ဆာသော်ဒိုး - စတိတ် အလွဲ

စတိတ် အလွဲ

ဆာသော်ဒိုး

(မိုးမခ) ဩဂုတ် ၁၊ ၂၀၂၃

(က)

၂၀၂၁ ခုနှစ်ကတည်းက ယာယီခရီးထွက်လာခဲ့သည့် ဆာသော်ဒိုးမှာ ယခု ၂၀၂၃ အထိ အိမ်ပြန်မရောက်သေးပါ။ ခဏပါပဲဆိုပြီး ရန်ကုန်မြေကနေ ထွက်လာခဲ့ပေရာ မြို့ကြီးပြကြီးတွေကနေ မြို့ငယ်လေးပေါင်းများစွာမှသည် ရွာကလေးပေါင်း မြောက်မြားစွာကို ဟိုဝင်သည်ထွက် ဟိုနား သည်ခို ဆိုသလို ခြေစင်္ကြာဖြန့်တော်မူနေဆဲပါ ခင်ဗျာ။

ဘဝမှာ တခါဘူးမျှမဆုံခဲ့ဘူးသည့် လူပေါင်းများစွာနှင့် ခင်မင်ရင်းနှီးခွင့်ရခဲ့ပြီးသကာလသူတို့ သူတို့၏ နေအိမ်များမှာ အမျိုးရင်းချာများပမာ စိတ်ချလက်ချ ခိုနားခွင့် စားသောက်ခွင့်ရခဲ့သည်မှာကား ဘဝအတွက် အမှတ် တရများစွာမှ များစွာပါပေ။

' ယာယီခရီး ' ကား ယခုအထိတော့ ဆုံးခန်းမတိုင်သေး။ ရွာပေါင်းများစွာကို ဖြတ်သန်းခဲ့ရချိန်မှာ မိတ်ဆွေအသစ်ပေါင်းများစွာ မိတ်ဆွေအစစ်ပေါင်းများစွာနှင့် ဆုံဆည်းခွင့်ရခဲ့သည်ကတော့ ဘဝအတွက် ဆုလာဘ်တစ်ပါးပါလေ။

ရွာကလေးတစ်ရွာမှာ လေးငါးခြောက်လ အနေကြာခဲ့ရတော့ တရွာလုံးနှင့် မိတ်ရင်းဆွေရင်းတွေလို ' အမျိုးအရင်းတွေ ' လိုကို ဖြစ်ခဲ့ပါလေ၏။ သူတို့က ဆာသော်ဒိုးကို မည်သို့ခေါ်သည်ဟုထင်ပါသနည်း။ ' TV က ကာတွန်းဆရာကြီး 'တဲ့ ခင်ဗျ။ 

(ခ)

သည်ရွာကလေးရဲ့ဘေးမှာ စောက်နက်နက်ချောင်းကလေးရှိပါတယ်။ မိုးမှာဆို ရေအပြည့်။

နွေမှာလည်း ရေနည်းနည်းတော့ စီးနေတာပါပဲ။

ချောင်းကမ်းပါးဘေးတွေမှာ ယာခင်းကလေးတွေရှိပြီး ပြောင်းစိုက်တယ်။ ကြက်သွန်စိုက်တယ်။ ငြုပ်စိုက်တယ်။ နှမ်းစိုက်တယ် ခင်ဗျ။

အဲသည်ရွာရဲ့အမည်ကလည်း စိတ်ဝင်စားစရာပါ။ ' သေမသောက် ' တဲ့။ လှလိုက်တဲ့ နာမည်လေး။ ' သေမသောက် ' ဆိုပေမယ်လို့  ဆာသော်ဒိုးတယောက် ထန်းရည်ပေါ်ချိန် ထန်းရည် သောက်ရပါတယ်။ ထန်းရည်က

နေချက်ထားတဲ့ ' ချိုးအရက် ' လည်း မော့ခွင့်ရပါတယ်။ ကြံကနေချက်တဲ့ ' ကြံအရက်' လည်း ဆေးဖြစ်ဝါးဖြစ် မှီဝဲရပါတယ်။

သည်လို တခါတရံ ' ဇရက်(ဆားရက်)မင်းစည်းစိမ် ' ခံစားခွင့်ရတဲ့အချိန်မျိုးမှာ ရန်ကုန်က ဘီယာဆိုင်ထိုင်နေကျဘော်ဒါတွေကို လွမ်းမိတာတော့ အမှန်ပါ ခင်ဗျာ။ အကြောင်းတိုက်ဆိုင်တဲ့အခါ အတွေ့အကြုံတိုက်ဆိုင်တဲ့အခါမျိုးမှာ အတိတ်ကအဖြစ်အပျက်တွေနဲ့ချိန်ထိုးပြီး သတိရမိတာလွမ်း ဆွတ်မိတတ်တာဟာ သဘာဝပဲမဟုတ်လား။

