Breaking News

သီအိုဇော် - အာဏာရှင်တို့အတွက် သတင်းဆိုးများဖန်တီးသည့် သတင်းသမားကောင်းများ



သီအိုဇော် - အာဏာရှင်တို့အတွက် သတင်းဆိုးများဖန်တီးသည့် သတင်းသမားကောင်းများ

(မိုးမခ) ဇွန် ၂၁၊ ၂၀၂၂

သတင်းစာနယ်ဇင်းသမားကောင်းများဆိုတာ အာဏာရှင်တိုင်းအတွက် အိပ်မက်ဆိုးပါ၊ ဒီသတင်းသမားတွေရဲ့ ဖေါ်ထုတ်ရေးသားမှုတွေဟာလည်း သူတို့အတွက်တော့ သတင်းဆိုးတွေပဲ ဖြစ်လို့နေပါတယ်။ ဒီလိုအာဏာရှင် များရဲ့ လူအခွင့်အရေးဖေါက်ဖျက်မှု၊ အကျင့်ပျက်ခြစားမှု့ ၊ဖိနှပ်ချုပ်ချယ်မှု့၊ ညှင်းပမ်းနှိပ်စက် သတ်ဖြတ်မှုတွေ ကို သတ္တိရှိရှိ ရဲရဲဝံ့ဝံ့ ရေးသားဖေါ်ပြနေကြတဲ့ သတင်းသမားတွေ၊သတင်းစာဂျာနယ်တွေ ကမ္ဘာအနှံ့မှာ ရှိကြ ပါတယ်။ဒီအထဲမှာ ရုရှားနိုင်ငံက ‘နိုဗာရာဂဇက်တာ’(Novaya Gazeta) သတင်းစာလည်းပါဝင်ပါတယ်။

ဒီသတင်းစာရဲ့ အယ်ဒီတာချုပ်နဲ့ တည်ထောင်ခဲ့သူတဦးဖြစ်သူ ’ဒီမီထရီ မူရာတောဗ့်’(Dmitry Muratov)ဟာ ၂၀၂၁ခုနှစ်အတွက် နိုဘယ် ငြိမ်းချမ်းရေးဆုကို ပူးတွဲ‌ပေးအပ်ခံရသူတဦး ဖြစ်ပါတယ်။‘ နိုဗာရာဂဇက်တာ’သ တင်းစာဟာ နိုဘယ်ဆုနဲ့ရေစက်ရှိတယ်လို့ ပြောရလေမလား၊ ဒီသတင်းစာရဲ့ အစုရှယ်ယာဝင်တဦးဟာ နိုဘယ် ငြိမ်းချမ်းရေးဆုရှင် ယခင်ဆိုဗီယက်သမ္မတ ‘မီခေးလ်ဂေါ်ဘာချက်ဗ်’ဖြစ်လို့ပါ။ဒါပေမယ့် မီဒီယာများမှာ ရေး ကြသလို သူချီးမြှင့်ခံရတဲ့ နိုဘယ်ငြိမ်းချမ်းရေး ဆုကြေးငွေတွေနဲ့ မတည်ခဲ့ခြင်းတော့မဟုတ်၊ သူ့ရဲ့ဇနီး ‘ရေစာ’ (Raisa Gorbachev)ရေးသားတဲ့ ‘I Hope’စာအုပ်ရောင်းရငွေအချို့ကို သတင်းစာတိုက်အတွက် အသုံးပြုခဲ့တာ ဖြစ်တယ်ဆိုပြီး ‘ဒီမီထရီ’က နိုဘယ်ဆုရရှိကြောင်း ကြေညာပြီး မကြာမီ ‘UN News’နဲ့ အင်တာဗျူးစဥ်မှာ ဖြေ ကြားခဲ့ဖူးပါတယ်။

