ကိုကျော်(မြစ်ကြီးနား) - သမ္မတဂျိုးဘိုင်ဒန် ရဲ့ ဇန်နဝါရီ ၆ ရက်နေ့ မိန့်ခွန်း
သမ္မတဂျိုးဘိုင်ဒန် ရဲ့ ဇန်နဝါရီ ၆ ရက်နေ့ မိန့်ခွန်း
ကိုကျော်(မြစ်ကြီးနား)
(မိုးမခ) ဇန်နဝါရီ ၈၊ ၂၀၂၂
ဇန်နဝါရီ ၆ ရက်နေ့ ကွန်ကရက်လွှတ်တော်ရုံးကို အကြမ်းဖက်တိုက်ခိုက်ခဲ့မှု တစ်နှစ်ပြည့်တဲ့နေ့မှာ သမ္မတဂျိုးဘိုင်ဒန်က မိန့်ခွန်းပြောကြားခဲ့ပါတယ်။ သမ္မတဖြစ်ပြီးနောက် ဂျိုးဘိုင်ဒန် ပြောကြားခဲ့တဲ့ မိန်းခွန်းတွေထဲမှာ ဇန်နဝါရီ ၆ ရက်နေ့ မိန့်ခွန်းက အကောင်းဆုံးတစ်ခုဖြစ်ပြီး အခုလိုပြောခဲ့မယ်လို့ ဘယ်သူကမှ မျှော်လင့်မထားခဲ့ဘူးလို့ သုံးသပ်ကြပါတယ်။
မိန့်ခွန်းထဲမှာ ဂျိုးဘိုင်ဒန်က ယခင်သမ္မတဟောင်း ဒေါ်နယ်ထရမ့်ရဲ့ နာမည်ကို ပြောဆိုသုံးနှုန်းခြင်းမရှိဘဲ ထရမ့်ကို ပက်ပက်စက်စက် ဝေဖန်ခဲ့ပါတယ်။ လွန်ခဲ့တဲ့တစ်နှစ်က ဒီနေ့လိုရက်မှာ ထရမ့်ကို အားပေးထောက်ခံသူ လူတစ်အုပ်က ကွန်ကရက်လွှတ်တော်ရုံးသို့ ချီတက်ခဲ့ပြီး အကြမ်းဖက်တိုက်ခိုက်ခဲ့မှု နဲ့ ၂၀၂၀ သမ္မတရွေးကောက်ပွဲနှင့် ပတ်သက်ပြီး ထရမ့်ကိုယ်တိုင်က လိမ်လည်မှုများဖန်တီးကာ ဆူပူအကြမ်းဖက်မှုကို လှုံ့ဆော်ပေးခဲ့တယ်လို့ ဘိုင်ဒန်က ရှုတ်ချခဲ့ပါတယ်။
ဂျိုးဘိုင်ဒန်ရဲ့ ဇန်နဝါရီ ၆ ရက် မိန့်ခွန်းထဲမှ လူမှုကွန်ယက်မှာ လူကြိုက်များတဲ့ မိန့်ခွန်းအပိုင်းအစတချို့ကို ဖော်ပြလိုက်ပါတယ်။
* * *
"အမေရိကန်သမိုင်းမှာ ပထမဆုံးအကြိမ်အဖြစ် သမ္မတတစ်ဦးက ရွေးကောက်ပွဲမှာ ရှုံးနိမ့်ခဲ့ရုံမျှမက ငြိမ်းချမ်းစွာ အာဏာလွှဲပြောင်းရေးကို ဟန့်တားဖို့ကြိုးစားခဲ့ပြီး အကြမ်းဖက်လူတစ်စုမှ ကွန်ကရက်လွှတ်တော်ကို တိုက်ခိုက်ခဲ့ပါတယ်။ ဒါပေမဲ့ သူတို့ မအောင်မြင်ခဲ့ပါဘူး၊ သူတို့ ရှုံးနိမ့်ခဲ့ပါတယ်။ ဒါကြောင့် အမှတ်တရအနေနဲ့ ဒီနေ့လိုမျိုးရက်မှာ အလားတူတိုက်ခိုက်မှုမျိုး ဘယ်တော့မှ ထပ်ပြီးမဖြစ်အောင် ကျနော်တို့သေချာအောင်လုပ်ဖို့ လိုအပ်ပါတယ်"
