ကောင်းဇေလူ - ကုလသမဂ္ဂ နဲ့ အာဆီယံ ဘယ်လဲ ဘာလဲ

ကောင်းဇေလူ - ကုလသမဂ္ဂ နဲ့ အာဆီယံ ဘယ်လဲ ဘာလဲ

(မိုးမခ) အောက်တိုဘာ ၂၉၊ ၂၀၂၂

မြန်မာပြည်သူတွေ လက်တွေ့ရင်ဆိုင်နေရတဲ့ ဖက်ဆစ် စစ်အာဏာရှင်စနစ် ဆန့်ကျင်တိုက်ဖျက်ရေးတိုက်ပွဲ သို့မဟုတ် နွေဦးတော်လှန်ရေးမှာ နိုင်ငံတကာကို အားကိုးတာထက် ကိုယ့်အားကိုယ်ကိုးကြဖို့သန္နိဋ္ဌာန်ချထားရပေလိမ့်မယ်။ နိုင်ငံတကာ နိုင်ငံရေးအခင်းအကျင်းအရ ကိုယ်ကျိုးစီးပွားကာကွယ်ရေးမူဝါဒကို ဦးစားပေးကြတာ မြင်သာနေတယ်။ သူတို့ အကျိုးအတွက် အထောက်အပံ့မဖြစ်ဘူးလို့ယူဆရင် အကြောင်းပြချက် အမျိုးမျိုးနဲ့ခေါင်းရှောင်ကြတာ များပါတယ်။

ယေဘုယျအားဖြင့် အကြမ်းဖက် အာဏာသိမ်း စစ်ခေါင်းဆောင် မင်းအောင်လှိုင်ဟာ ၁၈ လ ကျော်လာသည်အထိ နိုင်ငံ ကို ထိန်းချုပ်နိုင်စွမ်း မရှိဘဲ၊ တိုင်းပြည်အနှံ့စစ်တပ် ဆန့်ကျင်တွန်းလှန်ရေး လက်နက်ကိုင်ခုခံမှုအများအပြားကိုရင်ဆိုင်နေ ရပြီး၊ လေကြောင်းတိုက်ခိုက်မှုနဲ့ပါ ကြိုးပမ်း နှိမ်နှင်း ခဲ့သော်လည်း အောင်မြင်မှု မရခဲ့ကြောင်း မျက်ဝါးထင်ထင် မြင်နေရ တယ်။ အကြမ်းဖက် စစ်တပ်အုပ်ချုပ်ရေးကို နိုင်ငံတကာကလည်း အသိအမှတ်မပြုတဲ့အတွက် တရားမဝင် အုပ်ချုပ်နေတဲ့ စစ်အုပ်စုအဖြစ် အရှက်ကွဲနေရပြီဖြစ်တယ်။ တရားမဝင် စစ်အုပ်ချုပ်ရေးအဖြစ်မှ ရုန်းထွက်ဖို့ ထွက်ပေါက်ရှာ ရင်းက စစ်ရာဇဝတ်မှုတွေ တခုပြီး တခု ကျုးလွန်မိ လျှက်သား ဖြစ်နေခဲ့တာ တွေ့ရတယ်။ နိုင်ငံတကာအလယ်မှာ  စစ်ခေါင်းဆောင်တွေရဲ့ ဉာဏ် အမြာ်အမြင်နည်းမှု နဲ့ လူစိတ်ကင်းမဲ့မှုကို တဖြည်းဖြည်း ပိုမိုသိရှိလာကြတယ်။

