မြန်မာပြည်မှာ စစ်တပ်အာဏာသိမ်းပြီး ၈ လ ၂ ရက်မြောက်နေ့ မြင်ကွင်း
(မိုးမခ) အောက်တိုဘာ ၃၊ ၂၀၂၁
မတည်မငြိမ်ဖြစ်မှု ၊ စိုးရိမ်ထိတ်လန့်မှုများနဲ့ ကုန်စျေးနှုန်းမြင့်တက်လာနေတဲ့ မြန်မာနိုင်ငံ
တနေ့ တနေ့ လောင်စာဆီဖြစ်တဲ့ ဓါတ်ဆီနဲ့ ဒီဇယ်ဆီစျေးနှုန်းတွေက တလီတာကို ကျပ် ၅၀မှ ၇၀ ထိ နေ့စဥ်လိုလို မြင့်တက်နေပါတယ်။ ပြီးခဲ့တဲ့ ၂ ရက်အကြာက တလီတာ ၁၅၀၀ ကျပ်မရောက်သေးပေမယ့် အောက်တိုဘာ ၂ ရက်နေ့မှာတော့ ၁၅၉၅ ကျပ် ဖြစ်လို့နေပါပြီ။ ဒါက ရန်ကုန်မြို့ရဲ့ စျေးနှုန်းသာ ဖြစ်ပါတယ်။ နယ်မြို့တွေကိုရောက်တဲ့အခါ သယ်ယူပို့ဆောင်စရိတ် အခုလို စျေးကွက်မငြိမ်မသက်ဖြစ်ချိန်မှာ အရောင်းနားထားရတဲ့ လောင်စာဆီအရောင်းဆိုင်တွေ၊ ပြင်ပမှောင်ခိုစျေးလိုမျိုးနဲ့ ဝယ်ယူရတဲ့အခြေအနေတွေ နယ်မြို့တွေမှာ ဖြစ်ပျက်နေတာ ဖြစ်ပါတယ်။ ရခိုင်ပြည်နယ်ရဲ့ အချို့သော မြို့နယ်တွေမှာ ဓါတ်ဆီတဂါလံကို ကျပ် ၁သောင်းခွဲအထိ အပြင်စျေးကွက်မှာ ရောင်းချနေပြီဆိုတဲ့သတင်းတွေလည်း ကြားနေရသလို ၊ ကချင်ပြည်နယ်၊ ချင်းပြည်နယ်၊ ရှမ်းပြည်နယ်တို့လိုဒေသတွေမှာလည်း စက်သုံးဆီစျေးက ရန်ကုန်မြို့ထက် အများကြီး ကြီးမြင့်နေမှာ ဖြစ်ပါတယ်။
လောင်စာဆီစျေး မြင့်တက်တာဟာ လယ်ယာထွက်ကုန်၊ စားသောက်ကုန်စတဲ့ ကုန်ပစ္စည်းတွေကို ပိုပြီး သက်ရောက်နိုင်မှာ ဖြစ်ပါတယ်။ ဥပမာအားဖြင့် စိုက်ပျိုးရေးထွက်ကုန်ဖြစ်တဲ့ ဂေါ်ဖီထုပ်၊ ခရမ်းချဥ်သီး၊ ပန်းမုံလာ၊ အာလူး စတဲ့ ရှမ်းပြည်နယ်ထွက် စိုက်ပျိုးရေးထွက်ကုန်တွေ နကိုကတည်းက စျေးကွက် ပျက်သလိုဖြစ်ပြီး ဝယ်အားကျဆင်းနေချိန်မှာ အခု သယ်ယူပို့ဆောင်ရေး စရိတ်ထပ်မံကြီးမြင့်တဲ့အချက်က ပိုပြီးထိခိုက်နစ်နာစေဦးမှာ ဖြစ်ပါတယ်။
ဆန်၊ အာလူး၊ ကြက်သွန်၊ ရေထွက်ပစ္စည်းစတဲ့ စားသောက်ကုန်တွေ တင်ပို့စရိတ်ကြီးမြင့်လာခြင်းကြောင့် နကိုကတည်းက ငွေလဲနှုန်းကြောင့် စျေးမြင့်တက်နေတဲ့ အခြေခံစားသောက်ကုန်တွေကို ထပ်ပြီးမီးလောင်ရာ လေပင့်သလို ဖြစ်စေမှာ ဖြစ်ပါတယ်။ တဖက်မှာ အလုပ်အကိုင် အခွင့်အလမ်းလျော့ပါးလာနေပြီး အလုပ်လုံးဝရပ်နားမသွားသည့်တိုင် ဝင်ငွေလျော့ကျနေပြီးဖြစ်တဲ့ အောက်ခြေမိသားစုတွေကို အခုလို ကုန်ပစ္စည်းတွေ စျေးနှုန်းမြင့်တက်လာမယ့်အချက်က ထပ်ပြီး အထိနာစေမှာ ဖြစ်ပါတယ်။
