နန္ဒလင်းရှိန် - တရုတ်နဲ့ အာဆီယံခင်းတဲ့လမ်း မြန်မာမျိုးဆက်သစ်တို့ ဘာကြောင့်လက်မခံသလဲ
(မိုးမခ) ဇူလိုင် ၁၁၊ ၂၀၂၂
မြန်မာ့အရေးဟာ အခုအချိန်အထိ နိုင်ငံရေးမိုးမှောင်ကျနေဆဲလို့ ဆိုရပါလိမ့်မယ်။ အကြောင်းကတော့ စစ်ကောင်စီခေါင်းဆောင်ရဲ့အာဏာတပ်မက်မှု အလွန်အကျူးဖြစ်နေမှုကြောင့်လို့ ဆိုရပါလိမ့်မယ်။ နိုင်ငံနှင့် ပြည်သူလူထုဟာ သူ့ပယောဂကြောင့် လက်ရှိအခြေအနေမှာ ဘက်ပေါင်းစုံ ဘေးဥပါဒ်ရန်အန္တရာယ်ပေါင်းစုံနဲ့ကြုံတွေ့နေတယ်။ ဒီအခြေအနေကို စိုးစဉ်းမျှ ထည့်သွင်းငဲ့ကွက်ခြင်း မရှိဘဲ သူအာဏာဆုပ်ကိုင်နိုင်ရေးကိုသာ ဦးစားပေးလုပ်ကိုင်နေတာ မြင်နေရတယ်။ အကြမ်းဖက်စစ်ကောင်စီက အာဏာသိမ်းထားတဲ့ တစ်နှစ်ကျော်အတွင်း စစ်ရေးပဋိပက္ခတွေကြောင့် နေရပ်စွန့်ခွာ ထွက်ပြေးရတဲ့ စစ်ဘေးဒုက္ခသည် ရ၅၈,၀၀၀ ဦးအထိရှိလာကြောင်း ကုလသမဂ္ဂ လူသားချင်းစာနာမှု ဆိုင်ရာညှိနှိုင်းရေးရုံး (UN OCHA) က ဇူလိုင် (၇) ရက်နေ့က ထုတ်ပြန်ခဲ့တယ်။ နိုင်ငံတစ်ဝန်းက နေရပ်စွန့်ခွာထွက်ပြေးနေရတဲ့ဦးရေဟာ ပြီးခဲ့တဲ့ ဧပြီလမှာ ၅၆၆,၁၀၀ ဦး၊ မေလမှာ ၅၇၈,၂၀၀ ဦး၊ ဇွန်လမှာ ရ၅၈,၀၀၀ ဦးအထိ ရှိလာတာကြောင့် သုံးလအတွင်းမှာ လူဦးရေ ၁၉၁,၉၀၀ ဦးအထိ တိုးလာခဲ့တာတွေ့ရတယ်။
၂၀၂၁ ဖေဖော်ဝါရီလ ၁ ရက်နေ့ အာဏာသိမ်းပြီးနောက် ပထမဆုံး သတ်ဖြတ်မှု ဖြစ်တဲ့ ၂၀၂၁ ဖေဖော်ဝါရီလ ၉ ရက်နေ့မှာ မမြသွဲ့သွဲ့ခိုင် ပစ်သတ်ခံရမှုကစပြီး သတ်ဖြတ်မှုပေါင်း ၁၈၇၅ မှုအတွက် တာဝန်ခံရမယ်ဆိုပြီး နိုင်ငံရေးအကျဉ်းသားများ ကူညီစောင့်ရှောက်ရေးအသင်း AAPP က ဇူလိုင်လ ၈ ရက်နေ့မှာ ထုတ်ပြန်လိုက်ကြောင်း ဘီဘီစီက ဖေါ်ပြတယ်။ အဲဒီ အမှုတွေအတွက် AAPP က သက်သေအထောက် အထားတွေကိုရရှိထားပြီး တပ်မ (၇၇) နဲ့ (၄၄) တို့က ဒီအမှုတွေမှာ အဓိကပါဝင်ပတ်သက် ကျူးလွန်ကြောင်း ဘီဘီစီရဲ့ ဆက်သွယ်မေးမြန်းချက်တွေအရ သိရတယ်လို့ ဆိုတယ်။
