နိုင်ငံခြားဝတ္ထုများနှင့်မောင်မိုးသူ

နိုင်ငံခြားဝတ္ထုများနှင့်မောင်မိုးသူ

(မိုးမခ) အောက်တိုဘာ ၁၂၊ ၂၀၁၉

တကယ်တော့ မောင်မိုးသူဟာ စာဖတ်သမားတစ်ဦးအဖြစ်အားသန်သူဖြစ်ပါတယ်၊ စာရေးဖို့က တော့ အကြောင်းတိုက်ဆိုင်ရင်ရေးဖြစ်ပါတယ်၊ သို့သော်အဓိကက စာဖတ်ခြင်းပါ၊ မောင်မိုးသူအထက် တန်ကျောင်း သားဘဝက မန္တလေးမြို့မှာ ဒုတိအကြီးဆုံးစာကြည့်တိုက်ဆိုတဲ့ ဒီဘိုးကိုးတာစာကြည့် တိုက်မှ အမြဲတန်း စာအုပ်စာပေများကို ဖောက်သည်အဖြစ်ငှားရမ်းဖတ်ရှုပါတယ်၊ အဲဒီစာကြည့်တိုက် က ထွက်သမျှမဂ္ဂဇင်းများဝယ် ယူတဲ့အပြင် လုံးချင်းစာအုပ်များလည်း ဝယ်ယူစုဆောင်းထားပါတယ်၊ အဲဒီစာကြည့်တိုက်မှာ မောင်မိုးသူက ပထမမဂဇင်းတွေ၊ ဝတ္ထုတွေဖတ်ရာဆောင်းပါတွေ သုတတွေ လည်း ဖတ်ဖြစ်လာပါတယ်၊ ဖတ်အားကကောင်း ပြီး စာကြည့်တိုက်မှာ ငှားဖတ်စရာစာအုပ်နဲပါးလာ တော့ နောက်ဆုံးစာမှန်သမျှအကုန်ဖတ်မယ်ကွဟု ဆုံးဖြတ် ချက်ချပြီး စနစ်တကျစာအုပ်စည်းမျဉ်းပြုစု ထားတဲ့ စာအုပ်စာရင်းထဲကနေပြီး အက္ခရာဝလိအစီအစဉ်အတိုင်း ကကြီးမှ အအထိ မြန်မာစာနဲ့ ထွက်သမျှ ရှိသမျှ စာအုပ်တွေအကုန်အစင် ဖတ်ဖြစ်ခဲ့ဖူးပါတယ်၊ 

စိန်ပီတာ ကျောင်းမှာ နေရတော့ အင်္ဂလိပ်စာလည်း တဖြည်းဖြည်းပိုကောင်းလာပါတယ်။ ပိုကောင်းတော့ ပထမတော့ ကော့မတ်ရုပ်ပြ တွေဖတ်တယ်၊ နောက်ကျတော့ ဝတ္ထုတွေဖတ်ဖြစ်လာတယ်၊ ရီဒါးဒိုင်ဂျတ်ကထုတ်တဲ့ အလတ် တန်း စာဖတ်အားရှိသူများအတွက် ပြုစုထုတ်ဝေတဲ့ ကမ္ဘာကျော်စာအုပ်တွေဖြစ်တဲ့ လိုင်ဒါဟတ်ကတ်တို့ ချားဒီ ကင်တို့ ဆားဝေါ်တာစကော့တို့ ဖတ်စက အကျဉ်းချုပ်သဘောမျိုးဖတ်ဖြစ်တာပေါ့လေ၊ နောက် တော့ အားမရလို့ မူရင်းတွေရှာပြီးဖတ်ဖြစ်လာတယ်၊ 