အကြမ်းဖက် စစ်ကောင်စီအဖွဲ့ကတော့ သူတို့ အာဏာတည်မြဲရေးအတွက် တပြည်လုံးကို မီးလောင်တိုက်သွင်းဖို့ ဆုံးဖြတ်ထားပုံပါပဲ။ အောက်တိုဘာ ၂၃ ရက်နေ့ည ၈ နာရီခွဲခန့် ဖားကန့်ဒေသက ကံဆီးကျေးရွာအနီးက KIA တိုင်းရင်းသားလက်နက်ကိုင် အဖွဲ့ရဲ့ တပ်မဟာ (၉) နယ်မြေအတွင်း အနန့်ပါမှာ KIA ထူထောင်ခြင်း ၆၂ နှစ်မြောက် အထိမ်းအမှတ် ဖျော်ဖြေပွဲကျင်းပနေစဉ်မှာ စစ်ကောင်စီတပ်က တိုက်လေယာဉ် နဲ့ဗုံးကြဲပစ်ခတ်တိုက်ခိုက်ခဲ့တယ်။ KIA စစ်အရာရှိ အချို့အပါအဝင် KIA က ဖိတ်ကြားထားတဲ့ ကချင်လုပ်ငန်းရှင်အချို့၊ ကချင်အနုပညာရှင် တချို့နဲ့ အရပ်သားတွေ စုစုပေါင်း ရ၅ ဦး ထက်မနည်း သေဆုံးခဲ့တယ်။ ၁၀၀ ကျော် ဒဏ်ရာရခဲ့ကြတယ်။ လူမဆန်တဲ့ လေကြောင်းတိုက်ခိုက်မှုလို့ ဆိုရမယ်။ ကြားသိရသူအားလုံး မယုံနိုင်အောင် အံ့အားသင့်ခဲ့ရတယ်။ KIA တပ်မဟာ (၉) ကို ပစ်မှတ်ထားတိုက်ခိုက်တာ မှန်ပေမယ့် အရပ်သား အများအပြားပါတဲ့ ဂီတဖျော်ဖြေပွဲကို တိုက်ခိုက်တာဟာ ဂျီနီဗာ ကွန်ဗင်းရှင်းကို ချိုးဖေက်တဲ့ စစ်ရာဇဝတ်မှုဖြစ်တယ်။ သာမန်အရပ်သူအရပ်သား အများအပြား စုဝေးနေတဲ့ ဖျော်ဖြေရေးပွဲ မှန်းသိပါလျှက်နဲ့ လေကြောင်းကနေ ဗုံးကျဲ ပစ်ခတ်တိုက်ခိုက်တာဟာ လူမဆန်တဲ့ စစ်ရာဇဝတ်မှုလို့ သတ်မှတ်နိုင်တဲ့ ပြစ်မှုမျိုးကို စစ်ကောင်စီတပ်က ကျူးလွန်ခဲ့တာ ဖြစ်တယ်။

ဖားကန့်မှာ တိုက်လေယာဉ်တွေနဲ့ ဗုံးကြဲတိုက်ခိုက်ခဲ့ခြင်းမှာ ကေအိုင်အေရဲ့ တပ်မဟာ (၉) ဌာနချုပ်ကို တိုက်ခိုက်ခြင်း သာဖြစ်ပြီး အရပ်သား တဦးတလေမျှ သေဆုံးခြင်း မရှိဘူးလို့ လိမ်လည်သတင်းဖြန့်ပုံကို ကြည့်ရင် နောက်ထပ်လည်း အခုလို လူမဆန်တဲ့ လုပ်ရပ်မျိုး ဆက်လက်ကျုးလွန်ဦးမယ့် သဘောရှိတယ်။ အကြမ်းဖက် စစ်အုပ်စုရဲ့ ရက်စက်ယုတ်မာ လွန်းတဲ့ လုပ်ရပ်တွေ အကြိမ်ကြိမ် ကျူးလွန်ခဲ့ပေမယ့် ကုလ နဲ့ အာဆီယံ အပါအဝင် နိုင်ငံတကာအနေနဲ့ ရှုတ်ချကြောင်း ကြေညာချက် အသီးသီး ၀တ္တရားကျေ ထုတ်ပြန်ခဲ့ရုံကလွဲလို့ မြန်မာ ပြည်သူတွေ ကျေနပ်လောက်အောင် ဘာမျှ မည်မည်ရရ အရေးယူပြတာမျိုး တကြိမ်တခါမျှပင် မရှိခဲ့။ အနောက်တိုင်း သုတေသီတဦးက ယူကရိန်းကို အမေရိကန်၊ ဗြိတိန် အီးယူတို့က ပေးနေတဲ့ အကူအညီမျိုး ဒေါ်လာငါးသန်းဖိုးလောက်သာ မြန်မာအတိုက်အခံတို့ကို ပေးခဲ့မယ် ဆိုရင်တောင် ဒီမိုကရေစီဘက်ခေတ်သစ်တခု ဖန်တီးနိုင်မှာ သေချာတယ်လို့ နိုင်ငံရေးလေ့လာသူတွေက ဝေဖန်သုံးသပ်ခဲ့ကြဖူးတယ်။

