အောင်မြို့ - ပါရီအလွမ်းဇာတ်( မြသန်းတင့် မြန်မာပြန် ပါရီကျဆုံးခန်း)

 ပါရီအလွမ်းဇာတ်

အောင်မြို့

(မိုးမခ) စက်တင်ဘာ ၃၀၊ ၂၀၂၀

"ဘာလဲ ကျုပ်တူကြီးဟာ အာဏာဟာ ဝန်ထုပ်ဝန်ပိုးလို့ ပြောချင်သေးလား။

ဟုတ်တယ် ဝန်ထုပ်ဝန်ပိုးတော့ ဝန်ထုပ်ဝန်ပိုးပဲ။ ဒါပေမဲ့ ဇိမ်ရှိတဲ့ ဝန်ထုပ်ဝန်ပိုးဗျ "

(မြသန်းတင် မြန်မာပြန် ပါရီကျဆုံးခန်း မှ)

မြသန်းတင့်

ပါရီကျဆုံးခန်း

The_Fall_of_Paris_by_Ilya_Ehrenburg

ဒုတိယအကြိမ်၊ဇူလိုင် ၂၀၂၀

တန်ဖိုး ၁၅၀၀၀ ကျပ်

စာ ၇၉၇

ခန်းဆောင်နီစာပေ၊ မျက်နှာဖုံးပန်းချီ ဇော်မောင်

ဒုတိယအကြိမ်ပြန်ထွက်လာဖို့ ကျနော်တို့အမျှော်ကြီး မျှော်ခဲ့ရတဲ့ ဆရာမြသန်းတင့်ရဲ့ ပါရီကျဆုံးခန်း စာအုပ်ပါ။ နာမည်ကျော်ရုရှားစာရေးဆရာအီလျာအာရင်ဘတ်ရဲ့ လက်ရာဖြစ်ပြီး ဒုတိယကမ္ဘာစစ်မဖြစ်မီ ပါရီကို နောက်ခံထားရေးဖွဲ့ထားတဲ့ဝတ္ထုကြီးဖြစ်ပါတယ်။

ကျနော်တို့ငယ်ငယ်တုန်းက စာအုပ်အဟောင်းဆိုင်တွေမှာ ပါရီကျဆုံးခန်း စာအုပ်သုံးတွဲကို ငေးကြည့်ခဲ့ရ တာပါ။ စိစစ်ရေးက ပိတ်ထားတဲ့စာအုပ် ပြန်မထုတ်နိုင်သေးတဲ့ စာအုပ်လို့နာမည်ကြီးတာကြောင့် အဟောင်းစျေးမှာ တန်ဖိုးကြီးတဲ့စာအုပ်တအုပ် ဖြစ်ပါတယ်။ ဒီစာအုပ် ပြန်ထုတ်ပေးတဲ့ ခန်းဆောင်နီစာပေနဲ့ ဖြန့်ချိပေးတဲ့ တိုးမြစ်စာအုပ်တိုက်ကိုလဲ ကျေးဇူးတင် ရပါတယ်။

ပါရီကျဆုံးခန်းရဲ့ အဓိကဇာတ်ဆောင်တွေက အများကြီးပါ။ လူလည်နိုင်ငံရေးသမား ဝန်ကြီးတက်စ၊ တက်စရဲ့သား လူပေါ်ကြော့ ယောင်ခြောက်ဆယ် လူဆန်း၊ တက်စရဲ့သမီးဖြစ်ပေမဲ့ ကွန်မြူနစ်ပါတီဘက်က ရပ်တည်လှုပ်ရှားတဲ့ ဒင်းနိစ်၊ နိုင်ငံချစ်စိတ်ရှိပြီး ရိုးသားတဲ့ အင်ဂျင်နီယာ ပီယာ၊ အနုပညာကိုပဲ ချစ်မြတ်နိုးတဲ့ ပန်းချီ ဆရာ အန်ဒရေ၊ အသံလွှင့်ရုံမှာ အလုပ်လုပ်တဲ့ ကခြေသည်မလေးဂျဲနက်၊ လုပ်ငန်းရှင်ကြီး ဒက်ဇာ၊ ဖက်ဆစ်ခေါင်းဆောင် ဘရီကျူး၊ သတင်းစာတိုက်ဆရာ ဂျူလီယော့၊ ပီယာရဲ့ဇနီးဖြစ်လာတဲ့ အဂ္ဂနိစ်၊ အလုပ်သမားခေါင်းဆောင် မစ်ရှောနဲ့ တခြား ဇာတ်ကောင်တွေ အများကြီး ပါဝင်ပါတယ်။

ဂျာမနီမှာ တန်ခိုးထွားနေတဲ့ ဟစ်တလာနဲ့ ဖက်ဆစ်တွေရဲ့ရန်ကိုကာကွယ်ဖို့ ပြင်သစ်ပြည်သူတွေဟာ ဖက်ဆစ်ဆန့်ကျင်ရေးအင်အားစုတွေရဲ့ ပြည်သူ့တပ်ဦး ကို မဲပုံထည့်ခဲ့ကြပါတယ်။ ဒါပေမဲ့ တပ်ဦးထဲကသစ္စာဖောက်တွေ၊ လည်သလို ကြည့်လုပ်ပြီး ကိုယ်နေရာရရေးကိုပဲဦးစားပေးတဲ့ နိုင်ငံရေးသမားတွေ၊ ဖက်ဆစ်ဝါဒီတွေရဲ့ အနှောင့်အယှက်ပေးမှုတွေကြောင့် ပြည်သူ့တပ်ဦးအစိုးရပြုတ်ကျသွားပါတယ်။ နောက်တက်တဲ့ အစိုးရတွေကလဲ ပြည်သူတွေရဲ့ဆန္ဒကို မကြည့်ဘဲ ဟစ်တလာနဲ့စေ့စပ်ရေးလုပ်ဖို့နဲ့ ကိုယ့်ရာထူးအာဏာတည်မြဲရေးကိုပဲ ဦးစားပေးခဲ့ကြပါတယ်။

