ကိုသန်းလွင် - ရှည်ကြာဦးမည့် ယူကရိန်းစစ်ပွဲ

ကိုသန်းလွင် - ရှည်ကြာဦးမည့် ယူကရိန်းစစ်ပွဲ

(မိုးမခ) ဧပြီ ၁၆၊ ၂၀၂၂

( ၁ )

မစ္စတာပူတင်သည် မူလရည်ရွယ်ချက် မအောင်မြင်သောကြောင့် ဒုတိယအကြိမ်အနေဖြင့် စစ်ပွဲကို Plan B သို့ ပြောင်းလိုက်ရပြီ ဖြစ်သည်။ ယူကရိန်း၏ အရှေ့ပိုင်းနယ်မြေကို နည်းနည်းပဲဖြစ်ဖြစ် အရယူတော့မည့်ပုံစံ ပေါ်နေသည်။

ထိုအချိန်တွင် သူ့ကိုစစ်ပွဲနှင့် ပတ်သက်၍ အကောင်းဆုံးအကြံကို ဘယ်လိုလူက ပေးနိုင်မည်နည်းဟု စဉ်းစားမိပါသည်။ အမေရိကန်နိုင်ငံမှ စစ်ရေးစစ်ရာများနှင့်ပတ်သက်၍ ပုံစံအသစ်ဖော်ထုတ်သူ ဂျွန်အကွီလာ (John Arquilla) ကို သွားတွေ့သည်။ အကွီလာသည် အမေရိကန်ရေတပ်ကာကွယ်ရေးတက္ကသိုလ် မှ မကြာသေးမီက အနားယူထားသူ ပရော်ဖက်ဆာတစ်ဦး ဖြစ်ပါသည်။ 

သူ့ကို မေးသောအခါ သူက တုံ့ဆိုင်း၍မနေပါ။ သူ ပြောလိုက်သောစကားမှာ “ငြိမ်းချမ်းရေးလုပ်ပေါ့ အရူးရဲ့” ဟုပြောပါသည်။ ၎င်းသည် “သင်တွင်းထဲကိုကျရောက် နေပြီလား။ တွင်းထဲရောက်နေလျင် ဆက်မတူးပါနဲ့” ဆို သည် မှာ ပထမဆုံးလိုက်နာရမည့် စည်းမျဉ်းဖြစ်သည်ဟုပြောပါသည်။

( ၂ )

အကွီလာသည် လေထဲမှနေ၍ သူ့အဖြေကို ဆွဲထုတ်လိုက်ခြင်းတော့ မဟုတ်ပါ။ D-Day ဖြစ်စဉ်ကာလက မဟာမိတ်များ ကမ်းခြေပေါ် တက်ရောက်ပြီး ဂျာမန်များကို အနိုင်ယူခဲ့ပြီးသည့် ၆ ဇွန်လ ၁၉၄၄ နောက်ရက်များမကြာမီနေ့ ဇူလိုင်လ ၁ ရက်တွင် ဖီးမားရှယ် ရန်စတက် (Gerd Van Rundstedt) က ဌာနချုပ်ကို ဖုန်းဆက်ပါသည် “ဘာလုပ်ကြမှာလဲ “ဟု ဖုန်းကိုင်သောသူက ပြန်မေးသည်ကို ဗိုလ်ချုပ်က တုံ့ပြန်ပုံမှာ “ငြိမ်းချမ်းရေးလုပ်ပေါ့ အရူးရဲ့ တို့ ဘာလုပ်လို့ရမှာတုံး” ဟု ပြောခဲ့ဖူးပါသည်။

နောက်တစ်နေ့တွင် ဗိုလ်ချုပ်မှာ အလုပ်ဖြုတ်ခံခဲ့ရပါသည်။ ပူတင်နှင့် မတူသည်မှာ ပူတင်က ဆီးရီးယား၌ လူသတ်ရာတွင် ရက်စက်လှသည်ဟု နာမည်ဆိုးဖြင့် ကျော်ကြားခဲ့သော ဗိုလ်ချုပ်ကြီးကို သူ၏စစ်ပွဲ နောက် လာမည့် Phase 2 အတွက် ခေါင်းဆောင်ရန် တာဝန်ပေးလိုက်သည်။ စစ်ပွဲ ဘာဖြစ်လိမ့်မည်ဆိုသည်ကို အကွီလာ က ရှင်းမပြနိုင်ခဲ့သော်လည်း အဘယ်ကြောင့် ရုရှားတပ်မတော်ကြီး ကျဆုံးရကြောင်းကို ရှင်းပြခဲ့ပါသည်။ ဗိုလ်ချုပ် ရန်စတက် မှာ နောက်ပိုင်းတွင်ရာထူးတွင် ပြန်လည်ခန့်အပ်ခံခဲ့ရသည်။