မြန်မာနိုင်ငံတွင်းက အပြစ်မဲ့ ပြည်သူအများအပြားရဲ့ အခြေအနေဟာ ဆိုးရွားသထက် ဆိုးရွားလာနေပြီး ကြောက်မက်ဖွယ် အခြေအနေ ဖြစ်နေကြောင်း မြန်မာ့ လူ့အခွင့်အရေးဆိုင်ရာ ကုလသမဂ္ဂအထူးကိုယ်စားလှယ် Tom Andrews က မကြာသေးခင်က ကုလ လူ့အခွင့်ရေး ကောင်စီကို တင်ပြခဲ့ကြောင်း VOA သတင်းက ဖေါ်ပြတယ်။

လူပေါင်း ၁ သန်း ၃ သိန်းလောက်ဟာ အိုးအိမ်စွန့်ခွာ ထွက်ပြေးနေရပြီး စစ်တပ်ကလည်း ပြာကျတဲ့အထိ ရွာလုံးကျွတ် မီးရှို့မှုတွေ ကျူလွန်ခဲ့ကြောင်း၊ အိမ်ပေါင်း ၂၈,၀၀၀ ကျော် ဖျက်စီးခဲ့ပြီးဖြစ်ကြောင်း အထူးကိုယ်စားလှယ်က တင်ပြခဲ့တယ်။ မြေမြှုပ်မိုင်းကြောင့် သေဆုံး ဒဏ်ရာရတဲ့ အပြစ်မဲ့ ပြည်သူ အရေအတွက်ကလည်း သိသိသာသာ တိုးလာကြောင်း၊ စားနပ်ရိက္ခာ ပြဿနာ ရှိနေပြီး ကလေးဘဝ အဟာရ မပြည့်ဝမှုလည်း တိုးလာကြောင်း၊ အမျိုးသမီးတွေရဲ့ စီးပွားရေးနဲ့ လူမှုရေးပိုင်း တိုးတက်မှုလည်း ဆုံးရှုံးနေပြီး ၁၃၀,၀၀၀ သော ရိုဟင်ဂျာတွေလည်း နိုင်ငံတွင်းက ပိတ်လှောင်ခံနေရတဲ့ ဒုက္ခသည်စခန်းတွေမှာ နေထိုင်နေရဆဲ ဖြစ်တယ်လို့လည်း ထည့်သွင်း တင်ပြသွားတယ်။

ရက်စက်ပြီး တရားမဝင်တဲ့ စစ်ကောင်စီကို ရန်ပုံငွေပံ့ပိုး၊ ကုန်သွယ်ရေး၊ လက်နက်တွေ၊ နောက် တရားဝင်မှု ဖြစ်လာအောင် ပံ့ပိုးနေကြတဲ့ အဖွဲ့ဝင် နိုင်ငံတွေကြောင့် မြန်မာလူထု စိတ်ဆိုး ဒေါသ ထွက်ကြရတယ်လို့လည်း မြန်မာ့ လူ့အခွင့်အရေး ဆိုင်ရာ ကုလသမဂ္ဂ အထူးကိုယ်စားလှယ် မစ္စတာ Andrews က ဆိုတယ်။ မြန်မာလူထုကို နှုတ်အားဖြင့် ပံ့ပိုးကူညီပြီး ပြောထားတဲ့အတိုင်း လက်တွေ့မပါတဲ့ နိုင်ငံတွေကိုလည်း မြန်မာလူထုက စိတ်ပျက်တယ်လို့လည်း သူက ပြောပါတယ်။ ကြီးထွားလာနေတဲ့ မြန်မာ့ပြဿနာကို နိုင်ငံတကာရဲ့ တုံ့ပြန်ဆောင်ရွက်မှုတွေက မအောင်မြင်ဘူးလို့လည်း ထောက်ပြ ခဲ့တယ်။