တခါတခါလည်း အခြေချနေထိုင်ရာ မြို့တော်ရန်ကုန်က သူငယ်ချင်းတွေကိုသာမက ဒေသကောလိပ်တုန်းက ဘော်ဒါတွေကိုပါ သတိရစရာ ' ဆင်တူဖြစ်ရပ် ' တွေကအလွမ်းတွေကို သယ်ဆောင်လာတတ်ပါတယ်။ 

အဲသည်လိုမျိုးများ ကြုံလာခဲ့ပြီဆိုရင် အသံထက်မြန်တဲ့ ' အတိတ်သွားလျှပ်စစ်ရထား ' ဟာ ပစ္စုပ္ပန်ဘူတာကနေပြီး  အတိတ်ဘူတာကို စက္ကန့်ပင်မခြား ချက်ချင်းဆိုက်ရောက်သွားတတ်တာကတော့ အံ့သြစရာပါ။ 

(ဂ)

တခါမတော့ ရွာက ဂီတလုလင်အဖွဲ့သားတွေက ဆာသော်ဒိုးကို သူတို့အော်ဂင်ဝိုင်းနဲ့အတူ ရွာအလှူမှာ သီချင်းတပုဒ်ဆိုပေးဖို့ တိုက်တွန်းတောင်းဆိုလာပါတယ်။ သူတို့ကတော့ တီးနေကျ ဆိုနေကျသူတွေပါ။

" TV က ကာတွန်းဆရာကြီး . . . တပုဒ်တော့ လုပ်လိုက် "

" ဟာဗျာ . . . ကျနော်က ကာရာအိုကေနဲ့သာ ဆိုတတ်တာဗျ "

" လျှိူမထားပါနဲ့ ကိုယ့်ဆရာ . . . ရန်ကုန်မှာ ' ဝိုင်း ' နဲ့ဆိုဖူးတာ သိပါတယ်ခင်ဗျ "

ငြင်းလို့လည်းမရ၊ မဆိုပြန်ရင်လည်း ရိုင်းရာကျမည်ဖြစ်၏။ သို့ပေမည့် ဆိုရမှာကားအစိမ်းသက်သက်ကြီးဖြစ်နေရာ တခုခုတော့ လိုအပ်နေသလိုပါပေ။ ခဏနေတော့ ' အာသွက်ဆေး ' ပုလင်းလေး ရောက်လာပြီး အကြမ်းပန်းကန်ထဲ ငှဲ့ပေးလာလေရာသည်အတိုင်း ဇတ်ခနဲ မော့ချလိုက်ပါ၏။

ပြီးမှ ရေလေးအနည်းငယ် အာဆွတ်၏။

" ဝှား . . . အား . . . ဟား . . . "

" ဟားဟား ဟားဟား ဟားဟား . . . . "

သို့ဖြင့် ' ပြည်တော်ဝင် ' သီချင်းကို သီဆိုရန် ဟန်တွေ မာန်တွေ ဋ္ဌာန်တွေ ဈာန်တွေကိန်းအောင်းရောက်ရှိလာသလိုလိုပါပေ။

သို့ပေမယ့် ' အတီးဆရာ ' တွေကား ညက်သလောက် ' အဆိုဆရာ ' ကား အဝင် အထွက်တွေ မှားနေပါလေတော့၏။ အစကနေပြန်တီး၏။ ပြန်ဝင် ၏။ သို့ပေမည့် ' အဆို ' ကား ထပ်၍ထပ်ကာ မှားနေဆဲပါ ခင်ဗျ။

" မဆိုတာကြာလို့ပါ ကိုယ့်ဆရာ . . . "

" ဟားဟား ဟားဟား ဟားဟား . . . . "

ကျနော် ရုတ်တရက်ကြီး ထရယ်မိလိုက်လေရာ အော်ဂင်ဆရာ စည်းဝါးဆရာနှင့် သေမသောက် ဂီတလုလင်များ ရပ်သွားကြပါလေ၏။

သို့ဖြင့် ကျနော်ရယ်ရခြင်းအကြောင်းရင်းကို ဘော်ဒါတွေအား ရှင်းပြဖြစ်ပါလေတော့၏ ခင်ဗျာ။

