ကယန်းအမျိုးသားပါတီ ဥက္ကဋ္ဌ ခွန်းဘီထူးနှင့်တွေ့ဆုံခြင်း

ဖြိုးသီဟချို ၊ Myanmar NOW

(မိုးမခ) နိုဝင်ဘာ ၂၃၊ ၂၀၁၉

လူငယ်မျိုးဆက်သစ်များဖြင့် ပါတီကို သွေးသစ်လောင်းရန် ရည်ရွယ်လုပ်ဆောင်နေသော ကယန်းအမျိုးသားပါတီက ၂၀၁၅ ရွေးကောက်ပွဲအပြီး ပါတီညီလာခံတွင် အသက် ၃၀ ကျော်အရွယ် လူငယ်နိုင်ငံရေးသမား ခွန်းဘီထူးကို ပါတီဥက္ကဋ္ဌအဖြစ် ရွေးချယ်လိုက်သည်။

ခွန်းဘီထူးမှာ တပ်မတော်အစိုးရလက်ထက်က အတည်ပြုခဲ့သည့် ၂၀၀၈ ဖွဲ့စည်းပုံ အခြေခံဥပဒေကို ကန့်ကွက်ဆန္ဒပြမှုကြောင့် ဖမ်းဆီးခံရကာ အကျဉ်းထောင်ထဲတွင် ၄ နှစ်ကြာ နေထိုင်ခဲ့ရပြီး ၂၀၁၂ ခုနှစ်တွင် အကျဉ်းထောင်မှ ပြန်လည် လွတ်မြောက်လာခဲ့သူဖြစ်သည်။

လက်ရှိတွင် ကယန်းအမျိုးသားပါတီ၏ ဗဟိုကော်မတီဝင် ၇၀ ရာခိုင်နှုန်းကို လူငယ်၊ လူလတ်ပိုင်းများက ဦးဆောင်နေပြီး ၂၀၂၀ ရွေးကောက်ပွဲတွင် ကယားပြည်နယ်အတွင်းရှိ ကယန်းလူမျိုးများ အဓိကနေထိုင်သည့် မဲဆန္ဒနယ်များတွင် ဝင်ရောက် ယှဉ်ပြိုင်ရန် ပြင်ဆင်နေသည်။

ယင်းအပြင် ပြည်နယ်အတွင်း အင်အားကြီးပါတီဖြစ်သည့် ကယားဒီမိုကရက်တစ်ပါတီနှင့် မဟာမိတ်ဖွဲ့ကာ မဲဆန္ဒသတ်မှတ် ယှဉ်ပြိုင်ရန်လည်း ရည်ရွယ်ထားသည်။

ယင်းကြောင့် ကယားပြည်နယ်အခြေအနေ၊ ၂၀၂၀ ရွေးကောက်ပွဲ အလားအလာနှင့် ကယန်းအမျိုးသားပါတီ၏ နိုင်ငံရေးမျှော်လင့်ချက်များကို သိရှိနိုင်စေရန် Myanmar Nowက ကယားပြည်နယ်၊ လွိုင်ကော်မြို့သို့ သွားရောက်ကာ ခွန်းဘီထူးနှင့် တွေ့ဆုံမေးမြန်း၍ ကောက်နုတ်ဖော်ပြအပ်ပါသည်။

MYANMAR NOW။ ။ ၂၀၂၀ ရွေးကောက်ပွဲ ဝင်မယ့် အမတ်လောင်းတွေကို ပါတီက ဘယ်လိုစံနှုန်းတွေနဲ့ ရွေးချယ်သွားမလဲ။

ခွန်းဘီထူး။ ။၂၀၂၀ ရွေးကောက်ပွဲမှာတော့ အရည်အချင်းရှိတဲ့လူတွေပေါ့။ အရည်အချင်းလို့ ပြောတဲ့အခါမှာ ဥပဒေအကြောင်းအရာ ကိစ္စတွေကို နားလည်နိုင်ရမယ်။ လူမှုရေးကိစ္စတွေ၊ နိုင်ငံရေးကိစ္စရပ်တွေမှာ ကျကျနနနဲ့ အောင်အောင်မြင်မြင် ဆောင်ရွက်နိုင်တဲ့ လူမျိုးတွေဖြစ်ရမယ်။ လူထုကို နားလည်ပြီး လူထုအရေးကို တကယ် သတ်သတ်မှတ်မှတ် လုပ်ချင်တဲ့ လူတွေကို ရွေးချယ်သွားဖို့ ကျွန်တော်တို့ ပြင်ဆင်ထားပါတယ်။ လောလောဆယ်တော့ ကျွန်တော်တို့ ကိုယ်စားလှယ်လောင်းတွေ အားလုံးနီးပါးကို စိစစ်ထားပြီးသား အဆင်သင့်လည်းရှိပါတယ်။ ဒီကိုယ်စားလှယ်လောင်းတွေကနေပြီးတော့မှ ကျွန်တော်တို့ လူထုတွေ အကျိုးရှိနိုင်မယ့်ဟာတွေကို ကျွန်တော်တို့ ပြင်ထားတယ်။ ရွေးကောက်ပွဲမှာဝင်ပြိုင်မယ့် ကိုယ်စားလှယ်လောင်း အားလုံးနီးပါး အကောင်းဆုံးဖြစ်အောင် ပြင်ထားပြီးမှ ထက်ဝက်ကျော်လောက်ပေါ့၊ ခုနှစ်နေရာ လောက်ထိကို နိုင်ဖို့အတွက် ကျွန်တော်တို့ ရည်မှန်းထားပါတယ်။