"ဆန္ဒပြသူများက ဆူပူသောင်းကျန်းရင်း ကွန်ကရက်လွှတ်တော်ထဲမှာ ပထမဆုံးအကြိမ်အဖြစ် အမေရိကန်ကို ဖျက်ဆီးမဲ့ သင်္ကေတတစ်ခုဖြစ်တဲ့ confederate အလံကိုကိုင်ပြီး ဝှေ့ယမ်းခဲ့ပါတယ်။ အမေရိကန် ပြည်တွင်းစစ်အတွင်းမှာတောင် ဒီလိုမျိုးဘယ်တော့မှ မဖြစ်ခဲ့ပါဘူး။ ဒါပေမဲ့ ၂၀၂၁ ခုနှစ်မှာ ဖြစ်ခဲ့ပါတယ်။ ဆူပူမှုမှာ ဘာတွေမြင်ခဲ့ရသလဲ? လွှတ်တော်ထဲက ပြူတင်းပေါက်တွေ ရိုက်ခွဲခဲ့တယ်၊ တံခါးတွေကို ကန်ကျောက်ခဲ့တယ်၊ အမေရိကန်အလံတိုင်တွေကို လှံလက်နက်တွေအဖြစ် သုံးခဲ့တယ်။ မီးသတ်ဘူးတွေနဲ့ ရဲအရာရှိတွေကို ပစ်ပေါက်ခဲ့တယ်။ ရဲအရာရှိပေါင်း ၁၄၀ ကျော် ဒဏ်ရာရခဲ့ကြတယ်။ ရဲအရာရှိတစ်ဦး ပြောခဲ့တာက အလယ်ခေတ်တုန်းကတိုက်ပွဲနဲ့ အလားတူပြီး၊ အီရတ်မှာတိုက်ပွဲဝင်ခဲ့တာထက် အဲဒီနေ့ကို ပိုပြီးကြောက်ရွံ့ခဲ့ရတယ်လို့ ပြောခဲ့ပါတယ်။"
"ဆူပူတိုက်ခိုက်မှုမှာ ကျနော်တို့ မမြင်ခဲ့တာက ဘာလဲ? ကျနော်တို့ မမြင်ခဲ့တာက အကြမ်းဖက်လူတစ်စုကို စည်းရုံးခေါ်ဆောင်ခဲ့တဲ့ ယခင်သမ္မတဟောင်းတစ်ဦးက အိမ်ဖြူတော်ရုံးခန်းမှာ ထိုင်နေရင်း အဖြစ်အပျက်တွေကို ရုပ်မြင်သံကြားကတဆင့် နာရီအတော်ကြာကြည့်ခဲ့ပြီး ဘာတစ်ခုမှ မလုပ်ခဲ့ပါဘူး။ ရဲတွေ တိုက်ခိုက်ခံနေရတယ်၊ လူ့အသက်တွေ အန္တရာယ်ကျနေရတယ်၊ တိုင်းပြည်ရဲ့ လွှတ်တော်ရုံးက အဝိုင်းခံတိုက်ခိုက်ခံနေရပါတယ်။"
"တိုင်းပြည်ရဲ့အကျိုးနဲ့ အမေရိကန်ပြည်သူတွေရဲ့အကျိုးတို့ထက် သူ့ရဲ့ကိုယ်ကျိုးက ပိုပြီးအရေးကြီးတယ်လို့ သူ မြင်ပါတယ်။ ဘာကြောင့်လဲဆိုတော့ ပွန်းပဲ့နေတဲ့ သူ့ရဲ့အတ္တက ကျနော်တို့ရဲ့ ဒီမိုကရေစီ သို့မဟုတ် ကျနော်တို့ရဲ့ ဖွဲ့စည်းပုံအခြေခံဥပဒေတို့ထက် ပိုအရေးကြီးနေတာကြောင့် ဖြစ်ပါတယ်။ အမေရိကန် ဆီးနတ်အမတ် ၉၃ ဦး၊ သူရဲ့ရှေ့နေချုပ်၊ သူရဲ့ဒုတိယသမ္မတ၊ ရွေးကောက်ပွဲ အကြိတ်အနယ်ဖြစ်ခဲ့တဲ့ ပြည်နယ်မြို့နယ်တို့က အုပ်ချုပ်ရေးမှုးတွေကအစ အားလုံးက သူရှုံးပါတယ်လို့ ပြောခဲ့ကြတာတောင် ရှုံးနိမ့်မှုကို သူ လက်မခံနိုင်ခဲ့ပါဘူး။ အမေရိကန်သမိုင်းမှာ ဘယ်သမ္မတတစ်ဦးကမှ မလုပ်ခဲ့တာကို သူ လုပ်ခဲ့တယ်။ ရွေးကောက်ပွဲတစ်ခုရဲ့ အဖြေရလဒ်နဲ့ အမေရိကန်ပြည်သူများရဲ့ ဆန္ဒသဘောထားတွေကို လက်ခံဖို့ သူက ငြင်းဆန်ခဲ့တာ ဖြစ်ပါတယ်"
"ဒီနေရာမှာ အမှန်တရားကို ပြောပြမယ်။ ၂၀၂၀ ရွေးကောက်ပွဲဟာ အမေရိကန်သမိုင်းမှာ ဒီမိုကရေစီကို ဖော်ပြတဲ့ အကြီးကျယ်ဆုံးတစ်ခု ဖြစ်ပါတယ်။ မဲဆန္ဒရှင် သန်း ၁၅၀ ကျော်တို့က ကပ်ရောဂါအတွင်း အဲဒီနေ့မှာ မဲရုံကိုသွားရောက်ပြီး မဲပေးခဲ့ကြပါတယ်။ အဲဒီလူတွေက ချီးကျူးခံရဖို့သင့်ပြီး အတိုက်ခိုက်ခံရဖို့ မဟုတ်ပါဘူး။"
