လှကျော်ဇော - ကမ္ဘာကြီးကို ကိုင်လှုပ်လိုက်သော ဗီဒီယိုအခွေလေး

(မိုးမခ) ဇွန် ၁၅၊ ၂၀၂၀

မေလ ၂၅ ရက်နေ့က အမေရိကန်ပြည်ထောင်စု မင်နီဆိုးတားပြည်နယ် မင်နီပိုလစ်မြို့မှာ အသက် (၄၆) နှစ်ရွယ် လူမည်းအမျိုးသား ဂျော့ချ်ဖလွိုက်ကို ငွေစက္ကူအတုသုံးတယ် ဆိုတဲ့ သံသယနဲ့ ပုလိပ် ၄ ယောက်က ဝိုင်းဝန်းဖမ်းဆီးတဲ့ ဖြစ်စဉ်အတွင်း အဲဒီလူမည်းအမျိုးသားက သေဆုံးသွားပါတယ်။

ဖြစ်စဉ်တခုလုံး အနီးအနားရှိတဲ့လူတဦးက လက်ကိုင်ဖုန်းနဲ့ ဗွီဒီယိုရိုက်ထားလိုက်ပါတယ်။
ဗွီဒီယိုထဲမှာ လူမည်းအမျိုးသားဟာ မှောက်လျက်အနေအထားနဲ့ လက်ပြန် လက်ထိပ်ခတ်ထားပြီး သူ့ရဲ့လည်ပင်းကို လူဖြူပုလိပ်က ဒူးနဲ့ထောက်ထားတာ တွေ့ရပါတယ်။

လူမည်းက ‘အမေရေ၊ ကျွန်တော် အသက်မရှုနိုင်တော့ဘူး’ လို့ အကြိမ်ကြိမ် ဗလုံးဗထွေး ပြောရင်းက နောက်ဆုံး ငြိမ်သက်သွားတဲ့အထိပါပဲ။ ၈ မိနစ်နဲ့ ၄၆ စက္ကန့်တိတိ ပုလိပ်က ဒူးနဲ့လည်ပင်းကို ဖိထားတာပါ။ ဆေးရုံပို့လိုက်တော့ သေဆုံးသွားပြီဆိုတာ သိလိုက်ကြရပါတယ်။

ဒီ ဗွီဒီယိုအခွေလေး သတင်းက မီဒီယာမှာ ပြန့်သွားတော့ တကမ္ဘာလုံး ဒေါသမုန်တိုင်းကြီး တိုက်ခိုက်ခံ လိုက်ရပါတယ်။

* * *

၁၉၇၀ ပြည့်နှစ်များက မြန်မာပြည်မှာ တင်ထွေး ဘာသာပြန်တဲ့ ‘ကမ္ဘာကို ကိုင်လှုပ်တဲ့ ၁၀ရက်’ ဆိုတဲ့ စာအုပ် ဖတ်ဖူးပါတယ်။ ရုပ်ရှင်ကိုတော့ တရုတ်ပြည်မှာ ကြည့်ရပါတယ်။ အမေရိကန် (ဆိုရှယ်လစ်)စာရေးဆရာ ဂျွန်ရီဒ် (John Reed) ၁၉၁၇ အောက်တိုဘာ တော်လှန်ရေးကာလအစောပိုင်း (ဆောင်းရာသီ နန်းတော်တွင်း အဖြစ်အပျက်များ) အကြောင်းတွေကို ရေးထားတာပါ။ စာရေးဆရာကိုယ်တိုင် အဲဒီခေတ် ဘော်ရှီဗစ် ခေါင်းဆောင်တွေ (လီနင် အပါအဝင်)နဲ့အတူ ဖြတ်သန်းခဲ့ရတဲ့ ကိုယ်တွေ့ဖြစ်စဉ်တရပ်လုံး ပြန်ရေးထားတာပါ။