MYANMAR NOW ။ ။ ကယန်းအမျိုးသားပါတီအနေနဲ့ မဲဆန္ဒနယ် ဘယ်နှစ်နေရာလောက် ဝင်ရောက် ယှဉ်ပြိုင်သွားမလဲ။

ခွန်းဘီထူး။ ။ကျွန်တော်တို့ ကယန်းအမျိုးသားပါတီကတော့ ကယန်းတွေ အနေအများဆုံးနေရာတွေမှာ ကယန်းလူထုကို ကိုယ်စားပြုနိုင်ဖို့အတွက်ကို မဲဆန္ဒနယ်တွေ ရွေးလိုက်တယ်။ ကျန်တဲ့နေရာတွေ အားလုံးကတော့ ကယားပြည်နယ် ဒီမိုကရက်တစ်ပါတီနဲ့ မဟာမိတ်လုပ်ဖို့ ကျွန်တော်တို့ ဆုံးဖြတ်ထားပြီးသားဖြစ်တယ်။ ကျွန်တော်တို့ ကယန်းလူထုတွေအားလုံးကလည်း ကယားပြည်နယ်ဒီမိုကရက်တစ်ပါတီကို မဲဝိုင်းပေးရမယ့် အနေအထားမျိုးဖြစ်ပါတယ်။ ကျွန်တော်တို့နှစ်ပါတီကတော့ မူဝါဒပိုင်းဆိုင်ရာအရ ဒေသကို ဦးစားပေးတဲ့ ပါတီတွေဖြစ်တဲ့အတွက် အနီးစပ်ဆုံး မဟာမိတ်တွေအဖြစ်နဲ့ ရပ်တည်ကြမယ်။

MYANMAR NOW။ ။ ဘယ်ပါတီတွေက အဓိကပြိုင်ဘက် ပါတီတွေ ဖြစ်လာနိုင်သလဲ။

ခွန်းဘီထူး။ ။ဒီရွေးကောက်ပွဲမှာတော့ NLD နဲ့ ကြံ့ခိုင်ရေးနှစ်ပါတီကို ကျွန်တော်တို့ အဓိကယှဉ်ပြိုင်ရမယ့် အနေအထားမျိုးဖြစ်ပြီးမှ NLD ကတော့ လောလောဆယ် အနိုင်ရတဲ့ပါတီဖြစ်တဲ့အတွက် သူ့ကို အများဆုံးယှဉ်ပြိုင်ရမယ့် အနေအထားမျိုးဖြစ်တယ်။ ကျွန်တော်တို့ NLD နဲ့ နိုင်ငံရေးအရ နီးစပ်တာတွေ အများကြီးရှိပါတယ်။ နိုင်ငံပြောင်းလဲမှုအတွက် ကျွန်တော်တို့ အုပ်စုနှစ်ခုပေါ့ ယှဉ်တွဲပြီး လုပ်နိုင်မယ့်ဟာတွေလည်း ရှိကောင်းရှိပါလိမ့်မယ်။ ဒါပေမဲ့ လက်ရှိအခြေအနေအထိ NLDအနေနဲ့ တိုင်းရင်းသားတွေအပေါ်မှာ နားလည်မှုသော်လည်းကောင်း၊ အပေးအယူသော်လည်းကောင်း လုံးဝမရှိတဲ့အတွက် ကျွန်တော်တို့က ၂၀၂၀မှာလည်း NLD ကို မဖြစ်မနေပြိုင်ရမှာဖြစ်တယ်။ ဒေသခံလူထုတွေအနေနဲ့က ကိုယ့်ရဲ့ဒေသအရေး၊ ကိုယ့်ရဲ့အမျိုးသားရေးကို ကိုယ်တကယ်အားပေးမယ်။ ကိုယ်တကယ်လုပ်ဆောင်မယ်ဆိုရင်တော့ ဒေသခံပါတီနဲ့ပဲ သွားရမယ့် အနေအထားမျိုးဖြစ်တာကြောင့် ကျွန်တော်တို့က NLDနဲ့ကို ပြိုင်ရမယ့် အနေအထားမျိုးဖြစ်တယ်။