" ဒီလိုဗျာ ကိုယ့်ဆရာတို့ . . . ကျုပ်အခုလိုအဖြစ်မျိုးကောလိပ်တုန်းက ကြုံဖူးတာကိုသွားပြီးအမှတ်ရမိလို့ ရယ်ချလိုက်မိတာပါဗျို့ . . . "

(ဃ)

၁၉၈၁/၈၂ ဝန်းကျင် ပြည်ဒေသကောလိပ်မှာ ဆာသော်ဒိုးဟာ ' မိုက်ခဲ ' တွေထဲက တဦးပေါ့ ခင်ဗျာ။ ဖရက်ရှာဝဲလ်ကမ်းတွေ ဖဲရ်ဝဲတွေ အဆောင်ဒင်နာတွေမှာ ' ဖိုးဆိုချင် ခင်မောင်ညွန့် ' အဖွဲ့ဝင်ပါ။ 

အဲသည်ခေတ်က မြို့ပေါ်က တတ်နိုင်တဲ့မင်္ဂလာဆောင်တွေမှာ ' တီးဝိုင်း ' ထည့်လေ့ရှိကြပါတယ်။ ' စတိတ်ရှိုး ' လို့ခေါ်ကြတာပေါ့။ မြို့မှာ နာမည် ကြီးတီးဝိုင်းတွေ ၆ ခုလောက်တောင် ရှိတယ်။ ကျနော်တို့ကျောင်းမှာလည်း တူတူတန်တန်တီးနိုင်တဲ့ ' ကျောင်းသားဝိုင်း ' ရှိပါတယ်။

တစ်ခါမတော့ ဖဲရ်ဝဲတစ်ခုမှာ တီးဖို့ ဆိုဖို့ပေါ်လာတာနဲ့ ဘော်ဒါပလေရာတွေနဲ့ ပွဲမဝင်ခင် လေးငါးရက်လောက် သီချင်းတွေတိုက်ကြပါတယ်။ လိဒ် ဖြူတုတ်၊ ဘေ့စ် ခင်မောင်လတ်၊ ရက်သမ် ချိုဆွေ၊ ဒရမ်မာ တင်မောင်ဌေး တို့ပေါ့ ခင်ဗျာ။

ဆိုမယ့်သူတွေကလည်း အများသား။ ကိုယ်ဆိုမယ့်သီချင်းကို ကြေညက်အောင် အတီးသမားတွေနဲ့ လေးငါးရက်လောက် လေးငါးကြိမ်လောက် သေသေချာချာကို တိုက်ခဲ့ကြပါတယ်။ ဆာသော်ဒိုးက ကိုခင်ဝမ်းကြီးရဲ့ 

' ဘာမဆို မင်းအတွက် ' ကိုသီဆိုဖို့ အများနည်းတူ ကြေညက်အောင် တိုက်ပါတယ်။

ကျန်သူငယ်ချင်းတွေလည်း သူ့ဟာနဲ့သူ သူ့သီချင်းနဲ့သူ အသီးသီးအသက အသက တယောက်မကျန် ကြေညက်နေအောင်ကိုတိုက်ခဲ့ကြပါတယ်။ အဲသည်ခေတ်ကာလအချိန်က ' ဟစ် ' ဖြစ်နေတဲ့အဆိုတော်တွေကလည်း

အများကြီးဗျ။ အခွေတွေအပြိုင်အဆိုင်ထွက်ပြီး အပြိုင်အဆိုင်ကို အောင်မြင်ပြီး အပြိုင်အဆိုင်ကို လူကြိုက်များနေကြတာ။

စိုင်းထီးဆိုင်၊ ပလေးဘွိုင်သန်းနိုင်၊ ဘိုဘိုဟန်၊ စိုးပိုင်၊ မြန်မာပြည်သိန်းတန်၊ လွှမ်းမိုး၊ ကိုင်ဇာ၊ ကံ့ကော်တောမျိုးအောင်၊ ခင်မောင်တိုး၊ ခင်ဝမ်း၊ ခိုင်ထူး၊ သွအောင်၊ ကျော်ဟိန်း၊ ဂျေမောင်မောင်၊ သုမောင်၊ သန်းဖေလေး၊ စန္ဒယားလှထွတ်၊ စန္ဒယားချစ်ဆွေ၊ ကိုတင်လှိုင်၊ ဟင်္သာတထွန်းရင်၊ စိုင်းနေဝန်း၊ အနိုင်၊ မင်းအောင်. . . . . . စသည် ဖြင့်ပေါ့ဗျာ။