စစ်ကောင်စီတပ်ဖွဲ့တွေရဲ့ ဘဏ္ဍာငွေကြေးနဲ့ လက်နက် ပြတ်လပ်စေပြီး တရားဝင်မှု မရှိစေရေး အတွက် ကုလသမဂ္ဂ အဖွဲ့ဝင်နိုင်ငံတွေ ဘက်က ပိုပြီး ထိထိရောက်ရောက် ခိုင်ခိုင်မာမာ ဆောင်ရွက်သင့်ကြောင်း တိုက်တွန်းထားတယ်။ မြန်မာနိုင်ငံမှာ ဆက်လက်ဖြစ်ပွားနေတဲ့ လူ့အခွင့်အရေးချိုးဖောက်မှုတွေဟာ လူ့ဘောင်လောကမှာ အဆိုးဝါးဆုံး အခြေ အနေကို ထင်ဟပ်နေတယ်လို့ မြန်မာဆိုင်ရာ ကုလလူ့အခွင့်အရေး အထူးကိုယ်စားလှယ် Tom Andrews က ၂၀၂၂ ခုနှစ် ကုလသမဂ္ဂအထွေထွေညီလာခံရဲ့ လူ့အခွင့်အရေးဆိုင်ရာ တတိယကော်မတီမှာ ပြောဆိုခဲ့ခြင်း ဖြစ်တယ်။ တနိုင်ငံချင်းစီရဲ့ မြန်မာအပေါ်ဖိအားပေးတာတွေက ထိရောက်မှုမရှိဘဲ အခြေအနေ အဆပေါင်းများစွာ ပိုဆိုးလာနေတဲ့အတွက် နိုင်ငံတကာညွန့်ပေါင်းဖွဲ့ပြီး ဖိအားပေးဖို့ လိုအပ်နေပြီလို့လည်း  Tom Andrews က VOA ကို ပြောပြခဲ့ကြောင်း သိရတယ်။

“ မြန်မာနိုင်ငံက လူ့သားချင်းစာနာမှုဆိုင်ရာနဲ့ လူ့အခွင့်အရေး အခြေအနေတွေက ဘယ်လိုပဲတိုင်းတိုင်း ဆတိုးချီပြီးတော့ကို ဆိုးဝါးပျက်သုဉ်းလာနေပါတယ်။ ထောင်ဂဏန်းတွေချီတဲ့ ပြည်သူတွေ သတ်ဖြတ်ခံနေရတယ်၊ ထောင်သောင်းချီ ဖမ်းဆီး ထိန်းသိမ်းခံထားရတယ်။ ဒီအထဲ ကလေးတွေလည်း အများကြီးကို ပါနေတယ်။ ဒီကလေးအရွယ်တွေအပါအဝင် လူတွေ ညှဉ်းပမ်းနှိပ်စက်ခံနေရတယ်။ ဒီစစ်အုပ်စုရဲ့ရက်စက်မှုတွေက အတောမသတ်နိုင်အောင်ကို ဖြစ်နေတာပါ။ လွန်ခဲ့တဲ့ ရက် အနည်းငယ်အတွင်းကပဲ စစ်အုပ်စုအနေနဲ့ ဂီတဖျော်ဖြေပွဲတခုကို လေကြောင်းကနေပစ်ခတ်ဖို့ အမိန့်ပေးခဲ့တယ်။ သိထားရ သမျှ အနည်းဆုံး ၆၀ သေကျေခဲ့ရတယ်။ နောက်ထပ်လည်း ထိခိုက်သေဆုံးစာရင်း ဆက်လာနေတယ်။ 

