖတ်" တော့ထည့်ချက်ကြရပါတယ်ခင်ဗျ။
ဒီနေ့အိမ်မှာ မုန့်ဟင်းငါးထမင်းလွတ်ချက်စားကြပေမယ့်"ငှက်ပျောအူ"ကတော့ ရှားရှားပါးပါးလို့ ဆိုရမယ်ခင်ဗျ။ "ငှက်ပျောပင်တွေ"ပြည်သူလူထု ရပ်ကွက်စျေးထဲ အဝင်နည်းသွားပုံပါပဲ။
ယုံကြည်စိတ်ချရတဲ့ "အတွင်းသတင်း" တခုရဲ့အဆိုအရ "သူတို့တွေ"ဆီမှာ မုန့်ဟင်းခါးတွေအပြိုင်ကျွေးပြီး အသံတိတ်ရှိုက်ကြီးတငင်အပြိုင်ငိုနေကြရတာကြာပါပြီတဲ့။ ဆက်လက်ပြီးတော့လည်း စားကြရအုံးမှာမြင်ယောင်နေပါသတဲ့။
လက်စသတ်တော့ "ငှက်ပျောပင်တွေ" ကိုသီးသန့်ကန်ထရိုက်ဆွဲထားကြတဲ့ လူတန်းစားတွေကလည်း ရှိနေတာကိုးဗျ။ ။
ဆာသော်ဒိုး
23-5-21(Tue)
4:37 Pm
-
Join Us @ MoeMaKa Telegramt.me@moemaka
#MoeMaKaMedia
#WhatsHappeningInMyanmar
Posts