စစ်ကောင်စီရဲ့ တပ်မ ၆၆ ဟာ ပြီးခဲ့တဲ့နှစ် ခရစ်စမတ် မတိုင်မီ တရက်မှာ ကယားပြည်နယ် ဖရူးဆိုးမြို့နယ်အတွင်း ဒါဇင်နဲ့ ချီတဲ့ အစုအလိုက် အပြုံလိုက်သတ်ဖြတ်မှုကို ကျူးလွန်ခဲ့ပြီး တပ်မ ၄၄ ဟာလည်း ကနီမြို့နယ်အတွင်း ဖြတ်လေးဖြတ် စစ်ဆင်ရေးနဲ့ အစုလိုက်အပြုံလိုက် သတ်ဖြတ်မှုတွေကို ကျူးလွန်ခဲ့ကြောင်း AAPP ရဲ့ အစီအရင်ခံစာမှာ ဖော်ပြထားတယ်။ စစ်ကောင်စီဟာ အသက်မပြည့်သေးသူ ၃၃၈ ယောက်အပါအဝင် နိုင်ငံရေးအကျဉ်းသား တသောင်းကျော် ဖမ်းဆီးထားကြောင်း AAPP က ဆိုတယ်။ ဖမ်းဆီးခံထားရတဲ့ ကလေးတွေထဲမှာ မိဘကို ဖမ်းမမိတဲ့အတွက် ကိုယ်စား ဓားစာခံအဖြစ်နဲ့ ဖမ်းဆီးခံရတဲ့ကလေးအရေအတွက်က ၆၁ ယောက်အထိရှိတယ်လို့ ဆိုတယ်။
ဒီအခြေအနေ အဖြစ်အပျက်တွေကိုကြည့်ရင် မြန်မာစစ်တပ်ဟာ ကိုယ့်ပြည်သူကို ကာကွယ်ရမယ့်တာဝ◌န် လုံးဝပျက်ကွက်နေရုံမက ရွာတွေမီးရှို့ ပြည်သူ့ဉစ္စာပစ္စည်းတွေ လုယက်ယူငင်ပြီး ဥပဒေမဲ့ပြည်သူတွေကို သတ်ဖြတ်မှုတွေပါ ကျူးလွန်နေတာ တွေ့နေရတယ်။ ဒီလို စစ်တပ်ရဲ့ မတော်မတရားတဲ့လုပ်ရပ်တွေက နိုင်ငံနဲ့အဝှမ်းမှာရှိတဲ့ ပြည်သူတွေ (အထူးသဖြင့် ဂျန်ဇီးလူငယ်မျိုးဆက်တွေ) ကို လက်နက်ကိုင်တော်လှန်ရေးဆီ တွန်းပို့လိုက်ရာရောက်တယ်။ နွေဦးတော်လှန်ရေးရဲ့ အရှိန်အဟုန် ကြီးသထက် ကြီးလာတာဟာလည်း စစ်ကောင်စီရဲ့ လူမဆန်တဲ့ အကြမ်းဖက်မှုတွေကြောင့် ဖြစ်တယ်။
အခုလို စစ်ရာဇဝတ်မှုပေါင်း မြောက်မြားစွာကျူးလွန်နေတဲ့စစ်တပ်ဟာ ဒီရာဇဝတ်မှုတွေကို သူတို့ကျူးလွန်တာမဟုတ်၊ PDF အဖွဲ့တွေရဲ့ လုပ်ရပ်တွေဖြစ်ကြောင်း ကလိန်စေ့ငြမ်းဆင် လုပ်နေကြသေးတယ်။ သတင်းနည်းပညာခေတ်ရဲ့ အိုင်တီ မျက်လုံးပေါင်းကုဋေကုဋာအောက်မှာ ကမ္ဘာကြီးဟာ ရွာကြီးတရွာမျှသာဖြစ်တယ်ဆိုတဲ့ ဖြစ်ပေါ်ပြောင်းလဲမှုကို စစ်အာဏာ ရှင်တွေ မသိတာကတော့ အံ့ဖွယ်ကိစ္စပါပဲ။ စစ်တပ်က ကျေးရွာတွေမီးရှို့မှု၊ လူအစုလိုက် မီးရှို့သတ်ဖြတ်မှု၊ တိုက်ပွဲမဖြစ်ဘဲ လူနေကျေးရွာတွေကို လက်နက်ကြီး လက်နက်ငယ် လေကြောင်းကနေတိုက်ခိုက်မှု၊ လူထုဥစ္စပစ္စည်းတွေကို လုယက် ယူငင်မှု အစရှိတဲ့ သတင်းတွေဟာ ဒစ်ဂျစ်တယ်နည်းပညာအကူအညီနဲ့ မိနစ်ပိုင်း စက္ကန့်ပိုင်းအတွင်း ကမ္ဘာအနှံ့ပြန့်နှံ့ ရောက်ရှိသွားခဲ့ပုံကို စစ်အာဏာရှင်တွေ မသိချင်ယောင် ဆောင်နေကြပုံပါပဲ။ ဒါပေမယ် နိုင်ငံတကာမှာတော့ မြန်မာစစ်တပ် ဟာ ပြည်သူ့အိုးအိမ်မီးရှို့ လူသတ်လုယက် မုဒိန်းသမား မာဖီးယာဂိုဏ်းမျှသာ ဖြစ်တယ်လို့ နာမည်ဆိုးနဲ့ကြော်ကြားနေပြီ ဖြစ်တယ်။
ဒီလိုအခြေအနေမျိုးမှာ မဲခေါင်ဒေသတွင်း နိုင်ငံများရဲ့ နိုင်ငံခြားရေး ဝန်ကြီးများ အစည်းအဝေးကို မြန်မာနိုင်ငံ ပုဂံဒေသမှာ ပြီးခဲ့တဲ့ ဇူလိုင်လဆန်း ပထမသီတင်းပတ်က ကျင်းပခဲ့တာ တွေ့ရတယ်။ တရုတ်-မြန်မာ ပူးတွဲ ဦးဆောင် ကျင်းပခဲ့တယ်လို့သိရပြီး တရုတ်နိုင်ငံခြားရေး ဝန်ကြီး Wang Yi တက်ရောက်ခဲ့တယ်။ တရုတ်နိုင်ငံခြားရေးဝန်ကြီး Wang Yi ရဲ့ မြန်မာ နိုင်ငံ ခရီးစဉ်ကြောင့် အရှေ့တောင် အာရှနိုင်ငံများအသင်း အာဆီယံရဲ့ မြန်မာ့အရေး ကြိုးပမ်းမှုတွေကို ထိခိုက်မှာ စိုးရိမ်မိ ကြောင်း South China Morning Post သတင်းစာက ဝေဖန်ရေးသားခဲ့တယ်။ မြန်မာ့အကျပ်အတည်းပြဿနာ ဖြေရှင်းရာမှာ မြန်မာစစ်ကောင်စီရဲ့အစီအစဉ်ကို ထောက်ခံရေးနဲ့ ပုံမှန်ပြန်ဆက်ဆံဖို့ အာဆီယံကို ဖိအားပေးတဲ့ အနေအထားတွေ ရှိတယ်လို့လည်း အကဲခတ်တွေရဲ့ ပြောကြားချက်တွေကို South China Morning Post သတင်းစာက ကိုးကား ဖော်ပြထားတယ်လို့ဆိုတယ်။