’ဒီမီထရီ မူရာတောဗ့်’ကို နိုဘယ်ငြိမ်းချမ်းရေးဆုပေးခဲ့စဥ်က ဆုရွေးချယ်ရေးကော်မတီရဲ့ မှတ်ချက်မှာ ‘ဒီမိုက ရေစီ’နဲ့ရေရှည်ငြိမ်းချမ်းရေး တည်တံ့စေရေးအတွက် အခြေခံလိုအပ်ချက်ဖြစ်တဲ့ လွတ်လပ်စွာ ထုတ်ဖေါ် ပြောဆိုခွင့်ကို ခုခံကာကွယ်ပေးတဲ့အတွက်’ ဆုပေးအပ်ရခြင်းလို့ ဆိုခဲ့ပါတယ်။ မွေးရာပါ အခွင့်အရေး လို့ လည်း သတ်မှတ်ထားကြတဲ့ ဒီအရာဟာ အာဏာရှင်နိုင်ငံများမှာ အဖိုးအခ ကြီးမားလှပါတယ်။ ပူတင်အစိုး ရရဲ့ လူ့အခွင့်အရေးဖေါက်ဖျက်ခြင်း၊အဂတိလိုက်စားခြင်း၊စီမံခန့်ခွဲမှု မှားယွင်းခြင်းများအပေါ် အစဥ်တ စိုက် ဝေဖန်ထောက်ပြလေ့ရှိတဲ့ ‘နိုဗာရာဂဇက်တာ’သတင်းစာဟာ ဂျာနယ်လစ်(၆)ယောက် အသက်ဆုံးရှုံးခဲ့ရဖူးပါ တယ်။ဒီလိုလုပ်ကြံခံရခြင်းများဟာ ရုရှားသတင်းမီဒီယာလောကမှာ ‘နိုဗာရာဂဇက်တာ’ သတင်းစာတိုက်က ကျန်တဲ့သတင်းဌာနများနဲ့ယှဥ်ရင် အများဆုံးပါပဲ။

အခုယူကရိန်းကျူးကျော်မှုနောက်ပိုင်းမှာ အကြိမ်ကြိမ်သတိပေးခံရပြီးနောက် နိုင်ငံတွင်းသတင်းစာထုတ်ဝေမှု ရပ်နားသွားခဲ့ရပါပြီ။ ဓမ္မနဲ့အဓမ္မယှဥ်လာတိုင်း ဘယ်ဘက်မှာရပ်တည်မှာလဲ ဆိုတဲ့မေးခွန်းကို မေးကြည့်ဖို့ တောင်မလိုတဲ့ ‘နိုဗာရာဂဇက်တာ’ သတင်းစာတိုက်က သတင်းသမားများဟာ ရှောင်ယင်းတိမ်းယင်းနဲ့ ပြည် ပကနေ ရေးသားဖြန့်ဝေနေကြပါတယ်။ ’ဒီမီထရီ မူရာတောဗ့်’ကိုယ်တိုင်လည်း ယူကရိန်းသမ္မတ ‘ဇလဲန်း စ ကီး’နဲ့ အွန်လိုင်းတွေ့ဆုံမှုတခုမှာ ပါဝင်ပြီးနောက် သတိပေးခံထားရပါတယ် ။ ဧပြီ(၇)ရက်နေ့တုန်းက မော်စကို မြို့ကနေ သူ့မွေးရပ်မြေ‘ဆမ်မရာ’မြို့ (Samara)ရထားနဲ့ ခရီးသွားတုန်း ‘အက်ဆီတုန်း’နဲ့စပ်ထားတဲ့ အနီရောင် ဆေးနဲ့ပက်ပြီး ရန်ပြုတာ ကြုံခဲ့ရပြန်ပါတယ်။ ဒီဖြစ်ရပ်နောက်ကွယ်မှာ ရုရှားထောက်လှမ်းရေးရှိတယ်ဆိုပြီး အမေရိကန်အစိုးရဘက်က ယူဆထားတယ်လို့ ‘ဝါရှင်တန်ပို့စ်’ က ဖေါ်ပြထားခဲ့ပါတယ်။