၁၉၅၆ခုနှစ် မန္တလေးတက္ကသိုလ်ရောက်တော့ အဲဒီနှစ်မှာ မန်းတက္ကသိုလ်က လောင်ရှင်အသင်းဆိုတာဖွဲ့စည်းပါတယ်။ အဲဒီကလောင်ရှင်အသင်းကို မောင်မိုးသူရောက်သွားပုံကလည်း ဇာတ် လမ်းလေးနဲ့ခင်ဗျ၊ မောင်မိုးသူ စိန်ပီတာ ၁၀တန်း ကျောင်း သားဘဝ စိန်ပီတာကျောင်းမှာ သင်္ချာအတော်ဆုံး ကျောင်းသားတစ်ဦးဖြစ်ပါတယ်၊ အဲဒီအချိန်မှာ ကျူရှင်တွေလည်း မပေါ်သေး မရှိသေးတော့ ကွန့်ဖရင့်ကျောင်း က သူငယ်ချင်း အမနှင့်သူ့သူငယ် ချင်းနှစ်ယောက်တို့ကို မောင်မိုးသူ ညနေ ညနေဘောလုံးကန်မယ့်အစား အိမ်မှာဖိတ်ပြီး သင်္ချာပြ ပေးဖို့တာဝန်ပေးပါတယ်၊ မောင်မိုးသူလည်း ပြပေးရတာပေါ့လေ၊ အဲဒီကွန်ဖရင့်ကျောင်း သူသုံးဦး ကတော့ သူငယ်ချင်းအမဖြစ်သူက ဂျူဒီ၊ သူ့ငယ်ချင်းနှစ်ယောက်က လူစီနှင့်ပင်စီ တို့ဖြစ်ပါတယ်၊ သူတို့သုံးယောက်စလုံး ကိုမောင်မိုးသူသင်္ချာပြပေးလို့ ၁၀တန်းမှာသင်္ချာဘာသာအောင်ပါတယ်၊ အဲဒီမိန်းကလေးသုံးယောက်ထဲအနက် တစ်ယောက်သောသူပင်စီက ပင်းယမွှေးဆိုတဲ့ကလောင် နာမည်နဲ့ ယုဝတီကလောင်ရှင်တစ်ဦးဖြစ်နေပါတယ်၊ ဒါပေမယ့် မောင်မိုးသူလောက် စာဖတ်အား မကြီးဘူး၊ ဝါသနာမကြီးလှပါဘူး၊

စောစောကပြောတဲ့အတိုင်း ၅၆ခုနှစ်မောင်မိုးသူ တက္ကသိုလ်ရောက်တဲ့နှစ်မှာ မန်းတက္ကသိုလ် ကလောင်ရှင်အသင်းဆိုတာဖွဲ့စည်းပါတယ်၊ ဥက္ကဌက ဦးထွန်းအံ့(တက္ကသိုလ်နွယ်ထွန်း) ၊ အတွင်းရေး မှူးက ဦးဝင်းမောင်(တက္ကသိုလ်ဝင်း)၊ အဲဒီလို အဲဒီလို ကလောင်ရှင်အသင်းဖွဲ့စည်းမယ်ဆိုတော့ ကျောင်းရောက်လာတဲ့ ယုဝတီကလောင်ရှင်ပင်းယမွှေးကို အသင်းထဲပါဖို့ဖိတ်ကြားပါတယ်၊ ပင်းယမွှေး ကလည်း သူ့ထက်စာဖတ်အားကောင်း စာပေဝါသနာကြီးတဲ့ သူငယ်ချင်းမောင်မိုးသူကို အဖော်အဖြစ် ခေါ်သွားပါတယ်၊ အတွင်းရေးမှူးဖြစ်တဲ့ တက္ကသိုလ်ဝင်းဟာ ပင်းယမွှေးရော မောင်မိုးသူ(အဲဒီအချိန်မှာ ကလောင်အမည်က မောင်သက်ဦး)ကိုအမှုဆောင်အဖွဲ့ထဲထည့်လိုက်ပါတယ်၊ အဲဒီမှာ မောင်မိုးသူ စာပေစိတ်ပိုပြီးပြင်းထန်တဲ့သ ဘောရှိသွားတော့တာပေါ့၊ 

ဒါကြောင့် တက္ကသိုလ်ရောက်စမှာ သင်္ချာ သုံးဘာသာနှင့်အောင်လာတဲ့မောင်မိုးသူက သင်္ချာအတွဲယူပါတယ်၊ ကလောင်ရှင်အသင်းအမှုဆောင် အသင်းဖြစ်လာတော့ မောင်မိုးသူက သင်္ချာကနေပြီး မြန်မာစာအတွဲကိုပြောင်းယူပါတယ်။ အဲဒီတုန်းက တက္ကသိုလ်မှာ သင်္ချာကျူတာဆရာဦးချစ်ဆွေဟာ နောင်အ ချိန်မှာ သင်္ချာပါမောက္ခဦးချစ်ဆွေပဲဖြစ်ပါ တယ်။ ဆရာဦးချစ်ဆွေက မောင်မိုးသူကိုခေါ်ပြီး မောင်မိုးသူက သင်္ချာ ဂုဏ်ထူးတွေနဲ့အောင်လာတဲ့ ကျောင်းသား သင်္ချာအတွေး သင်္ချာစိတ်ကူး(Math brain)သင်္ချာဦးနှောက်ရှိတဲ့သူဟု သတ်မှတ်တာပေါ့၊ ဒါကြောင့် သင်္ချာကိုမယူတော့ပဲ မြန်မာစာကိုပြောင်းမယူဖို့ ဆွေးနွေးရှာပါသေးတယ်၊ ဒါပေမယ့် မောင်မိုး သူက ကျနော်က စာရေးဆရာလုပ်မှာလို့ပြောပြီး မြန်မာစာကိုပြောင်းယူခဲ့ပါတယ်၊ 