ဒီကြားထဲမှာ ကြံ့ခိုင်ရေးပါတီရှိတယ်။ ကြံ့ခိုင်ရေးပါတီကတော့ တပ်နဲ့နှီးနွယ်ပြီးတော့မှ ကျွန်တော်တို့ရဲ့ အသွင်ကူးပြောင်းရေးမှာလည်း လမ်းစဉ်မတူညီတဲ့ အနေအထားမျိုးတွေရှိတဲ့အတွက်ကြောင့် ကြံ့ခိုင်ရေးပါတီနဲ့လည်း အရင်တုန်းကလည်း ပြိုင်ခဲ့တယ်။ ပြိုင်ဘက်ပါတီအနေနဲ့လည်းဖြစ်တဲ့အတွက် ကြံ့ခိုင်ရေးပါတီကို ဆက်ပြီးတော့ ယှဉ်ပြိုင်ရမယ့် အနေအထားမျိုးဖြစ်ပါတယ်။

MYANMAR NOW။ ။ ကယန်းအမျိုးသားပါတီနဲ့ကယားဒီမိုကရက်တစ်ပါတီ နှစ်ပါတီပေါင်းပြီး မဲဆန္ဒနယ် ဘယ်နှစ်ခုလောက် စိုးမိုးနိုင်မယ်လို့ မျှော်လင့်ထားသလဲ။

ခွန်းဘီထူး။ ။ကယားပြည်နယ်မှာ စုစုပေါင်း (မဲဆန္ဒနယ်) ၃၄ နေရာရှိတယ်။ ၃၅ နေရာလည်း ဖြစ်နိုင်တယ်ပေါ့။ ကယန်းအမျိုးသားလူဦးရေက ၀ ဒသမ ၁ ရာခိုင်နှုန်းထက်ကျော်တယ်ပေါ့။ ကျွန်တော်တို့လူဦးရေက ၆၉,၀၀၀ လောက်ရှိတဲ့အတွက် (တိုင်းရင်းသား)ရေးရာဝန်ကြီး တစ်နေရာလည်း ရနိုင်တဲ့အတွက်ကြောင့် စုစုပေါင်း ၃၅ နေရာလည်း ဖြစ်နိုင်တယ်ပေါ့။ ၃၅ နေရာလောက်ရှိမယ်ဆိုရင် ကျွန်တော်တို့ ကယန်းအမျိုးသားပါတီကနေပြီးတော့ ၄ နေရာကနေ ၅ နေရာလောက် ဝင်ပြိုင်ပြီးတော့ ကျန်တဲ့ဟာတွေကတော့ ကယားဒီမိုကရက်တစ်ပါတီ ကိုယ်စားပြုပြီးတော့ ကယားလူထုကိုယ်စားလှယ်တွေ ဝင်ပြိုင်ကြမှာပေါ့။ ၃၄ နေရာထဲမှာ ကျွန်တော်တို့ နှစ်ပါတီကတော့ ၂၀၂၀ မှာ ထက်ဝက်ကျော် နိုင်ဖို့ ရည်မှန်းထားတယ်။ အထူးသဖြင့်တော့ ပြည်နယ်လွှတ်တော်မှာ ကျွန်တော်တို့ အားလုံးကို ထိန်းချုပ်နိုင်ဖို့ မျှော်လင့်ထားတယ်။ ကျွန်တော်တို့ကတော့ ကြံ့ခိုင်ရေးပါတီနဲ့ကတော့ အနီးစပ်ဆုံးဖြစ်စရာ အကြောင်းမရှိပါဘူး။ ကြံ့ခိုင်ရေးပါတီနဲ့က တော်တော်လေး ပြိုင်ရမယ့် အနေအထားမျိုးဖြစ်ပြီးမှ နောက်ပိုင်း NLD ပါတီနဲ့လည်း ဒီလိုပဲ ပြိုင်ရမယ်ပေါ့နော်။ ကျွန်တော်တို့ မဟာမိတ်လဲ မရှိတော့ဘူး။ အဲဒါကြောင့် ကျွန်တော်တို့ NLD ပါတီနဲ့လည်း ပြိုင်ကိုပြိုင်ရမယ့် အနေအထားမျိုး ဖြစ်တယ်ပေါ့နော်။