ပြီးခဲ့တဲ့ လပိုင်းတွေက ကမ္ဘာ့ဘဏ်၊ ကမ္ဘာ့ကုလသမဂ္ဂ တို့က မြန်မာနိုင်ငံစီးပွားရေး၊ ဆင်းရဲမွဲတေမှုနဲ့ပတ်သက်လို့ ခန့်မှန်းထားတဲ့ရလဒ်တွေဟာ အခုလတ်တလောထပ်ပြီးဆိုးရွားလာတဲ့ အချက်အလက်တွေမပါဝင်သေးပါဘူး။ အဲဒီအချိန်ခန့်မှန်းချိန် ထုတ်ပြန်ချိန်မှာတုန်းက အခုလို ငွေတန်ဖိုးကျတဲ့ ဂယက်တွေ နိုင်ငံခြားငွေလဲနှုန်း မကြုံဖူးလောက်အောင် မြင့်တက်တာတွေ မဖြစ်ပွားသေးပါဘူး။
သတင်းတွေထဲ အစီရင်ခံစာတွေထဲ၊ ခန့်မှန်းချက်တွေထဲက စီးပွားရေး အခြေအနေကိုချည်း မကြည့်ပဲ ကျနော်တို့ပတ်ဝန်းကျင်မှာ ဘာတွေဖြစ်နေလဲကြည့်မယ်ဆိုရင်လည်း စားဝတ်နေရေး ကြပ်တည်းမှုက တရစ်ပြီးတရစ် တင်းကြပ်လာတာ သတိပြုမိနိုင်ပါတယ်။ ရန်ကုန်မြို့ရဲ့ ရပ်ကွက်တွေထဲ စက်ဘီးနဲ့ စျေးရောင်းသူတွေ၊ ဆိုက်ကားနဲ့ စျေးရောင်းသူတွေ၊ လက်တွန်းလှည်းနဲ့ စျေးရောင်းသူတွေ အပြင် တက္ကစီကားလိုမျိုးနဲ့ အသားငါး၊ မီးဖိုချောင်သုံးပစ္စည်းတင်ပြီး ရပ်ကွက်တွေထဲ လိုက်ရောင်းတာတွေကို နေ့စဥ် မြင်တွေ့နေရသလို တနေ့ထက်တနေ့ စျေးရောင်းသူများလာတာ မြင်တွေ့နေရပါတယ်။ ဘုရားပန်း၊ ဟင်းရွက်စုံ၊ ကြက်သား၊ ငါး၊ ကြက်ဥ၊ ဘဲဥ၊ သစ်သီး၊ ကြက်သွန်၊ အာလူး စတာတွေအပြင် မုန့်သည်တွေလည်း မနက်မိုးလင်းတဲ့အချိန်က စလို့ညနေ မှောင်ခါစထိ စျေးသည်တွေရဲ့ အော်သံ လက်ကိုင်စပီကာသံတွေက အဆက်မပြတ် လောက်အောင် ကြားနေရတာပါ။
အပြင်မှာစျေးရောင်းသလိုပဲ အွန်လိုင်းပေါ်မှာလည်း အစားအသောက်တွေ အဝတ်အစား၊ အသုံးအဆောင်၊ ဆန်၊ စားဆီ စတဲ့ မရှိမဖြစ် အိမ်သုံးပစ္စည်းနဲ့ အစားအသောက်တွေ အွန်လိုင်းပေါ်မှာ အပြည့်ဖြစ်လာနေပါတယ်။ အရင်က စျေးတခါမျှ မရောင်းဖူးတဲ့ ကိုယ့်ရဲ့ အသိမိတ်ဆွေတွေအများအပြားလည်း အွန်လိုင်းမှာ စျေးရောင်းသူတွေ ဖြစ်လာနေတာ တွေ့နေရပါတယ်။ အခုလို အွန်လိုင်းမှာ စျေးရောင်းတာတွေ တရှိန်ထိုးများပြားလာတာဟာ အလုပ်အကိုင် အခွင့်အလမ်းရှားပါးလာတာကို ပြသတဲ့ လက္ခဏာ ဖြစ်ပါတယ်။
အလုပ်အကိုင် အခွင့်အလမ်းတွေရှားပါးလာတဲ့ အကြောင်းအချက်တွေအနက် နံပါတ်တစ်က စစ်အာဏာသိမ်းတာဖြစ်ပါတယ်။ ကိုဗစ်ကန့်သတ်ချက်တွေကြောင့် ဖျော်ဖြေရေးလုပ်ငန်း၊ စားသောက်ဆိုင်လုပ်ငန်း ဟိုတယ်နဲ့ ခရီးသွားလုပ်ငန်း အခမ်းအနား ပွဲလမ်းသဘင်တွေက ရပ်နားထားရတာ နှစ်ချီရှိလာချိန်မှာ အပြီးတိုင် ရပ်နားလိုက်ရတဲ့ စားသောက်ဆိုင်တွေ၊ ဖျော်ဖြေရေး လုပ်ငန်းတွေ ရှိသလို ဟိုတယ်နဲ့ ခရီးသွားလုပ်ငန်းတွေလည်း ပြန်လည် နလံထဖို့ မျှော်လင့်ချက်မမြင်နိုင်သေးတဲ့ အခြေအနေမှာ စစ်အာဏာသိမ်းမှုကြောင့် ပိုပြီးဆိုးရွားတဲ့ အကျိုးဆက်တွေ အထက်က လုပ်ငန်းတွေတင်မက အထည်ချုပ်လုပ်ငန်းလို ကုန်သွယ်မှု လုပ်ငန်းတွေအထိ ထပ်မံထိခိုက်စေခဲ့တာပါ။