အပြည်ပြည်ဆိုင်ရာဒုက္ခသည်နေ့ဖြစ်တဲ့ ဇွန်လ(၂၀)ရက်နေ့မှာ ’ဒီမီထရီ မူရာတောဗ့်’က သူကြေညာထားတဲ့အ တိုင်း သူ့ရဲ့နိုဘယ်ဆုတံဆိပ်ကို ‘Heritage Auctions’ကတဆင့် လေလံတင်ရောင်းချခဲ့လို့ ဒေါ်လာ(၁၀၃.၅) သန်းရရှိခဲ့ပါတယ်။ဒါဟာနိုဘယ်ဆုတံဆိပ် လေလံရောင်းချမှုသမိုင်းမှာ စံချိန်တင်လိုက်ခြင်းပဲ။ ဒီရရှိလာတဲ့ ငွေတွေအားလုံးကို ယူနီဆက်ဖ်က ဆောင်ရွက်နေတဲ့ စစ်ဘေးသင့် ယူကရိန်း ကလေးငယ်များအတွက် လူသား ချင်းစာနာထောက်ထားမှု အကူအညီပေးရေးမှာ အသုံးပြုသွားမယ်လို့ သိရှိထားရပါတယ်။ နိုဘယ်ဆုကော်မတီကလည်း ဒီအစီအစဥ်ကို အားပေးထောက်ခံတယ်လို့ ဆိုပါတယ်။

နိုဘယ်ငြိမ်းချမ်းရေးဆု လက်ခံရယူစဥ်တုန်းက ပြောကြားခဲ့စဥ်မှာ ဒီဆုဟာ သူဆုံးရှုံးခဲ့ရတဲ့ လုပ်ဖေါ် ကိုင် ဖက်များနဲ့လည်း သက်ဆိုင်ကြောင်းပြောပြီး ထိုဂျာနယ်လစ်(၆)ဦးရဲ့အမည်အားလုံးကို ရွတ်ပြခဲ့ပါတယ်။

ဒီသတင်းသမားများအနက် ‘အဲန်နာ ပိုလစ်ကောဗ့်စ်ကေယာ’(Anna Politkovskaya)က ပိုထင်ရှားသူလို့ ဆိုရပါ မယ်။သူမဟာ ဆုများချီးမြှင့်ခံခဲ့ရတဲ့ ‘စုံစမ်းစစ်ဆေးမှုဆိုင်ရာ ဂျာနယ်လစ်’ (Investigative Journalist)တ ယောက်ဖြစ်ပြီး ရေးသားဖေါ်ထုတ်ခဲ့တဲ့ အလုပ်များအနက် ဖမ်းဆီးခြိမ်းခြောက်ခံရတဲ့ကြားက သတ္တိရှိရှိ ဇွဲအ ပြည့်နဲ့ ရေးသားခဲ့တဲ့ ‘ချေချင်းညာ’စစ်ပွဲအကြောင်းက လူသိများပါတယ်။ထင်ရှားတဲ့ ‘ပူတင်’ဝေဖန်ရေးသမား တယောက်လည်း ဖြစ်ပါတယ်။

‘ချေချင်းညာ’ဒေသကို အခေါက်ခေါက်အခါခါ ခရီးထွက်ခဲ့တာ အကြိမ်(၅၀)ကျော်ခဲ့တယ် ဆိုရင်ပဲ သူမ စိုက် ထုတ်ခဲ့တဲ့ လုံ့လကို သတိပြုမိကြပါလိမ့်မယ်။ ချေချင်းညာအကြောင်း A Dirty War: A Russian Reporter in Chechnya (2001)၊A Small Corner of Hell: Dispatches from Chechnya(2002)နဲ့ Putin’s Russia (2003)တို့ အပါအဝင် အခြားထင်ရှားတဲ့ စာအုပ်များ ရေးသားခဲ့သူဖြစ်ပါတယ်။

