ခြေ/ဥပြင်ရေး ဥပဒေကြမ်းများ လွှတ်တော်တင်သွင်းရန် အဆင်သင့်ဖြစ်ပြီ

ဥပဒေကြမ်းနှစ်ရပ်ကို တင်သွင်းရန် လိုအပ်သည့် လွှတ်တော်အမတ် ၂၀ ရာခိုင်နှုန်း၏ လက်မှတ်များကို လာမည့်ကြာသပေးနေ့တွင် ကောက်ခံမည် ဖြစ်သည်။

ဉာဏ်လှိုင်လင်း Myanmar NOW

(မိုးမခ) ဇန်နဝါရီ ၂၁၊ ၂၀၂၀

၂၀၀၈ ဖွဲ့စည်းပုံ အခြေခံဥပဒေပြင်ဆင်ရေး လုပ်ဆောင်နေသည့် ပူးပေါင်းကော်မတီက ဥပဒေကြမ်းနှစ်ရပ်ကို ယနေ့(ဇန်နဝါရီ ၂၀ရက်) အပြီးသတ်ရေးဆွဲ အတည်ပြုလိုက်ပြီဖြစ်ကြောင်း ယင်းကော်မတီအတွင်းရေးမှူး ဒေါက်တာ မြတ်ဉာဏစိုးက ပြောသည်။

၂၀၀၈ ဖွဲ့စည်းပုံအခြေခံ ဥပဒေပါ ပြင်ဆင်ရေးနည်းလမ်း သတ်မှတ်ထားချက်များအရ ပုဒ်မ ၄၃၆ (က)နှင့် အကျုံးဝင်သည့် ပြင်ဆင်ချက်များအတွက် ဥပဒေကြမ်းတစ်ရပ်၊ ပုဒ်မ ၄၃၆ (ခ)နှင့်စပ်လျဉ်းသည့် ပြင်ဆင်ချက်များအတွက် ဥပဒေကြမ်းတစ်ရပ်ဟူ၍ ဥပဒေကြမ်းနှစ်ရပ်ခွဲကာ ပြည်ထောင်စုလွှတ်တော်သို့ တင်သွင်းရမည်ဖြစ်သည်။

ဒေါ်အောင်ဆန်းစုကြည်ကို သမ္မတဖြစ်ခွင့်တားမြစ်ထားသည့် ပုဒ်မ ၅၉(စ)၊ တပ်မတော်၏ နိုင်ငံရေးတွင်ပါဝင်ခွင့် ကဲ့သို့သော အရေးကြီး ပုဒ်မပေါင်း ၉၆ ခုတို့ကို ပြင်ဆင်ရန်မှာ ပြည်ထောင်စုလွှတ်တော်၌ ၇၅ ရာခိုင်နှုန်းကျော် ထောက်ခံမဲရပြီးသည့်အပြင် ပြည်လုံးကျွတ်ဆန္ဒခံယူပွဲကျင်းပရန် လိုအပ်မည်ဖြစ်သည်။

ယင်းအချက်များမှာ ပုဒ်မ ၄၃၆ (က)ဆိုင်ရာ အခြေခံဥပဒေ ပြင်ဆင်ရေး မူကြမ်းတွင်ပါဝင်မည်ဖြစ်သည်။

ပြည်ထောင်စုလွှတ်တော်၌ ၇၅ ရာခိုင်နှုန်းကျော် ထောက်ခံမဲရရုံဖြင့် ပြင်ဆင်နိုင်မည့် ကျန်ပုဒ်မ ၃၀၀ ကျော်နှင့် စပ်လျဉ်းသည့် ပြင်ဆင်ချက်များမှာ ၄၃၆ (ခ)ဆိုင်ရာ အခြေခံဥပဒေ ပြင်ဆင်ရေး မူကြမ်းအတွင်း ပါရှိလာမည် ဖြစ်သည်။

ယင်းဥပဒေကြမ်းပါ ပြင်ဆင်ချက်များမှာ ပါတီအသီးသီးအကြံပြုထားသည့် ၂၀၀၈ ဖွဲ့စည်းပုံအခြေခံ ဥပဒေပါ ပုဒ်မပေါင်း ၄၅၇ ချက်အပေါ် ပြင်ဆင်၊ ဖြည့်စွက်၊ နုတ်ပယ်၊ အစားထိုးသည့် နည်းလမ်းများဖြင့် ယင်းဥပဒေကြမ်းများကို ပြုစုခဲ့ကြခြင်းဖြစ်ကြောင်း ကော်မတီထံမှသိရသည်။

ပူးပေါင်းကော်မတီ၏ ပြင်ဆင်ချက်များနှင့်စပ်လျဉ်း၍ အသေးစိတ်မပြောနိုင်သေးဘဲ ဥပဒေကြမ်းများလွှတ်တော် သို့ ဖြန့်ဝေချိန်ရောက်မှ အသိပေးမည်ဟု ဒေါက်တာမြတ်ဉာဏစိုးကပြောသည်။

