ပန်ဒိုရာ - မိုးနှောင်းသံထင် နားဆင်ခြင်း
မိုးနှောင်းသံထင် နားဆင်ခြင်း
ပန်ဒိုရာ
(မိုးမခ) ဩဂုတ် ၂၇၊ ၂၀၂၂
ရှည်ရှည်လျားလျား နင့်နင့်နဲနဲ မြန်မာဝတ္ထုရှည်တအုပ်ကို စိတ်နှစ်ပြီးမဖတ်ဖြစ်တာ ဝရုန်း သုန်းကားကာလများ စတင်ကတည်းက ဆိုပါတော့။
ဆရာမဒေါ်ခင်မြဇင်ကတော့ စာအုပ်ထွက်ထွက်ချင်း လက်ဆောင်ပေးခဲ့ပါတယ်။ ဒါပေမဲ့ ဆရာမရဲ့ အမာခံပရိတ်သတ် မေမေ့လက်ထဲကို အရင်ထည့်ဖြစ်တော့ ကိုယ့်ဆီကို အခုမှ ပြန်ရောက်လာခဲ့တယ်။
စာအုပ်စစချင်းမှာ ပုဂံခေတ် အသုံးအနှုန်းတွေကို ရင်းနှီးကျွမ်းဝင်အောင် ဖြည်းဖြည်းချင်း ဖတ်ရတယ်။ စန္ဒာမဂ္ဂဇင်းမှာ ဖတ်ခဲ့ရတဲ့ နန္ဒသူရဲ့ ဝတ္ထုတွေကို ပြန်သတိရမိတယ်။ စာမျက်နှာ ၅၀ လောက်ကျော်သွားတဲ့အခါ page turner လို့ခေါ်တဲ့ တစ်မျက်နှာပြီး တစ်မျက်နှာလှန်ကာ အစအဆုံး တစ်ထိုင်တည်းပြီးအောင် အမြန်ဖတ်ချင်စိတ်ကို ဖြစ်စေတဲ့ စာအုပ်အဖြစ် ဆွဲဆောင်မှုပိုရှိလာတယ်။
စာရေးသူက ဇာတ်ကောင်တွေရဲ့စရိုက်ကို ဒိုင်ယာလော့ဂ်တွေထဲမှာ ဒါမှမဟုတ် သရုပ်ဖော်စကားလုံးတွေထဲမှာ ကြွတက်အောင် ပုံဖော်ပြတာထက် ဇာတ်ကြောင်းထဲမှာ ညွှန်းဆိုပြောပြတဲ့ဘက်ကို ပိုအလေးပေးဟန်တူတယ်။ သမိုင်းကနေ လှုံ့ဆော်မှုရပြီး ဝတ္ထုအဖြစ်ဖန်တီးတဲ့အခါ စာရေးသူတွေဟာ စိန်ခေါ်မှုနဲ့ ကြုံရမှာပါ။ လူတိုင်းနီးပါး ကြားဖူးနားဝရှိနေနိုင်တဲ့ သမိုင်းပုံပြင်တွေရယ်၊ မိမိကိုယ်တိုင် ဖြည့်စွက်ဖန်တီးလိုက်တဲ့ ဇာတ်ကောင်တွေနဲ့ ဇာတ်ကွက်တွေရယ် ကို သေသေသပ်သပ် ဆက်စပ်ချုပ်သီပြနိုင်တာကတော့ စာရေးဆရာရဲ့ အတွေ့အကြုံနဲ့ ဖန်တီးမှုအရည်အချင်းပါပဲ။
စာရေးသူကို အမျိုးသမီးတဦးအဖြစ် ရှုမြင်ခံစားဖတ်ရှုတဲ့အခါ အမျိုးသမီးတို့ဘက်က စာနာမှုကို အထင်အရှားမြင်နိုင်သလို၊ လူ့စရိုက်တွေနဲ့ ဖြစ်လေ့ဖြစ်ထရှိတဲ့ သဘာဝတွေကိုဖတ်ရတဲ့အခါ စာရေးသူရဲ့ ကျားမဖြစ်တည်မှုကို ထည့်တွက်စရာမလိုအောင် ဘက်လိုက်မှုကင်းပြီး ရင့်ကျက်တဲ့ အရေးအသားတွေကိုလည်း တွေ့ရတယ်။
ပုဂံခေတ်အသုံးအနှုန်းတွေကို စာထဲမှာ မြင်မြင်နေရတဲ့အတွက် စိတ်ဝင်တစား အမြန်သိလိုနေတဲ့ စိတ်ထဲမှာ တခါတလေ အတားအဆီးဖြစ်စေတော့ မကျေနပ်သလိုလို ဖြစ်မိပြီး တွေးမိပါတယ်။ ဒီဘက်ခေတ် သာမန်အသုံးနဲ့ပဲ (personification ဆိုမလား၊ သမာဓိဂုဏ် ဆိုမလား၊ အဲဒီသဘောဆန်ဆန် ယုတ္တိကို ဆန့်ကျင်တင်စားပြီး) ချောမောအောင်ရေးမယ်ဆိုရင် ဒိုင်ယာလော့ဂ်တွေလည်း ခုထက်လွတ်လပ်ပြီး ရသတွေဟာ ယခုထက်တောင် ပိုမို တောက်ပြောင်လာဦးမလားပေါ့။ ကတ်ကတ်သတ်သတ်ပြောမယ်ဆိုရင် အခုသုံးထားတဲ့ ပုဂံခေတ်ဝေါ ဟာရတွေကလည်း အပြည့်အဝတော့ မဖြစ်နိုင်ပါဘူး။ စကားပြောတွေမှာရော ဇာတ်ကြောင်းပြောတွေမှာရော အပြည့်အဝ အတိအကျသုံးလိုက်ရင်လည်း ဒီဝတ္ထုကို ကျောက်စာဖတ်သလို ဖတ်နေကြရမှာပေါ့။