ပုဂံမှာ ကျင်းပတဲ့ မဲခေါင်-လန်ချန်း ပူးပေါင်းဆောင်ရွက်ရေးအစည်းအဝေးကို တရုတ်နိုင်ငံမှာ ကျင်းပမယ်ဆိုရင် ဖြစ်နိုင်ပါလျှက်နဲ့ မြန်မာ နိုင်ငံမှာကျင်းပခဲ့တဲ့ကိစ္စကိုလည်း အမေရိကန်ငြိမ်းချမ်းရေးအင်စတီကျူက မြန်မာဆိုင်ရာ ညွှန်ကြားရေးမှူး Jason Tower က ထောက်ပြထားကြောင်း အာအက်ဖ်အေသတင်းက ဖေါ်ပြတယ်။ တရုတ်နိုင်ငံခြားရေးဝန်ကြီးအပါအဝင် ဒေသတွင်းနိုင်ငံတွေက နိုင်ငံခြားရေးဝန်ကြီးတွေ အစည်းအဝေးတက်ရောက်မှုဟာ မြန်မာနိုင်ငံရဲ့အချုပ်အခြာအာဏာနဲ့အစိုးရကို အသိအမှတ်ပြုတာဖြစ်တယ်လို့ စစ်ကောင်စီပြောခွင့်ရ ဗိုလ်ချုပ်ဇော်မင်းထွန်းက အစည်းအဝေးမတိုင်ခင်မှာ ပြောဆိုထားတာတွေ့ရတယ်။ ဒါပေမဲ့ စစ်အာဏာသိမ်းပြီးနောက်ပိုင်း ပထမဆုံးအကြိမ်အဖြစ် မြန်မာနိုင်ငံကို ပြီးခဲ့တဲ့ ဇူလိုင် ၂ ရက်နေ့က ရောက်ရှိလာတဲ့ တရုတ်နိုင်ငံခြားရေးဝန်ကြီးဟာ ဗိုလ်ချုပ်မှူးကြီး မင်းအောင်လှိုင်နဲ့ တရားဝင်တွေ့ဆုံမှု မရှိခဲ့ကြောင်း တွေ့ရတယ်။
အမေရိကန် ငြိမ်းချမ်းရေးအင်စတီကျုမှ မြန်မာနိုင်ငံဆိုင်ရာ ဒါရိုက်တာဖြစ်သူ ဂျေဆန် တာဝါက တရုတ်ဟာ မြန်မာ့အရေးနဲ့ပတ်သက်ပြီး စစ်အာဏာသိမ်းအဖွဲ့ရဲ့ လမ်းပြမြေပုံနောက် အာဆီယံနိုင်ငံတွေ လိုက်ပါဖို့ ဖဲ့ထုတ်စည်းရုံးနေတယ်လို့ ဝေဖန်ထောက်ပြခဲ့တယ်။ စစ်ကောင်စီရဲ့လမ်းပြမြေပုံဆိုတာ ၂၀၂၃ ခုနှစ် ရွေးကောက်ပွဲ ပြုလုပ်ဖို့ဖြစ်တယ်။ USDP ပါတီသို့ အာဏာလွှဲပေးနိုင်ရေးကြံစည်မှုလို့ ထောက်ပြထားတယ်။
အာဆီယံ အထူးကိုယ်စားလှယ် Prak Sokhonn နဲ့ စစ်ကောင်စီ ငြိမ်းချမ်းရေးဆွေးနွေးပွဲဆိုင်ရာ တာဝန်ရှိသူ ဗိုလ်ချုပ်ကြီးရာပြည့် ဦးဆောင်တဲ့အဖွဲ့တို့ တွေ့ ဆုံစဉ်မှာ တကယ်လို့ စစ်ကောင်စီက အကြမ်းဖက်အဖြစ် သတ်မှတ်ထားတဲ့ အဖွဲ့ အစည်းတွေထဲက တစ်ချို့က ဆွေးနွေးချင်တဲ့သူတွေရှိနေခဲ့ရင် ဗိုလ်ချုပ်ကြီးတို့ ဘယ်လိုလုပ်မလဲလို့ မေးမြန်းခဲ့ကြောင်း Prak Sokhonn က ပြောခဲ့တယ်လို့ဆိုတယ်။ အတိုက်အခံအဖွဲ့တွေနဲ့ တွေ့ဆုံရေး ဖြစ်နိုင်စရာရှိပေမယ့်၊ သူတို့ဘက်က အခြေအနေသုံးခုကို လိုက်နာဖို့လိုကြောင်း ပြန်လည်ပြောကြားခဲ့တယ်လို့ ပေါ်ပြူလာသတင်းမှာ ဖေါ်ပြတာတွေ့ရတယ်။