“ပြည်သူအများရှင်းရှင်းလင်းလင်း လွယ်လွယ်ကူကူနဲ့မြင်နိုင်အောင်၊ လွှတ်တော်အဆုံးအဖြတ်ရယူချိန်မှာလည်း ရှင်းရှင်းလင်းလင်းဖြစ်အောင် ပုဒ်မ၊ ပုဒ်မခွဲတွေတစ်ခုလုံးအလိုက်ကိုအစားထိုးပါတယ်။ ၂၀၀၈ မူရင်းအခြေခံ ဥပဒေမှာကဒီလို၊ ပြင်ဆင်ရေးပူးပေါင်းကော်မတီက ပြင်ဆင်လိုက်တာက ဒီလိုပါလားလို့ ကွဲကွဲပြားပြား မြင်အောင်ပါ”ဟု ၎င်းကဆိုသည်။

ယင်းဥပဒေကြမ်း ၂ ရပ်ကို ဇန်နဝါရီ ၂၇ ရက်နေ့တွင် ပြန်လည်စတင်မည့် ပြည်ထောင်စုလွှတ်တော် အစည်းအဝေးကာလတွင် တင်သွင်းမည်ဖြစ်သည်။

ယင်းသို့တင်သွင်းနိုင်ရန်အတွက် လွှတ်တော်အမတ် ၂၀ ရာခိုင်နှုန်းထံမှ ထောက်ခံလက်မှတ်ကောက်ခံရန် လိုအပ်မည်ဖြစ်ပြီး သုံးရက်အတွင်း အပြီးသတ်ဆောင်ရွက်ရန် မျှော်မှန်းထားကြောင်း ဒေါက်တာမြတ်ဉာဏစိုးက ပြောသည်။

ပြည်ထောင်စုလွှတ်တော်တွင် အမတ်နေရာ ၆၆၄ နေရာရှိသဖြင့် ယင်း၏ ၂၀ ရာခိုင်နှုန်းဖြစ်သော ၁၃၃ ဦးက ဖွဲ့စည်းပုံ အခြေခံဥပဒေပြင်ဆင်ရန် ထောက်ခံရမည်ဖြစ်သော်လည်း ပြည်ထောင်စုလွှတ်တော်အတွင်း ၅၈ ဒသမ ၅၉ ရာခိုင်နှုန်း နေရာရထားသည့် အမျိုးသားဒီမိုကရေစီအဖွဲ့ချုပ်အတွက်မူ လိုအပ်သည့်အရေအတွက်ထက်ပင် ပိုမိုကျော်လွန်နေပြီဖြစ်သည်။

သို့သော် NLD ပါတီအနေဖြင့်မူ တပ်မတော်အပါအဝင် အခြားသောပါတီအသီးသီး ပါဝင်နိုင်ရန် ဖိတ်ခေါ်ထားသည်ဟု ဒေါက်တာမြတ်ဉာဏစိုးကဆိုသည်။

ယနေ့တွင်ပင် ကော်မတီအစည်းအဝေးသို့ တက်ရောက်လာသူ ၃၀ ဦး၏ လက်မှတ်များရရှိပြီးသကဲ့သို့ အမတ်အများစုတည်းခိုသည့် နေပြည်တော်စည်ပင်ဧည့်ရိပ်သာ ၂ တွင် ဇန်နဝါရီ ၂၃ ရက်၌ပြုလုပ်မည့် ထောက်ခံလက်မှတ်စုဆောင်းပွဲပြီးနောက် ပြည်ထောင်စုလွှတ်တော်နာယကထံ ဥပဒေကြမ်းများပေးပို့နိုင်မည်ဟု ၎င်းကပြောသည်။

“ဒီကနေ့ကော်မတီအစည်းအဝေးမှာကိုပဲ တိုင်းရင်းသားတွေ စုံစုံညီညီလက်မှတ်ရေးထိုးတဲ့အနေအထား ဖြစ်ပါတယ်”ဟု ဒေါက်တာမြတ်ဉာဏစိုးကဆိုသည်။

ပါဝင်လက်မှတ်ရေးထိုးရန်ရှိမရှိ ကော်မတီဝင် တပ်မတော်သားကိုယ်စားလှယ် ဒုတိယဗိုလ်မှူးကြီး မျိုးထက်ဝင်း ထံမေးမြန်းရာ မှတ်ချက်ပြုရန်မရှိဟုဆိုသည်။