ဒီစာအုပ်ဟာလည်း သူ့စာအုပ်နာမည်အတိုင်း ကမ္ဘာကို ကိုင်လှုပ်ခဲ့တဲ့ စာအုပ်ပါပဲ။
တရုတ်ပြည်ရဲ့ တော်လှန်ရေးကို အမေရိကန်စာရေးဆရာကြီး အဂွါစနိုးရဲ့ ‘တရုတ်ပြည်ပေါ်ကကြယ်နီ’က ကမ္ဘာကျော်စေခဲ့သလို ဂျွန်ရီးဒ်ရဲ့ ဒီစာအုပ်ကလည်း အောက်တိုဘာ ဘော်ရှီဗစ်တော်လှန်ရေးကြီးကို ကမ္ဘာကျော်စေခဲ့တာပါ။ ဒီစာအုပ်ကို ပထမဆုံးအကြိမ် ထုတ်ဝေစဉ် (၁၉၂၀) က လီနင်ရဲ့ အမှာစာနဲ့ပါ။
(စကားချပ်။ ဒီ အမေရိကန်စာရေးဆရာကြီး နှစ်ယောက်စလုံး သူတို့အမိနိုင်ငံမှာ ဖိနှိပ်မှုအမျိုးမျိုးကြောင့် မနေနိုင်ကြဘဲ၊ တခြားတိုင်းပြည်များမှာ သက်ဆုံးတိုင် ခိုလှုံနေထိုင်သွားရပါတယ်။ ဒါပေမဲ့ သူတို့ကို သက်ဆိုင်ရာနိုင်ငံတွေက မမေ့မလျော့ ကျေးဇူးဆပ် ဂုဏ်ပြုခဲ့ကြပါတယ်။

အဂွါစနိုးရဲ့ အရိုးပြာများကို ပီကင်းတက္ကသိုလ် ပန်းခြံထဲမှာ ဂူသွင်းသင်္ဂြိုဟ်ထားပြီး သူ့ရဲ့ ကိုယ်တပိုင်းရုပ်တုနဲ့ အတူ ထားရှိပါတယ်။

ဂျွန်ရီးကိုတော့ (ဘော်ရှီဗ‌စ် ခေါင်းဆောင်များကို မြှုပ်နှံလေ့ရှိတဲ့) မော်စကို ကရင်မလင်နန်းတော်မြို့ရိုးမှာ မြှုပ်နှံထားပေးခဲ့ပါတယ်။)

‘အောက်တိုဘာ တော်လှန်ရေးရဲ့ တပ်ဦးတပ်လှန့်သံဖြစ်တဲ့ ဇာဘုရင့်ရေတပ်သင်္ဘော အော်ရိုရာက ပထမဆုံး ဖောက်လိုက်တဲ့ အမြောက်သံဟာ တကမ္ဘာလုံးဆီကို မာ့က်စ်ဝါဒ ကွန်မြူနစ်ဝါဒကို ပို့ပေးလိုက်တယ်’လို့ ဆိုစမှတ်ပြုကြပါတယ်။

တကယ်လည်း အဖိနှိပ်ခံ ကိုလိုနီနီုင်ငံများ (အာရှ၊ အာဖရိက၊ လက်တင်အမေရိကနိုင်ငံများ)က မျိုးချစ် ပြည်ချစ်နိုင်ငံရေးသမား တက်ကြွသူများအဖို့ မိမိတို့ အမျိုးသားလွတ်မြောက်ရေး လှုပ်ရှားမှုများအတွက် အောက်တိုဘာ တော်လှန်ရေးကြီးဟာ တွန်းအားကြီးတရပ် ဖြစ်လာပါတော့တယ်။ လေ့လာစရာ အကြောင်းအရာကြီးတရပ်လည်း ဖြစ်လာပါတော့တယ်။ မိမိတို့နိုင်ငံတိုင်းရဲ့ ပကတိအခြေအနေများနဲ့ ကိုက်ညီစွာ တိုင်းပြည်လွတ်လပ်ရေးတိုက်ပွဲများကို နည်းသဏ္ဌာန်ပေါင်းစုံနဲ့ ဆင်နွှဲကြပြီး နိုင်ငံအများအပြား (အားလုံးနီးပါး) လွတ်လပ်ရေးများ ရယူနိုင်ခဲ့ကြပါတယ်။