ဤအဖြစ်အပျက်မျိုးကို ဂျာမန်တို့သာမက ယခုခေတ် စပိန်ပြည်တွင်းစစ်တွင်လည်း ကြုံခဲ့ဖူးကြပါသည်။ စိုးမိုးသူ တို့ဘက်မှ (Stuka Dive Bomber) နှင့် (Panzer Tank) များကို အသစ်အဆန်းအဖြစ် သုံးခဲ့ကြဖူးပါသည်။ စစ်ပွဲ၏ ပထမဆုံးသင်ခန်းစာမှာ ”Many and small beats large and heay” ဟူ၍ဖြစ်ပါသည်။ “ သေးငယ်ပြီး အများကြီးဖြစ်ပါက ကြီးကျယ်ပြီးလေးနက်သော အရာများကို နိုင်နိုင်ပါသည်” ဟူ၍ဖြစ်ပါသည်။

ယူကရိန်းစစ်တပ်မှာ တပ်စိတ်ငယ် (Squad) အဆင့်သာရှိပြီးလက်နက်အသေးစားများကို ကိုင်ဆောင်ထားကြပါသည်။ ထိုအဖွဲ့ငယ်ကလေးများက အကြီးစားစစ်တပ်ကြီးများ၊ အသံထွက်သော ဟယ်လီကော်ပတာများကိုနိုင်ပါသည်။ ရုရှားစစ်တပ်မှာ ကြီးမားသည် ဆိုသော်လည်း ယူကရိန်း၏ တိုက်နိုင်စွမ်းရှိသော ယူနစ်အသေးအငယ်လေးများကို နိုင်ရန် မစွမ်းနိုင်ပါ။ ယူကရိန်းတပ်ဖွဲ့တစ်ခုလျှင်လူ ၈ ယောက်မှ ၁၀ ယောက်အထိသာ ပါဝင်ပါသည်။  ထိုယူနစ် အငယ်လေးများတွင် ကိုင်ဆောင်ထားသော လက်နက်များမှာ ဒရုန်းများ၊ လေယာဉ်ပစ်လက်နက်များ (Stinger missile) တင့်ကားဖျက် လက်နက် (Javelin) များရှိသဖြင့် ပို၍ကြီးမားသော ရုရှားစစ်တပ်ကို အလွယ်တကူ အောင်နိုင်ခြင်း ဖြစ်ပါသည်။

 ယူကရိန်းစစ်ပွဲ၏ ဒုတိယနည်းမှာ” Finding always beats flanking” စောစီးစွာ ရှာဖွေတွေ့ရှိပါက မိမိကိုယ် ဝိုင်းနေသော ရန်သူကို ချေမှုန်းနိုင်သည်ဟူ၍ ဖြစ်ပါသည်။ အဓိကမှာ ရန်သူကိုစောစီးစွာ ရှာဖွေတွေ့ရှိရေး ဖြစ်ပါသည်။ မိုင် ၄၀ ရှည်လျားသော တင့်ကားတပ်ကြီးပင်ဖြစ်ပါစေ မိမိကသာ ဦးအောင်ရှာဖွေနိုင်ပါက ထို တင့်ကားတန်းကြီးကို အောင်နိုင်ပါလိမ့်မည်။ ဤနည်းဖြင့် ကျည်ကာကားများဖြင့် (armoured Personnel) ချီတက်လာသူများကိုလည်း အင်အားငယ်ငယ်ကလေးဖြင့် ဖြိုခွဲနိုင်ပါသည်။