‘ရုရှား-ချေချင်းညာ’ ပဋိပက္ခများဟာ ရာစုနှစ်နဲ့ချီခဲ့တယ်လို့ ဆိုနိုင်ပါတယ်။ ၁၉၉၉ခုနှစ် ဩဂုတ်လ (၉)ရက် နေ့ မှာ ‘ပူတင်’ဟာ ရုရှားသမ္မတ‘ဘောရစ်ယဲလ်ဆင်’(Boris Yeltsin)ရဲ့ အစိုးရအဖွဲ့မှာ ဝန်ကြီးချုပ် ဖြစ်လာခဲ့ပါ တယ်။ ဒါဟာ ထောက်လှမ်းရေး အကြီးအကဲနေရာက နိုင်ငံရေးနယ်ပယ်ကို ခြေလှမ်းစတင်ခဲ့ခြင်းပါ။ သူ့လက် ထက်မှာ ချေချင်းညာ ဒုတိယစစ်ပွဲ အရှိန်မြင့်တက်ခဲ့ပြီး ‘SS-21’လို ပဲ့ထိန်းဒုံးကျည်များကိုပင် အသုံးပြုတိုက် ခိုက်ခဲ့တာဖြစ်ပါတယ်။ ချေချင်းညာမြို့တော် ‘ဂရောစ့်နီ’(Grozny)ဟာ စစ်ဒဏ်ကြောင့် ကြီးမားစွာပျက်စီးခဲ့ ရပြီး ၂၀၀၃ခုနှစ် မှာ ကုလသမဂ္ဂမှ ကော်မရှင်အဖွဲ့ လာရောက်စစ်ဆေးခဲ့ပြီး ဒုတိယကမ္ဘာစစ်နောက်ပိုင်း အ ဖျက်ဆီးခံရဆုံးမြို့ အဖြစ်ကြေညာခဲ့ပါတယ်။အမျိုးသားရေးဝါဒီများဟာ စစ်ပွဲများကို စည်းရုံးရေးလက်နက် အဖြစ် သုံးလေ့သုံးထ ရှိတတ်ကြပါတယ်။ ချေချင်းညာ စစ်ပွဲရလဒ်ကြောင့် ‘ပူတင်’ဟာလူကြိုက်များလာပြီး ၂၀၀၀ ခုနှစ် မတ်လရွေး ကောက်ပွဲမှာ သမ္မတအဖြစ် ရွေးကောက်ခံခဲ့ရပါတယ်။

အခုဆိုရင် ရုရှားရဲ့ ယူကရိန်းကျူးကျော်တိုက်ခိုက်မှုကို မျက်မြင်တွေ့နေကြသူများအနေနဲ့ ချေချင်းညာ စစ်ပွဲ အတွင်း ရုရှားစစ်တပ် ဘယ်လိုအင်အားသုံး တိုက်ခိုက်ခဲ့မယ်ဆိုတာကို မှန်းဆကြည့်နိုင်ပါတယ်။ပြောရမယ်ဆို ရင် နှစ်ဖက်လုံးက အကြမ်းဖက်တိုက်ခိုက်မှု၊လူ့အခွင့်အရေးချိုးဖေါက်မှုတွေ ကျူးလွန်ခဲ့ကြတာပါ၊‘အဲန်နာ’ အနေနဲ့ ရရှိနိုင်သမျှ မျက်မြင်သက်သေများ၊အထောက်အထားများကို စုစည်းပြီး ဂျာနယ်လစ်ကျင့်ဝတ်များနဲ့ အညီ ကျိုးသင့်ကြောင်းသင့် ရေးသားတင်ပြခဲ့ခြင်း ဖြစ်ပါတယ်။ ‘အဲန်နာ’ရဲ့ သတင်းသမားသိက္ခာကို ကမ္ဘာက ယုံကြည်အသိအမှတ် ပြုကြတာကလည်း ထင်ရှားပါတယ်။ဒါပေမယ့် ’ကရင်မလင်’ထိပ်တန်းခေါင်းဆောင် ပိုင်းကတော့ သဘော တွေ့ဟန် မရှိခဲ့ပါဘူး။