"၂၀၂၀ မှာဖြစ်ခဲ့တာကို ရှင်းရှင်းလင်းလင်း ပြောကြရအောင်။ ပထမဆုံး ဆန္ဒမဲတစ်ခု မထည့်ရခင်ကတည်းက သမ္မတဟောင်းက ရွေးကောက်ပွဲရလာဒ် နဲ့ ပတ်သက်ပြီး သံသယတွေဖြစ်အောင် ကြိုတင်အစပျိုးခဲ့ပါတယ်။ အထောက်အထား အချက်အလက် တစ်ခုမျှမရှိဘဲနဲ့ သူ့ရဲ့လိမ်လည်မှုကို လပေါင်းများစွာကတည်းက အကောင်အထည်ဖော်ခဲ့ပါတယ်။ အမှန်တရားကို ဖုံးကွယ်ဖို့အတွက် ကြိုတင်ဆင်ခြေတစ်ခုကို သူ ရှာဖွေခဲ့တယ်။ သူက ယခင်သမ္မတဟောင်းတစ်ယောက် ဖြစ်ရုံတင်မကဘဲ ရှုံးနိမ့်ခဲ့တဲ့ သမ္မတဟောင်းတစ်ယောက် ဖြစ်ပါတယ်။ လုံးဝလွတ်လပ်ပြီး တရားမျှတမှုရှိတဲ့ ရွေးကောက်ပွဲမှာ သူဟာ မဲဆန္ဒအရေအတွက် ၇ သန်းကျော်နဲ့ ရှုံးနိမ့်ခဲ့ပါတယ်"
"သင် အနိုင်ရမှပဲ သင့်တိုင်းပြည်ကို ချစ်လို့မရပါဘူး၊ အဆင်ပြေမှပဲ ဥပဒေကို လိုက်နာလို့မရပါဘူး၊ လိမ်ညာမှုတွေကို လက်ခံဖန်တီးပြီး မျိုးချစ်စိတ်ရှိလို့ မရပါဘူး"
"ဒီမိုကရေစီက ဘယ်လောက်ခက်ခဲတယ်ဆိုတာ ကျနော် သိပါတယ်၊ ပြီးတော့ အမေရိကန်က ကြုံတွေ့နေရတဲ့ ခြိမ်းခြောက်မှုတွေနဲ့ ပတ်သက်ပြီး ရှင်းရှင်းလင်းလင်း နားလည်ပါတယ်။ ဒါပေမဲ့ အမှောင်မိုက်ဆုံးနေ့တွေက မျှော်လင့်ချက် အလင်းရောင်တွေဆီ ခေါ်ဆောင်သွားနိုင်တယ် ဆိုတာကိုလည်း သိထားပါတယ်။ ဒုသမ္မတ ကိုးကားခဲ့သလိုပဲ ပုလဲဆိပ်ကမ်းမှာ သေကျေပျက်စီးခဲ့ရမှုကနေ ဖက်ဆစ်အင်အားစုအပေါ် အောင်မြင်မှုကို ရနိုင်ပါတယ်။ Edmund Pettus Bridge ကြမ်းတမ်းရက်စက်တဲ့ သွေးစွန်းတဲ့တနင်္ဂနွေမှတဆင့် သမိုင်းဝင် မဲဆန္ဒထည့်ခွင့်ဥပဒေတစ်ခု ပေါ်ထွက်ခဲ့ပါတယ်။"
"လွန်ခဲ့တဲ့တစ်နှစ် ဒီနေ့လိုရက်မျိုး ကွန်ကရက်လွှတ်တော် တိုက်ခိုက်မှုကို ကျနော် ရှာဖွေခဲ့တာ မဟုတ်ပါဘူး၊ ဒါပေမဲ့ တိုက်ခိုက်မှုကြောင့် တုန်လှုပ်သွားမှာလည်း မဟုတ်ပါဘူး။ ဒီလိုလုပ်ရပ်မျိုးကို ကျနော်ရှေ့ကရပ်တည်ပြီး တိုင်းပြည်ကို ကာကွယ်သွားမှာပါ။ နောက်ပြီးတော့ မည်သူတစ်ဦးတစ်ယောက်ကိုမှ ဒီမိုကရေစီရဲ့ လည်ချောင်းကို ဓားနဲ့လာထောက်ဖို့ ကျနော် ခွင့်ပြုမှာ မဟုတ်ပါဘူး။"
(ကိုးကား။ ။ NPR - Jan 6,2022, Read President Biden's Jan. 6 speech in full)
t.me@moemaka
#MoeMaKaMedia
#WhatsHappeningInMyanmar