ဒီလိုနဲ့ ကမ္ဘာ့ကိုလိုနီစနစ်ကြီးဟာ တဖြည်းဖြည်း မှေးမှိန်အားပျော့လာပြီး ပျောက်ကွယ်လုမတတ် ဖြစ်သွားရပါတော့တယ်။

၁၉၁၇ အောက်တိုဘာ တော်လှန်ရေးကြီးဟာ ဒီဖြစ်ရပ်ကြီးအတွက် ရှေ့ပြေး ခေါင်းလောင်းထိုးသံကြီးဖြစ်ပြီး ကမ္ဘာ့အဖိနှိပ်ခံ ပြည်သူများအတွက် မိမိတို့ရဲ့ လွတ်မြောက်ရေးလမ်း (တနည်း) တော်လှန်ရေးလမ်းကို လမ်းပြပေးခဲ့ပါတယ်။

အခု (၂၀၂၀ မေလ ၂၅ ရက်ကစလို့)လည်း ဒီလိုမျိုး ကမ္ဘာ့အပြောင်းအလဲကြီးတရပ်အတွက် ခေါင်းလောင်းထိုးသံ ပေါ်လာပြန်ပါပြီ။

* * *

မေလ ၂၅ ရက်၊ ဂျော့ဖလွိုက် သေဆုံးသွားရတဲ့ဖြစ်စဉ်ကို မှတ်တမ်းတင်ထားတဲ့ ဗွီဒီယိုလေး ပေါ်ထွက်လာပြီးနောက် အမေရိကမြို့ကြီး အများအပြားမှာ ‘လူမည်းများရဲ့ အသက်လည်း အရေးကြီးပါတယ်’ ဆိုတဲ့ လူထုလှုပ်ရှားမှုကြီး အရှိန်ပြင်းပြင်းနဲ့ ပေါ်ထွက်လာပါတယ်။ ရဲများရဲ့ ရက်စက်မှု၊ ပြစ်မှုကျူးလွန်မှုများ ကို အရေးယူပေးဖို့လည်း တောင်းဆိုလာကြပါတယ်။ သမ္မတထရမ့်က စစ်တပ်လွှတ် နှိမ်နှင်းမယ်လို့ ခြိမ်းခြောက်မှုကိုတောင် အန်တုပြီး ပိုမိုကြီးမားတဲ့ လူထုအင်အားနဲ့ သမ္မတအိမ်ဖြူတော်ကိုတောင် ဝိုင်းလာလို့ ထရမ့်ခမျာ တညသား မြေအောက်ဗုံးခိုကျင်းထဲတောင် ဆင်းရသေးသတဲ့။

ဆန္ဒပြပွဲများမှာ အစောပိုင်း(ညအချိန်များမှာ) ဆိုင်တွေဖောက် လုယက်မှုတွေ ရှိခဲ့ပေမယ့် နောက်ပိုင်း ဒီလိုလုပ်ရပ်များဟာ မိမိတို့ရဲ့ အရေးတော်ပုံကြီးအတွက် ဂုဏ်သိက္ခာ ထိခိုက်စေတယ်ဆိုတာ သိမြင်လာကြတာကြောင့် နောက်ပိုင်းမှာ ငြိမ်းချမ်းစွာ လှုပ်ရှားလာတာတွေ တွေ့လာရပါတော့တယ်။ ဒါ့အပြင် ဒီလှုပ်ရှားမှုထဲကို လူဖြူများရော၊ တခြားလူညိုများ အာရှသားများ၊ လက်တီနိုများ အားလုံး ပါဝင်လာကြပါတယ်။ ယခင့် ယခင်က ရဲများရဲ့လက်ထဲမှာ သေဆုံးရတဲ့ အပြစ်မဲ့ (အခု သေဆုံးသွားရတဲ့ ဂျော့ချ် သုံးတဲ့ ၂၀ ဒေါ်လာတန် ငွေစက္ကူကလည်း အစစ်တဲ့။) လူမည်းများစာရင်းလည်း ပြန်ပေါ်ထွက်လာပြီး အခုစာရင်းရှင်းပေးဖို့ တောင်းဆိုလာကြပါတယ်။