၂၀၁၉ ခုနှစ်၊ ဖေဖော်ဝါရီလတွင် ပြည်ထောင်စုလွှတ်တော်ရှိ ပါတီအသီးသီးနှင့် တပ်မတော်သားပါဝင်မှု အချိုးကျစနစ်ဖြင့် စတင်ဖွဲ့စည်းခဲ့သည့် ၄၅ ဦးပါကော်မတီမှာ ၁၁ လနီးပါးသက်တမ်းရှိလာချိန်တွင် ယခုကဲ့သို့ ခြေ/ဥပြင်ရေး ဥပဒေကြမ်း ၂ ရပ်ကို အပြီသတ် ရေးဆွဲနိုင်လိုက်ခြင်းဖြစ်သည်။

အဆိုပါသက်တမ်းအတွင်း အတိုက်အခံများဖြစ်သည့် ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီ၊ ရခိုင် အမျိုးသားပါတီ၊ အမျိုးသားညီညွတ်သော ဒီမိုကရက်တစ်ပါတီတို့မှ ကော်မတီ၌ ကိုယ်စားပြုခွင့်ရထားသူ ငါးဦး နုတ်ထွက်ခြင်း၊ ဇန်နဝါရီ ၂၀ ရက်အပါအဝင် ဥပဒေကြမ်းအပြီးသတ်ရေးဆွဲမှုများ ဆောင်ရွက်ခဲ့သည့် အစည်းအဝေးများ၌ တပ်မတော်နှင့် တိုင်းရင်းသားပါတီအချို့မှ ကိုယ်စားလှယ် ပျမ်းမျှ ၁၆ ဦးခန့် သုံး ကြိမ်တိုင်တိုင် ပျက်ကွက်ခြင်းတို့ ရှိခဲ့သည်။

အစည်းအဝေးပျက်ကွက်သူ များခဲ့သော်လည်း ခြေဥပြင်ဆင်ရေးမူကြမ်း ဇန်နဝါရီ ၂၇တွင် လွှတ်တော်တင်မည်

“ပျက်ကွက်မှုတွေရှိပေမယ့် ကော်မတီဝင် ထက်ဝက်ကျော်တက်တဲ့အတွက် အစည်းအဝေးတွေ အထမြောက်ခဲ့ပါ တယ်”ဟု ဒေါက်တာမြတ်ဉာဏစိုးက ရှင်းပြသည်။

အခြေခံဥပဒေပြင်ဆင်ရေး ပြည်ထောင်စုလွှတ်တော်၌ ကော်မတီဖွဲ့ဆောင်ရွက်နေစဉ် ပြီးခဲ့သည့်နှစ်အတွင်း ပြည်ထောင်စု ကြံ့ခိုင်ရေးနှင့်ဖွံ့ဖြိုးရေးပါတီနှင့် တပ်မတော်တို့က ဥပဒေကြမ်း ၅ခုကို သီးခြားစီတင်သွင်းထားသေးသည်။

ယင်းဥပဒေကြမ်းများတွင် သမ္မတဖြစ်ခွင့်ဆိုင်ရာပုဒ်မ ၅၉(စ)ပါ ကန့်သတ်ချက် များကို တိုင်း၊ ပြည်နယ်အစိုးရအဖွဲ့ဝင်များအထိ ဘောင်ချဲ့သတ်မှတ်ရန်၊ တပ်မတော်၏ ကိုယ်စားပြုသူ ပိုမိုပါဝင်နေသည့် အမျိုးသား ကာကွယ်ရေးနှင့်လုံခြုံရေးကောင်စီ၏ လုပ်ပိုင်ခွင့်ကို ပို၍တိုးမြှင့်ရန် စသည့်ပြင်ဆင်ချက်များ ပါဝင်သည်။

အခြေခံဥပဒေ ပြင်ဆင်ရေးပူးပေါင်းကော်မတီကို တပ်မတော် ထပ်မံကန့်ကွက်

အဆိုပါဥပဒေကြမ်းများကို ပူးပေါင်းကော်မတီက ရေးဆွဲထားသည့် ဥပဒေကြမ်းနှစ်ရပ်နှင့် တစ်ပြိုင်တည်းယှဉ်တွဲ ဆွေးနွေးဆုံးဖြတ်နိုင်ရန်လာမည့် ပြည်ထောင်စုလွှတ်တော်အစည်းအဝေးကာလ အတွင်း လေ့လာစိစစ်ရေး ပူးပေါင်းကော်မတီတစ်ရပ်ထပ်ဖွဲ့ကာ စီစဉ်ဆောင်ရွက်သွားရန်ရှိသည်ဟု ဒေါက်တာ မြတ်ဉာဏစိုးက ပြောသော်လည်း အသေးစိတ်ကိုမူ မသိရသေးပေ။

အခြေခံဥပဒေကြမ်း ၇ ခုနှင့် ပွဲဆူဦးမည့် လွှတ်တော်

၄၅ ဦးကော်မတီ၏ ဥပဒေကြမ်းနှင့်အတူ ပြည်ခိုင်ဖြိုးနှင့်တပ်တို့၏ မူကြမ်းများကို တစ်ပြိုင်တည်း တင်မည်