သို့သော် Every utterance is different . ဆိုတဲ့သဘောကလည်း ဘာသာဗေဒမှာ ရှိလေတော့ ဝါကျတကြောင်းချင်း တစ်လုံးမကျန်တူနေတာတောင် ပထမ ရေရွတ်လိုက်တဲ့ ဝါကျနဲ့ ဒုတိယ ထပ်မံရေရွတ်လိုက်တဲ့ ဝါကျတို့တောင်မှ သက်ရောက်ပုံ ကွဲပြားနိုင်တယ် ဆိုတဲ့အခါ ၊ စာရေးသူရဲ့ ရည်ရွယ်ချက်နဲ့ တကူးတကရွေးချယ်ခဲ့တဲ့ ပုဂံခေတ်အသုံးအနှုန်း တစ်လုံးချင်းတိုင်းဟာ စာဖတ်သူကို မတူကွဲပြားတဲ့ ၊ စာရေးသူဖြစ်စေချင်တဲ့ ထူးခြားသက်ရောက်မှုကို ပေးမှာပါပဲလို့ ပြန်တွေးဖြစ်ပါတယ် ။ ဒါသည်သာလျှင် အနုပညာရဲ့ မှော်ဆန်တဲ့ သဘော တရားလို့ပဲ မှတ်ယူရမှာပါ။
မျက်နှာဖုံးနဲ့ပတ်သက်လို့ အားမရကြောင်းတွေ ကြားရတယ်။ အနုပညာဘက်က ကြည့်ရင် ဆိတ်ငြိမ်တဲ့ အညိုရောင်နောက်ခံမှာ သိမ်မွေ့လှပတဲ့ ပန်းချီတစ်ကားပါပဲ။ commercial ရှုထောင့်က ကြည့်ရင်တော့ ဖတ်ချင်စရာ ဝယ်ချင်စရာ ဆွဲဆောင်မှု ပိုအားကောင်းတဲ့ မျက်နှာဖုံးမျိုးကို ဒုတိယအကြိမ်ထုတ်ဝေတဲ့အခါ ဆရာမ စဥ်းစားနိုင်မှာပါ။
အချုပ်အားဖြင့် ပြောရရင်တော့ ဒီဇာတ်လမ်းဟာ ပုဂံခေတ်က အသုံးမကျတဲ့ ဘုရင်တဦးကြောင့် တိုင်းပြည်ပျက်ရတဲ့အကြောင်းပါပဲ။ မယုံနိုင်စရာတော့ မဟုတ်ပါဘူးနော်။ တဦးတည်းသဘော ထင်ရာမြင်ရာ အုပ်ချုပ်တာကို ထိန်းညှိမှုမရှိနိုင်ဘဲ ပြည်သူ့ဆန္ဒမပါတဲ့ စနစ်ဆိုးက အဓိကပါပဲ။ အဲဒီစနစ်အောက်မှာ ဘုရင်က စိတ်ရူးထရင် ထသလို အမိန့်ချတဲ့အခါ အားလုံး ဒုက္ခရောက်ကြရတာပဲ။ အဲဒီလို အမှောင်ခေတ် မီးတောက်တွေထဲ ဖူးပွင့်နွမ်းကြွေခဲ့ရတဲ့ ချစ်ခြင်းမေတ္တာတွေကတော့ သမိုင်းတစ်ပတ်လည်နေသရွေ့ ရှိနေဦးမှာပါ။
ဒီစာအုပ်ဖြစ်မြောက်လာဖို့ စာပေနဲ့ပဲ ပရော်ဖက်ရှင်နယ်အသက်မွေးဝမ်းကျောင်းလုပ်သူ စာရေး ဆရာမက နှစ်နဲ့ချီအချိန်ယူပြီး သုသေတနလုပ်ကာ စေတနာအားကြီးစွာ အသေအချာ အား ထုတ်ခဲ့တယ်။ ဝယ်ဖတ်သင့်ကြောင်း တိုက်တွန်းပါရစေ။
စာအုပ်အမည် ။ ။ မိုးနှောင်းသံထင်အခါ
စာရေးသူ။ ။ ခင်မြဇင်
ဆုပြည့်စုံထွန်းစာပေ မှ ထုတ်ဝေ
ရွှေသစ္စာဦးစာပေမှ ဖြန့်ချိ
ပထမအကြိမ် ဇွန်လ ၂၀၂၂
တန်ဖိုး။ ။ ၈၀၀၀ ကျပ်
(City Mart တွေမှာလည်း တွေ့ရပါတယ်)
-
t.me@moemaka
#MoeMaKaMedia
#WhatsHappeningInMyanmar