ဒါ့အပြင် ဥရောပနိုင်ငံများနဲ့ တခြားနိုင်ငံအသီးသီးကိုလည်း ဒီလှုပ်ရှားမှု ဂယက်ရိုက်ခတ်သွားပြီး အမေရိကန်က လူမည်းများကို ထောက်ခံပြီး မိမိတို့နိုင်ငံတွင်း လူမှုရေး တရားမျှတမှု အတွက် တောင်းဆိုမှုတွေ ဟိန်းညံသွားပါတယ်။

ဂျော့ချ်ဖလွိုက်ရဲ့ စျာပနအခမ်းအနားကိုလည်း လူပေါင်းထောင်ချီ တက်ရောက်ခဲ့ပါတယ်။ ဒေသဆိုင်ရာ အစိုးရ အရာရှိကြီးများလည်း တက်တာ တွေ့ရပါတယ်။ အဲဒီအခမ်းအနားမှာ ပြောကြားခဲ့တဲ့ အမှတ်တရ အောက်မေ့ဘွယ်စကားများကတော့ သမိုင်းဝင်သွားပါပြီ။

လူမည်း ဘုန်းတော်ကြီးလည်း ဖြစ်၊ လူမည်းအရေး တက်ကြွလှုပ်ရှားသူလည်း ဖြစ်တဲ့ အဲလ်ရှပ်တန် (Al Sharpton) က— “ငါတို့တတွေ တကမ္ဘာလုံးအနှံ့ ချီတက်ဆန္ဒတွေ ပြနေရတဲ့အကြောင်းကတော့ ငါတို့အားလုံး ဂျော့ချ် ဖြစ်နေလို့ပါပဲ။ ‘ငါတို့ အသက်မရှူနိုင်ဘူး။ ငါတို့အဆုတ်တွေ အလုပ်မလုပ်တော့လို့ မဟုတ်ဘဲ၊ မင်းတို့က မင်းတို့ရဲ့ဒူးတွေကို ငါတို့ လည်ပင်းတွေပေါ်ကနေ ဖယ်မပေးလို့ ဖြစ်တယ်။ အခု ဂျော့ချ် တွေ့ကြုံရတဲ့ဒုက္ခဟာ ဒီတိုင်းပြည်မှာ နေ့စဉ် ကြုံနေရတာပါ။ ပညာရေး၊ ကျန်းမာရေးနဲ့ အမေရိကန်က နေရာတကာမှာ တွေ့နေရတာပါ။ ငါတို့တတွေ ဂျော့ချ်ကို တိုင်တည်ပြီး မင်းတို့ဒူးတွေ တို့လည်ပင်းပေါ်ကနေ ဖယ်ပေး’ လို့ အော်ပြီး မတ်မတ်ရပ်ဖို့ အချိန်တန်ပါပြီ” တဲ့။

အဲဒီနေ့က အခမ်းအနားကို တိုက်ရိုက် တနိုင်ငံလုံးကို ပြသခဲ့ပါတယ်။ နောက်နေ့ကစပြီး ဆန္ဒပြပွဲတ ဆက်ပြုလုပ်နေကြပြီး တရားဥပဒေအရ ရဲတွေကို အကာအကွယ်ပေးထားတာတွေ ဖျက်သိမ်းပေးရေးတို့၊ ရဲတွေရဲ့ ဘတ်ဂျက်လျှော့ရေး၊ ရဲအဖွဲ့ ပြုပြင်ပြောင်းလဲရေးတို့ စတာတေွ ပါလာပါတယ်။