အခုလို မြန်မာမှာ အတိဒုက္ခဆိုက်ရောက်မှုကြီးတွေ၊ ရက်စက်မှုအပြည့်နဲ့ တုန်လှုပ်ချောက်ချားစရာတွေက ဆတိုးချီကို ပိုဆိုးဆိုးလာ နေပါ တယ်။ ကုလသမဂ္ဂကို ကျနော်ပန်ကြားချင်တာက ဒီကပ်ဆိုက်မှုကြီးအပေါ်  နိုင်ငံတကာတုံ့ပြန်မှုပုံစံတွေ မပြောင်းတော့ဘူး ဆိုရင် ရှေ့ဆက် အခြေအနေက ဆိုးသထက်ကို ဆိုးလာမှာပါ။” လို့ Tom Andrews က VOA ရဲ့ ကုလသတင်းထောက် Margaret Besheer နဲ့ သီးသန့် တွေ့ဆုံမေးမြန်းမှုမှာ ရှင်းပြခဲ့တယ်။  ကုလအထွေထွေညီလာခံကနေ ရက်ပိုင်းအတွင်း အရေးယူနိုင်ခဲ့တဲ့ သာဓကမျိုးနဲ့ မြန်မာပြည်သူတွေကိုကူညီသင့်ပါပြီလို့  Tom Andrews က ဆိုပါတယ်။ 

ဒီတော့ ပြန်လည် တွက်ဆ သုံးသပ်ကြည့်ရရင် မြန်မာ့အရေးနဲ့ပတ်သက်ပြီး မြန်မာတွေအနေနဲ့ အာဆီယံအဖွဲ့နဲ့ ကုလ သမဂ္ဂအဖွဲ့တွေကို မျှော်ကိုးနေလို့ မရနိုင်တော့ဘူး။ အကြောင်းကတော့ အဲဒီ နိုင်ငံတကာအဖွဲ့အစည်းတွေဟာ မြန်မာ ပြည်သူတို့ရဲ့ဆန္ဒ မျှော်မှန်းချက်တွေကို သိနေပါလျှက်နဲ့ မသိချင်ယောင်ဆောင်နေကြလို့ပဲဖြစ်တယ်။ သေချာတာက တော့ ကမ္ဘာ့နိုင်ငံအများစုဟာ ဒီမိုကရေစီ အရေခြုံနိုင်ငံတွေဖြစ်နေလို့ပဲ။ ကုလသမဂ္ဂရဲ့အပြည်ပြည်ဆိုင်ရာ လူ့အခွင့် အရေးဆိုင်ရာ ပဋိညဉ်စာတမ်း (UDHR)ကို မည်ကာမတ္တမျှ လက်ခံထားကြပြီး၊ လက်တွေ့ခံယူကျင့်သုံးမှု မရှိကြလို့ဖြစ် တယ်။

ဒါကြောင့်လည်း တရုတ်၊ ရုရှား၊ မြောက်ကိုးရီးယား၊ အီရန် အစရှိတဲ့ အာဏာရှင်နိုင်ငံတွေရဲ့ လူ့အခွင့်အရေးချိုးဖေါက်မှု တွေကို ထိထိရောက်ရောက် မတားဆီးနိုင်ကြတာဖြစ်တယ်။ မြန်မာ့အရေးမှာလည်း ကုလလုံခြုံရေးကောင်စီမှာ တရုတ်နဲ့ ရုရှားသဘောမတူလို့ ထိရောက်မှန်ကန်တဲ့ အရေးယူမှုမျိုး လုံးဝမလုပ်နိုင်ခဲ့ဘူး။ ဆင်တကောင်လုံး လက်ရဖမ်းမိထားပါ လျှက်နဲ့ ဆင်ခြေရာရှာဖို့လိုသေးသယောင် ပြောဆိုပြုမူနေပုံတွေဟာ မြန်မာလူထုကို ပြက်ရယ်ပြုနေတဲ့ သဘောပါပဲ။