အဲဒီအချိန်မှာ မောင် မိုးသူက ပြင်သစ်စာရေးဆရာကြီး ဖရန်ဆွာဆေးဂဲရဲ့ဝတ္ထုလေးပုဒ်ကိုဖတ်ဖူးနေပါတယ်၊ ဖရန်ဆွာ ဆေးဂဲဆိုတဲ့ ပြင်သစ်စာရေးဆရာမဟာ ၁၉၃၅မှာမွေးဖွားသူဖြစ်လေတော့ မောင်မိုးသူထက် ၂နှစ်ကြီး ပါတယ်၊ သူက ၁၈နှစ် သမီး မှာ Bonjour Tristesse စာအုပ်ကိုရေးပြီး ကမ္ဘာကျော်စာရေးဆရာ မတစ်ဦဖြစ်သွားပါတယ်၊ သူ့ဝတ္ထုကို မောင်မိုးသူအသက် ၂၀ တက္ကသိုလ်ရောက်မှဖတ်ဖူးတာပါ၊ ဖတ်ဖူးတော့သဘောကျပြီး သူ့ဝတ္ထုသုံးအုပ်စလုံးကို ရှာဖွေဖတ်ရှုပါတယ်၊ အဲဒီအချိန်မှာ သူ့ဝတ္ထုသုံး အုပ်စလုံးကို ဟောလိဝုဒ်အကျော်အမော်ဒါရိုက်တာကြီးတွေက သူ့ရဲ့ဝတ္ထုများကို ရုပ်ရှင်ဇာတ်ကား အဖြစ်ရိုက်ကူးနေတော့ ကြည့်ဖြစ်ခဲ့ကြိုက်ဖြစ်ခဲ့ရပါတယ်၊ 

မောင်မိုးသူတို့ တက္ကသိုလ်ခေတ်မှာ အင်္ဂလိပ်စာအုပ်များက ဝယ်ရာတာလွယ်ကူပြီး ဈေးကလည်းပေါပါတယ်၊ အင်္ဂလန်ထုတ် ၂သျှီလင် ၆ပဲနိ တန်စာအုပ်ဆိုရင် မြန်မာငွေနဲ့ ၂ကျပ်ခွဲပဲပေးရပါတယ်၊ အမေရိကန်ုထုတ် ၃၅ဆင့် စာအုပ်က တော့ ၃ကျပ်ဖြစ်ပါတယ်။ အဲဒီတော့ မောင်မိုးသူတစ်ယောက် ကိုယ်ကြိုက်တဲ့စာရေးဆရာဆို သူ့စာအုပ်ဆိုအ ကုန်လုံးရှာဖွေပြီး ဖတ်ရှုဖြစ်ပါတော့တယ်၊ အဲဒီလို အဲဒီလိုနဲ့ အချစ်ဝတ္ထုများ ကို ကျော်လွန်ပြီးတဲ့နောက် ကမ္ဘာ့ဂန္ထဝင်စာရေးဆရာစာအုပ်တွေကို ဝယ်ဖြစ်ဖတ်ဖြစ်ပါတယ်၊ 

မောင်မိုးသူ ကျောင်းကထွက် စာပေလောက ထဲကို ရောက်ရှိတဲ့အချိန်မှာတော့ ဝတ္ထုတိုများ၊ ဆောင်းပါးများ၊ မဂ္ဂဇင်းတော်တော်များမှာ ပင်တိုင်ဆောင်းပါးရှင် အဖြစ်ရေးဖြစ်ပါတယ်၊ မောင်မိုးသူ ပထမဆုံး ဘာသာပြန်ဖြစ်တဲ့ လုံးချင်းဝတ္ထုကတော့ စာရေးဆရာ ရောဘတ်ဘ လော့ရဲ့ ဆိုက်ကို ဝတ္ထုပဲဖြစ်ပါ တယ်။ အဲဒီဝတ္ထုကို ရုပ်ရှင်ရိုက်ထားတဲ့ ဟစ်ကော့ရဲ့ ဆိုက်ကိုရုပ်ရှင်ကိုလည်းကြည့်ဖူးပါတယ်၊ ကြည့်ပြီးမှ ဝတ္ထုကိုဖတ်ဖြစ်တာပါ၊ ဖတ်ဖြစ်တော့လည်း ကြိုက်ပြီးတော့ မောင်မိုးသူ ပထမဆုံးလုံး ချင်းဝတ္ထုက ဆိုက်ကို( စိတ္တဇ )ဖစ်ပါတယ်၊ စိတ္တဇဝတ္ထုကို မောင်မိုးသူက ၁၉၆၅ခုနှစ်တွင် ပြန်ဆိုထုတ် ဝေခဲ့တာဖြစ်ပါတယ်၊ ၁၉၅၆နှစ်တက္ကသိုလ်ရောက်တဲ့မောင်မိုးသူဟာ ပထမဆုံးဘာသာပြန်ဝတ္ထုကို ၁၉၆၅မှာ ဘာသာပြန်ထုတ်ဝေဖြစ်ခဲ့ပါတယ်၊ ၅၆-၆၅တို့ဆိုတာ မောင်မိုးသူအတွက် ထင်ရှားတဲ့အ မှတ်အသားများဖြစ်လေသလားမသိပါဘူး ၊ 