၂၀၀၆ခုနှစ် အောက်တိုဘာလ(၇)ရက်နေ့မှာတော့ သူမနေထိုင်ရာ မော်စကိုမြို့လယ် အဆောက်အအုံတွင်းက ဓါတ်လှေခါးအတွင်းမှာ လုပ်ကြံသတ်ဖြတ်ခံခဲ့ရရှာပါတယ်။ အဲန်နာ’ထိမှန်တဲ့ သေနတ်ဒဏ်ရာ(၄)ချက်ထဲမှာ ခေါင်းတည့်တည့် အနီးကပ်ချိန်ရွယ်ပစ်ခတ်ခဲ့တာကိုလည်း တွေ့ရတယ်လို့ မှတ်တမ်းတင် ခဲ့ကြပါတယ်။ တိုက် ဆိုင်မှုလို့ပဲ ဆိုရလေမလား ဒါမှမဟုတ်လို့ ဆိုပြီး အစချီရေးသားရမှာလား ဖြစ်စေခဲ့မိတာကတော့ အောက်တို ဘာလ (၇)ရက်နေ့ဟာ ‘ပူတင်’ရဲ့ မွေးနေ့ဖြစ်လို့ပါပဲ၊

သတင်းမီဒီယာလွတ်လပ်ခွင့်အတွက် လှုပ်ရှားနေကြသူများသာမက နိုင်ငံတကာ အသိုင်းအဝိုင်းကပါ ‘အဲန်နာ’ လုပ်ကြံသတ်ဖြတ်ခံခဲ့ရမှုအပေါ် ပြင်းပြင်းထန်ထန် ပြစ်တင်ရှုတ်ချကြပါတယ်။ ‘အဲန်နာ’ဟာ ဂျာနယ်လစ် မျိုး ဆက်သစ်များအတွက် စံနမူနာပြုရတဲ့သူ၊လွတ်လပ်စွာထုတ်ဖေါ်ပြောဆိုခွင့်ရဲ့ ပြယုဂ် ဖြစ်လာပြီး သူမအ ထိမ်း အမှတ် ဂျာနယ်လစ်ဇင်ဆုမျိုး ဂုဏ်ပြုပေါ်ပေါက်ခဲ့ပါတယ်။သူမအကြောင်းရိုက်ကူးထားတဲ့ ‘Letter to Anna’ ဆိုတဲ့ မှတ်တမ်းရုပ်ရှင်ဟာလည်း နိုင်ငံတကာ ဆုပေးပွဲများမှာ ဆုရရှိတာ၊ဇကာတင်စာရင်းထဲဝင် တာ မျိုးတွေနဲ့ အသိအမှတ်ပြု ခံခဲ့ရပါတယ်။

ထိုစဥ်က ရုရှားအတိုက်အခံနိုင်ငံရေးသမားတယောက်ဖြစ်တဲ့ ကမ္ဘာ့စစ်တုရင်ချန်ပီယံဟောင်း ‘ဂယ်ရီကက်စ် ပါးရောဗ့်’(Garry Kasparov)မှတ်ချက်ပြုခဲ့တာက’‘အဲန်နာ ပိုလစ်ကောဗ့်စ်ကေယာ’လုပ်ကြံခံရမှုဟာ ဒီမိုက ရက်တစ်အဖွဲ့အစည်းတွေ ပျက်သုန်းပြီး လွတ်လပ်စွာပြောဆိုခွင့် ဖယ်ရှားခံခဲ့ရတဲ့ နိုင်ငံမှာ ဖြစ်ပွားခဲ့တာ’ဆို ပြီးပါ။