အဲဒီ အချက် (၃) ချက်က လက်ရှိ စစ်ကောင်စီအစိုးရအား ဖျက်သိမ်းဖို့ ကြိုးစားနေမှုတွေ ရပ်တန့်ရန်၊ လက်ရှိ စစ်အစိုးရအဖွဲ့ကို အစားထိုးဖို့ မကြိုးစားရန်၊ ၂၀၀၈ အခြေခံ ဥပဒေကို ငြိမ်းချမ်းရေးဆွေးနွေးမှု ဆိုင်ရာအခြေခံမူအဖြစ် ဆက်လက်ထားရှိရန် စတဲ့ အချက်တွေကို လိုက်နာရမယ်လို့ ပြောကြားခဲ့ ကြောင်း သိရသိရတယ်။ ဘယ်လိုမှ မဖြစ်နိုင်တဲ့ ပြည်သူလူထုက လက်မခံနိုင်တဲ့ တောင်းဆိုချက်တွေလို့ ဆိုရမယ်။ ပြည်သူလူထုအများစုကြီးက စစ်ကောင်စီကို အလိုမရှိတော့ကြောင်း ပုံသဏ္ဍာန်အမျိုးမျိုးနဲ့ဖေါ်ပြပြီးခဲ့တာတောင် စစ်အုပ်စုက မြန်မာ့နိုင်ငံရေးမှာ သူတို့ဆက်ပါခွင့်ရဖို့ ကြိုးပမ်းနေဆဲဖြစ်တာတွေ့ရတယ်။ ဒါပေမယ့် ပြည်သူတွေရဲ့အဖြေကတော့ No ပါပဲလို့ တိတိကျကျ ပြတ်ပြတ်သားသား ပြန်ကြားပြီးဖြစ်ကြောင်း တွေ့ရတယ်။
တချိန်တည်းမှာ မြန်မာနိုင်ငံမှာ စစ်ကောင်စီရဲ့ အကြမ်းဖက်မှုတွေ ရပ်အောင် မလုပ်ဆောင်နိုင်တဲ့အတွက် အာဆီယံ အရပ်ဘက် (၂၁) ဖွဲ့က ထိုင်းအစိုးရကို ပြစ်တင်ရှုတ်ချလိုက်တာလည်း ကြားရတယ်။ လူသားချင်းစာနာမှု အကူအညီတွေ ထိုင်း-မြန်မာနယ်စပ်ဖြတ်ကျော်ပေးရမယ့် အရေးကိစ္စတွေမှာ ထိုင်းအစိုးရ ပူးပေါင်းပါဝင်ဖို့ တိုက်တွန်းထားထာတွေ့ရတယ်။ ထိုင်းအစိုးရအနေနဲ့ မြန်မာစစ်ကောင်စီကို စစ်လက်နက်ခဲယမ်းမီးကျောက်နဲ့ စစ်ဘက်ဆိုင်ရာပစ္စည်းတွေ၊ လေယာဉ်ဆီတွေ တိုက်ရိုက်ဖြစ်စေ၊ သွယ်ဝိုက်လို့ဖြစ်စေ ရောင်းတာ၊ ကူညီပံ့ပိုးတာတွေ မလုပ်ဖို့လည်း အာဆီယံ အရပ်ဘက် အဖွဲ့ (၂၁) ဖွဲ့ က တိုက်တွန်းတောင်းဆိုထားကြောင်း RFA သတင်းမှာ ဖေါ်ပြတယ်။ ဇွန်လ ၂၆ ရက်နေ့ကတည်းက စစ်ကောင်စီဟာ ဥကရစ်ထစခန်းနားကို တိုက်လေယာဉ်တွေနဲ့ ပစ်ခတ်တိုက်ခိုက်လို့ ရွာသား ၈ဝဝ လောက် ထိုင်းနိုင်ငံ ပုပ္ဖရမြို့နယ်ထဲကို ထွက်ပြေးခိုလှုံနေရတယ်လို့လည်း ၂၁ ဖွဲ့ရဲ့ကြေညာချက်မှာ ဖော်ပြထားတယ်။