ပင်ကိုဝတ္ထု မရေးစွမ်းနိုင်တဲ့မောင်မိုးသူဟာ ကမ္ဘာကျော် ဝတ္ထုတော်တော်များများကို ဘာသာပြန်ထုတ်ဝေဖြစ်ခဲ့ပါတယ်၊ မောင်မိုးသူဘာသာပြန်ခဲ့တဲ့စာအုပ်တွေ ထဲမှာ ကင်ဖောလေးရဲ့ ကျားကုတ်ကျားခဲ အပါအဝင် စာအုပ် ၇အုပ်၊ လီယွန်အူးညရစ်ရဲ့ အိပ်ဇိုးဒတ် ဝတ္ထုကိုလည်း ဘာသာပြန်ဖြစ်ခဲ့ပါတယ်၊ 

အဲ့လိုစာအုပ်အထူကြီးတွေ ဘာသာပြန်ရာမှာ အသက် ၈၃ နှစ်ရှိလာပြီဖြစ်တဲ့မောင်မိုးသူဟာ ငယ်ငယ်ကဖတ်ဖူးတဲ့ ဆေးဂဲရဲ့ဝတ္ထုကို သောကစံအိမ်ကို တံခါး ခေါက်သူ အမည်နဲ့ ၂၀၁၉ခုနှစ်မှာ အိပ်မက်သစ် စာအုပ်တိုက်ကနေပြီး ပြန်ဆိုထုတ် ဝေဖြစ်ခဲ့ပါတယ်၊ ဆေးဂဲရဲ့ဝတ္ထုမတိုင်မီ ဘာသာပြန်ဖြစ်တဲ့ ဝတ္ထုကတော့ အဲရစ်မာရီယာရီမတ်ရဲ့ ဟဲဗင်းဟတ် နိုးဖေးဘရိတ် ဆိုတဲ့ဝတ္ထုကို ကောင်းကင်ဘုံကမျက်နှာမလိုက်ဘူး ဆိုတဲ့ Image မဂ္ဂဇင်းမှာ အခန်းဆက်ဘာသာပြန်ဆိုထည့်သွင်းခဲ့ပါတယ်၊ အကြောင်းတိုက်ဆိုင်စွာပြောရရင် အဲဒီစာအုပ်ကို ၂နှစ်ကျော် မဂ္ဂဇင်း မှာ အခန်း ဆက်ဖော်ပြဖြစ်ခဲ့တာဖြစ်ပါတယ်၊ Image မဂဇင်းပိုင်ရှင်တွေက တခြားစီးပွားရေးလုပ်ငန်း တွေကို လုပ်ဖြစ်ဖို့ရှိ သည့်တိုင် မောင်မိုးသူရဲ့ဘာသာပြန်အခန်းဆက်ဝတ္ထု ပြီးဆုံးသည်အထိ ထုတ်ဝေ ပေးခဲ့ဖူးပါတယ်။ Image မဂ္ဂဇင်းကိုလည်းကျေးဇူးတင်ပါတယ်၊

အခုအသက်ကြီးမှ စာဖတ်အားကြီးခဲ့တဲ့ စာဖတ်အားကောင်းခဲ့တဲ့မောင်မိုးသူဟာ ဖတ်ဖူးတဲ့ စာရေးဆရာရဲ့အကြောင်း သူရေးခဲ့တဲ့ စာအုပ်တွေအကြောင်း အားလုံးအားလုံးစုပြီးတော့ ပြုစုဖို့ စိတ်အားထက်သန်ဖို့ဖြစ်ပေါ်လာပါတယ်၊ အသက် ၈၃ နှစ်ရှိပြီဖြစ်တဲ့ မောင်မိုးသူလုပ်နိုင်လေအုံးမလား မလုပ်နိင်သေးဘူးလားဆိုတာတော့ မပြောနိုင်သေးပါဘူး၊ ဆေးဂဲ ရဲ့ဝတ္ထုပါးပါးလေးဖြစ်တဲ့ သောက စံအိမ်ကိုတံခါးခေါက်သူ ကို ၂၀၁၉မှာထုတ်ဝေဖြစ်ခဲ့ပါတယ်၊

ဒါကတော့ နိုင်ငံခြားဝတ္ထုများနှင့်မောင်မိုးသူ ဆောင်းပါးတစ်စိတ်တစ်ပိုင်းအစ ပဲဖြစ်ပါ တော့တယ်၊