အခု တကမ္ဘာလုံး ပျံ့နှံ့လာတဲ့ ကြွေးကြော်သံကတော့ ‘တရားမျှတမှု မရှိရင် ငြိမ်းချမ်းရေး မရှိနိုင်’ တဲ့။ (No Justice ,No Peace)

* * *

ဒီဆောင်ပုဒ်ကတော့ ဗမာပြည်အတွက် ကွက်တိပါပဲ။

ဗမာပြည်သူတွေ အသက်မရှူနိုင်တာ ကြာပါပြီ။ စစ်အာဏာရှင်စနစ် ဒူးက ဗမာပြည်သူတွေ လည်မျိုတွေကို ပြည်တွင်းစစ်ကြီးကတဆင့် စစ်ဗျူရိုကရက်ဖိနှိပ်ရေးယန္တရားကဆင့် အခုနောက်ပိုင်းမှာ ၂၀၀၈ ခြေဥကတဆင့် ညှစ်ထားတာ အနှစ် ၇၀ ကျော်ပါပြီ။

ဗမာပြည်သူတွေကလည်း ဒီစစ်အာဏာရှင်စနစ်ကြီး ရှိနေသရွေ့ မိမိတို့အသက်ဝဝ မရှူနိုင်ဘူးဆိုတာ ဘဝအရ သိထားပါတယ်။ ဒါကြောင့် ဒီဒူးကို မရမက ဖယ်ပစ်ရမှာပါ။ အမေရိကန်က စခဲ့တဲ့ ဒီလူမှုတော်လှန်ရေးကြီး တလျှောက် တွေ့ရတဲ့ အဖြစ်အပျက်အချို့ဟာ ဗမာပြည်သူတွေ ၁၉၆၂ ကစလို့ တိုက်ခဲ့တဲ့ စစ်အာဏာရှင် တိုက်ပွဲအဆက်ဆက်ကို သတိရစရာတွေပါ။

သမ္မတထရမ့်က— ‘လုယက်တာတွေ စတာနဲ့ ပစ်မှာ’ လို့ ကြိမ်းမောင်းသံကြားတော့ ဗမာပြည် စစ်အာဏာရှင်စနစ် ခေါင်းကိုင်ဖခင်ကြီးရဲ့ ‘စစ်တပ်ဆိုတာ ပစ်ရင် တည့်တည့် ပစ်မှာ၊ မိုးပေါ် ထောင်ပစ်တာ မပါဘူး။ နောင် ဆူဆူပူပူလုပ်မယ့်လူတွေ သတိသာထားပေတော့’ ဆိုပြီး ကျိန်စာတိုက်သွားတာကို သတိရမိတယ်။

ထရမ့်က— “ဒီဆူပူသူတွေထဲမှာ လက်ဝဲသမားတွေ (Antifa-Anti-Fascist Movement) ပါတယ်တဲ့။ (မှတ်ချက်။ လက်ယာစွန်း လူဖြူ လူမျိုးရေးသမားများကို ဆန့်ကျင်တဲ့အဖွဲ့)။

ရှစ်လေးလုံးအပြီး န.ဝ.တ စစ်အုပ်စုခေါင်းဆောင်တဦးရဲ့ သတင်းစာရှင်းလင်းပွဲ (ဗ.က.ပ များ ဖြတ်လမ်းမှ အာဏာသိမ်းရန် ကြံစည်မှု)ကို သွားသတိရစေတယ်။ သြော်… ဖောက်ပြန်ရေးသမားတိုင်း ကွန်မြူနစ်တစ္ဆေကို ကြောက်တတ်ကြတယ်ဆိုတာ တယ်မှန်ပါလား။ အမေရိကန်၊ အင်္ဂလန်၊ ပြင်သစ် စတဲ့နိုင်ငံများက ရဲတွေလက်ထဲ သေရတဲ့သူတွေစာရင်း ထွက်လာပြီး တရားဥပဒေအရ အရေးယူဖို့ တောင်းဆိုလာတော့—