အမျိုးသမီးတွေကတော့ မာမာအေး၊ တင်တင်မြ၊ ပုလဲ၊ ကေဂျာနူး၊ တင်မိုးခိုင်၊ နော်လီဇာ၊ မေရွက်ဝါ၊ မေဆွိ၊ မေခလာ၊ အယ်လ်ခွန်းရီ၊ ဖြူ သီ . . . . . . . စသည်ဖြင့်ပေါ့ ခင်ဗျာ။

အဲသလိုနဲ့ ဖဲရ်ဝဲညကို ရောက်ရှိလာပါတော့တယ်။ ရှေ့မှာ စိုင်းထီးဆိုင်တွေ၊ ဘိုဘိုဟန်တွေ၊ ကိုင်ဇာတွေ၊ လွှမ်းမိုးတွေ၊ ခင်မောင်တိုးတွေ၊ ပုလဲတွေ၊ မေဆွိတွေ၊ မေခလာတွေ၊ ဖြူသီတွေ တလှေကြီး အဆိုအတီး

လိုက်ဖက်မျှတစွာ တင်ဆက်နိုင်ခဲ့ကြပါပြီ။

" ယခုတစ်ဖန် အလှည့်ကျသူကတော့ သိပ္ပံသင်္ချာဘာသာတွဲမှ ' ကြင်စိုး ' ဖြစ်ပါတယ်ရှင်။ သူသီဆိုမယ့်သီချင်းကတော့ ဟင်္သာတ ကမ်းနဘေးက အလွမ်းသမားလေး မင်းအောင်ရဲ့ ' ရဝေ ရဝေ ' လို့ နာမည်ကြီးနေတဲ့ ' အသည်းနွမ်းခေါ်သံ ' ဖြစ်ပါတယ်ရှင့် "

" ဖြောင်း ဖြောင်း ဖြောင်း ဖြောင်း ဖြောင်း "

လက်ခုပ်သံများ လျှံထွက်သွားပါလေတော့၏။ အဲသည်ကာလမှာ အလွန် ' ပေါက် 'နေပြီး အင်မတန်မှ လူကြိုက်များနေသည့်တေးတပုဒ်ပါ။ ' ရဝေ ရဝေ...  ‌ေဩာ်  . . .မြိုင်စောင်းမှာလ ဥဒေါင်းတွေ တွန်သံ တွန်သံကြားရင် . . . ' အစချီ လူတိုင်းနားမှာစွဲနေကာ လူတိုင်းနီးပါး ပါးစပ်ဖျားမှာပါ အလိုက်သင့်လေး ' ညည်း ' ဖူးကြသည့် သီချင်းလေးပါ။

ကျနော်တို့နှင့် ဘာသာတွဲတူ အတန်းတူ သူငယ်ချင်း ကြင်စိုး စင်ပေါ်သို့တက်လာပါလေပြီ။ ငါးပေလောက်ပဲ ရှိတဲ့ အရပ်အမောင်းမှာ ဆင်ယင်ထားတဲ့ဒီဇိုင်းကာလာအနေအထားကတော့ ရှေ့ကလူတွေ လက်ဖျားခါ

လောက်သဗျ။ အဆိုကျော် ကိုမင်းအောင်စတိုင်အတိုင်း ရှပ်လက်ရှည် ကော်လာရှည်ရှည် အဖြူ၊ ခေါင်းလောင်း ဘောင်းဘီရှည်အဖြူ၊ ရှူးဖိနပ်အနက်နဲ့ ဂုတ်ထောက်ဆံပင်ကို ဘေးခွဲ ခွဲထားတယ်။ အဆွေးဒီဇိုင်းမျက် နှာနဲ့။ ' လုံးဝ မင်းအောင် ' ။

ပရိတ်သတ်မှာ သူ၏ဝတ်စားဆင်ယင်မှုအနပညာနှင့် အမူအရာကို ကြွေလေပြီ။

ကြင်စိုး စင်ရှေ့သို့ရောက်လာပြီး မိုက်ကိုဖြုတ်လိုက်၏။ ထိုအချိန်မှာပင် တီးဝိုင်းက' ခြေဆင်း ' စတီးပါလေရာ အဲသည်အချိန် သီရိခေတ္တရာ ပြည်မြို့ပေါ်က Exit တို့၊ El ysium တို့၊ Holly Star တို့၊ CAMS တို့လို ပရော်ဖက်ရှင်နယ်ဝိုင်းကြီးများအလား ထင်မှတ်ရလောက်အောင် အတီးညက်လှပါပေ၏။  ကြင်စိုးမှာ သူ ' ဝင် ' ရမည့်နေရာကို အာရုံစိုက်နေပါ၏။ ' အတော ' အဆုံးမှာ ' အဆို ' ဝင်ပါ၏။