အာဆီယံနိုင်ငံခြားရေးဝန်ကြီးတွေရဲ့ အထူးအစည်းအဝေးတရပ်ကို အင်ဒိုနီးရှားနိုင်ငံ၊ ဂျာကာတာမြို့မှာ အောက်တို ဘာ၂၇ ရက်နေ့က ကျင်းပခဲ့ရာမှာလည်း ဘာမှ သေချာရေရာတဲ့ ရလဒ် ထွက်ပေါ်မလာခဲ့ဘူး။ မြန်မာနိုင်ငံနဲ့ ပတ်သက်လို့ အာဆီယံ အဖွဲ့ဝင်နိုင်ငံတွေအကြား ရူမြင်သုံးသပ်ပုံတွေ အကွဲကွဲ အလွဲလွဲဖြစ်နေခဲ့ပြီး လွန်ခဲ့တဲ့ ၁၈ လက အာဆီယံအဖွဲ့ အတွင်း သဘောတူထားခဲ့တဲ့ ဘုံသဘောတူညီချက် ငါးချက်အတိုင်း ဆက်ပြီးဆောင်ရွက်ဖို့ ဆုံးဖြတ်ခဲ့ကြတယ်လို့ သိရတယ်။ အတော်စိတ်ပျက်ဖို့ ကောင်းတဲ့ အဖွဲ့ဖြစ်တဲ့အတိုင်း အခု ဆုံးဖြတ်ချက်ကလည်း မြန်မာပြည်သူတွေ အဖို့တော့ အတော် စိတ်ပျက်ဖွယ် ဆုံးဖြတ်ချက်ပါပဲ။ ၀တ်ကျေတန်းကျေ အလုပ်လုပ်လေ့ရှိတဲ့ အာဆီယံရဲ့ အစဉ်အလာအတိုင်း ဆုံးဖြတ်ခဲ့ကြတာ မြင်နေရတယ်။

မြန်မာ့အရေး အာဆီယံရဲ့ ဘုံသဘောတူညီချက်ငါးချက်ကို အခိုင်အမာ ဆက်လက် အကောင်အထည် ဖော်မယ်လို့ ဂျာကာတာ အာဆီယံနိုင်ငံခြားရေးဝန်ကြီးတွေရဲ့ အစည်းအဝေး အပြီး အာဆီယံအလှည့်ကျ ဥက္ကဋ္ဌ ကမ္ဘောဒီးယား နိုင်ငံခြားရေးဝန်ကြီးက ကြေညာသွားတယ်။ အာဆီယံ နိုင်ငံခြားရေးဝန်ကြီးများအစည်းအဝေးက လွန်ခဲ့တဲ့ ၁၈ လက သဘောတူထားချက် အဟောင်းကိုပဲ ထပ်ပြီး အတည်ပြုကြေညာခဲ့တာဟာ အာဆီယံအဖွဲ့ဝင်နိုင်ငံတွေ အကြား တရုတ်သြဇာ သက်ရောက်မှု ရှိနေတာကြောင့်လို့ သုံးသပ်နေကြတယ်။ တရုတ်ရဲ့ မီးစတဖက် ရေမှုတ်တဖက်မူဝါဒအရ မြန်မာ အကြမ်းဖက်စစ်တပ်ကို မြန်မာ့နိုင်ငံရေးဇာတ်ခုံပေါ်မှာ ဆက်လက်နေရာပေးထားလိုခြင်းကြောင့်ဆိုတာ ပေါ်လွင်နေ တယ်။ နွေဦးတော်လှန်ရေးရဲ့အရှိန်အဟုန်ကို ဆွဲချပြီး မြန်မာနိုင်ငံကို ၂၀၀၈ စစ်တပ်ဖွဲ့စည်းပုံအောက်ပြန်ပို့လိုတာဟာ တရုတ်ရဲ့ သဘောထားဖြစ်တယ်။ အာဆီယံမှာ တရုတ်ရဲ့သြဇာမကင်းတဲ့ အဖွဲ့ဝင်တွေ ပါ၀င်နေတဲ့အတွက် အာဆီယံရဲ့ ဘုံသဘောတူညီချက်ငါးချက်ကို အခိုင်အမာ ဆက်လက် အကောင်အထည် ဖော်မယ်ဆိုတဲ့ လတ်တလော ဆုံးဖြတ်ချက် ဟာ တရုတ်ဖြစ်စေချင်တဲ့ ရွှေ့ကွက်လို့ဆိုရမှာဖြစ်တယ်။ ဒီလို ဆုံးဖြတ်တာဟာ မြန်မာပြည်သူလူထုရဲ့ သဘောထား ဆန္ဒကို လျစ်လျူပြုကြောင်း ထင်ရှားနေတယ်။