ကိုဗစ်မတိုင်မီ၊ စစ်အာဏာသိမ်းမှု မတိုင်မီ ရန်ကုန်မြို့ရဲ့ အချက်အချာကျတဲ့နေရာတွေမှာ ဖွင့်လှစ်ထား ဖွင့်လှစ်ဆဲ အဝတ်အထည်ဆိုင်၊ အလှကုန်ဆိုင်၊ နိုင်ငံတကာ အမှတ်တံဆိပ် နဲ့ ဝန်ဆောင်မှု အစားအသောက်၊ လက်လီစတိုးစတဲ့ လုပ်ငန်းတွေ တဖြည်းဖြည်းနဲ့ ရပ်နားထားတာ ၊ ပိတ်သိမ်းလိုက်တာတွေ သိသိသာသာ မြင်တွေ့နေရပါတယ်။ နေရာကျယ်ကျယ်ယူထားတဲ့ ဟော့ပေါ့ဆိုင်ကြီးတွေလို ၊ ကေတီဗွီတွေ၊ လူလတ်တန်းစားကို ပစ်မှတ်ထားတဲ့ စားသောက်ဆိုင် ၊ ဘီယာဆိုင်တွေ အများအပြားကိုဗစ်ကန့်သတ်ချက်ကြောင့်ရော စစ်အာဏာသိမ်းပြီးနောက်ထုတ်ပြန်ထားတဲ့ ညမထွက်ရ အမိန့်ကြောင့်ပါ မလည်ပတ်နိုင်ကြသလို အများအပြား အပြီးတိုင် ပိတ်သိမ်းလိုက်ကြတာလည်း ဖြစ်ပါတယ်။
ဆိုင်ခန်းငှားမည် သို့ ရောင်းမည်ဆိုတဲ့ ဆိုင်းဘုတ်တွေ ရန်ကုန်မြို့ဟိုနားသည်နားမှာ အများအပြားတွေ့နေကြရပါတယ်။ ရန်ကုန်မြို့ရဲ့ လူစည်ကားရာ လမ်းဆုံ လမ်းထောင့်တွေမှာ နေရာကျယ်ကျယ်နဲ့ ဖွင့်ကြတဲ့ လက်ဖက်ရည်ဆိုင်ကြီးတွေလည်း တနှစ်ကျော်ကြာလာတဲ့ ဆိုင်ထိုင် ဧည့်သည်လက်မခံရတဲ့ ကိုဗစ်ကန့်သတ်ချက်ကို တောင့်ခံဖို့ မလွယ်ကူကြတော့ပါဘူး၊ အရင် ပုံမှန်အခြေအနေမှာ အလုပ်သမား ၃၀၊ ၄၀ လောက်ရှိတဲ့ လက်ဖက်ရည်ဆိုင်ကြီးတွေအနေနဲ့ အခုတော့ ၅ ယောက် ၁၀ ယောက်လောက်သာ ခန့်ထားနိုင်ကြတာတွေ့ရပါတယ်။
ဒီအခြေအနေတွေက ရန်ကုန်ရဲ့ စီးပွားရေး လူတွေရဲ့ အလုပ်အကိုင် အခွင့်အလမ်း အခြေအနေပဲ ဖြစ်ပါတယ်။ နယ်တွေက အခြေအနေက ရန်ကုန်နဲ့မတူပဲ မိမိတို့အိမ်တွေ ၊ လယ်တွေ စိုက်ခင်းတွေ ကျွဲ နွား ဝက် ဆိတ်တွေကို ထားခဲ့ရပြီး စစ်ကောင်စီတပ်တွေဝင်လာလို့ ထွက်ပြေးရတဲ့အခြေအနေ စိုက်ပျိုးရာသီလည်း မစိုက်ပျိုးနိုင်တဲ့အခြေအနေ အသက်တွေဆုံးရှုံးရတဲ့အခြေအနေတွေကို ရင်ဆိုင်နေရပြီး ပိုပြီးဆိုးရွားတဲ့အနေအထားဆိုတာသတင်းတွေထဲ မြင်နေတွေ့နေကြရတာ ဖြစ်ပါတယ်။
မြန်မာနိုင်ငံဟာ ကျရှုံးတဲ့ နိုင်ငံတနိုင်ငံမဟုတ်သေးဘူးဆိုသည့်တိုင် အဲဒီလားရာကို ဦးတည်သွားနေတဲ့ နိုင်ငံတနိုင်ငံဖြစ်လို့နေတာတော့အမှန်ပဲ ဖြစ်ပါတယ်။
t.me@moemaka
#MoeMaKaMedia
#WhatsHappeningInMyanmar
.png)
Posts