ဦးကိုနီ အသတ်ခံရမှု

ကိုပါကြီး အသတ်ခံရမှု

ကချင် ကျောင်းဆရာမလေး နှစ်ယောက် အစော်ကားခံရပြီး အသတ်ခံရမှု

ဒေါ်ခင်ဝင်း သေဆုံးရမှု

စတဲ့စတဲ့ အမှုတွေ တန်းစီပေါ်လာပြန်ပါတယ်။

ဗမာပြည်သူတွေကလည်း တနေ့ကျရင် ဒါတွေကို စာရင်းရှင်းခိုင်းရဦးမှာပါ။

ရဲတွေရဲ့ ထောက်ပံ့ကြေးတွေ၊ ကုန်ကျစရိတ်တွေလျှော့ဖို့ တောင်းဆိုလာပြန်တော့ ဗမာပြည်က စစ်တပ်ရဲ့ အသုံးစရိတ် လျှော့ချရေး တောင်းဆိုသံတွေကိုလည်း ကြားယောင်လာမိပါတယ်။ အဲဒီငွေတွေကို တခြား ကျန်းမာရေး၊ အိုးအိမ်တည်ဆောက်ရေးတွေမှာ သုံးဖို့ တောင်းဆိုနေကြလေရဲ့။

ရဲဒူးအောက်ကနေပြီး ‘အမေရေ...ကယ်ပါဦး၊ ကျွန်တော် အသက်ရှူမရတော့ဘူး’ လို့ ဂျော့ချ်ဖလွိုက် ဗလုံးဗထွေး ပြောနေသံကို ကြားရတော့ ရခိုင်က လူငယ်တဦး(ကိုဇော်ဝင်းလှိုင်) ကို စစ်တပ်က မေးမြန်းဖို့ ခေါ်သွားပြီး အိမ်ပြန်ရောက်တော့ ရေတိုက်တဲ့မိခင်ကို ‘အမေရေ၊ ကျွန်တော် ရင်တွေ သိပ်ပူနေပြီ၊ အတွင်းကလီစာတွေ ကြွေကုန်ပြီထင်ပါရဲ့’လို့ ပြောရင်း (စစ်တပ်ရဲ့ လူမဆန်စွာ ရိုက်နှက်နှိပ်စက်မှု ဒဏ်ကြောင့်) သေဆုံးသွားရပုံကို သတိရမိတယ်။

တကယ်တော့ အဖိနှိပ်ခံတွေရဲ့ ခံစားချက်တွေ၊ နာကြည်းချက်တွေဟာ တူညီကြပါတယ်။ ဒါကြောင့် တရားဥပဒေအရ တန်းတူညီမျှရေး တောင်းဆိုမှုတွေဟာ တကမ္ဘာလုံး တသံတည်း ထွက်လာကြတာပါ။

ဒီတချီ ဒီလောက်မြိုင်ဆိုင်လာတာဟာ နည်းပညာတိုးတက်မှုကြောင့် လူတိုင်းလက်ထဲ့မှာ စမတ်ဖုန်းတွေ ကိုင်လာနိုင်ပြီး အဖြစ်အပျက်များကို မှတ်တမ်းတင်ရိုက်ကူးပြီး သက်သေသက္ကာယအဖြစ် ခိုင်ခိုင်မာမာ ပြောဆိုလာနိုင်တာကြောင့် ဖြစ်ပါတယ်။ အလွန်အားတက်စရာပါ။

ဒါကြောင့် ဗမာပြည်သူတွေရဲ့ စစ်အာဏာရှင်စနစ် ဖျက်သိမ်းရေးအတွက် တိုက်ပွဲဝင်နေမှု(တနည်း) ၂၀၀၈ ဖွဲ့စည်းပုံဖျက်သိမ်းရေးတိုက်ပွဲများကို ရနိုင်သလောက် သဏ္ဌာန်မျိုးစုံနဲ့ ရှေ့တိုးလုပ်သွားရပါလိမ့်မယ်။