မြန်မာပြည်သူလူထုက စစ်အာဏာရှင်စနစ်နဲ့ စစ်အုပ်ချုပ်ရေးကို လုံးဝအလိုမရှိတော့ကြောင်း အသက်သွေးချွေးပေါင်း များစွာ ပေးဆပ်ပြသခဲ့ပြီးဖြစ်တယ်။ ဆက်လက်ပြီးတော့လည်း အာဏာသိမ်း အကြမ်းဖက် စစ်ကောင်စီကို မပြုတ်မချင်း လူငယ်မျိုးဆက်သစ်တွေက အသေခံတိုက်ကြဦးမှာ ဖြစ်တယ်။ ဒါကြောင့် မြန်မာပြည်သူတို့ရဲ့ဆန္ဒအစစ်အမှန်ကို လေးစားသောအားဖြင့် အာဆီယံ အနေနဲ့ မြန်မာ့အရေးမှာ ဘယ်နေရာ ဘယ်ကဏ္ဍနေ ဘယ်လိုခံယူချက်နဲ့ ဆက်လက် ပါ၀င်သင့်သလဲ ဆိုတာကို အရင်ဆုံးစဉ်းစားသင့်တယ်။

မင်းအောင်လှိုင်ရဲ့အကြမ်းဖက်စစ်အုပ်စုဟာ မြန်မာပြည်သူတွေကို လုံးဝကိုယ်စားပြုခွင့် မရှိဘူးဆိုတဲ့အချက်ကို အာဆီယံ အနေနဲ့ အထူးသတိပြုသင့်တယ်။ ဒါကြောင့် အာဆီယံအနေနဲ့ တရုတ်ကစားကွက်ထဲက နယ်ရုပ်မဖြစ်စေလိုပါ။ ဂျန်ဇီး လူငယ်မျိုးဆက်သစ်တွေဦးဆောင်တဲ့ နွေဦးတော်လှန်ရေးသန္နိဋ္ဌာန် အရ တိုင်းရင်းသားပြည်သူလူထုအနေနဲ့ ၂၀၀၈ ဖွဲ့စည်းပုံအောက် ဘယ်သောအခါမှ ပြန်သွားတော့မည် မဟုတ်ပါ။ စစ်တပ်ဟာ ပြည်သူ့ဆန်းစားနေတဲ့ ၀န်ထမ်းအဖွဲ့ အစည်းဖြစ်တာကြောင့် နိုင်ငံရေးကဏ္ဍမှာ လုံးဝပါ၀င်ခွင့် မရှိတော့ပါ။ ၂၀၂၀ ရွေးကောက်ပွဲရလဒ်ကို ပစ်ပယ်လိုတဲ့ သဘောနဲ့ မင်းအောင်လှိုင်ကြံစည်နေတဲ့ ၂၀၂၃ အတုအယောင် ရွေးကောက်ပွဲအစီအစဉ်မှာ အာဆီယံအနေနဲ့ လုံးဝ မပတ်သက်မိဖို့ လိုတယ်။ ကုလသမဂ္ဂကတော့ လက်မခံကြောင်း အတိအလင်းပြောထားတယ်။  အာဆီယံအနေနဲ့ အခုဖေါ်ပြခဲ့တဲ့ မြန်မာပြည်သူလူထုရဲ့ သဘောဆန္ဒတွေကို လေးစားမှသာ မြန်မာနိုင်ငံရဲ့ မိတ်ဆွေဖြစ်နိုင်ပါလိမ့်မယ်။ အာဆီယံအနေနဲ့ မြန်မာပြည်သူတို့ရဲ့ ရန်သူ မဖြစ်စေလိုပါ။ 

 

Join Us @ MoeMaKa Telegram
t.me@moemaka
#MoeMaKaMedia
#WhatsHappeningInMyanmar