မြန်မာပြည်က ထွက်ပြေးခိုလှုံလာသူတွေကို ထိုင်းအစိုးရအနေနဲ့ ပြန်တွန်းမထုတ်ဘဲ လက်ခံထားဖို့ အာဆီယံ အရပ်ဘက် အဖွဲ့ (၂၁) ဖွဲ့က တိုက်တွန်းထားတယ်။ ဒီအပြင် အာဆီယံဘုံသဘော တူညီချက် ၅ ရပ်ကို စစ်ကောင်စီဘက်က လိုက်နာအကောင်အထည်ဖော်အောင် ထိုင်းအစိုးရအနေနဲ့ အာဆီယံဘက်က ကိုယ်စားပြုဆောင်ရွက်ဖို့၊ နိုင်ငံတကာက ပြဌာန်း ထားတဲ့ဥပဒေတွေ၊ လူ့အခွင့်အရေးတွေအရ ရာဇဝတ်မှုကျူးလွန်ထားသူကို တာဝန်ယူမှု တာဝန်ခံမှုရှိအောင် ဆောင်ရွက်ပေးဖို့လည်း (၂၁) ဖွဲ့က ထောက်ပြထားတာတွေ့ရတယ်။ ဇွန်လ ၃ဝ ရက်နေ့က စစ်ကောင်စီတပ်ရဲ့ MIG-29 တိုက်လေယာဉ်တွေနဲ့ ထိုင်း-မြန်မာနယ်စပ်မှာ ပစ်ခတ်တိုက်ခိုက်သွားမှုကြောင့် နှစ်နိုင်ငံ အရပ်သားတွေ ထိခိုက်ဒဏ်ရာရခဲ့ တာ၊ တာ့ခ်ခရိုင် ပုပ္ဖရမြို့နယ် စာသင်ကျောင်းက ကလေးတွေ ထိပ်လန့်တကြား ပြေးလွှားပုန်းအောင်းရတာတွေဖြစ်ခဲ့ပြီး တဲ့နောက် ထိုင်း၊ မလေးရှားနဲ့ မြန်မာတွေပါဝင်တဲ့ အာဆီယံ အရပ်ဘက် အဖွဲ့ (၂၁) ဖွဲ့က ဇူလိုင်လ ၃ ရက်နေ့စွဲနဲ့ ပူးတွဲကြေညာချက်ထုတ်ပြီး ထိုင်းအစိုးရကို တောင်းဆိုခဲ့တာဖြစ်တယ်။
မြန်မာ့အရေးဟာ အိမ်နီးချင်းနိုင်ငံတွေကိုပါ ထိခိုက်နစ်နာစေခဲ့ပြီလို့ဆိုနိုင်တယ်။ အိန္ဒိယ-မြန်မာနယ်စပ် တမူးမြို့မှာလည်း အိန္ဒိယနိုင်ငံသား ၂ ဦးကို စစ်ကောင်စီလက်ပါးစေ ပျူစောထီးတွေ သတ်ဖြတ်မှုကိစ္စလည်း ပေါ်ပေါက်နေတာတွေ့နိုင် တယ်။ တမူးမြို့မှာ အသတ်ခံရတဲ့ အိန္ဒိယနိုင်ငံသား ၂ ဦးဟာ တမီးလ်လူမျိုး P Mohan ၂၈ နှစ်နဲ့ M. Iyarnar ၃၅ နှစ်တို့ ဖြစ်ပြီး မိုးရေးမြို့က လူမှုအဖွဲ့အစည်းတွေကတော့ သေဆုံးသူတွေရဲ့ ရုပ်အလောင်းပြန်ရရေးနဲ့ လျော်ကြေးရရှိရေးအတွက် ဆောင်ရွက်ပေးဖို့ မဏိပူရပြည်နယ် ဝန်ကြီးချုပ်ကို ဇူလိုင် (၇) ရက်နေ့က တောင်းဆိုထားတယ်လို့ သိရတယ်။ စစ်ကောင်စီကတော့ သူတို့နဲ့မဆိုင်သလို လုပ်နေကြတာတွေ့ရတယ်။ အိန္ဒိယနိုင်ငံထုတ်သတင်းစာတွေမှာတော့ သေဆုံးသူ ရုပ်အလောင်းတွေ ပြန်လည်ရရှိရေးအတွက် ဗဟိုအစိုးရကို မဏိပူရပြည်နယ်အစိုးရက ဖိအားပေးနေကြောင်း ဖော်ပြထားပြီး ဒီအဖြစ်အပျက်ဟာ သံတမန်ရေး အကျပ်အတည်းဖြစ်ပေါ်လာနိုင်ကြောင်းလည်း ရေးသားထားတယ်လို့ VOA သတင်းက ဆိုတယ်။
လက်ရှိအနေအထားအရ NUG အပါအဝင် အတိုက်အခံ အင်အားစုတွေနဲ့ စစ်ကောင်စီတို့အကြား ထိပ်တိုက်ရင်ဆိုင်မှု ပြင်းထန်နေတယ်။ တရုတ်-အာဆီယံအပါအဝင် နိုင်ငံတကာအသိုင်းအဝိုင်းက တွေ့ဆုံညှိနှိုင်းရေး လမ်းကြောင်းပေးနေပေမယ့် လက်ရှိ မြန်မာ့နိုင်ငံရေးပြဿနာကို ၂၀၀၈ အခြေခံ ဥပဒေအောက်မှာ ဖြေရှင်းလို့မရနိုင်တော့တာ မြင်သာနေတယ်။ တိုင်းရင်းသားနိုင်ငံရေးအင်အားစုတွေအပါအဝင် အတိုက်အခံ အင်အားစုတွေက ၂၀၀၈ ဖွဲ့စည်းပုံကို ဖျက်သိမ်းလိုက်ပြီ လို့အတိအလင်းပြောထားကြတာ ကမ္ဘာသိကိစ္စဖြစ်နေတယ်။ အတိုက်အခံအင်အားစုအားလုံးရဲ့ တူညီတဲ့သဘောထားကတော့ ဒါတင်မက ၂၀၂၀ ရွေးကောက်ပွဲရလဒ်ကို ဆက်လက်အတည်ပြုထောက်ခံနေကြာင်း တွေ့ရတယ်။ စစ်တပ်ကို နိုင်ငံရေးကနေဆုတ်ခွာပြီး စစ်တန်းလျားပြန်ပါလို့လည်း အတိုက်အခံတွေက တောင်းဆိုထားတယ်။
ဒါကြောင့် လက်ရှိ မြန်မာ့နိုင်ငံရေးအကြပ်အတည်းဟာ Deadlock အနေအထား သောင်မတင်ရေမကျဖြစ်နေဆဲလို့ ဆိုနိုင်တယ်။ တရုတ်နဲ့အာဆီယံခင်းတဲ့လမ်းက စစ်ကောင်စီကို ပိုနေမြဲကျားနေမြဲထားလိုခြင်းဖြစ်လို့ မြန်မာမျိုးဆက်သစ်လူငယ်တွေက လက်မခံနိုင်ခြင်းဖြစ်တယ်။ တိုင်းရင်းသား လူကြီး/လူငယ် Stakeholders အများစုရဲ့ သဘောဆန္ဒကတော့ လူငယ်မျိုးဆက်သစ်တို့ရဲ့ အနာဂတ် အိပ်မက်တွေ ပြန်လည်အကောင်အထည်ဖေါ်ရေးအတွက် စစ်အာဏာရှင်စနစ်ကို အမြစ်ပါမကျန် မြေလှန်ပစ်ဖို့လိုတယ်လို့ ဆိုနေကြပါတယ်။
t.me@moemaka
#MoeMaKaMedia
#WhatsHappeningInMyanmar