ယူကရိန်းစစ်တပ်မှာ ရုရှားတပ်များကို ရှာဖွေရာတွင်ဒရုန်းများကို သုံးပါသည်။ အထူးသဖြင့် တူရကီလုပ် ဒရုန်းများမှာ ဤစစ်ပွဲအတွက် အသုံးဝင်လှပါသည်။ ထို့ပြင် ဒရုန်းကိုင်ဆောင်သူ လူများမှာလည်း သူတို့လုပ်ငန်း မှာ ကျွမ်းကျင်ကြပြီး ယူကရိန်းပြည်သူများထံမှလည်း အကူအညီများစွာရပါသည်။ အိုင်ဖုန်းကိုင်သော အမေကြီး ဟု ပြောနေကြသော ပြည်သူအများက သတင်းပေးနေကြပုံမှာ နယ်မြေတခုလုံး ဂြိုဟ်တုများဖြင့် စောင့်ကြည့်နေသကဲ့သို့ အားရစရာကောင်းပါသည်။ ယူကရိန်းပြည်သူများ၏ စောင့်ကြည့်ရေးတပ်ဖွဲ့မှာ ကလေးများနှင့် မိန်းမကြီးများ ပါဝင်ပြီး ၎င်းတို့သည် မိမိတို့ကိုင်ဆောင်သော ဖုန်းများနှင့် ရုရှားတပ်ဖွဲ့များ၏ လှုပ်ရှားမှု သတင်းများကို အမြဲမပြတ်သတင်း ပို့ပေးနေကြပါသည်။ ဤမျှကြီးမား၍ ကျယ်ပြန့်သော စစ်မြေပြင်တွင် ဤကဲ့သို့သော သတင်းများမှာ အရေးပါ အရာရောက်လှပါသည်။

ဤစစ်ပွဲ၏ တတိယနိယာမမှာ “Swarming always beats surging” ဖြစ်ပါသည်။ စစ်ပွဲတွင် အရေအတွက်ကအဓိကမဟုတ်တော့ပါ။ ရန်သူကို မိမိက လက်နက်ငယ်များဖြင့် ဝိုင်းထားစရာ မလိုပါ။ စစ်မြေပြင်မှထွက်လာသော ဗွီဒီယိုများတွင် တင့်ကားတန်းကြီးကို ရှေ့ဆုံးမှကားကို ပစ်ခတ်ဖြိုခွင်းလိုက်သည်။ မကြာမီ နောက်ဆုံး နားမှ တင့်ကားတစ်စီးကို တိုက်ခိုက်ဖြိုခွင်းလိုက်ပြန်သည်။ ဤနည်းဖြင့် တင့်ကားတန်းကြီး၏ တိုက်ခိုက်ရေးအစီအစဉ်မှာ ပျက်ပြားကုန်တော့သည်။ 

ထို့ကြောင့် ရုရှားတပ်များအဖို့ သမားရိုးကျနည်းများကို မသုံးတော့ဘဲ သူတို့ နောက်တကျော့ စစ်ပွဲအတွက် ပြင်ဆင်ကြရပြန်သည်။  သူတို့သည် လူနေရပ်ကွက်များကို ဖျက်ဆီးကြပါလိမ့်ဦးမည်။ ယူကရိန်းအနောက်ပိုင်းမှာ လုပ်ခဲ့သလိုထက် အရှေ့ပိုင်းကို ပို၍ဖျက်ဆီးကြမှာ သေချာပါသည်။ အဆောက်အဦပျက်များမှ အမှိုက်သရိုက်များမှာ အောင်မြင်မှုကို အဟန့်အတားဖြစ်စေပါသည်။ နောက်က တက်လာသော တပ်များမှာ အမှိုက်သရိုက်များကြောင့် ရှေ့တိုးရန် အခက်အခဲဖြစ်တတ်ပါသည်။ 

နာဇီများ စတာလင်ဂရက်မြို့ကို တိုက်ခိုက်စဉ်က အဖြစ်အပျက်များကို မှတ်မိကြပါလိမ့်ဦးမည်။ ပထမ နာဇီများက မြို့တော်ကို ကျောက်ခေတ်သို့ ပြန်ရောက်သွားအောင် အမှုန့်ချေပစ်လိုက်ကြပါသည်။ ပြီးနောက် ဤအပျက်အစီးများကြားမှ မြို့တော်ကို သိမ်းပိုက်ရန် ကြိုးစားရာ အမှိုက်သရိုက်များမှာ များပြားလှသဖြင့် စစ်တပ်ကြီးမှာ ရှေ့မတိုးနိုင်လောက်အောင် ဖြစ်ရဖူးသည်။

ရုရှားစစ်ကောင်၏ အုပ်ချုပ်ပုံမှာဗဟိုက ဦးစီးသောစနစ် ဖြစ်သည်။ ထို့ကြောင့်လည်း ဂျင်နရယ်အမြောက်အမြား သေဆုံးရခြင်း ဖြစ်သည်။ ဆုံးဖြတ်ချက်ကို ရှေ့တန်းရောက်နေသောသူများက မချနိုင်။ ဌာနချုပ်သို့ ပြော၍ ဌာနချုပ်က ဘာမှမမြင်ရဘဲ အမိန့်များကို ချမှတ်နေသည်။ အမေရိကန် စစ်တပ်တွင်မူ ရှေ့တန်းရောက်နေသော တပ်မှူးတစ်ယောက်သည် မိမိ၏ပတ်ဝန်းကျင်နှင့် လိုက်လျောညီထွေရှိအောင် ဆုံးဖြတ်ချက်များကို ချမှတ်နိုင်သည်။ ရှေ့တန်းတွင် တကယ်တိုက်ပွဲဖြစ်နေစဉ် တဖက်နှင့်တဖက် ပစ်ခတ်နေကြစဉ် ထိုနေရာသို့ ရောက်နေသူက ဆုံးဖြတ်ချက်များကိုချမှတ်မှသာ ပတ်ဝန်းကျင်နှင့် လျော်ညီသော အမိန့်ဖြစ်ပေမည်။ 