ရုရှားလိုနိုင်ငံမျိုးမှာ အစိုးရကို ဝေဖန်ပြောဆိုရေးသားကြသူတွေအတွက် အန္တာရယ်ဟာ ကြီးမားလှပါတယ်၊ ‘အဲန်နာ’ရဲ့အဖြစ်အပျက်က သက်သေပါပဲ။သူမကဲ့သို့ ဂျာနယ်လစ်မဟုတ်တဲ့ နိုင်ငံရေးသမားတယောက် အ ကြောင်းကိုလည်း အလျဥ်းသင့်တုန်း ဖြည့်စွက်ရေးသားလိုပါတယ်။ ပူတင်ရဲ့ ၂၀၁၄ခုနှစ် ယူကရိန်းကျူးကျော် စစ်ကို ဆန့်ကျင်ခဲ့တဲ့ ‘ဘောရစ်နဲမ့်ဆောဗ့်’(Boris Nemtsov) မော်စကိုမြို့ ကရင်မလင်နန်းတော်အနီးရှိ တံတားပေါ်ဖြတ်လျှောက်နေတုန်း လုပ်ကြံခံခဲ့ရတာကိုပါ၊တကယ်တော့သူဟာ သာမန်နိုင်ငံရေးသမား မဟုတ်ပါ ဘူး၊ ‘ဘောရစ်ယဲလ်ဆင်’လက်ထက်က အစိုးရအဖွဲ့ဝန်ကြီး၊ ဒုဝန်ကြီးချုပ် ရာထူးတာဝန်များ ယူခဲ့ဖူးသူတဦးပါ။

ဒါတွေကိုကြည့်ရင် ရုရှားသတင်းမီဒီယာသမားတွေ နေ့တဓူဝ တွေ့ကြုံဖြတ်သန်းနေရတာကို မှန်းဆလို့ရပါ လိမ့်မယ်။’ဒီမီထရီ’က သူ့ရဲ့တွေ့ကြုံခံစားခဲ့ရမှုကြောင့် နိုဘယ်ဆု လက်ခံရယူစဥ်တုန်းက ‘စာနယ်ဇင်းသမား တွေ အသက်အရွယ်ကြီးမြင့်မှသာ သေဆုံးစေချင်ပါတယ်’လို့ မိန့်ခွန်းအဆုံးသတ်မှာ မှတ်မှတ်ရရ ထည့်သွင်း ပြောကြားခဲ့ပါတယ်။ ရုရှားမှာဖြစ်လေ့ရှိတဲ့ လုပ်ကြံသတ်ဖြတ်မှုအများစုရဲ့ ထုံးစံအတိုင်း ပစ်ခတ်ခဲ့ သူ ကြေးစားလူသတ်သမားတွေကို ဖမ်းဆီးမိတယ်လို့ ဆိုပေမယ့် နောက်ကွယ်ကနေ စေခိုင်းသူများကတော့ ဒီ အမှု(၂)မှုလုံးမှာ ဖေါ်ထုတ်နိုင်ခဲ့ခြင်းမရှိပဲ လွတ်မြောက်နေခဲ့ပါတယ်။

’ဒီမီထရီ’အနေနဲ့ နိုဘယ်ဆု လက်ခံရရှိတဲ့ အချိန်ကရော၊အခုလို ဆုတံဆိပ်လေလံတင်ပြီး ယူကရိန်းဒုက္ခသည် တွေကို ကူညီဖို့ဆောင်ရွက်နေစဥ်မှာပါ ဒီနိုဘယ်ငြိမ်းချမ်းရေးဆုရရှိစေဖို့ အသက်နဲ့ဘဝကိုပေးဆပ် ပါဝင်ခဲ့ ကြတဲ့ သူ့ရဲ့လုပ်ဖေါ်ကိုင်ဖက်တွေကို သတိရနေမှာ သေချာပါတယ်။ အာဏာရှင်တွေ သက်တမ်းရှည်နေသရွေ့ ‘အဲန်နာ’လို၊’ဘောရစ်’လို သတင်းစာနယ်ဇင်းသမား၊နိုင်ငံရေးသမား၊တက်ကြွလှုပ်ရှားသူတွေရဲ့ တန်ဖိုးရှိလှတဲ့ အသက်တွေ ကမ္ဘာအနှံ့မှာ ဆုံးရှုံးကြရဦးမှာပါ။ တဖက်ကကြည့်ပြန်ရင်လည်း ဒီလိုရဲရင့်ပြီး ’ကလောင်’ နဲ့ ’ကီး ဘုတ်’ကိုသာ ပိုင်ဆိုင်တဲ့ အမှန်တရားဖက်က ရပ်တည်ကြသူများကို အာဏာရှင်တို့ ဘယ်လောက်အထိ အ ကြောက်လွန်ကဲနေကြသလဲ ဆိုတာကို ပြသနေသလိုပါပဲ။