MYANMAR NOW။ ။ ပါတီနှစ်ခုပေါင်းပြီး အစိုးရဖွဲ့ဖို့ထိများ မျှော်လင့်ထားသလား။

ခွန်းဘီထူး။ ။ ကျွန်တော်တို့ နှစ်ပါတီပေါင်းပြီးတော့ ဝန်ကြီးချုပ်နေရာထက် (ကယားပြည်နယ်) လွှတ်တော်ကို လွှမ်းမိုးနိုင်ဖို့ကို ပိုရည်မှန်းထားတယ်။ကျွန်တော်တို့ အဓိကရည်မှန်းတာကတော့ အနာဂတ်မှာ ဖက်ဒရယ်ပြည်ထောင်စုတစ်ခု ဖြစ်ဖို့ပါ။ ၂၀၀၈ ဖွဲ့စည်းပုံ အခြေခံဥပဒေအောက်ကနေ ဝန်ကြီးချုပ်ခန့်ပိုင်ခွင့်တွေ၊ ဝန်ကြီးချုပ်ခန့်နိုင်ရေးတွေက ကျွန်တော်တို့လက်ထဲမှာ မရှိတဲ့အတွက် ဒီအပေါ်မှာ ကျွန်တော်တို့ သံသယရှိတယ်။ ရည်မှန်းချက်လည်း မထားဘူး။ ဒါပေမဲ့ လွှတ်တော်ကို လွှမ်းမိုးနိုင်ရင်တော့ ပြည်နယ်အစိုးရကို လွှမ်းမိုးနိုင်တဲ့ အနေအထားမျိုးဖြစ်တဲ့အတွက်ကြောင့် ကျွန်တော်တို့ အဲဒီအပေါ်မှာ အဓိကအားထားပြီးမှ ဝင်ပြိုင်မယ့် အနေအထားမျိုးဖြစ်ပါတယ်။

MYANMAR NOW။ ။ ကယားပြည်နယ်မှာ ကယန်းလူမျိုးတွေအတွက် တိုင်းရင်းသားရေးရာ ဝန်ကြီးနေရာ မရနိုင်ဘူးလား။

ခွန်းဘီထူး။ ။ကယားပြည်နယ်မှာ ကယန်းလေးမျိုးလို့တော့ ခွဲထုတ်လိုက်တာပေါ့။ တကယ်ကတော့ ကယန်းလူမျိုးဆိုတာ တကယ်တန်းဆိုရင်တော့ တစ်မျိုးထဲရှိတယ်ပေါ့။ လဝကရဲ့ စာရင်းအရဆိုရင်တော့ ကျွန်တော်တို့က ၇၀,၀၀၀ ကျော်ရှိတယ်။အဲဒီ ခုနှစ်သောင်းကျော်ထဲမှာ ဇယိန်းတို့ ယင်းဘော်တို့ဆိုပြီး ကျန်တော်တို့ကို ခွဲခြားသတ်မှတ်လိုက်တယ်။ သို့သော် ကျွန်တော်တို့ ကယန်းလူမျိုးလို့ပဲ သတ်မှတ်လိုက်တဲ့ စုစုပေါင်းက ၆၉,၀၀၀ ကျော်ရှိတယ်။ ဖွဲ့စည်းပုံအခြေခံဥပဒေအရ ကျွန်တော်တို့က မြန်မာနိုင်ငံလူဦးရေ ၅၆ သန်းရဲ့ ၀ဒသမ ၁ ရာခိုင်နှုန်းထက်ကျော်တယ်ဆိုတော့ ကျွန်တော်တို့က ကယားပြည်နယ်မှာ (တိုင်းရင်းသား) ရေးရာဝန်ကြီး တစ်နေရာစာရဖို့က သေချာတယ်ပေါ့နော်။ ရွေးကောက်ပွဲကော်မရှင်ကိုလည်း မေးမြန်းထားတယ်။ ရွေးကောက်ပွဲကော်မရှင်က အဲဒီဟာနဲ့ ပတ်သတ်ပြီးမှ ထုတ်ပြန်ထားတာ မရှိသေးဘူး။ ပေးမယ်။ မပေးဘူးဆိုတာလည်း ပြောတာမရှိဘူးပေါ့နော်။ ကျွန်တော်တို့က အဲဒီအပေါ်မှာလည်း မျှော်လင့်ထားတယ်။ ဒီပြည်နယ်မှာ ကယန်းလူမျိုးစုတစ်စုရဲ့ (တိုင်းရင်းသား) ရေးရာဝန်ကြီး အရေးကြီးတယ်လို့ ကျွန်တော်တို့ လူထုတွေအားလုံးက ခံယူတယ်။ကျွန်တော်တို့ပါတီကလည်း အဲလိုခံယူတယ်။ ကိုယ့်လူထုကိုယ် ကိုယ်စားပြုနိုင်ဖို့အတွက်လည်း မျှော်လင့်ထားတဲ့ နေရာတစ်ခုဖြစ်ပါတယ်။