ယခုအခြေအနေကို ကြည့်ရသည်မှာ ရုရှားနှင့် ယူကရိန်းသည် တဖက်နှင့်တဖက် အားပြိုင်နေပြီး တစ်ယောက်ကိုတစ်ယောက် အပြီးတိုင်ချေမှုန်းရန် နည်းလမ်းမရှိဘဲ ဖြစ်နေပါသည်။ တဘက်နှင့်တဘက် အပျက်အစီးတွေသာ စုပုံလာနေပြီး နှစ်ဘက်လုံး ကောင်းနိုင်စရာမရှိတော့ပေ။ စစ်ပွဲသည်သာ ရှည်ကြာပြီး တစ်ဖက်နှင့် တစ်ဖက် အားသွန်ခွန်စိုက်ချေမှုန်းနေကြမည်သာ ဖြစ်ပါသည်။ ယူကရိန်းတို့အနေဖြင့် ခုခံအားမှာ ပိုမိုကောင်းသည်ထက်ကောင်းလာပြီး စစ်ပွဲမှာ ပိုမိုကြမ်းတမ်းလာဘွယ်ရှိသည်။

( ၃ )

ပူတင်အနေဖြင့် ရုရှားလူထုကိုလည်း မလှုပ်နိုင်အောင် ပိုင်စိုးပြီးပြီ၊ ရုရှားစစ်တပ်အနေဖြင့်လည်း စစ်ပွဲများရှုံးနိမ့်ခဲ့သဖြင့် မျက်နှာမလှဖြစ်ရပြီး ပူတင်ကို တွန်းလှန်နိုင်စရာ အကြောင်းမရှိ။ ထိုအကြောင်းများကြောင့် ပူတင်အနေဖြင့် စစ်ပွဲကို အဆောတလျင် အဆုံးသတ်စရာ မလိုပေ။ အချိန်သည် သူ့ဘက်မှာရှိနေပြီး စစ်ပွဲတာရှည်သွားလျှင်လည်း သူ့တွင် ပို၍ဆုံးရှုံးစရာမရှိတော့ပေ။

မည်သို့ပင်ဖြစ်စေ ပူတင်အဖို့ မည်မျှပင် ဆိုးရွားသည် ဆိုစေဦး၊ သူ့မျက်နှာမပျက်ရေးအတွက် ဆောင်ရွက်ပါလိမ့်မည်။ သူ့တပ်များကို ဆုတ်ခွာပေးခြင်းအတွက် ရုရှားဘက် ယိမ်းသည်ဟုဆိုသော ဒွန်ညတ် (Donetsk) နှင့် လူဟန့် (Luhansk) ဒေသနှစ်ခုကို လွတ်လပ်ရေးနှင့်တူသော အခွင့်အရေးတမျိုးမျိုးဖြစ်စေ ရစေရမည်။ ယူကရိန်းကို ဥရောပကောင်စီဝင်အဖြစ်သာ လက်ခံ၍ နေတိုးအဖွဲ့ဝင်နိုင်ငံအဖြစ် လက်မခံရေးတို့ကို နောက်တကြိမ် ရုရှားနိုင်ငံက မကျူးကျော်ရေးအတွက်ကို အာမခံပေးရမည် ဖြစ်သည်။

မည်သို့ပင်ဆိုစေ စစ်ဆိုသည်နှင့် အင်အားကြီးသူသာနိုင်စတမ်း ဟူသောအယူအဆ ကိုပုံသေကားချပ်အနေဖြင့်မှတ်ယူ၍မရကြောင်း ယူကရိန်းတွင် ဖြစ်ရပ်များက သက်သေပြလျက်ရှိနေပေပြီ။

ကိုသန်းလွင်

Ref: Free Advice For A Leader On The Edge By Thomas  Freedman N.Y. Times 15.April.2022

Join Us @ MoeMaKa Telegram
t.me@moemaka
#MoeMaKaMedia
#WhatsHappeningInMyanmar