‘နိုဗာရာဂဇက်တာ’သတင်းစာဟာ အာဏာရှင်ရဲ့ ဖိနှိပ်မှုကို ကြံ့ကြံ့ခံခဲ့ရတဲ့ သတင်းသမားတို့ရဲ့ စုဝေးရာပါ၊အခု တခါ ဒီအာဏာရှင်ကြောင့်ပဲ ဒုက္ခအတိရောက်ကြရတဲ့ ယူကရိန်းစစ်ပြေးဒုက္ခသည် ပြည်သူများအတွက် သူတို့ သွေးချွေးမျက်ရည်တို့နဲ့ ရင်းနှီးရယူခဲ့တဲ့ တန်ဖိုးမဖြတ်နိုင်တဲ့ နိုဘယ်ဆုကို လေလံတင်ရောင်းချပြီး ကူညီလိုက် ပါပြီ။ငွေကြေးပမာဏတခုဆိုတာထက် ယူကရိန်းပြည်သူများအပေါ်ထားတဲ့ ဒီရုရှားသတင်းမီဒီယာသမားများ ရဲ့မေတ္တာနဲ့ကိုယ်ချင်းစာတရားက ပိုလို့အဓိကကျတယ် ဆိုရပါမယ်၊ စစ်မက်ဖြစ်ပွားနေတဲ့ လူမျိုးစု(၂)ခု အ ကြားက စစ်အနိဌာရုံတွေကို ကျော်လွန်ပြီး လှမ်းမြင်လိုက်ရတဲ့ အလှတရားလည်း ဖြစ်ပါတယ်။

အာဏာရှင်များနဲ့ သတင်းမီဒီယာသမားများရဲ့ တိုက်ပွဲတွေဟာ အာဏာရှင်ကြီးစိုးတဲ့ နိုင်ငံတိုင်းမှာ ခေတ် အဆက်ဆက် ဆက်ပြီးရှိနေကြဦးမှာပါ။ဥာဏ်ပညာ၊ချစ်ခြင်းမေတ္တာနဲ့အမှန်တရားကို မြတ်နိုးသူများက တ ဖက်၊ ဆင်ခြင်တုံတရားကင်းမဲ့၊ဒေါသမာန်မာနများနဲ့ အမှန်တရားကို ဖုံးကွယ်လိုသူများကတဖက် ရင်ဆိုင်တွေ့ နေကြရဦးမှာပါ။ ဓမ္မဘက်တော်သားများရဲ့ သမိုင်းကို ယဥ်ကျေးတဲ့လူ့အဖွဲ့အစည်းက ဂုဏ်ယူလေးစားစွာ မော်ကွန်းရေးထိုးလေ့ရှိကြပေမယ့်၊ အမှားသံသရာထဲ တဝဲလည်လည်နေကြရင်း အဓမ္မဘက်က ရပ်ခဲ့မိကြသူ များကိုတော့ သမိုင်းကငဲ့ညှာလေ့မရှိဘူးဆိုတာကို အလေးအနက် နားလည်သဘောပေါက်ကြဖို့ လိုအပ်ပါ လိမ့်မယ်။

သီအိုဇော်

Join Us @ MoeMaKa Telegram
t.me@moemaka
#MoeMaKaMedia
#WhatsHappeningInMyanmar