" . . . . . . ဒူ့  ဒူ  ဒူ့  ဒူ . . . ဒူ့  ဒူ့  ဒူ့  ဒူ့

ဒူ့  ဒူ  ဒူ့  ဒူ  ဒူ . . . . . . "

" ရဝေ ရဝေ့ . . . . . . "

ရှေ့ဆက်၍ မရတော့ပါ ခင်ဗျာ။ ' ရဝေ ရဝေ  ' ဟု သာသာလေး ဆိုရမှာကို အောက်ကမြင်ထည့်ပြီး ' ရ ဝေ ရ ဝေ့. . . . ' ဖြစ်ခဲ့ရာ သူ ဘယ်လိုမှကို ဆက်ဆိုလို့မရတော့ပဲ ရုတ်တရက်လက်ကိုမြှောက်ပြီး တီးဝိုင်းကို ' ဟိုးထား ' ဟု အော်လိုက်ပါလေ၏။ ပြီးတော့မှ ပရိသတ်ကို တောင်းပန်ပါလေ၏။

" သည်းခံတော်မူကြပါ ခင်ဗျာ . . ကျနော်နှင့် တီးဝိုင်းတို့မှာ အပေးအယူ လွဲမှားသွားခဲ့သည့်အတွက် အမှားအယွင်းကလေးများဖြစ်သွားရင် ခွင့်လွှတ်ပါ . . . "

ပြီးတော့ တီးဝိုင်းဘက် လက်မြှောက်ပြကာ တစ်လုံးချင်း ပြောပါလေ၏။

" ကဲ . . . ပြ န် စ မ ယ် . . . ရ ယ် ဒီ . . .

ဖိုး . . . သရီး . . . တူး . . . ဝမ်း . . . ဂိုး "

ဝိုင်းက အစကနေ ပြန်တီးလာပါ၏။ ခြေဆင်းဆုံးတော့ ကြင်စိုး အဆို ဝင်ပါ၏။

" . . . ဒူ့  ဒူ  ဒူ့  ဒူ . . . ဒူ့  ဒူ့  ဒူ့  ဒူ့  ဒူ့  ဒူ  

ဒူ့  ဒူ  ဒူ . . . . . . "

" ရ ဝေ့. . . . . . ရ ဝေ "

ရှေ့ကို အသံဆက်လို့ မရတော့ပြန်ပါလေ။

သည်တခါ ' အောက်ကမြင် ' က ရှေ့ကိုတက်သွားပြီး ' ရ  ဝေ့' ဖြစ်လျက် အခက်ကြီးခက်ပြန်တာပေါ့ ခင်ဗျာ။ သူသည်ကား ' ဟိုးထား ' လုပ်ပြန်ပါလေ၏။

" သည်းခံတော်မူကြပါ ခင်ဗျာ . . .တီးဝိုင်းနဲ့ ကျနော်ကြေညက်အောင် တိုက်မထားရတဲ့အတွက် အမှားအယွင်းလေးများပါသွားရင် ခွင့်လွှတ်ပါ ."  

" ဝါး . . . ဟားဟား ဟားဟား ဟားဟား "

" ဟေး . . . ဟေး . . . ဟေး . . . ဟေး "

" ဟေ့ကောင် ကြင်စိုး . . ဆင်း ဆင်း . . "

အောက်ကပရိသတ်မှာ  ပတ်တုတ်၍မရတော့ပါ။ စင်ပေါ်မှာလည်း နဂိုကတည်းက အရယ်သန်လွန်းလှသည့် လိဒ်ဂစ်တာဆရာဖြူတုတ်မှာ မတ်တပ်ပင်မရပ်နိုင်တော့ပဲ စင်ပေါ်မှာပက်လက်ကြီးလဲကာ အူတက်နေတာ

သေးတွေတောင်မှ ထွက်ကျကုန်ပါရောလားခင်ဗျာ။

(င)

" ' စတိတ် ' ဆိုတာ သိပ်နတ်ကြီးတယ်။

အောက်မှာ ဘယ်လောက်ပဲ ညက်ထားညက်ထား အပေါ်ရောက်ပြီး တကိုယ်တည်း ငေါငေါကြီး ' လွဲ ' တဲ့အခါ လူအများ ' ဟားစရာ ' ဖြစ်တတ်ပါသဗျား "

ဆာသော်ဒိုး

-

Join Us @ MoeMaKa Telegram
t.me@moemaka
#MoeMaKaMedia
#WhatsHappeningInMyanmar