ဒီအတွက် တတိုင်းပြည်လုံးက ပြည်သူများ (ဒီအထဲမှာ စွန့်ပြီး မစားရရှာတဲ့ စစ်တပ်က အောက်ခြေစစ်သားများပါ)၊ တိုင်းရင်းသားများအားလုံး စည်းလုံးညီညွတ်ကြဖို့ လိုပါတယ်။ ဗမာပြည်ရှိ ဗမာလူမျိုးတွေ မလွတ်မြောက်ရင် ဘယ်လူမျိုးစုမှ မလွတ်မြောက်နိုင်သလို၊ လူမျိုးစုတွေအားလုံး မလွတ်မြောက်ရင်လည်း ဗမာလူမျိုးတွေ မလွတ်မြောက်နိုင်ပါဘူး။ ငြိမ်းချမ်းရေးလည်း မရနိုင်ပါဘူး။
ဗမာတပ်မတော်ကိုလည်း သတိပေးလိုပါတယ်။

ကမ္ဘာ့အင်အားကြီးနိုင်ငံများမှာတောင် မတရားမှုများကို တဆင့်ချင်း လျှော့ပေးနေရပါပြီ။ ဒါ့အပြင်
အခုခေတ်ကြီးမှာ ရှေ့ကဖုံး နောက်က ပေါ်ပါတယ်။

တပ်မတော်သတင်းပြန်ကြားရေးအဖွဲ့က ဘာတွေပြောပြော… တလောက လူမှုကွန်ရက်မှာ တက်လာတဲ့ ဗွီဒီယိုအခွေလေး (သင်္ဘောပေါ်မှာ စစ်သားတွေက ဖမ်းထားတဲ့ အရပ်သားတွေကို ရိုက်နှက်ညှဉ်းပန်းနေတဲ့)မျိုး နောင်မှာ တက်လာလေလေ စစ်အုပ်စုနဲ့ စစ်အာဏာရှင်စနစ်ကို ပြည်သူတွေက ရွံရှာမုန်းတီးပြီး တခဲနက် အုံကြွဆန့်ကျင်မယ့်ရက်လည်း နီးလာလေလေ ဖြစ်ပါလိမ့်မယ်။

တပ်မတော်အနေနဲ့ မိမိတို့ မတရားရယူထားတဲ့ နိုင်ငံရေး၊ စီးပွားရေးအခွင့်ထူးတွေကို စွန့်လွှတ်ဖို့ အချိန်တန်ပါပြီ။ ဗမာပြည်သူတွေ လိုလားတောင့်တနေတဲ့ ပြည်တွင်းငြိမ်းချမ်းရေးရရေးအတွက် အဓိက တာဝန်ယူရမှာက ဗမာ့တပ်မတော်ပါ။

ဗမာပြည်သူတွေကတော့ တရားမျှတမှုမရှိရင် မငြိမ်းချမ်းနိုင်ဘူးဆိုတာ ကောင်းကောင်းနားလည် လက်ခံထားပြီး မိမိတို့ လျှောက်ရမယ့်လမ်းကို ဆက်လျှောက်ကြပါလိမ့်မယ်။ ဗမာပြည်က အဖိနှိပ်ခံ လူမျိုးပေါင်းစုံ ပြည်သူတိုင်းလည်း ဒီတိုက်ပွဲတွင်း ပါနိုင်တဲ့နေရာက ဝင်ရောက်ပါဝင်ရမှာပါ။ ဗမာပြည်သူများ အပါအဝင် တကမ္ဘာလုံးရှိ အဖိနှိပ်ခံများကတော့ (ခရီး ဘယ်လောက်ဝေးဝေး အချိန်ဘယ်လောက်ကြာကြာ) အောင်ပွဲရသည်အထိ တဗိုလ်ကျ၊ တဗိုလ်တက် ဆက်ချီတက်ကြပါလိမ့်မယ်။

လှကျော်ဇော
13-6-2020/