ဒါ့အပြင် အစိုးရက ဖက်ဆစ်ဆန့်ကျင်ရေးလှုပ်ရှားတဲ့ ကွန်မြူနစ်ပါတီနဲ့ ပါတီဝင်တွေကို အစွမ်းကုန်နှိပ်ကွပ် သလိုအလုပ်သမားတွေရဲ့တက်ကြွတဲ့လှုပ်ရှားမှုတွေ ကိုလဲ ကောင်းကောင်းဖိနှိပ်ထားပါတယ်။ ဒီကြားထဲ အာဏာလုနေတဲ့ နိုင်ငံ့ခေါင်းဆောင်တွေ၊ ညံ့ဖျင်းတဲ့ စစ်ဗိုလ်ချုပ်တွေကလဲ တိုင်းပြည်ကို ဦးဆောင်နေတာ မို့ ပြင်သစ်ပြည်ရဲ့ ကံကြမ္မာက အဆိုးဘက်ကိုပဲ ရောက်ရှိသွားပြီး ဟစ်တလာ့ဆီ ပါရီမြို့ကြီး ထိုးအပ်လိုက် ရပါတော့တယ်။

ဇာတ်သိမ်းမှာတော့ စစ်ကြောင့် သေတဲ့သူတွေနဲ့ စိတ်ထွေပြားပြီး သတ်သေသွားသူတွေရှိသလို အရင်ကလိုပဲ သစ္စာဖောက် အကျင့်ပျက်သူက ဆက်ပျက်လို့ တော်လှန်ရေးအတွက် ပြင်ဆင်သူက ပြင်ဆင်လို့ ဘာမှမလုပ်ဘဲ တွေဝေသူက ဆက်လက်တွေဝေလို့။ ဒီလိုနဲ့ပဲ ဂျာမန်တွေအောက်က ပါရီမြို့ရဲ့ မြင်ကွင်းတွေကိုတင်ပြရင်း အဆုံးသတ်ထားပါတယ်။

ဒီစာအုပ်ထဲမှာ ကျနော် အရသာအတွေ့ဆုံးကတော့ ဆရာမြသန်းတင့်ရဲ့ ဘာသာပြန်ချောမွေ့မှုပါ။

ဥပမာ စာမျက်နှာ ၃၃၄ မှာပါတဲ့

"နီဂရိုးအရုပ်တစ်ရုပ်။ အဝတ်အစားမပါ။

ဘုရားပေးလိုက်သည့်ပစ္စည်းကို 

ကမ္ဘာကြီးအား ပြသလျက် " ဆိုတာမျိုး၊

စာမျက်နှာ ၇၇၄ က 

ဘုန်းတော်ကြီးကို ဘရီကျုးနှုတ်ဆက်တဲ့စကား

" ဆွမ်း ကွမ်း မျှတပါရဲ့လား ကိုယ်တော်" ဆိုတာမျိုး ဘာသာပြန်အရေးအသားတွေက သဘောကျစရာ ဖြစ်ပါတယ်။

ပါရီကျဆုံးခန်းကိုဖတ်ရင်း မြန်မာပြည်အကြောင်းပဲရေးထားသလို ခံစားရပါတယ်။ ပြည်သူ့တွေလိုချင်တာက တမျိုး၊ ဖြစ်နေတာက တမျိုးဆိုတာတွေ၊ ဖက်ဆစ်အန္တရာယ်ကို တိုက်ခိုက်တွန်းလှန်မယ့်အစား စေ့စပ်ပြေငြိမ်းဖို့ ကြိုးစားနေရတာတွေ၊ တကယ်တိုင်းပြည်ကို ချစ်တဲ့သူတွေသာ ပေးဆပ်မြဲ ပေးဆပ်နေရပြီး လူလည်တွေ သာကူးတွေ စားဖားတွေကသာ အမြဲလိုလို နေရာရသွားတတ်တာတွေ ပြည်ပရန်ကာကွယ်ရမယ့်အစား အချင်း ချင်းသွေးကွဲနေတာတွေဖြစ်ပါတယ်။

အပိုင်ဝယ်သိမ်းထားပြီး အကြိမ်ကြိမ် ပြန်ဖတ်တိုင်း အရသာရှိနေမယ့် စာအုပ်ဖြစ်ပါတယ်။

ခန်းဆောင်နီစာပေက ထုတ်ဝေပြီး တိုးမြစ်စာအုပ်တိုက်က ဖြန့်ချိတဲ့ ဒီစာအုပ်ကို စာအုပ်စျေးကွက်မှာ ဝယ်ယူရရှိနိုင်ပြီ ဖြစ်ပါကြောင်း။

အောင်မြို့

BookReview